పైడిమర్రి వెంకటసుబ్బారావు

పైడిమర్రి వెంకటసుబ్బారావు (జూన్ 10, 1916 - ఆగష్టు 13, 1988) నల్గొండ జిల్లా, అన్నెపర్తికి చెందిన రచయిత, మరియు బహుభాషావేత్త. భారత జాతీయ ప్రతిజ్ఞ (భారతదేశం నా మాతృభూమి...) రచయిత.[1]

పైడిమర్రి సుబ్బారావు
Paidi-marri-subbarao
పైడిమర్రి సుబ్బారావు
జననంజూన్ 10 , 1916
నల్గొండ జిల్లా , అన్నెపర్తి
మరణంఆగష్టు 13, 1988
ఇతర పేర్లుపైడిమర్రి సుబ్బారావు
వృత్తివిశాఖపట్నం డిటివొ
ప్రసిద్ధిరచయిత,
నేడు విద్యార్థులు చేస్తున్న "ప్రతిజ్ఞ" రచయిత.
మతంహిందూ
భార్య / భర్తవెంకట రత్నమ్మ
తండ్రిరామయ్య
తల్లిరాంబాయమ్మ,

జననం - విద్యాభ్యాసం

ఈయన 1916, జూన్ 10న పైడిమర్రి రాంబాయమ్మ, వెంకవూటామయ్య దంపతులకు నల్లగొండ కేంద్రానికి అతి సమీపంలో ఉండే అన్నెపర్తిలో జన్మించారు. విద్యాభ్యాసం మొత్తం అన్నెపర్తి, నల్లగొండలోనే సాగింది. తెలుగు, సంస్కృతం, హిందీ, ఇంగ్లీష్, అరబిక్ భాషల్లో నిష్ణాతులు.

ఉద్యోగం

హైదరాబాద్ రాష్ట్రంలోనే ట్రెజరీ విభాగంలో ప్రభుత్వోద్యోగం సంపాదించారు. ఆ తర్వాత ఆంధ్రప్రదేశ్ ఏర్పడ్డాక ఖమ్మం, నిజామాబాద్, నెల్లూరు, విశాఖపట్నం, నల్లగొండ జిల్లాల్లో పనిచేశారు.

ప్రతిజ్ఞ రచన

ఆయన 1962లో విశాఖపట్నం ట్రెజరీ అధికారిగా ఉన్నపుడు ఈ ప్రతిజ్ఞ తయారు చేశాడు.[2] భారత్-చైనా యుద్ధం జరుగుతున్న సమయమది. ఆ యుద్ధం పూర్తయిన తర్వాత చైనా ప్రభుత్వం ఓ నిర్ణయం తీసుకుంది. అక్కడి ప్రజల్లో ప్రాథమిక దశ నుంచే దేశభక్తి భావం నూరిపోయాలని..! ఆ మేరకు ప్రత్యేకంగా కొన్ని దేశభక్తి గేయాలను రాయించి, పాఠశాల విద్యార్థులతో చదివించడం మొదలుపెట్టింది. అప్పటికే పలు భాషల్లో ప్రావీణ్యం ఉన్న పైడిమర్రి ఈ విషయం గుర్తించాడు. మన విద్యార్థుల్లోనూ దేశభక్తిని పెంపొందించడానికి గేయాలుంటే బాగుంటుందని భావించాడు. పలు రచనలు చేసిన అనుభవంతో ఆ ఆలోచనకు రూపమివ్వడం మొదలుపెట్టాడు. ప్రతిజ్ఞకు పదాలు కూర్చాడు. విశాఖ సాహితీ మిత్రుడు తెన్నేటి విశ్వనాధంతో చర్చించాడు. ‘వారి శ్రేయోభివృద్ధులే నా ఆనందానికి మూలము’ అన్న వాక్యాన్ని అదనంగా చేర్చాడు. అంతాబాగానే ఉంది కానీ, దాన్ని ప్రభుత్వం దృష్టికి తీసుకెళ్లి.. పాఠ్యపుస్తకాల్లో చేర్చడం ఎలా..?

