Brodo

brodo ł'è un tipo de menestra tipega deła coxina poera che se cata nteła Rejon Veneta e anca nteł resto del itałia. Ł'e na menestra ciara de cołor dorato e se ghe buta deła pastina (o stełete o bigułi maltajadi) e 'na beła branca de formai (o grana o regiano). Par coxinar sta menestrina bexon metarghe dełi os de carne (o gał vecio o manzo, o anca tut'e do), carote, sedano, zheoła e ajo drento a na pignata piena de aqua. Ła se fa bołir par tre o quatro ore. Ł'è na menestra che se pol far co pochi schei, e donca ł'è sta sempre popłar neła Rejon Veneta ntełi tempi deła dopoguera. De sołito ghe piaxe anca ałi toxatełi parche' ł'ha un saor senpłise e bon, ma bexon starghe drio parché sta menestra broa co che ł'è pena mesa in toła e i se bruxa ła boca.

Agneło d'Alpago

El agneƗo d'Alpago el vien da Ɨa rasa de Ɨa piegora alpagota (autoctona, vaƗe a dire originaria) del Alpago (provinça de BeƗun), dove ke Ɨa vien slevà par la carne. Ɨa xe na piegora co'l peƗo fiso,fin e a onde, sensa corni, co rece pitosto picoƗe e co mace scure su Ɨa suca e su Ɨe sate. Sti agneƗi qua i li ciama monghe.

Sto agneƗo, par Ɨa so carne ténara e piena de saor, el xe considerà na speciaƗità agroaƗimentare del Veneto e par questo el xe anca un Presidio Slow food.

Bìgołi co ł'arna

I bìgołi coł'arna i xe un piato tipico del Veneto e i se magna de sołito ała prima domenega de otobre, dedicà ała Madona del Rosario.

Par 4 persone ghe vol:

320 g de bigołi

1 ganba de sełeno

1 séoła

1 carota

1 spigoło de ajo

na sbrancà de ciodi de garofano

2 cuciari de parsémoło fresco

1 arna xovane

2 foje de doraro

3 - 4 foje de salvia

2 cuciari de formajo grana padano gratà

30 g de buro

sałe

pevare

3 - 4 foje de salvia

2 cuciari de formajo grana padano gratà

30 g de buro

sałe

pevare

1 goto de vin biancoSe neta e lava ben ł'arna, metendo da parte i figadini e i altri roinàsi.

Se fa bojer in na pignata aqua sałà con drento ła carota, el parsemoło, ł'ajo, el doraro, ła séoła e i ciodi de garofano. Meter drento ł'arna, col core e el stomego e cuxinare; dopo un'ora cavar ł'arna e i roinàsi e cuxinare i bìgołi col brodo ke xe vegnù fora. Intanto se trita i roinàsi coti (core e stomego) e crudi (figadini) e ła carne deł'arna e i se versa in na farsora desfrizandołi con buro e salvia. Se ghe versa el goto de vin e se cuxina par un'ora. Na volta pronto el sugo, se ghe xonta sałe e pevare. Sto sugo se versa sui bìgołi cavà dal brodo quando ke i xe ancora un poco al dente. Prima de servire, se versa sora el formajo gratà.

Keno consilià: Cabernet superiore deła cantina Beato Bartolomeo de Breganze o Merlot dei Cołi Berici.

Casalmoro

Casalmoro el xe on comune de 2049 abitanti 'nte ła provincia de Mantova. El fa parte de i comuni de l'Alto Mantovan. El paexe vede scorar el fiume Chiese so de un paexajo de pianura volto soratuto al laor de i canpi.

Maresina

La maresìna ła xe na pianta (nome sientifego Tanacetum parthenium) deła fameja dełe Compositae o Asteraceae. In inglese ła se ciama feverfew, in todesco Mutterkraut, in taljan matricale o partenio. Ła xe na pianta erbàsea perene, on mucio aromàtega al strucarse, ga foje de contorno ełìtego, fin a 8 cm de łonghesa. Ła se uxa par redure fiebre (varda el nome inglese), tratar dołor de suca, artriti, problemi dijestivi. Na volta ła se doparava par i dolori dełe mestruasion (da qua el nome in todesco e in taljan). Rexentemente ła se ga utilixà par ła cura de ła pełe.

