ბრონზეშ ხანა

ბრონზეშ ხანა — ჯარალუაშ გოვითარაფაშ ისტორიულ–კულტურული პერიოდი, მუჟამსჷთ ოლჷმარი დო ომუშებელი ანჯარეფიშ ოხაზირაფალი მოღე ჯინჯიერო რდჷ ბრონზე. ბრონზეშ ხანას წოხოლე აწმულუანდჷ ენეოლითი.

ბრონზეშ ხანა მოსოფელიშ შხვადოშხვა ტერიტორიას შხვადოშხვა პერიოდის ფორუნდჷ. ბრონზეშ უჯვეშაში (ჯვშ. წ. IV ანთასწ.) ნოხაზირუ გჷთოგორილიე ობჟათე ირანს, თურქეთის დო შქაწყარმალონას. ჯვშ. წ. IV ვითოშწანურას დუდშე ბრონზექ გიფაჩჷ ეგვიპტეს, III ვითოშწანურაშ ლიაშე – ინდოეთის, II ვითოშწანურაშე – ევროპას, II ვითოშწანურაშ შქახანშე – ჩინეთის. ამერიკას ბრონზეშ ხანას ზოხორინელი ისტორია უღუ; თექ მეტალურგიული ცენტრი პერუშ დო ბოლივიაშ ტერიტორიას რდჷ (VI-X ოშ. თ. გ. გვიანი ტიუანაკოშ კულტურა). ცენტრალურ აფრიკას ბრონზეშ ხაზირაფაშ ზოხორინელი კერიეფი ოკო ეშაფალედჷკო ვართ უგვიანაშ ჯვშ. წ. I ვითოშწანურას.

ბრონზეშ ხანას გჷშაკერძაფილო გჷმირჩქინჷ დუდი ისტორიული გოვითარაფაშ ვაართმანგალაქ. ხოლოშ ელახიშ ქიანეფს (შქაწყარმალონა, ელამი, ეგვიპტე, სირია) ივითარებუდჷ კლასობური ჯარალუეფი დო უჯვეშაში სახენწჷფოეფი. ჯვშ. წ. III-II ანთასწანურეფს მახაზირაფუ მეურნალაშ თე ცენტრეფიშ გოლინათ გიფაჩჷ დო გიჭყჷ ახალ ცივილიზაციეფქ: ჰარაფიშ კულტურაქ ინდოეთის, ინიშ სახენწჷფოქ ჩინეთის, ხური-მითანიშ, ხეთეფიშ დო შხვ. სახენწჷფოეფი წოხოლენი აზიას; კრეტა-მიკენიშ კულტურაქ ევროპას.

ევრაზიას უშანულამაში მეტალურგიული ცენტრი ბრონზეშ ხანას რდჷ კავკაცია. ბრონზეშ ხანა თაქ სუმ ეტაპო ირთუ: ორდოული (ჯვშ. წ. III ვითოშწ.), შქა (ჯვშ. წ. II ვოთოშწ. I გვრდ.) დო გვიანი (ჯვშ. წ. II ანთასწ. II გვრდ.). კავკაციას გჷშმერთუ ორდობონზეშ ხანაშ მუშობური მატერიალური კულტურეფი: კოლხეთიშ რზენც, ოორუე–ბჟადალ კავკაციას (თ. გ. მაიკოპიშ კულტურა) დო თ. გ. მტკვარ-არაქსიშ კულტურა, ნამუთ ჯინჯიერო გოფაჩილი რდჷ ცენტრალური დო ელახ ამიერკავკაციას, ოორუე კავკაციაშ ელახ ნორთის, ანატოლიას, ოორუე ირანს.

