ايډيالوژي

ايډيالوژي په لغت كې مفكورې ته ويل كېږي او په اصطلاح كې د ټولو سياسي، اقتصادي، اجتماعي، هنري او حقوقي نظرياتو مجموعې ته ايډيالوژي وايي. يا په بله ژبه د تاکتيک او ستراتيژۍ مجموعې ته ايډيالوژي وايي.

ناپېيلې هېوادونه

ناپېيلې هېوادونه دغه اصطلاح په هغو هېوادونو اطلاق كېږي چې د خيتځ او لويديځ تړونونو څخه د مستقل سياست پېروي كوي. په عمومي ډول ناپييلي هېوادونه هغو هېوادونو ته ويل كېږي چې د ختيځ او لويديځ بلاك هېوادونو د سياست تابع نه وو، مستقل خارجي سياست يې درلود. يا په بله ژبه د دواړو بلاكونو په وړاندې يې تعهد نه درلود. ناپېيلي هېوادونه د ختيځ او لويديځ بلاك په څېر نظامي او سياسي اتحاديه نه وه او ددې دواړو بلاكونو په وړاندې يې كوم نظامي تړون نه درلود، يوازې يې د يوې اخلاقي قوې په توگه په بين المللي سياست كې نفوذ درلود. ناپېيلي هېوادونو د كپيټاليزم او كمونيزم په وړاندې كومه گډه مشخصه ايډيالوژي نه لرله. بلکه مختلفوهېوادونو مختلف ايډيالوژيك تمايلات او مختلف سياسي رژيمونه لرل. ددې هېوادونو د ناپېيلتوب سياست د دوى په خپلو ملي منافعو، له نړيوالې جگړې څخه د ځان ساتنې، په نظامي تړونونو كې د نه گډون او د نړيوال بحران د تخفيف په لزوم اتكاء لرله.

ټوټالېټر

ټوټالېټر په لغت كې د جامع معنا وركوي او د صفت په ډول په هغو رژيمونو اطلاقيږي چې دا لاندې مشخصات ولري.

په ټولو سياسي، اجتماعي او اقتصادي چارو كې د دولت شديد نظارت موجود وي.

ټول سياسي قدرت د يوه حزب په واك كې وي او د ټولنې د ټولو ديموكراتيكو افكارو څارنه كوي. د انتقاد مخه په كلكه نيسي، منتقدين وهي، ځينې د محبس تورو تمبو ته غورځوي او وژني يې.

په حزب او دولت كې په مطلق ډول د يوه تن تسلط موجود وي.

په زور او جبر حاكم حزب خپله حزبي ايډيالوژي د ټولنې په ټولو اقشارو كې خپروي او فردي آزادي له منځه وړي.

د مخالفينو د سركوبولو او له منځه وړلو له پاره هر ډول ترور، اختناق او بې شرمانه اعمالو ته هڅه كوي. په ټوټاليټر دولتونو كې د ټولنې او افرادو په سياسي، اجتماعي او اقتصادي ژوند كې د دولت مداخله هيڅ حد نه لري.دغه ډول فعاليتونه، حتى هنري او ادبي فعاليتونه تر څارنې لاندې نيسي او د جمعي ارتباط په ټولو الكتريكي او طباعتي وسايلو، جدي او كلك مراقبت جاري ساتي. ټوټاليټر دولتونه داسې ډلې او اشخاص چې د دوى د قضاوت او نظارت له حوزې څخه د باندې وي، نه شي تحمل كولاى. دغه ډول خلك لومړى په يوه حزب كې په ديموكراتيك شكل متشكل كېږي، خو كله چې قدرت ته ورسېدل نو بيا ديموكراسي يوې خواته ږدي او له خپل قدرته كار اخلي. په دنيا كې ددې ډول نهضتونو بارزه نمونه د هټلر ناسيونال سوسياليست گوند ؤ چې د ديموكراسۍ له لارې قدرت ته ورسېد، قدرت ته د رسېدو سره سم يې ديموكراسي يوې خواته وغورځوله او په غورو او زورگويو يې پېل وكړ. د ايټاليا فاشيست او د المان نازي دولتونه د ټوټاليټر دولتونو ښې نمونې دي.

ټول كمونستي دولتونه هم د ټوټاليټر دولتونو په كتگوريو كې حسابيږي چې ښه مثال يې په افغانستان كې د ۱۳۵۷ لمريز كال د ثور د اومې نېټې څخه وروسته د تره كې، امين،كارمل او ډاكټر نجيب كمونستي حكومتونه دي.

په نورو ژبو کې

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.