Ła vive specie in alta cołina; conosuda e doparà in cuxina in Val Cianpo e Valdagno, 'ntel Vixentin, ma anca 'ntel Veronexe, sui Lesini e in pianura.

Paeta al malgaragno

Ła paèta al malgaragno xe l'altro piato tipico de Vicensa, dopo el bacałà.

Par farlo ghe vol: 1 paèta de 1,5 kilogrammi, 80 g de panceta fresca tajà a fetełe fin, el malgaragno (4 fruti), 80 g de buro, 5-6 foje de salvia, 5 cuciari de ojo extravèrgine de ołiva, 1 minestro de brodo, sałe, pevare.

Netar la paèta, vèrsarla e metarghe drento 30 g de buro mis-cià a un bel pìsego de sałe. Coverser el peto cołe fetełe de panceta e ligar ben.

Scaldar in na tecia 20 g de buro con 3 cuciari de ojo e ła salvia e metarghe drento ła paèta. Lasàr cusinar par 2 ore pi o manco a fogo medio, metendoghe ogni tanto un cuciaro de brodo. Intanto, dopo 1 ora, versar 'nteła tecia el sugo de 2 malgaragni e xontar un poco de sałe.

Finchè se cusina ła paèta, lavar, sugar e tritar łe coradełe; cusinarle col buro e l'ojo ke xe restà, xontandoghe el sugo de naltro malgaragno pi sałe e pevare.

Quando ke ła paèta ła xe cota, tajarla a toki e servirla su un piato caldo con sora ła salsa de coradełe e i grani del' ultimo malgaragno ke xe restà.

Pearà

La pearà l'è na roba da magnar, se podarea dir salsa, che ła va ben insieme a ła carne de bolito.

'Nte 'l Połéxine i ła ciama panà.

Proverbio

Al proverbio ( la 'l latin proverbium) al è na massima che la à inte norme, judiži, detami o consilji esprimesti in modo curt e, tante olte, come metafora, e i è stati cavadi da la esperjenža comun.De solito i riporta na verità (o quel che la đent la pensa che al sie vera): se diss difati che i proverbi i è fruto de la sageža popolar o de la cosideta "filosofia popolar", ma ghe n'è chi che 'l diss che altro no i è che la version codificada de loghi comuni. I pol contegner similitudini. Metafore e similitudini le gnen ciapade da usi, costumi, legende de la popolažion che la à inventà al proverbio ma tanti i è comuni a parlade diverse.

In ogni caso, i representa pur senpre an patrimonio cultural da difender e da salvaguardar, da' che i ne assa an segn de epoche passade, e i ne indica la strada che i à fat i nostri avi.

Al studio de i proverbi al se ciama paremiologia.

Rixi e bixi

I risi e bisi xe un tipico magnar veneto.

Ingredienti:

300 g de riso Vialone nano

250 g de bixi sgranà

1,5 l de brodo vegetałe

50 g de buro

50 g de panceta fresca tajà in na feta ugnoła

4 cuciari de formajo grana padano gratà

3 cuciari de ojo de oliva

3 cuciari de parsémoło fresco trità

1 scałogno

sałe

pevare

Tritar fini 1 cuciaro de parsemolo, ła panceta, el scałogno e farli frìzare 'nteł'ojo par 3-4 minuti. Xontare i bisi e 2 mestołi de brodo e lasar cuxinar par 10 minuti. Versare el riso e finir de cuxinar xontando brodo quando ke el conposto el se suga, mis-ciando de continuo parkè no se taca. Finio de cuxinar, cavar dal fogo, giustar de sałe e pevare, metarghe sora el formajo gratà, el buro e el parsemoło trità restà. Mis-ciare e servire.

Vin ke ghe va ben drio: Lugana o Custoza superiore.

Rixi e bruscandołi

I Risi e bruscandołi xe un piato che se fa in primavera quando che se pol tirar su i bruscandołi dai prà.

Par 4 persone, ghe vol: 4 eti de riso viałone nano, na ròsa de bruscandołi, ojo de ołiva extravergine, do cuciari de buro, do cuciari de formajo grana padan gratà, un goto de vin bianco seco, na séoła, un dado da brodo vegetal, sałe, pevare.