అది కాసు బ్రహ్మానందడ్డి ప్రభుత్వం. అప్పటి విద్యాశాఖ మంత్రి విజయనగరం రాజాగా పేరుగాంచిన పీవీజీ రాజు. ఆయన సాహితీవేత్త కావడం వారికి కలిసొచ్చింది. తేన్నేటి సాయంతో ప్రతిజ్ఞను పీవీజీ రాజు దృష్టికి తీసుకెళ్లాడు. దాని విలువను, అవసరాన్ని వివరించి ఓ ప్రతిని అందజేశారు. 1964లో బెంగుళూరులో ప్రముఖ న్యాయనిపుణుడు మహ్మద్ కరీం చాగ్లా అధ్యక్షతన కేంద్రీయ విద్యా సలహామండలి సమావేశం జరిపినపుడు జాతీయ ప్రతిజ్ఞగా స్వీకరించారు. తరువాత దీన్ని అన్ని భాషల్లోకి అనువాదం చేయించి 1965 జనవరి 26 నుంచి దేశమంతటా చదువుతున్నారు.[3]

పైడిమర్రి రాసిన ప్రతిజ్ఞలో కాలానుగుణంగా కొన్ని స్వల్ప మార్పులు మాత్రం జరిగాయి. గ్రాంథికంలో కొన్ని పదాల స్థానంలో వాడుక భాష వాడారు. ఇతర భాషల్లోకి అనువదించి 1963 నుంచి దేశ ప్రతిజ్ఞగా అమలులోకి వచ్చింది.

ఈ భారత జాతీయ ప్రతిజ్ఞ గురించి వికీపీడియా మరో పేజీలో వివరంగా వున్నా, ఇక్కడకూడ తెలుగు పాఠాంతరాలను ఇస్తే బాగుంటుందని భావించి, ఈ కింద ఇస్తున్నాము:

ప్రస్తుత రూపం

భారతదేశం నా మాతృభూమి.

భారతీయులందరూ నా సహోదరులు.

నేను నా దేశాన్ని ప్రేమిస్తున్నాను.

సుసంపన్నమైన, బహువిధమైన నాదేశ వారసత్వసంపద నాకు గర్వకారణం.

దీనికి అర్హత పొందడానికి సర్వదా నేను కృషి చేస్తాను.

నా తల్లిదండ్రుల్ని, ఉపాధ్యాయుల్ని, పెద్దలందర్నీ గౌరవిస్తాను.

ప్రతివారితోను మర్యాదగా నడచుకొంటాను.

నా దేశం పట్ల, నా ప్రజల పట్ల సేవానిరతితో ఉంటానని ప్రతిజ్ఞ చేస్తున్నాను. వారి శ్రేయోభివృద్ధులే నా ఆనందానికి మూలం.

పాత రూపం

భారతదేశము నా మాతృభూమి.

భారతీయులందరు నా సహోదరులు.

నేను నా దేశమును ప్రేమించుచున్నాను.

సుసంపన్నమైన, బహువిధమైన నాదేశ వారసత్వసంపద నాకు గర్వకారణము.

దీనికి అర్హుడనగుటకై సర్వదా నేను కృషి చేయుదును.

నా తల్లిదండ్రులను, ఉపాధ్యాయులను, పెద్దలందరిని గౌరవింతును.

ప్రతివారితోను మర్యాదగా నడచుకొందును.

నా దేశముపట్లను, నా ప్రజలపట్లను సేవానిరతి కలిగియుందునని ప్రతిజ్ఞ చేయుచున్నాను. వారి శ్రేయోభివృద్ధులే నా ఆనందమునకు మూలము.

