伊莎贝拉女王

卡斯蒂亚女王伊莎贝拉(西文:Isabel I de Castilla,1451年4月22号-1504年11月26号),是15世纪挨末阶段统治卡斯蒂亚王国个女王,1474年廿三岁辰光接替自家个同父异母阿哥恩里克四世(卡斯蒂亚)即位。伊搭阿拉贡王国个费南笃二世结婚,让卡斯蒂亚王国搭阿拉贡王国形成共主联盟。1480年代,发动盖纳达战争,1492年,终于拿回回个盖纳达苏丹国灭脱,完成再征服运动。同年,资助哥伦布对大西洋探索,结果,发现新大陆,让西班牙获得后势来朆想象个殖民财富。一般认为,伊莎贝拉女王是西班牙历史浪顶顶伟大个君主之一。

IsabellaofCastile03
IsabellaofCastile03
克里斯托弗·哥伦布

阔烈涩波 哥伦布(西文:Cristóbal Colón, ?-1506年5月20号)是世界顶顶有名个航海家。出身15世纪当中阶段,立在15世纪挨末阶段活跃。伊是热那亚人,弗过为寻求自家个利益,到伊比利亚半岛效力,开始投靠葡萄牙国王,朆畀赏识,就改换门庭,投靠卡斯蒂亚搭阿拉贡。1492年,得到资助,前往伊自家讲个中国开展贸易,弗过,航行几个月,最后到达个是新大陆(具体看哥伦布发现美洲)。弗过,出于自家对中国个向往搭一厢情愿,伊自家弗承认发现个是新陆地,非要拿新大陆个土著,叫做印度人,这也是印第安人个由来。

发现美洲之后,哥伦布得到伊莎贝拉女王个褒奖,获得贵族头衔,并且许诺让伊统治新发现个土地。弗过,哥伦布弗是一个合格个管理人员,搭交关手下,土著侪发生矛盾,让西班牙个殖民事业差点失控,个能,就畀架空、撤换,丧失实际权力,回到西班牙养老去哉。

恩里克四世(卡斯蒂亚)

卡斯蒂亚王恩里克四世(西文:Enrique IV de Castilla,1425年1月5号-1474年12月11号),是1454年到1474年当中统治卡斯蒂亚王国个国王。立在一些历史书当中,畀赋无能者(西文:el Impotente)个称号。伊是卡斯蒂亚王胡安二世(卡斯蒂亚)个儿子,也是后势来有名个伊莎贝拉女王同父异母个阿哥。恩里克四世是一个同性媾人物,欢喜搭宠臣共度良宵,对个辰光复杂个国际形式搭内部问题侪嘸啥见解,结果,让卡斯蒂亚王国陷入动荡搭危机。伊1474年留下一个来源有问题个女儿,随后死脱。伊死脱之后,同父异母个伊莎贝拉自立登基,促成后势来西班牙王国个形成。

贡萨洛·肥男肚·阔多瓦

贡萨洛·肥男肚·阔多瓦(西文:Gonzalo Fernández de Córdoba y Enríquez de Aguilar, 1453年9月1号-1515年12月2号),出身卡斯蒂亚王国贵族家庭,是伊莎贝拉女王个近臣搭有名个武将。立在15世纪挨末阶段来到那波利王国对抗法兰西王国对亚平宁半岛个干涉,屡建奇功,多趟拿法国军队做脱。到16世纪开始辰光,又开发出闻名欧洲个西国枪阵。拿西班牙(卡斯蒂亚王国搭阿拉贡王冠国)个军队提升到欧洲顶尖水平。伊莎贝拉女王死脱之后,伊返回国内,受费迪南二世猜疑,避居自家封地,1515年死脱。伊立在后世畀广泛尊敬,西班牙人也公认伊是自家顶顶老卵个陆军将领之一。

别样闲话版本

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.