Metare in na tecia 4 cuciari de ojo e ła séoła tajà a fetine, scaldar finchè ła séoła no ła se fa bionda. A sto punto se buta drento i bruscandołi trità e un goto de vin bianco. Quando che se ga sugà el vin, se buta el riso e se fa brustołare par 2 minuti, se buta drento meso minestro de aqua calda de bojo, un dado e se mis-cia. Man man che va via l'aqua, se buta drento aqua calda e se continua a mis-ciare, metendo sałe e pevare. Dopo 20 minuti, pi o manco, se stua el fogo, se buta drento do cuciari de buro, se sara ła tecia col covercio. Desfà el buro, se ghe da na beła mis-ciada, se buta drento el formajo gratà, se mis-cia naltro colpo e i risi i xe pronti.

Rixi e kumo

Par 4 persone ghe vol:

320 g de rixo Vialone nano

1 sbrancà de kumo

1,5 l de brodo de carne magro

30 g de buro

1 zioła picoła

4 cuciari de ojo de oliva veneto

4 cuciari de formajo grana padano gratà

2 cuciari de parsémoło fresco trità

sałe

pevare

Tritare ła zioła fina fina e desfrizarla 'nteł'ojo drento na tecia.

Quando ke ła se ga fata bionda, versar drento el kumo lavà e trità e continuare con fogo medio par 3 — 4 minuti versando mexo minestro de brodo caldo. Xontare el rixo e senpre mis-ciando, portare a cotura versando al bixogno minestri de brodo caldo. Cavar dal fogo, regołare de sałe e pevare e versar drento el buro e el formajo, mis-ciando pian pianeło.

Vin da bevare insieme: Tocai bianco de Cołi Berici.

Rixoto a l'isołana

Par preparar un bon rixoto all'isolana ghe vol el tastasal. Cogna sofrizar la sioła e, prima che ła diventa bruna, zontar el tastasal (almanco 100 g par persona). Co chel xe coto, zontar un bel bicier de vin moro, mejo se el ga un bel corpo. Far sbołentar e zontar el rixo (viałon nano, 100 g par persona). Cozar a fogo lento par venti minuti, smìsiar poco e zonzar brodo de gałina par tegnerlo mòrbio. Prima de servir, metare na beła dòxe de formajo gratà e far ripoxar par do minuti.

Rixoto coi figadini

El rixoto coi figadini par 4 persone el vol:

320 g de rixo Vialone nano

8 figadini de połastro

1,5 l de brodo de carne

50 g de buro

1 sioła picoła

1 carota

1 ganba de sełeno

4 foje de salvia

4 cuciari de salsa de pomodoro

4 cuciari de formajo grana padano gratà

2 cuciari de ojo de oliva veneto

sałe

pevareNetar ben i figadini e tajarli a toketi, versarli in na farsora con metà del buro e łe foje de salvia. tegnere el fogo baso. Dopo 3 - 4 minuti xontare na s-cianta de sałe. Da na parte versare in na pignata el brodo de carne e ła salsa de pomodoro e scaldar tuto finke no'l boje. Intanto se trita fini fini ła sioła, el sełeno e ła carota e i se desfriza in na tecia coł'ojo e na s-cianta de buro. Quando ke i xe indorà, se versa drento el rixo e se mis-cia par 1 minuto par farlo tostare. Senpre mis-ciando, se ghe xonta raquanti minestri de brodo de bojo ogni volta ke'l rixo se suga. A metà cotura, se versa drento anca i figadini col so sugo. Quando ke'l rixo xe pronto, se regoła de sałe e pevare e se buta drento el buro restà e el formajo, mis-ciando forte.

Keno ke va ben insieme: Valpołiceła o Breganze Roso

Sełeno de Verona

El sełeno de Verona el xe na varietà de sełeno (Apium graveolens rapaceum), dito celeriac in inglexe, Zeller in todesco e sedano rapa in tałjan, 'ndove ła parte ke conta de pi e ke se magna xe ła raixa, grosa anca 15 cm de diametro, maron fora e bianca drento, tonda come na bała. Łe foje łe xe verdi, i pecol cavi. El sełeno de Verona el ga poco podere całorico (soło 23 kcal/100 g), tanto sełenio, vitamina C e E. El xe un bon antiosidante, ma ocore magnarlo cruo in sałata o coto al vapore par conservar ste proprietà. El tenpo par tirarlo su dal canpo va da metà agosto ałe prime giaxade (novenbre).

