The euro (Siller sign: €; baunkin code: EUR) is the offeecial siller o the European Union's Eurozone that at the meenit conseests o 19 states (Austrick, Belgium, Cyprus, Estonia, Finland, Fraunce, Germany, Greece, Ireland, Italy, Latvia, Lithuanie, Luxembourg, Maltae, the Netherlands, Portugal, Slovakie, Slovenie, Spain).
It is the ae siller for mair nor 320 million Europeans. Includin airts uisin sillers pegged tae the euro, the euro directly affects close tae 500 million fowk warldwide.
Wi mair nor €610 billion in circulation as o December 2006 (equeevalent tae US$802 billion at the exchynge rates at the time), the euro is the siller wi the hiechest combined vailie o cash in circulation in the warld, haein surpassed the U.S. dollar.
The euro wis introduced tae warld financial mercats as an accoontin siller in 1999 an lenched as pheesical cunyies an baunknotes on 1 Januar 2002. It replaced the umwhile European Currency Unit (ECU) at a ratio o 1:1.
The euro is dividit intae 100 cents (whiles cried eurocent, especially whan sinderin it frae the U.S. cent or the umwhile currency in a parteecular kintra). Aw circulatin euro cunyies (includin the €2 commemorative cunyies) haes a common side shawin the denomination (vailie) wi the auld 19 EU-kintras in the backgrund. Frae 2007 or 2008 on (lippenin on the kintra whaur the cunyie is issued) that "auld" cairt is replaced bi a cairt o Europe, that nou shows nane-EU-members sic as Norrowey. The cunyies haes a naitional side shawin an eemage speceefically waled bi the kintra that issued the cunyie. Euro cunyies frae ony kintra can be freely uised in ony naition that haes adoptit the euro.
The euro cunyies are €2, €1, €0.50, €0.20, €0.10, €0.05, €0.02, an €0.01. In the Netherlands cash transactions is roondit tae the nearest five cents, tae avoid the uise o €0.02, an €0.01, an in Finland, the twa smawest denominations isna ony langer struck, tho thay remain legal tender thare. (See Linguistic issues concernin the euro an aw.)
Commemorative cunyies wi €2 face value hae been issued wi chynges tae the design o the naitional side o the cunyie — as Greece did for the 2004 Summer Olympics. Thir twa-euro cunyies is legal tender throughoot the Eurozone. Cunyies wi various ither denominations hae been issued an aw, but thir are no intendit for general circulation. Thir later cunyies are anly legal tender in the naition that issued them.
Aw euro banknotes hae a common design for each denomination on baith sides. Notes are issued in €500, €200, €100, €50, €20, €10, €5. The design for each o them haes a common theme o European airchitecture in various airtistic periods. The front (or recto) o the note features windaes or gateways while the back (or verso) haes brigs. Care haes been taen sae that the airchitectural examples dinna represent ony actual existin monument, sae as no tae induce jealousy an controversy in the choice o whilk monument should be depictit. Some o the hiechest denominations sic as the €500 are no issued in a few kintras, tho thay remain legal tender athort the Eurozone.
Thir 19 kintras thegether is frequently referrit tae as the Eurozone or the euro airt, or mair informally "euroland" or the "eurogroup". Ootside o the airt covered bi the cairt, the euro is the legal siller o the French owerseas possessions o French Guiana, Réunion, Saint-Pierre et Miquelon, Guadeloupe, Martinique, Saint-Barthélemy, Saint Martin, Mayotte, an the uninhabited Clipperton Island an the French Southern an Antarctic Lands; the Portuguese autonomous regions o the Azores an Madeira; an the Spainyie Canary Islands.