შქა ბრონზეშ ხანას კავკაციას მუზმარენი ზოხორინელი კულტურა იქიმინუაფუ: თრიალეთიშ, სევან-უზერლიქიშ, თაზაქენთ-ყიზილვანქიშ, ბჟადალ საქორთუოშ დო ოორუე კავკაციაშ კულტურეფი. ფირქენა, ნამუდა თე ბორჯის იქიმინუაფუდჷ ტომეფიშ დიდი რსხუეფი, ნამუეფსჷთ თე კონკრეტული კულტურეფი მეურედჷ.

გვიანბრონზეშ ხანაშ მოღეეფი კავკაციას ორგანულო არსხუაფუ მუჭოთ წჷმოხონი, თეშ უკულიანი პერიოდიშ ქილინჯეფს დო აბანობური კულტურაშ გოვითარაფაშ ართ-ართ შანულამი ოკუჩხურს წჷმარინუანს. გვიანბრონზეშ ხანას კავკაციას მოხვადჷ დიდი ომეურნულ დო სოციალურ-პოლიტიკურ ყარაფიქ. ოწარმე ნძალეფიშ დო წარმებაშ მეშქაშალაშ გოვითარაფაშ ართ–ართი ჯინჯიერი რეზულტატი რდჷ რკინაშ კჷლაგორუა დო ემუშორაფა (ჯვშ. წ. II ანთასწ. ლია), მუქუთ რევოლუციური როლი იღვენუ ჯარალუაშ გოვითარაფაშ ისტორიას. მოხვადჷ ხანდაშ მასუმა დონორთუაფაქ. ხელუანობაქ გაგმერთჷ დიხასაქვარუას. გევითარჷ ვაჭრუაქ. გიტომბარჷ მაართარინელი თემური წყობილაფაშ აკოცუმაშ პროცესიქ, მიხაზირჷ ოსხირქ კლასობური ჯარალუეფიშ ჸონდინაფაშ დო სახენწჷფოეფიშ გოჭყაფაშო.

Bronze age weapons Romania
ბრონზეშ ხანაშ ანჯარეფი დო ორნამენტეფი

ლიტერატურა

ბრონზე (მეტალი)

ბრონზე — ლინჯიშ მიშნანდღულეფი შხვადოშხვა ქიმიურ ელემენტეფწკჷმა, უთარაშო ლითონწკჷმა: კალა (კალამი ბრონზე), ალუმინი (ალუმინამი ბრონზე), ბერილიუმი (ბერილიუმამი ბრონზე) დო შხვა. ბრონზეს ვა უძახჷნა ხვალე ლინჯიში დო თუთიაშ (თითმერი), თაშნეშე ლინჯიში დო ნიკელიშ მიშნანდღულაფეფს (ლინჯამი მიშნანდღულაფეფი). უჯვეშაშიე კალამი ბრონზე. თიში ხაზირაფა დო გჷმორნაფა ადამიერს დიო ხოლო ჯვშ. წ. 3000 წანას უჩქჷდ (ბრონზეშ ხანა). შქა დო გვიან ბრონზეშ ფარანს ლინჯის შხვადოშხვა მუდანობათ გეუძინანდეს ჭუკი-შანქარს, სტიბიუმს, ტყვიას, თუთიას, მარა არძაშე გოფაჩილი იშენით კალამ ბრონზე რდჷ.

ვარაუდენა, ნამუდა საქორთუოს ბრონზეშ ხაზირაფა დო გჷმორინაფა ჯვშ. წ. მეხოლაფირო 2000 წანას დუჭყაფჷნა. მაართათ ჭუკი-შანქარამი ბრონზე მუხაზირაფუნა, უკული თიშო სტიბიუმი გეუძინჷნა. მიშანდღულაფირს ჭუკი-შანქარიშ მუდანობას კოროცხჷნდეს ბრონზეშ დანიშნულებაშ მეჯინათ, მაგ., ნაჭკადა ანჯარიშ ოხაზირაფალ ბრონზე იკათუანდჷ 0,5-7% ჭუკი-შანქარს, სამკაულეფშო გინოდვალირი - 7-22%-ის. კალამი დო შხვა ბრონზეშ მეტალურგია საქორთუოს გევითარუ ჯვშ. წ. II ვითოშწანურაშ ოთებუსი დო I ვითოშწანურაშ დაჭყაფუს.

