სახენწჷფო

სახენწჷფო, გჷშაკერძაფილი წესით მონწყილი პოლიტიკური ორგანიზაცია ეკონომიკურო გოპატჷნაფილი კლასიშ ედომუშამი ქიანაშ თანჯეფს უმაღალაში ღარჯილნებაშ ოხორციელებერო.

თე ენწყჷმა არგამათ მარქსისტული რე, ნამუთ მუ რაგადი ოკო, წაჸონაფა რე სახენწჷფოშ, მუჭოთ პოლიტიკურ-ჯარალუობურ მოლინაშ ესახუაშ. ალაზიმაფათ ალმახანური სამართალობურ დო პოლიტიკური სახენწჷფოშ ცნება შორსი რე მარქსისტული გაგებაშე.

სახენწჷფო რე ჯარალუობურ-პოლიტიკური ორგანიზაციაშ ფორმა, ნამუთ გჷშაკერძაფილი აპარატიშ დო ოჯარე ხეშუულობაშ მეშქაშალათ ახორციელენს მუში სუვერენული ნებაგოქუნალას, უნარღელჸოფირენც ქიანაშ ართოიანალას დო ედომუშამობას, ორსხუანს ჯარალუობური წეს-რიგის, სამართალს არზენს ოირკოჩე ოვალდვალირე შანულობას, ნამუთ რე მენოღალეეფიშ ნებეფიშ დო დუდიშალეფიშ, კანონიერობაშ დო მანგი წეს-რიგიშ გარანტი.

ციტატეფი

  • "სახენწჷფო რე ორგანიზაცია, ნამუსჷთ გარჩქჷ გორკვიაფილ ტერიტორიას ნძალაშ გჷმორინაფაშ ლეგიტიმური ნება." - მაქს ვებერი

ქოძირით თაშნეშე

  • სახენწჷფოშ თეორია
wikistub ათე სტატია მერკე რე.
თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათ.
ავსტრალია

ავსტრალია (ინგლ. Australia; ოფიციალურო ავსტრალიაშ რსხუ ინგლ. Commonwealth of Australia) — სახნწჷფო ავსტრალიაშ კონტინენტის. უშუალო ოსქირონე მეძობელი ვა ჸუნს, ზუღაშე ომძღჷ: ინდონეზია, ბჟაეიოლი ტიმორი დო პაპუა-ახალი გვინეა ოორუეჸურე, სოლომონიშ კოკეფი, ვანუატუ დო ახალი კალედონია ოორუე-ბჟაეიოლჸურე დო ახალი ზელანდია ობჟათე-ბჟაეიოლჸურე.

აზერბაიჯანი

აზერბაიჯანი (Azərbaycan Respublikası) — რე კავკაციაშ ართ-ართი ქიანა. მილარე ევროპას დო აზიას, კასპიაშ ზუღაშ პიჯის. მუშ ნანანოღა რე ბაქო. სახენწჷფო ნინა აზერბაიჯანს რე აზერბაიჯანული. აზერბაიჯანს თანჯა უღუ რუსეთიწკჷმა, საქორთუოწკჷმა, სომხეთიწკჷმა, თურქეთიწკჷმა დო ირანწკჷმა. აზერბაიჯანს რე ნახჭევანიშ ავტონომიური რესპუბლიკა.

აკანი

აკანი — ტერიტორიული ართური საქორთუოს დო რანწკ ქიანეფც. საქორთუოშ გალე, ოაკანე დორთუალა გარჩქჷ რუსეთიშ ფედერაციას, ჩეხეთის დო სლოვაკეთის.