ప్రతిజ్ఞ ప్రస్థానం

పైడిమర్రి ప్రతిజ్ఞ రచించి 53 సంవత్సరాలు పూర్తయ్యింది. భారత ప్రభుత్వం ప్రతిజ్ఞను ఆమోదించి 50 సంవత్సరాలు పూర్తయ్యింది.2011లో ప్రముఖ సంపాదకుడు ఎలికట్టె శంకర్రావు నల్గొండ కవుల కథలు రాస్తున్న సందర్భంగా పైడిమర్రి ప్రస్తావన వచ్చింది. ఆయన పైడిమర్రి కుమారుడు పి.వి సుబ్రమణ్యాన్ని కలవగా ప్రతిజ్ఞను తన తండ్రి గారు రచించారని శంకర్రావుకు తెలిపారు. ఒక మహనీయుడి మూలాలను ప్రపంచానికి తెలియజేయాలనే తాపత్రయంతో ఎలికట్టె కొంతమంది తెలంగాణా సాహిత్య మిత్రులతో కలిసి "ప్రతిజ్ఞ పదశిల్పి పైడిమర్రి" పేరుతో ఒక ప్రత్యేక సంచికను ప్రచురించారు. పైడిమర్రి పేరును పాఠ్య పుస్తకాలలో ముద్రింపచేయాలని ఉత్తరాంధ్ర రక్షణ వేదిక, తెన్నేటి ఫౌండేషన్ ప్రయత్నించాయి. జనవిఙ్ఞాన వేదిక (గంపలగుడెం శాఖ, కృష్ణాజిల్లా) ప్రతిజ్ఞ అంశాన్ని క్షేత్ర స్థాయిలోకి విస్తృతంగా తీసుకు వెళ్ళింది. మందడపు రాంప్రదీప్, పోతురాజు కృష్ణయ్య ల ఆధ్వర్యంలో తిరువూరు నియోజిక వర్గ పరిధిలో చదువుతున్న 25 వేల మంది విద్యార్థుల సంతకాలు సేకరించి సి.డి రూపంలో పొందుపరిచి విజయవాడ పార్లమెంట్ సభ్యులు శ్రీ కేశినేని నాని ద్వారా కేంద్ర, రాష్ట్ర ప్రభుత్వాలకు పంపడం జరిగింది. జనవిఙ్ఞాన వేదిక ఆధ్వర్యంలో కృష్ణా, గుంటూరు, ఒంగోలు జిల్లాల్లో ప్రతిజ్ఞ ప్రాముఖ్యతపై అవగాహన సదస్సులు నిర్వహించబడ్డాయి. పైడిమర్రి జీవిత చరిత్రతో కూడిన కర పత్రాలు ముద్రించి పంపిణీ చేయడం జరిగింది. విజయవాడలోని అన్నపూర్ణా దేవి ఉన్నత పాఠశాల ప్రతిజ్ఞకు ప్రాముఖ్యతనివ్వడానికి కృషి సల్పింది. ఎమ్.రాంప్రదీప్ (ఆర్లపాడు జిల్లాపరిషత్ ఉన్నత పాఠశాల ఆంగ్ల ఉపాధ్యాయుడు) పలు పాఠశాలలను సందర్శించి వేలాది మంది విద్యార్థులను కలుసుకొని పైడిమర్రి జీవిత చరిత్రను వివరించారు.ఎట్టకేలకు జనవిఙ్ఞాన వేదిక మరియు పలువురు ఇతర అభ్యుదయవాదులు చేసిన కృషి ఫలితంగా తెలుగు రాష్ట్రాలలో నూతనంగా ముద్రించిన పాఠ్య పుస్తకాలలో ప్రతిజ్ఞ ఎగువన పైడిమర్రి పేరు చేర్చడం జరిగింది. జాతీయ సమైక్యతకు, సమగ్రతకు ప్రతిజ్ఞ దోహదపడుతుంది. ప్రజలలో సోదర భావాన్ని పెంచుతుంది.పైడిమర్రి జీవిత చరిత్రను పాఠ్యాంశంగా చేర్చాలని జనవిఙ్ఞాన వేదిక డిమాండ్ చేస్తుంది. పైడిమర్రి వెంకట సుబ్బారావు జీవిత చరిత్రను ఎం. రాంప్రదీప్ తెలుగులో "భారతదేశం నా మాతృభూమి" పేరుతో వ్రాయగా 2016 జనవరిలో విజయవాడ పుస్తక మహోత్సవంలో ప్రముఖ విద్యావేత్త కే.ఎస్ లక్ష్మణరావు, మంత్రివర్యులు ప్రత్తిపాటి పుల్లారావు గార్ల చేతుల మీదగా వీ.జీ.ఎస్ బుక్ లింక్స్ వారు ఆవిష్కరించారు. ప్రస్తుతం ఆంగ్లంలో "ది ఫర్గాటెన్ పేట్రియాట్" పేరుతో రాంప్రదీప్ అనువదించగా, హిందీ ఉపాధ్యాయులు రేపాక రఘునందన్ పైడిమర్రి జీవిత చరిత్రను హిందీలోకి అనువదించారు. ప్రతిఙ వివరాల కొరకు రాంప్రదీప్ కేంద్ర ప్రభుత్వాన్ని సమాహార హక్కు చట్టం ద్వారా సంప్రదించగా ప్రతిఙ రచించింది పైడిమర్రేనని కేంద్రం తెలిపింది. 2016లో తెలంగాణా ప్రభుత్వం హైదరాబాద్ లోని రవింద్ర భారతిలో పైడిమర్రి సంస్మరణ సభను నిర్వహించింది. భారతీయులంతా ఒక్కటేనని చాటిచెప్పే ప్రతిఙకు మరింత ప్రాచుర్యం కల్పించాల్సిన అవసరం ఎంతైనా ఉంది. 2010 లో ఒక చురుకైన విద్యార్థి ఆంగ్ల ఉపాధ్యాయుడు రాంప్రదీప్ ను ప్రతిఙను ఎవరు రాశారు అని ప్రశ్నించడం దగ్గర నుంచి ప్రతిఙ ఉద్యమం ఊపందుకుంది. 