კალამი ბრონზე კალას 14-18 %-ის (მინშა უმოსისჷთ) იკათუანდჷ. თენერ რთული აკოდგინალუაშ მიშნანდღულეფშე ნივთეფს ჭკადუათი დო გითობუნათ ახაზირენდეს. კალამიბრონზეშ ფარსაკი ობუნური თვისებეფიშ გურშენ ფართას ირინუანდეს ოლჷმარი დო ომეურნე ანჯარიშ (შუფეფი, მაღულარეფი, ყამეფი, არგუნეფი), მონეტეფიშ, ხანტური ნოღოლამუეფიშ დო სამკაულიეფიშ ოხაზირაფალო. შქა ოშწანურეფს ბრონზეშე ოხვამეშშ ზარეფს გითაბუნდეს. თენერ ბრონზე 20%-შახ კალას იკათუანდჷ. XIX ოშწანურაშე დიჭყეს ბრონზეშ გჷმორინაფა მანქანაკიდუას (საკისრეფიშ მილისეფიშ, კიბირაკეფიშ, არმატურაში დო შხვეფიშ ოხაზირაფალო). თე დარგიშო გჷშაკერძაფილ შანულობა უღუ ბრონზეშ ანტიფრიქციულ (ანტიფრიქციული მოღეეფი) დო ანტიკოროზიულ თვისებეფს. ქიმინელიე შხვადოშხვა მარკაშ ომანქანე ბრონზე, ნამუთ იკათუანს კალას (10-15%-შახ), თუთიას (5-10%) დო მორჩილი მუდანობათ ტყვიას დო ფოსფორს. XX ოშწანურას კალაშ დეფიციტურობაშენ ქჷდიჭყჷ ბრონზეშ ომათირეშ ხაზირაფაქ. მაგ., ქიმინელიე ალუმინამი ბრონზე, ნამუთ ფარსაკი თვისებეფიშიე. თინა იკათუანს ალუმინს (5-12%), მორჩილი მუდანობათ კინას, მანგანუმს დო ნიკელს. ჯგირი თვისებებით გჷშმეგორუ ბერილიუმამ ბრონზეთ (დამუშებულიე 20-30-იან წანეფს). მიშნანდღულეფი, ნამუთ 2% ბერილიუმს იკათუანს, მინი ფულანდიშე უმოსი ბერჯეკი რე. მაღალი სიბერკეჯეშიე კადმიუმამი ბრონზეთ. კადმიუმი უშანულეთ ურკენს თიშ ელექტრომუკმაშქუმალობაშ უნარს. თეშენ თე მიშნანდღულეფუს ირინუანა ტელეგრაფიშ, ტელეფონიშ დო ტროლეიბუსიშ ოკონტაქტე მავთულეფიშ ოხაზირაფალო.

ფარსაკი თვისებეფიშიე თაშნეშე სილიციუმამი ბრონზე, ნამუთ მაღალი პლასტიკურობაშ გეშა ლექინას იმუშებაფუაფჷ წნევათ. ბრონზეშ თეხანური მანქანაკიდუას, ოავიაციე დო ორაკეტე ტექნიკას შანულამი აბანი უკინებჷ.

ბრონზეშ ფარსაკი გითობუნური თვისებეფიშ გეშა ნამთინე მოდელიშ უსალუქაშ დეტალეფიშ რეპროდუქცირაფა. ბრონზე სკინჩალიე, ოქსილირაფაშ გეშა მითმიძნანც გიმარენჯი ფერს (ორთაშობური პატინას), ლექინიე თიში ქიმიური ტონირაფა (პატინირაფა), მოორქოვაფა, მოჭკადუა დო გრავირაფა, მუთ ნაღოლემუეფიშ ფერიშ დო გომიარეფერუნაფაშ მეშქაშალას ირზენს. ბრონზე ფართას ირინუაფჷ ომონეტე საქვარუას.