ამერიკაშ აკოართაფილი შტატეფი

ამერიკაშ აკოართაფილი შტატეფი (ინგლისურო The United States of America, USA, თაშნეშე უძახჷნა აკოართაფილ შტატეფს, ააშ-ს, შტატეფს დო ამერიკას) — ფედერალური სახენწჷფო, ნამუთ იკათუანს 50 შტატის დო ართ ფედერალურ ოლქის. ქიანაშ ტერიტორიაშ ჯინჯი ნორთი მილარე ოორუე ამერიკაშ ცენტრალურ ნორთის, კონტინენტის იდვალუაფუ 49 შტატი. აკოართაფილ შტატეფს ოორუეშე უხურგანს კანადა, ობჟათეშე — მექსიკა. ქიანა აშაძჷ ჟირ ოკიანე შქას. შტატი ალასკა იდვალუაფუ კონტინეტიშ უშორაშ ძგას, კანადაშ ბჟადალშე დო რუსეთიშ ბჟაეიოლშე. რუსეთწკჷმა მერსხუაფა შილებე ბერინგიშ საროტით. შტატი ჰავაი რე არქიპელაგი რჩქალი ოკიანეშ ცენტრალურ ნორთის. თაშნეშე ქიანას ორხველჷ ტერიტორიეფი კარიბიშ ზუღას დო რჩქალ ოკიანეს.

ქიანაშ ფართობი აკმადგინანს 9.83 მილიონ კვადრატულ კილომეტრის. ქიანას ოხორანს 309 მილიონი კოჩი. აკოართაფილი შტატეფი ფართობიშ დო მახორობაშ სიდიდაშ მეჯინათ მოსოფელშ ვით არძაშე უდიდაშ სახენწჷფოშა მიშმურს. ამერიკა რე მოსოფელს ართ-ართი არძაშე ეთნიკურო ანდაფეუანი დო მულტიკულტურული ქიანა, თაქ ბრელი იმიგრანტი ოხორანს. ააშ-ს ეკონომიკური მაძირაფალეფით მოსოფელს მაართა აბანი უკინებუ.

ქიანაშ მონძე მახორობა აზიური ბადებაშ რე, ნამუეფქჷთ ვითოშალათ წანეფიშ წოხოლე გჷნიხორეს თაქი. აკოართაფილი შტატეფი გაჭყჷ ვითოსუმ ბრიტანულ კოლონიაქ. 1776 წანაშ 4 კვირკვეს მუნეფქ დუდი ზოხორინელო გეგჷმაცხადეს. თეს მაჸუნუ ლჷმაქ ზოხორინელობაშო ბრიტანეთიშ იმპერიაწკჷმა. 1787 წანაშ 17ეკენიას ქიმიღეს ამერიკაშ აკოართაფილი შტატეფიშ კონსტიტუცია.

მა-19 ოშწანურას ააშ-ქ ქიმკირსხუ ტერიტორიეფი: საფრანგეთიშე, ესპანეთიშე, გოართამაფილი ომაფეშე, მექსიკაშე, რუსეთიშე. აკოართაფილ შტატეფქ ტეხასიშ რესპუბლიკა დო ჰავაი ქიმკირსხუ ანექსიაშ რზათ. 1860 წანას ქიანას ქჷდიჭყჷ ომენოღალერ ლჷმაქ, ნამუსჷთ ართიანს ოლჷმუდეს ოორუეშ დო ობჟათეშ შტატეფი. საბოლოოთ გომორძგუაქ ოორუეშ შტატეფს ქჷდასქიდეს. ლჷმაშ თებაშ უკული თელ ქიანას დოლმახორობაქ (მონობაქ) გეუქვუ. თეშ უკული აკოართაფილ შტატეფქ ბიწორია ტემპეფით გევითარჷ. ქიანა ოკათუდჷ მუჭოთ მაართა, თეშ მაჟირა მოსოფელიშ ლჷმეფს. ააშ რე გოართოიანაფილი ერეფიშ ორგანიზაციაშ უშქურანჯალაშ სხუნუშ იროიანი მაკათური.

ბოლივია

ბოლივია, ოფიციალურო ბოლივიაშ მიარეერუანი სახენწჷფო (ესპ. Estado Plurinacional de Bolivia, კეჩ. Bulivya Mamallaqta, აიმარ. Wuliwya Suyu, გუარ. - Tetã Volívia) — მოსოფელიშ ოკიანეშა გჷშაულარიშ უღვენჯი სახენწჷფო ობჟათე ამერიკას. იდვალუაფუ კონტინენტიშ ცენტრალურ ნორთის.

ოორუეშე დო ოორუე-ბჟაეიოლშე ბოლივია უხურგანს ბრაზილიას, ობჟათე-ბჟადალშე - პარაგვაის, ობჟათეშე - არგენტინას,ობჟათე-ბჟადალშე დო ბჟადალშე - ჩილეს დო პერუს. მოსოფელიშ ოკიანეშა გჷშაულარიშ უღვენჯი სახენწჷფო, მარა 2010 წანას, პერუწკჷმა ხე მაჭარჷ აპიჯალას, 99 წანაშ ხანით, პერუშ წყარპიჯიშ ჭიჭე ნორთიშ არენდათ გინოჩამაშო ონოშეშ აკაგაფალო.

