Aajentiina

Aajentiina, ofishali niem di Aajentiin Ripoblik, a di sekan bigis konchri ina Sout Amoerka, an a wah fedarieshan a 23 pravins an wah aatanamos siti, Buenos Airiz. Aajentiina a di iet-bigis konchri ina di wol bai lan ieria ah di bigis outa aal a di konchridem we ab Panish az ofishal languij, alduo Mexiko, Kolombia ah Spien ab muo piipl.

Antiiga ah Baabyuuda

Antiiga ah Baabyuuda (Panish fi "ienshent" ah "bied-op") a wah ailan nieshan we de pan di iistan baadalain a di Kiaribiyan Sii wid di Atlantik Uoshan. Az di niem paint out, ikansis a tuu mieja ailan - Antiiga ah Baabyuuda - ah soh wuoliip a likl ailet tu. Di wuola dem de kluos tu deh wananeda ina di migl a di Liiwad Ailanz, ah de bout 17 digrii naat a di ikwieta.

Aschrielia

Di Kamanwelt a Aschrielia a wahn konchri ina di Sodorn Emisfier we mek op a di Aschrielian kantinent, di ailan niem Tazmienia, an nof ada likla ailan ina di Indian an Pasifik Uoshan. Di papyulieshan a 24 milian.

Baabiedoz

Baabiedoz de iis a di Kiaribiyan Sii, an a wah indipendant kantinental ailan nieshan ina di Westan Atlantik Uoshan. Ide bout 13° naat a di ikwieta ah 59° wes a di praim meridian; istil kansida paat a di Lesa Antiliiz. Di ailandem we kluosis tui a Sin Vinsn ah di Grenidiinz, ah Sin Luusha tu di wes. Chrinidad ah Tubiego de tu di sout, ah nou ab set maritaim baada wid Baadiedoz. Di tuotal lan ieria a bout 430 skwier kilamita (166 skwier mail). Baabiedoz lan muosli flat, wid soh fyuu aya ieria ina di migl a di konchri. Di ayis paint a Mount Ilabi ina Sint Anju Parish.

Brazil

Brazil (Puotigiis: Brasil), a di laajis konchri ina Sout Amoerka ah a di onggl nieshan we chat Puotigiis ina di Amoerkaz. Brazil a wah fedarieshan wid tuenti-six stiet, wah fedaral dischrik ah myuunisipalitidem. Brazilia a di kiapital fi Brazil.

Chrinidad ah Tubiego

Di Ripoblik a Chrinidad ah Tubiego a wah aachipelajik stiet ina di sodan Kiaribiyan, naatiis a di Sout Amoerkan stiet a Venizuela ah sout a Grinieda ina di Lesa Antiliiz. Azwel ishier maritaim bongjri wid Baabiedoz tu di naatiis ah Gayana tu di soutiis. Di konchri kova wah ieria a 5,128 skwier kilamita (1,979 sk ml) ah kansis a tuu mien ailan, Chrinidad ah Tubiego, ah nof sumaal lanfaam. Chrinidad a di laaja ah muo papilos ah a di mien ailan; Tubiego moch sumaala, kompraiz bout 6% a di tuotal ieria ah 4% a di papilieshan. Di nieshan de houtsaida di orikien belt.

Daminiika

Daminiika, ofishali Di Kamanwelt a Daminiika, a wah ailan nieshan ina di Kiaribiyan Sii. Ina Italian, di niem miin "Sonde", we a weh di die wen Kristifa Kolombos sait di ailan. Di bifuo-Kolombos niem a di ailan wena "Wai'tu kubuli", we miin "Ar badi taal". Di indijinos piipl pah di ailan, di Ailan Kiarib, lib ina terichri komiin laka di Indian risoerv ina Naat Amoerka. Di ofishal languij a Ingglish, bot piipl, espeshali di uola fuok dem, taak wah French Kryuol, ah som taak Ailan Kiarib.

Daminikan Ripoblik

Di Daminikan Ripoblik a savrin nieshan pah di ailan niem Ispanyuola, paat a di Grieta Antiliiz aachipelago ina di Kiaribiyan Riijan. Di westan tod a di ailan akiupai bai Ieti - dis mek Ispanyuola wan outa tuu Kiaribiyan ailan we akiupai bai tuu konchri, Sin Maatn a di eda wan.

Filipiinz

Di Ripoblik a di Filipiinz a wahn konchri ina Soutiis Iezha. Di Filippinz av bout 105 milian piipl, an dat miin se pan di lis a konchri wid di muos piipl i kom twelft.

Frans

Frans (ofishali di French Ripoblik) a wah konchri ina westan Yuurop. Ibaada Beljiom, Logzimboerg, Joermani, Suitsalan, Itali, Spien, ah Anduora. Ikiapital a Paris, ah di ofishal languij a French.

