Спасѣня

Спасѣня, (лат.) salvatio; (гр.) σωτηρία sotería — переважно в христианствѣ — религийный идеал (благодать Божа), досягнутя котрого покладать ся за цѣль каждого вѣруючого, а конечно досягать ся по смерти.[1][2]

Од грецкого корѣня наука о спасѣню называть ся сотерология.

Leonardo da Vinci, Salvator Mundi, c.1500, oil on walnut, 45.4 × 65.6 cm
Леонардо да Винчи
Спаситель свѣта, ок. 1500

Христианство

Догматично и теологично в христианствѣ спасѣня беруть яко часть Божого плана заряджѣня свѣта и людства.[1]

Подля христианского учѣня через первородный грѣх Адама и Евы их потомство упало в грѣх. Бог послав свого сына Исуса, обы своим отѣлеснѣньом, смертьов и воскресѣньом спокутовав их грѣхы и принюс спасѣня людьом, зашто названый Спаситель, Христос.

Авшак меджи розличныма конарями христианства не е згоды в том, якым путьом може вѣрник достати спасѣня.[1]

Иншы монотеистичны религии

Ни ислам,ни юдаизм не вызнавать христианску концепцию первородного грѣха, а одты, ани выкуплѣня. В юдаизмѣ иде не о спасѣня, але о збавлѣню (геула), и не так окремого чоловѣка, як цѣлого народа Израиля, котрый мать быти вывольненый Богом од утиску околичным свѣтом в границях истории; при тому «частку в Будучом свѣтѣ» достануть вшиткы приверженцѣ юдаизма, што не одпали од него и не учинили тяжкы непростимы грѣхы. В исламѣ спасѣня означать помилованя вѣруючых Аллагом в Судный день, понеже подля ислама никто не несе на собѣ ни чужы грѣхы, ни чужы заслугы. Заслугы Аллаг одмѣнять, а за грѣхы або карать, або помилуе.[1]

Немонотеистичны религии

В немонотеистичных религиях идеал спасѣня в чистом видѣ неможный понеже там не е представа о безсмертю душѣ (таоизм, будгизм, конфуцианство), або не розвита особна концепция Бога яко Творця и Охранителя (будгизм, политеистичны религии).[1]

Жерела и одказы

  • Энциклопедия религий / Под ред. А.П. Забияко, А.Н. Красникова, Е.С. Элбакян. — М.: Академический Проект (ISBN 978-5-8291-1084-0), Гаудеамус (ISBN 978-5-98426-067-1), 2008. — 1520 с.
  • Катехизис католической церкви. Компендиум. Сс. 131-134. Доступно онлайн

Референции

  1. 1,0 1,1 1,2 1,3 1,4 Энциклопедия религий, сс. 1202-1203.
  2. Катехизис католической церкви. Компендиум. Сс. 131-134.
Помазаня хворых

Помазаня хворых, остатне помазаня або елеопомазаня, (лат.) unctio infirmorum — тайна, в котрой тяжко хворый чоловѣк через помазаня олайом и через молитву священика достане благодать Божу на спасѣня душѣ и на здоровя тѣла. Елеопомазаня може прияти каждый христиан, котрый е тяжко хворый, або умерать.Елеопомазаня може ся принимати вецей разы, але в припадѣ того истого охворѣня лем еден раз: кедь же ся хворый выздоровѣв, а по часѣ зась ся тяжко похворѣе, тогды може приняти помазаня зась.

Свята тайна

Свята тайна, (лат.) sacramentum – святе дѣло, присяга, (гр.) μυστήριον mystérion – тайна) — видимый знак невидимой ласкы Божой, од Исуса Христа установленой дѣля нашого спасѣня. Святы тайны суть — богоустановлены святы дѣйства, в котрых под видимым образом передавать ся вѣруючым невидима благодать Божа. На роздѣл од обрядох (освячѣня воды, погребу умерлых и др.), котры суть церковного походжѣня, святы тайны ся поважують установленыма самым Исусом Христом и суть покликаны змѣнити не вонкашный, але внуторный живот чоловѣка.

Теология

Теология або богословие, з (гр.) θεολογία theologia < θέος theos бог + λόγος logos слово — наука о Богу, або о богах и дотычных темах (чудеса, души, живот по смерти и т.п.). Термин ся вывинув и хосновав зачаточно в одношѣню до христианства, але можеме говорити и о теологии иншых набоженств. Люде, котры розвивають и учать теологию, звуть ся теологами.

Іншыма языками

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.