ევროპულ კოლონიზაციაშახ, ანდეფიშ თი რეგიონი, სოდგათ ამდღა ბოლივია იდვალუაფუ, წჷმარინუანდჷ კოლუმბიშახიანი ამერიკაშ არძაშე დიდი სახენწჷფოს - ინკეფიშ იმპერიაშ ნორთის. თე ტერიტორია XVI ოშწანურას ესპანეთიქ გეჭოფუ. ესპანური კოლონიალიზმიშ ფარანს, თე ტერიტორიას ჯოხოდჷ ჟიმოლენი პერუ დო მიშმეშჷ პერუშ ვიცე-ომაფეშა . ქიანაქ ზოხორინელობა ქჷმიღ 1825 წანაშ 6 მარაშინათუთას დო თის ობჟათე ამერიკაშ ზოხორინაშო მალჷმორი, სიმონ ბოლივარიშ პატიოჩამალო ბოლივიაქ ქჷგიადუ.

ამდღარშო, ბოლივია ოპრეზიდენტე, წჷმმარინაფალური დემოკრატიაშ რესპუბლიკა რე. ადმინისტრაციულო ირთუ 9 დეპარტამენტო.

გოართოიანაფილი ომაფე

დიდი ბრიტანეთიშ დო ოორუე ირლანდიაშ გოართოიანაფილი ომაფე (ვარა გოართოიანაფილი ომაფე, დიდი ბრიტანეთი) — სახენწჷფო ბჟადალ ევროპას, ბრიტანეთიშ კოკეფს. თის ართი ოსქირონე მეძობელი ჸუნს — ირლანდია. ოსქირონე თანჯეფიშ გალე, დიდი ბრიტანეთის მუკე-მუკე გოურე ატლანტიშ ოკიანე, ოორუეშ ზუღა, ლა-მანშიშ საროტი დო ირლანდიური ზუღა. ქიანა საფრანგეთის მიარცხუაფუ ევროტუნელით.

დანია

დანია (დან. Danmark), ოფიციალურო დანიაშ სამაფო (დან. Kongeriget Danmark) — სუვერენული სახენწჷფო ოორუე ევროპას, ნამუშ აკოდგინალუაშათ მიშმურს ჟირი დომინიონი — ფარერიშ კოკეფი ატლანტიშ ოკიანეს დო გრენლანდია ოორუე ამერიკას. დანია სკანდინავიურ ქიანეფს შქას არძაშე ობჟათეჸურე დვალირი სახენწჷფო რე. იდვალუაფუ შვედეთიშ დო ნორვეგიაშ ობჟათეჸურე დო აკა სახენწჷფო, ნამუწკჷმათ თის ოსქირონე თანჯა გაჩქჷნ, რე გერმანიაშ ფედერაციული რესპუბლიკა. ქიანაშ ტერიტორიაშ უდიდაში ნორთი იდვალუაფუ იუტლანდიაშ ჩქონს დო მიარე კოკის, ნამუეფ შქას ეიოღანკალი რე ზელანდია, ფიუნი, ლოლანი, ფალსტერი დო ბორნჰოლმი, თაშნეშე მიარე მორჩილი ზჷმაშ კოკი, ნამუეფიშ ართობულობა ქიმინჷნს დანიაშ არქიპელაგის.

ესპანეთი

ესპანეთი, ედომუშამი ოფიციალურო ჯოხოდვალა ესპანეთიშ ომაფე (ესპ Reino de España) - ქიანა ევროპაშ ობჟათე-ბჟადალუშე, პირენეიშ ჩქონს. ქიანას ოორუშე დო ოორუე-ბჟაეიოლშე უხურგანს საფრანგეთი დო ანდორა, ბჟადალშე - პორტუგალია. ესპანეთი კონსტიტუციური მონარქია რე, კანონდუმადვალუ ორგანო რე გენერალური კორტესეფი, ნამუთ აკმოდირთუ სენატშე (256 მაკათური) დო კონგრესშე (350 მაკათური). ქიანაშ მადუდე რე მაფა ხუან კარლოს I. ესპანეთიშ ომაფეშა მიშმურს 17 ავტონომიური რეგიონი დო ოორუე აფრიკაშ წყარპიჯეფს მადვალი ჟირი ავტონომიური ნოღა. ესპანეთი ინდუსტრიული-აგრარული ქიანა რე. ერუანული დღახუ რე ესპანარი ერიშ დღა, 12 გჷმათუთა, ქრისტეფორე კოლუმბიშე ამერიკაშ მეგორაფაშ დღა.