రచనలు

పుస్తక సేకరణ, పఠనం, కవితా వ్యాసంగం, వేద అధ్యయనం చేసేవారు. నోట్‌పుస్తకాలపై చాలా రచనలు చేశారు. అందులో అరబ్బీ అనువాదాలు కూడా ఉన్నాయి. జమిందారీ, భూస్వామ్య వెట్టిచాకిరీని నిరసిస్తూ ఎన్నో కథలు రాశారు. ఎక్కడ సాహిత్య కార్యక్షికమాలున్నా వెళ్లేవాడు. ప్రతి ఉగాదికి కవి సమ్మేళనంలో పాల్గొనేవారు.

ఆయన తన 18వ ఏటనే ‘కాలభైరవుడు’ (1936) పేరున చిన్న నవల రాశారు. దేవదత్తుడు, తులసీదాసు, త్యాగరాజు మొదలైన పద్యకావ్యాలు, బ్రహ్మచర్యము, గృహస్థ జీవితము, స్త్రీ ధర్మము, ఫిరదౌసి, తార, శ్రీమతి అనే నాటకాలు రాశారు. సింగపురీ నృకేసరీ శతకం, బాలరామాయణం, వెంక స్తుతి మొదలైన రచనలు సుబ్బారావు చేశారు. అనేక అనువాద రచనలు కూడా చేశారు. గోలకొండ, సుజాత, ఆంధ్రపవూతిక, భారతి, నవజీవన్, ఆనందవాణి పత్రికలలో వీరి రచనలు ప్రచురితమైనాయి. వీరి పద్యాలు గోలకొండ కవుల సంచికలోను, వీరి కథలు ఉషస్సు కథా సంకలనం, తెలంగాణ తొలితరం కథలులో ‘నౌకరి’ కథ వచ్చింది.

1945లోనే ఉషస్సు కథల సంపుటిని వెలువరించారు. 1945-46 లలో నల్లగొండలో జరిగిన ఆంధ్రసారస్వత పరిషత్తు సభలలో ప్రముఖ పాత్ర వహించారు. వీరి పదవీ విరమణ తర్వాత సర్వేలు గురుకుల పాఠశాలలో కొంతకాలం స్వచ్ఛందంగా పనిచేశారు. 1977 నుండి 1988 వరకు నల్లగొండ గాంధీ పార్కులో ఉచిత హోమియో వైద్య సేవలందించారు.