ონი

ონი — ნოღა ბჟადალ საქორთუოს, წყარმალუ რიონიშ კვარჩხან ძგას. ონიშ მუნიციპალიტეტიშ ადმინისტრაციული ცენტრი. ზუღაშ დონეშე 830 მ, ქართიშე 210 კმ. ოხორანს 2656 მახორუ (2014). ონს ზომიერო შიმე ჰავა რე, უჩქჷ ზომიერო რგილი ზოთონჯი დო ხანგინძე ტჷბუ ზარხული. ოშქაშე წანამოწანური ტემპერატურა რე 10 °C, ღურთუთას — 1 °C, კვირკვეს 20,4 °C, აბსოლუტური მინიმალური - 27 °C, აბსოლუტური მაქსიმალური 38 °C. ნოლექი 1000—1100 მმ წანამოწანას.

ონი ისტორიულ წყუეფს მაართათ იშინუაფუ XV-XVI ოშწანურეფს. მენცარობას გიშარაგადელი რე აზრი, ნამუდა ონი დარსხუ იბერიაშ მაფა ფარნაჯომქ (ჯვეში წანათეკოროცხუაშ II ოშწანურას). შქა ოშწანურეფს მირდუ ფეოდალური ნოღა ონიშ ეკონიმიკურ შანულობაქ. თაქ აკმოხვადუდჷ ოორუე კავკაციაშე, ქართლიშე, იმერეთიშე დო თუდონ რაჭაშე მუმაულარი შარეფი. იმერეთიშ ომაფეშ რუსეთიშა მიკოართაფაშ (1810) უკული ონი რდჷ დაბა; ონი წჷმარინუანდჷ რაჭაშ შანულამ ოვაჭარე პუნქტის, გოვითარაფილი რდჷ ხეშსაქვარი. 1846 წანაშე რდჷ ქუთეშიშ გუბერნიაშ რაჭაშ მაზრაშ ადმინისტრაციული ცენტრი. ონიშ ტერიტორიას ძირაფილი რე ბრონზეშ კვაღა (ბრონზეშ ხანა), თაშ ხოლო კოლხური თეთრიშ (ჯვეში წანათეკოროცხუაშ VI-III ოშწანურეფი) არხამა.

ნოღას რე საწარმოეფი, ჭყანათხილუაშ, განათლებაშ დო კულტურაშ დაწესებულებეფი. ონს რე ნიკორწმინდაშ ეპარქიაშ რეზიდენცია.

ნოღას უკებუ ხორგულიშ ონჭირე ღოზი რიონიშ კვარჩხან ნადუეფს — ჯეჯორაშ დო ღარულაშ შქას. ნოღაში ტერიტორიაქ შანულამო გეფართჷ რიონიშ კვარჩხანი ძგაშ გოჸუნაფას კიდალაშ ეგაფაშ უკული. გოჸუნაფილი რე წყარიშოლუ. ნოღაშა გინმურს ოსეთიშ ოურდუმე შარა. ნოღას მიკოსქილადირი რე შქა ოშწანურეფიშ ჯიხაშ ხორგი დო სინაგოგა.

წილკანი (მცხეთაშ მუნიციპალიტეტი)

წილკანი — ოფუტე საქორთუოს, მცხეთა-მთიანეთიშ აკანიშ მცხეთაშ მუნიციპალიტეტის, თემიშ ცენტრი (ოფუტე ერედა.) აშაძჷ მუხრანიშ დჷკის. წყარმალუ ნარეკვავიშ კვარჩხან ოძგაშეს. გოძვენა მცხეთაშახ 10 კილომეტრი. 2002 წანაშ ეჭარუაშ მუნაჩამეფით ოფუტეს ოხორანს 2767 კოჩი.

შხვა ნინეფს

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.