იაპონია

იაპონია (日本 ნიჰონ ვარა ნიპონ), ედომუშამი ოფიციალურ ჯოხოდვალა - იაპონიაშ სახენწჷფო (日本国ნიპონ-კოკუ ვარა ნიჰონ-კოკუ) — კოკი სახენწჷფო ბჟაეიოლ აზიას. ქიანა იდვალუაფუ რჩქალ ოკიანეს, იაპონიაშ ზუღაშ ბჟაეიოლშე. ქიანას უხურგანს ჩინეთიშ ოკათე რესპუბლიკას, ოორუე დო ობჟათე კორეას დო რუსეთის. იაპონიაშ ორიგინალური ჯოხოდვალა მარგალურშა გჷნოთანგუათ შანენს „ბჟაშ ოდაბადეს“ .

ინდოეთი

ინდოეთი (ჰინ. भारत, ინგლ. India), ედომუშამი ოფიციალური ჯოხოდვალა — ინდოეთიშ რესპუბლიკა - (ჰინ. भारत गणराज्य, ინგლ. Republic of India) — სახენწჷფო ობჟათე აზიას. ქიანაშ მახორობა — 1,22 მილიარდ ადამიერშე უმოსი (2010), ტერიტორია — 3 287 263 კმ², ჟირხოლო მუნაჩემეფით, ობჟათე აზიაშ უდიდაშ სახენწჷფოს წჷმმარინუანს. მოსოფელს მაჟირა აბანს იკენს მახორობაშ მუდანობათ დო მოსოფელს მაშკვითა რე ტერიტორიაშ მეჯინათ. ნანანოღა — ნიუ-დელი. სახენწჷფო ნინეფი — ჰინდი დო ინგლისური.

ფედერაციული, საპარლამენტო რესპუბლიკა. პრემიერ-მინისტრი — ნარენდრა მოდი, პრეზიდენტი — პრანაბ მუხერჯი. ქიანა ირთუ 29 შტატო დო 7 მორსხუე ტერიტორიათ.

ინდოეთის ბჟადალშე უხურგანს პაკისტანი, ოორუე-ბჟაეიოლშე - ჩინეთიშ ოკათე რესპუბლიკა, ნეპალი დო ბჰუტანი, ბჟაეიოლშე - ბანგლადეში დო მიანმარი. თეშ მოხ, ინდოეთის ოზუღე ხურგეფი უღუ ობჟათე-ბჟადალშე მალდივეფწკჷმა, ობჟათეშე - შრი-ლანკაწკჷმა დო ობჟათე-ბჟაეიოლშე - ინდონეზიაწკჷმა. შტატი ჯამუ დო ქაშმირს, ოდებელ ტერიტორიას, ხურგა უღჷ ავღანეთწკჷმა.

ირანი

ირანიშ ისლამური რესპუბლიკა (სპარს. جمهوری اسلامی ایران — ჯომჰური-იე ესლომი-ე, ირანი (სპარს. ایران [ʔiˈɾɒn]) ვარდა სპარსეთი) — სახენწჷფო აზიაშ ობჟათე-ბჟადალუშე. ნანანოღა-თეირანი.

სახენწჷფოშ მანჯღვერი: შურიელი ლიდერი - აიათოლა საიდ ალი ხამენეი (Ayatollah Ali Hoseini-KHAMENEI, 1989), პრეზიდენტი - მაჰმუდ აჰმადი ნეჯადი(Mahmoud Ahmadinejad, 2005).