పైడిమర్రి రచనలను భవిష్యత్ తరాలకు అందించాలన్న ఉద్దేశంతో ఆయన లైబ్రరీని తన కుమారులు నల్లగొండలోని గీత విజ్ఞాన్ ఆంధ్ర కళాశాలకు అందించారు. ప్రస్తుతమది మూతపడింది. ఆ పుస్తకాలను జిల్లా గ్రంథాలయానికి మార్చే ప్రయత్నంలో ఉన్నారు. ప్రస్తుతం జనవిఙాన వేదిక ఆధ్వర్యంలో పైడిమర్రి శత జయంతి ఉత్సవాలు పలు ప్రాంతాల్లో ఘనంగా జరిగాయి. 

కుటుంబం

ఆయన సతీమణి వెంకట రత్నమ్మ.

మరణం

ఉద్యోగ విరమణ అనంతరం 1988, ఆగష్టు 13 న అనారోగ్యంతో తుదిశ్వాస విడిచారు.

పుస్తకాలలో పేరు ముద్రణ

పాఠ్య పుస్తకాలలో ప్రచురిస్తున్న ప్రతిజ్ఞకు పైడిమర్రి వెంకటసుబ్బారావు పేరును ముద్రించాలని తెలంగాణ విద్యావంతుల వేదిక 2014, నవంబరు 27న రాష్ట్రపతికి, ప్రధానమంత్రికి, రాష్ట్ర గవర్నర్‌కు తెలంగాణ సీఎం కెసీఆర్ కు విజ్ఞప్తి చేయగా, 2015-16 విద్యాసంవత్సరం నుంచి కేంద్ర, రాష్ట్ర స్థాయిల్లో అన్ని భాషల్లో అన్ని ప్రభుత్వ పాఠ్యపుస్తకాలలో జాతీయ ప్రతిజ్ఞతో పాటు రచయిత పైడిమర్రి వెంకట సుబ్బారావు పేరును ముద్రిస్తున్నారు. అంతేకాకుండా తెలంగాణ ప్రభుత్వం 5వ తరగతి తెలుగు పుస్తకం అట్ట వెనుక భాగం లోపలి పేజీలో పైడిమర్రి వెంకట సుబ్బారావు జీవిత చరిత్రను ముద్రించి విశేష ప్రాచుర్యం కల్పించి గౌరవించింది.[4]

సన్మానం

వీరు వ్రాసిన ప్రతిఙ అన్ని భారతీయ భాషలలోనూ ప్రచురితమైననూ, వీరి పేరు ఎక్కడా ప్రచురించలేదు. ఈ విషయం గురించి, విజయవాడలోని అన్నపూర్ణ నగరపాలక ఉన్నత పాఠశాల విద్యార్థుల, నెల్లూరు జిల్లాకు చెందిన తెలుగు ఉపాధ్యాయులు ఎం.శివప్రసాద్ తదితరులు చేసిన విఙప్తి ఫలితంగా కూడా  రచయిత పేరును ఆంధ్రప్రదేశ్ రాష్ట్ర పాఠ్య పుస్తకాలలో  ప్రచురించారు. రెండు తెలుగు రాష్ట్రాల పాఠ్యపుస్తకాలలోనూ వీరి పేరును ముద్రించిన సందర్భంగా, 2016, జనవరి-8వ తేదీనాడు, విజయవాడలోని కొత్తపేట అన్నపూర్ణాదేవి నగరపాలక ఉన్నత పాఠశాలలో మరియు పీ.డబ్ల్యూ గ్రౌండ్ లో విజయోత్సవ వేడుకలు నిర్వహించారు. ఈ సందర్భంగా ఆంధ్రప్రదేశ్ రాష్ట్ర శాసనమండలి సభ్యులు శ్రీ రామకృష్ణ, శ్రీ బుడ్డా వెంకన్నల సమక్షంలో, శ్రీ పైడిమర్రి కుమారుడు శ్రీ వేంకటసుబ్రహ్మణ్యం, శేషుకుమారి, కుమార్తె నాగలక్ష్మి, అల్లుడు శ్రీ పోతావఝ్ఝుల వేంకటేశ్వరశర్మ దంపతులను ఘనంగా సత్కరించారు. జాతీయస్థాయిలో గూడా అన్ని భాషల పాఠ్యపుస్తకాలలోనూ ఈ ప్రతిఙ రచయిత పేరును ప్రచురింపజేటట్లు ప్రయత్నం చేసెదమని ఈ సందర్భంగా ఈ శాసనమండలి సభ్యులు ఇద్దరూ హామీ ఇచ్చారు. ఈ కార్యక్రమంలో భాగంగా, కృష్ణా జిల్లా గంపలగూడెం మండలంలోని ఆర్లపాడు గ్రామ జిల్లా పరిషత్తు ఉన్నత పాఠశాలలో ఆంగ్ల ఉపాధ్యాయులుగా పనిచేయుచున్న శ్రీ మందడపు రాంప్రదీప్, శ్రీ పైడిమర్రి వెంకటసుబ్బారావు జీవిత చరిత్ర పుస్తకం ఆవిష్కరించారు.