Griis

Griis, (Ingglish: Greece; Griik: Ελλάδα), ofishali di Elenik Ripoblik (Ελληνική Δημοκρατία), a wah konchri ina sodan Yuurop, sitiet pah di sodan hen a di Baalkan Peninsiula. Iab baada wid Albienia, di Ripoblik a Masiduonia ah Bulgieria tu di naat, ah Toerki tu di iis. Di Ijiyan Sii de tu di iis ah sout a mienlan Griis, wails di Ayuonian Sii de tu di wes. Buot paat a di Iistan Meditarienian biesn fiicha wuoliip a ailan, ailit ah rak ailan. Atenz a di kiapital fi Griis.

Grinieda

Grinieda a wah ailan nieshan we hingkluud di sodan paat a di Grenidiinz ina di soutiis Kiaribiyan Sii. Grinieda de tu di naat a Chrinidad ah Tubiego ah Venizuela, ah sout a Sin Vinsn ah di Grenidiinz. Di nashinal bod a di Grinieda Dov, uufa spiishiz aamuos dedout so ide pah di lis a indienja spiishiz.

Ieti

Ieti, ofishali di Ripoblik a Ieti, a wah Afro-French Kryuol ah French-taakin Kiaribiyan konchri. Wid di Daminikan Ripoblik, iakiupai di ailan a Ispanyuola, ina di Grieta Antiliiz Aakipelago. Ayiti ("Ai-op lan") a weh di hindijinos Taino niem fi di ailan. Di ayis paint ina di konchri a Pik la Sele, 2,680 miita ai (8,793 fut). Di tuotal ieria a Ieti a 27,750 skwier kilamita (10,714 sk ml) ah di kiapital niem Puot-o-Prins.

Itali

Itali (Italian Ripoblik, Italian: Repubblica Italiana) a wah nieshan we de pan di Italian peninsiula ina Sout Yuurop ah di tuu laajis ailan ina di Meditarienian Sii, Sisili ah Saadinia. Itali ab wah Alpain baada wi Frans, Suitsalan, Aschria, ah Sloviinia. San Mariino ah di Vatikan Siti de ina Itali, ah Kampioni d'Itali (Italian: Campione d'Italia) de ina Suitsalan.

Jumieka

Jumieka (vierieshan Jamieka ah Jomieka askaadn tu spiich rejista ar axent) a wah ailan nieshan we a paat a di Grieta hAntiliiz, bout 234 kilamiita (145 mail) lang ah bout 80 kilamiita (50 mail) waid. Ide ina di Kiaribiyan Sii, bout 145 kilamiita (90 mail) sout a Kyuuba, ah 190 kilamiita (120 mail) wes a di ailan we niem Ispanyuola, we mekop frah Ieti ah di Daminikan Ripoblik.

Kyuuba

Di Ripoblik a Kyuuba (IPA: /ˈkjuːbə/, Panish: Cuba), kansis a di ailan a Kyuuba (di laajis ah sekan-muos papilos ailan a di Grieta hAntiliiz), Isla de la Huventud ah sebral ajiesent sumaal ailan. Kyuuba lokiet ina di nadan Kiaribiyan a di kanfluens a di Kiaribiyan Sii, di Golf a Mexico ah di hAtlantik Uoshan. Kyuuba de sout a di hiistan Yunaitid Stiet ah di Ba'aamaz, wes a di Toerx ah Kiekos Ailanz ah Ieti, ah hiis a Mexiko. Di Kieman Ailanz ah Jumieka de tu di sout. Di nashinal flowaz a di flor de mariposa (botaflai flowaz) ah di nashinal bud a di Tokororo ar Kyuuban Chrogon.

Sin Kits ah Niivis

Di Fedarieshan a Sin Kits ah Niivis, a wan a di Liiwad Ailanz dem, an a wah fedaral tuu-ailan nieshan ina di Wes Indiz. Sin Kits ah Niivis a di sumaalis konchri ina di Amoerkaz, ina ieria ah papilieshan. Di kiapital siti ah di gobament edkwaataz de pah di biga ailan we niem Sin Kristifa, ar Sin Kits fi shaat. Di sumaala ailan, Niivis, de bout 2 mail (3km) soutiis a Sin Kits, kraas wah shalo chanil niem Di Naroz.

Sin Luusha

Sin Luusha a wah ailan nieshan ina di iistan Kiaribiyan Sii pan di baada wid di Atlantik Uoshan. Ia paat a di Lesa Antiliiz, ah ide tu di naat a Sin Vinsn ah di Grenidiinz, naatwes a Baabiedoz ah sout a Maatiniik. Sin Luusha ab di nikniem "Elen a di Wes Indiz" chuu ou iswich bitwix French ah British ruulaship ina di koluonial piiriad.

Sin Vinsn ah di Grenidiinz

Sin Vinsn ah di Grenidiinz a wah ailan nieshan ina di Lesa Antiliiz we de ina di Kiaribiyan Sii. Di 389 skwier kilamita lan terichri kansis a di mien ailan we niem Sin Vinsn, ah di nadan tuu-tod a di Grenidiinz. Di French ah di British weh ruul di konchri wan taim, an i nou bilang tu di Kamanwelt a Nieshan ah KIARIKOM az wah indipendant nieshan.

Riid ina nex languij