კანონიშდუმადვალუ ორგანო: ართპალატამი პარლამენტი - მეჯლისი (270 მაკათური)

ისრაელი

ისრაელი (ურიულ. יִשְׂרָאֵל Yisra'el; არაბ. إِسْرَائِيل‎‎ Isrā'īl, ოფიციალურო ისრაელიშ სახენწჷფო) — ქიანა ობჟათე-ბჟადალ აზიას, სქირონაშქა ზუღაშ ბჟაეიოლ ძგას. ოორუეშე უხურგანს ლიბანი, ოორუე-ბჟაეიოლშე სირია, იორდანია ბჟაეიოლშე დო ეგვიპტე ობჟათე-ბჟადალშე. ფორჷნს გეოგრაფიულო მიარეფერუან რეგიონეფს დო მუშ ალაზიმაფათ მორჩილ ტერიტორიას. თაშნეშე უხურგანს ბჟადალი წყარპიჯი ბჟაეიოლშე დო ღაზაშ სექტორი ობჟათე-ბჟადალშე. 7,86 მილიონი მახორობათ, ნაუეფიშ უმეტაშობა ურია რე, ისრაელი მოსოფელს აკა ურიული სახენწჷფო რე. ისრაელი ოდაბადეთ იკოროცხუ შხვა ეთნიკურ ბუნეფშო ხოლო, თინეფ შქას უმიარაშობას არაბეფი დო მიარერიცხუანი რელიგიური ბუნეფი (მაჰმადიანეფი, ქრისტიანეფი, დრუზეფი, სამარიტალეფი დო შხვა) წჷმარინუანა.

იტალია

იტალია (იტალ. Italia), ოფიციალურო იტალიაშ რესპუბლიკა (იტალ. Repubblica italiana) — უნიტარული, საპარლამენტო რესპუბლიკა ობჟათე-ბჟადალ ევროპას. ოორუეჸურე, ალპეფიშ მანგის ომძღჷ საფრანგეთი, შვეიცარია, ავსტრია დო სლოვენია. ობჟათეჸურე თინა ედომუშამო ფორჷნს აპენინიშ ჩქონს, სქირონაშქა ზუღაშ ჟირ უდიდაშ კოკის — სიცილიას დო სარდინიას, თაშნეშე შხვა მიარე ჭიჭე კოკის. იტალიაშ თანჯეფს იდვალუაფუ ჟირი ანკლავი, ზოხორინელი სახენწჷფოეფი სან-მარინო დო ვატიკანი. თე ბორჯის იტალიას შვეიცარიაშ ტერიტორიას უღჷ ექსკლავი კამპიონე-დ'იტალია. იტალიაშ ტერიტორია ფორჷნს 301 338 კმ²-ს დო ახასიათენს ზომიერი ორტყაფუშ კლიმატი. 60,6 მლნ მახორუთ იტალია ევროპას მა-5 სახენწჷფო რე მახორობაშ მუდანობაშე დო მოსოფელს 23-ა.

მექსიკა

მექსიკაშ აკოართაფილი შტატეფი (ესპ. México) – ფედერაციული სახენწჷფო ოორუე ამერიკას.სქირონას თიში არძოშე დიდი მეძობელი რე, ოორუეშე დვალირ ამერიკაშ აკოართაფილ შტატეფი, ობჟათეშე დო ბჟადალშე უხურგანს რჩქალი ოკიანე. მექსიკაშ ობჟათარი მეძობელფი რე გვატემალა დო ბელიზი, ქიანაშ ბჟაეიოლ ოძგალე გოკიდილიე კარიბიშ ზუღაშ დო მექსიკაშ ჸუჯიშ ოძგალე ზოლს. ქიანაშ ფართობი აკმადგინანს დოხოლაფირო 2 მილიონ კვადრატულ კილომეტრის (760,000 კვადრატული მილი), მექსიკა მავითოხუთა სახენწჷფო რე ედომუშამი მოსოფელს ფართობიშ მეჯინათ. თაქ მახორუეფიშ მუდანობა აკმადგინანს 111 მილიონ, ადამიერს. მოსოფელს მახორობაშ თოლწონუათ მექსიკას მავითაართა აბანი უკებჷ. მახორუეფიშ უმენტაშობა ესპანარ-მექსიკარიე, მუთ მექსიკას მოსოფელს მაართა აბანს გითმიორინუანს ესპანიდეფიშ მუდანობაშ ჸურე. მექსიკა ირთუ ეჩიდოვითაართი შტატო დო ართი ფედერალური რაიონო.