మూలాలు

  1. నమస్తే తెలంగాణ, తెలంగాణ వార్తలు (13 August 2017). "ప్రాతఃస్మరణీయుడు పైడిమర్రి". www.ntnews.com. మూలం నుండి 17 August 2019 న ఆర్కైవు చేసారు. Retrieved 17 August 2019.
  2. ప్రజాశక్తి, ఎడిటోరియల్ (12 August 2019). "'ప్రతిజ్ఞ' ని నిలబెడదాం". www.prajasakti.com. యం.రాంప్రదీప్‌. మూలం నుండి 17 August 2019 న ఆర్కైవు చేసారు. Retrieved 17 August 2019.
  3. సాక్షి ఆదివారం సంచిక ఆగస్టు 10, 2014 11వ పేజీ
  4. నమస్తే తెలంగాణ, సంపాదకీయం (13 August 2016). "ప్రతిజ్ఞ పదశిల్పి పైడిమర్రి". www.ntnews.com. జె.విశ్వ. మూలం నుండి 17 August 2019 న ఆర్కైవు చేసారు. Retrieved 17 August 2019.

వెలుపలి లింకులు

  1. ఈనాడు అమరావతి; 2016, జనవరి-9; 2వపేజీ.
ఆనం చెంచుసుబ్బారెడ్డి

ఎ.సి.రెడ్డి గా పేరొందిన ఆనం చెంచుసుబ్బారెడ్డి నెల్లూరు ప్రాంతంలో సుప్రఖ్యాతులైన నాయకులు. స్వాతంత్ర్య సమరయోధులు.

తిరువూరు

తిరువూరు, ఆంధ్ర ప్రదేశ్ రాష్ట్రములోని కృష్ణా జిల్లా లోని జనగణన పట్టణం. పిన్ కోడ్: 521 235., ఎస్.టి.డి.కోడ్ = 08673.

పైడిమర్రి

పైడిమర్రి వెంకటసుబ్బారావు : రచయిత, మరియు బహుభాషావేత్త.

పైడిమర్రి రామకృష్ణ : రచయిత మరియు రేడియోనాటక రచయిత

భారత జాతీయ ప్రతిజ్ఞ

భారత జాతీయ ప్రతిజ్ఞను పైడిమర్రి వెంకటసుబ్బారావు రచించాడు. ఆయన 1962లో ఈ ప్రతిజ్ఞ తయారు చేశాడు. భారత్-చైనా యుద్ధం తరువాత విద్యార్థుల్లో దేశభక్తిని పెంపొందించడం కోసం ప్రతిజ్ఞకు పదాలు కూర్చాడు. కాసు బ్రహ్మానందరెడ్డి ప్రభుత్వంలో విద్యాశాఖ మంత్రిగా ఉన్న పీవీజీ రాజుకు దాన్ని అందజేశాడు. 1964లో బెంగుళూరులో ప్రముఖ న్యాయనిపుణుడు మహ్మద్ కరీం చాగ్లా అధ్యక్షతన కేంద్రీయ విద్యా సలహామండలి సమావేశం జరిపినపుడు జాతీయ ప్రతిజ్ఞగా స్వీకరించారు. తరువాత దీన్ని అన్ని భాషల్లోకి అనువాదం చేయించి 1965 జనవరి 26 నుంచి దేశమంతటా చదువుతున్నారు.పైడిమర్రి రాసిన ప్రతిజ్ఞలో కాలానుగుణంగా కొన్ని స్వల్ప మార్పులు మాత్రం జరిగాయి. గ్రాంథికంలో కొన్ని పదాల స్థానంలో వాడుక భాష వాడారు.