Sopa coada

Ła sopa coada xe el piato "bandiera" de Trevixo, radici a parte.

Atension: Ghe xe anca na version ciamada de "Mota de Livensa" o de Oderso (a xe fata col poeastro al posto dei coeonbi)

Ła riceta par 4 persone la vol:

4 colonbi xòvani, 400 g de pan bianco vecio tajà a fete, un litro e mezo de brodo de carne, do séole grose, na costa de sèłeno, tre carote, un ciufo de parsémoło trità, tre cuciari de ojo, 150 g de buro, 80 g de parmesan o graso de montagna gratà, un goto de vin bianco seco, pevare, sale.

Netar ben i colonbi e tajarli par metà. Pareciar el desfrito con sełeno, séole, carote, ojo e buro. Quando che la séola ła taca a farse bionda, metare i colonbi in te ła tecia con un poco de vin bianco e lasarli cusinar a fogo lento. Zontar brodo, sale e pevare; metere el parsémoło e covèrsere, finchè i colonbi i xe ben coti. Tajar a fete alte un çentimetro el pan, cavarghe i osi ai colonbi coti, sensa spacarli masa. Zontar a tuto el conposto e ała carne dei colonbi el brodo, de bojo. Lasar cusinar pian pian a fogo lento par altri diexe minuti. Metare sul fondo de na pirofila granda le fete de pan, su ogni feta metarghe sora meso colonbo a toki, spanpanarghe sora el parmesan, metare le altre fete intorno e sora ancora parmesan. Covèrsere el tuto col brodo e metare in forno a "coare" pian pian par almanco 5 ore, finchè el brodo no xe quasi tuto evaporà. In caso, zontar ancora un poco de brodo de bojo e un toketo de buro. Servir caldo.

Sparagagna

La sparagagna a la Vicentina la xe un piato tipico de Vicensa, che se fa co le costesine de mas-cio, dite apunto sparagagna.

Par cuatro persone a ghe vol:

800 grami de sparagagna

ojo

butiro

meza zeola

un grosso spichio de ajo

salvia

sgolmarin

tamaro

sal

péar

vin bianco seco

un fià de brodo de carne

un poca de farina bianca.Tajè le costesine in tochi regolari (o magari fasìvele tajar dal becher), e dopo passèle in te la farina. Intanto scaldè ben in te na tecia granda l'ojo co na nosa de butiro, l'ajo pena schizà, la meza zeola sensa tajarla, un rameto de sgolmarin e calche fojeta de salvia. Rosolèghe drento la sparagagna, zirandola de continuo e metendoghe sal e péar in bisogno e un bel pìzego de tamaro. Bagnèla ben col vin bianco, cuerzì e continuè la cotura almanco na ora e meza, zontando brodo caldo se la tende a tacarse sul fondo. La carne la se ga da destacar fasilmente da l'osso e la deve rivar in tola ancora a scotadéo. La sua sarìa de conpagnarla con polenta pena fata.

Torexani

I torexani i xe i cołonbi ke vive sułe tori cołonbare a Breganze, in provinça de Vicensa. I vien cuxinà ało speło e magnà coła połenta.

Par 4 persone ghe vol:

2 kiłi de torexani

4 eti de lugànega

2 eti de lardo

2 eti de pan

120 g de ovi

50 g de formajo grana

1 eto de buro

sałe e pevare

salviaSpenare e curare i torexani. Rosołare i figadini e łe coradełe con buro e salvia. Tritar tuto e xontarghe ła lugànega e el pan smołà 'ntel brodo. Xontarghe el formajo gratà e un ovo. Metare drento i torexani sto ripieno e sarare col spago. Inpirare i torexani sul speło, co na feteła de lardo tra uno e ł'altro, cuxinare pian pian sul fogo e versarghe sora ogni tanto el tocio ke casca xo suła lecarda. Suła lecarda se lasa anca łe fete de połenta, in modo ke ła se frìsa e ła ciapa el saor dei torexani. Come keno da bevarghe drio va ben el Cabernet de Breganze.

Altre lengue

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.