პორტუგალია

პორტუგალია (პორტუგალიური: República Portuguesa) — ევროპაშ უძგაშაშ ობჟათე-ბჟადალ ნორთის დვალირი სახენწჷფო. პორტუგალიას ბჟადალშე ომძღჷ ატლანტიშ ოკეანე, ბჟაეიოლშე დო ოორუეშე - ესპანეთი. ატლანტიშ ოკიანეს დვალირი აზორიშ კოკეფი დო მადეირა მიშმურს პორტუგალიაშ აკოდგინალუაშა.

საქორთუო

საქორთუო (ქორთულო: საქართველო) — ქიანა ევრაზიას, კავკაციას, უჩა ზუღაშ ბჟაეიოლშე. ოორუეშე უხურგანს რუსეთიშ ფედერაცია, ოჩხანეშე — სომხეთი დო თურქეთი, ბჟაეიოლშე — აზერბაიჯანი დო ბჟადაალშე — უჩა ზუღა. საქორთუოს ოხორანს 4 661 473 კოჩი. საქორთუოშ ნანანოღა დო უდიდაში ნოღა რე ქართი. ქიანაშ ოფიციალური ნინა რე ქორთული (აფხაზეთის აფხაზური ქორთულწკჷმა ართო). საქორთუო ტრანსკონტინენტური ქიანა რე დო ევროპა-აზიაშ სანძღოს მილარე, მარა სოციალურო დო კულტურულო ევროპაშ ნორთი რე.

საქორთუოშ ამდღარი ტერიტორია ჯვეში ქუაშ ხანაშე მოჸუნაფილი ირო დოხორელი რდჷ. კლასიკურ ანტიკური ხანას თაქ გოპეულუუ მაართა ქორთულ სახენწჷფოეფქ: კოლხაქ დო იბერიაქ. თენა რდჷ გიოჭყაფალი ართამი ქორთული კულტურაშ დო სახენწჷფოშ. ქირსიანობა სახენწჷფო რელიგიათ მაანთხა ოშწანურას აღიარეს ბჟაეიოლ საქორთუოს, მარა აქი თე რელიგიაქ დიო ხოლო მაართა ოშწანურაშე გიისჷმუ. ქიანაქ ართამ მონარქიათ გინირთჷ 1008 წანას. იმპერიულ რუსეთიქ ქორთული დიხეფი მოზოგ-მოზოგო მიდეღჷ 1801-1866 წანეფს. რუსეთიშ რევოლუციაშ უკული საქორთუოქ კჷნ ზოხორინელ, დემოკრატიულ სახენწჷფოთ გინირთჷ, მარა ახალი დუდიშული ქიანა ხვალე სუმ წანას არსებენდჷ (1918 - 1921). 1921 წანას საქორთუოქ სოციალისტური რესპუბლიკეფიშ რსხუშ ნორთო გინირთჷ. 1991 წანას თექ ზოხორინალა მიიღჷ დო ამდღარშახ ზოხორინელი რე.

ტუნისი

ტუნისი ((არაბ. تونس‎‎), ოფიციალური ჯოხოდვალა — ტუნისიშ რესპუბლიკა (არაბ. الجمهورية التونسية‎‎, ალ-ჯუმჰურიია ატ-ტუნისიია)) ) — სახენწჷფო ოორუე აფრიკას, სქირონაშქა ზუღაშ ობჟათე წყარპიჯის. ომძღჷ ალჟირი დო ლიბია.

ყაზახეთი

ყაზახეთიშ რესპუბლიკა (ყაზახ. Қазақстан Республикасы) — სახენწჷფო ცენტრალურ აზიას დო ბჟაეიოლ ევროპას.

შვეიცარია

შვეიცარია (გერმ. die Schweiz, ფრანგ. la Suisse, იტალ. Svizzera, რეტორომანული la Svizra), ოფიციალურო შვეიცარიაშ კონფედერაცია (ლათ. Confoederatio Helvetica, გერმ. Schweizerische Eidgenossenschaft, ფრანგ. Confédération suisse, იტალ. Confederazione Svizzera) — ბჟადალ ევროპას დვალირი ფედერაციული რესპუბლიკა. ნანანოღა — ბერნი.

შხვა ნინეფს

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.