మెదక్ జిల్లా కథా రచయితలు

మెతుకు సీమగా ప్రసిధ్థి చెందిన మెదక్ జిల్లా తెలుగు కథకు సీమగా కూడా ఉంది. ఎంతో మంది తెలుగు కథా రచయితలు మెదక్ జిల్లాలో జన్మించారు.

వెంకట సుబ్బారావు

పైడిమర్రి వెంకటసుబ్బారావు, రచయిత, స్వాతంత్ర్యసమరయోధుడు.

అంకాల వెంకట సుబ్బారావు, ప్రముఖ చిత్రకారులు.

ఆలపర్తి వెంకటసుబ్బారావు, తెలుగు కవి.

ఆలూరి వెంకట సుబ్బారావు లేదా చక్రపాణి.

కంభంమెట్టు వెంకట సుబ్బారావు, ప్రముఖ సంగీత విద్వాంసులు.

కొడాలి వెంకట సుబ్బారావు, సుప్రసిద్ధ తెలుగు కవి.

దాసరి వెంకట సుబ్బారావు, సహకారోద్యమ ప్రముఖులు.

ద్రోణంరాజు వెంకట సుబ్బారావు, సాహిత్య కళాపోషకులు.

నండూరి వెంకట సుబ్బారావు, ప్రసిద్ధ గేయ రచయిత.

ముత్తా వెంకట సుబ్బారావు, ప్రముఖ న్యాయవాది.

రెంటాల వెంకట సుబ్బారావు, తెలుగు రచయిత.

వల్లూరి వెంకట సుబ్బారావు, సుప్రసిద్ధ రంగస్థల నటులు.

వీరగంధం వెంకట సుబ్బారావు, హరికథా ప్రముఖులు.

సుజాత (పత్రిక)

సుజాత సచిత్ర సారస్వత మాసపత్రిక తొలి సంచిక 1927 జనవరిలో వెలువడింది. హైదరాబాదు నుండి పసుమాల నృసింహశర్మ సంపాదకత్వంలో ఈ పత్రిక వెలువడింది. మాడపాటి హనుమంతరావు, సురవరం ప్రతాపరెడ్డి ప్రభృతులు ఈ పత్రిక నిర్వహణలో పాటుపడినారు. “త్రివర్ణ చిత్రములు, వాజ్మయ విషయిక విమర్శనలు, మహాకవుల జీవితములు, మనోరంజకములగు కథలు, నాటకములు, హృదయానందకరములగు పద్యములు, శాస్త్రీయ పరిశోధనా వృత్తాంతములు, ఆంధ్రదేశమునకు సంబంధించిన అముద్రిత శాసనములు, ఉత్కృష్ట ఆంధ్రేతర రచనల అనువాదములు, ముఖ్యముగా మహారాష్ట్ర, హిందీ, ఉర్దూ, ఫారసీ కవిత్వ విశేషణములు మున్నగునవి పేరుబడసిన పండితులచే వ్రాయింపబడి, ఉత్తమరీతిన ముద్రింపబడి ప్రకటింపబడును” అని ఈ పత్రిక ప్రకటించుకుంది. “ఈ సుజాతయు ఆంధ్రులయాడుబిడ్డగా ‘తెలంగాణ’మందు పుట్టినది. ‘సుజాత’ అన్వర్థయై సోదరాంధ్రుల కీర్తిభాగ్యములకు పెంపు తెచ్చునని విశ్వసించుచున్నాము.యుగాంతరముల నుండి ప్రవహించుచున్న ఆంధ్రసభ్యత భిన్న భిన్న నాగరకతల తోడునీడలలో మెలగి నేటికందిన విలక్షణ జీవితము ప్రదర్శించుటయే సుజాత యొక్క ప్రధాన సుభాషితము” అని మొదటి సంచికలోని స్వవిషయములో సంపాదకుడు తెలిపినాడు. ఈ పత్రిక 1940వరకు అత్యున్నత ప్రమాణాలతో నడిచింది. సురవరం ప్రతాపరెడ్డి, మల్లాది రామకృష్ణశాస్త్రి, గుడిపాటి వెంకటచలం, భాస్కర రామచంద్రరావు, బూర్గుల రామకృష్ణారావు,శేషాద్రి రమణ కవులు, ఉమర్ అలీషా,మాడపాటి హనుమంతరావు, సిరిగురి జయరావు, ఒద్దిరాజు సోదరులు మొదలైన వారి రచనలు ఈ పత్రికలో కనిపిస్తాయి. ప్రాచీనార్యులలో వర్ణ వ్యవస్థ(వ్యాసము), చండ భార్గవము(నాటిక), అదృశ్యశక్తి (కథ), నటి (కథ), ప్రేమపూజ(కథ), జరిగిన కథ(కథ),లండన్ విద్యార్థి(కథ),రక్తమూల్యము (కథ), ఆదిలక్ష్మి(కథ), విపరీత సాహసము (కథ) మొదలైన రచనలు ఈ పత్రికలో ప్రకటించబడ్డాయి.

తిరిగి ఈ పత్రిక వికృతి నామ సంవత్సరం శ్రావణ మాసానికి సరియైన 1950, ఆగస్టు నెలలో గడియారం రామకృష్ణశర్మ సంపాదకత్వంలో పునరుద్ధరింపబడి మూడు సంవత్సరాలు నడిచింది. రెండవసారి ప్రారంభమైన ఈ పత్రిక తొలి(?) సంచికలో సంపాదకుడు ఈ విధంగా నివేదనము చేశాడు.“నాటి ‘సుజాత’ పోకడలు ఆదర్శనీయములు. ఆ గౌరవము చేతనే ఆ పేరును గ్రహించితిమి. ఆ స్థాయిని అందుకొనగలిగినచో కృతార్థులమయ్యెదము. సంస్కృతి ప్రచారము, ఆంధ్రుల అభ్యుదయ వికాసములే మా పరమ లక్ష్యములు.సాహిత్యము, చరిత్ర, విజ్ఞానములకు సంబంధించిన రచనలకు ప్రాధాన్యత ఒసగబడును. సరళములై, సుబోధకములై ఉన్న ఉత్తమ రచనలకు స్వాగతము పల్కెదము”

1950లో పునఃప్రారంభమైన పత్రికలో అంబటిపూడి వెంకటరత్నం, అనుముల సుబ్రహ్మణ్యశాస్త్రి, పొట్లపల్లి రామారావు, పల్లా దుర్గయ్య, దూపాటి వెంకట రమణాచార్యులు, గిడుతూరి సూర్యం, ఆదిరాజు వీరభద్రరావు, గడియారం వెంకటశేషశాస్త్రి, మల్లంపల్లి సోమశేఖరశర్మ, బిరుదురాజు రామరాజు, చొల్లేటి నృసింహశర్మ, వేలూరి శివరామశాస్త్రి, కోదాటి నారాయణరావు, కాళోజీ నారాయణరావు, వానమామలై వరదాచార్యులు, నందగిరి ఇందిరాదేవి, పైడిమర్రి వెంకటసుబ్బారావు, పుట్టపర్తి నారాయణాచార్యులు, తల్లావఝుల శివశంకరస్వామి, దాశరథి కృష్ణమాచార్య, పర్చా వెంకటేశ్వరరావు, దేవులపల్లి రామానుజరావు తదితరుల రచనలు ప్రచురింపబడ్డాయి.

ఇతర భాషలు

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.