Oostern

An dat Fest vun Oostern (ok Paaschen, Paasch oder Paosken) warrt fiert, dat Jesus vun den Dood upstahn is. Dat Nee Testament vertellt, dat dat „an'n drüdden Dag“ na sien Dood passeert is. Dor tellt de Dag, wo he sturben is, de Stille Freedag, as eerste Dag bi. Upstahn is he denn an'n Sünndag na den Stillen Freedag. Dat is de Oostersünndag.

So, as de Kark un de Theologen dat anseht, is Oostern dat wichtigste christliche Fest. Dat hannelt ja dor vun, dat Gott sien Söhn endgüllig över den Dood un över de Höll wunnen hett.

Dat öllste Tüüchnis vun düssen Globen steiht in den 1. Breef an de Christen in Korinth vun den Apostel Paulus. Dor schrifft he in dat 15. Kapitel:

Mit dat Eerste, wat ik an Jo wiedergeven hebb, weer dat, wat ik ok süms toeerst to weten kreeg: Christus is storven för use Sünn- dat betüügt de Bibel. Un he is in't Graff leggt. Un he is upweckt an'n drüdden Dag- ok dat weet wi ut de Bibel. Un Kephas hett em to sehn kregen, un denn de Twölf. Denn hefft em mehr as 500 Bröder to sehn kregen, un dat up eenmol. Dorvun sünd de mehrsten noch hüüt an't Leven. Bloß en poor sünd al doot. Un denn hett Jakobus em to sehn kregen, un denn all de Apostels. Toletzt vun jem all hebb ik em ok noch to sehn kregen.

Man ünner dat Volk, tominnst in Düütschland un de Länner dor ümto, warrt Oostern nich so wichtig ansehn, as t.B. Wiehnachten. Bit up den hüdigen Dag warrt dor üm streden, ob dat Fest an un for sik ut de Tiet vun dat germaansche Heidendom vun herkummt. Wichtige Symbolen vun Oostern, as de Oosterhaas hefft jedenfalls nix mit den christlichen Globen to kriegen. Man de is ok eerst in dat 20. Johrhunnert to so'n wichtig Anbacksel vun dat Paaschfest wurrn.

Grunewald - christ
Matthias Grünewald,
Isenheimer Altar.

Wo dat Woort Oostern vun herkümmt

Dat düütsche Ostern un dat plattdüütsche Oostern hett woll dat sülbige Herkamen as dat engelsche Easter. Man een weet just nich genau, wo de Wöör nu akraat herkamen doot. Dor gifft dat verscheden Theorien över:

  • In den Duden steiht to lesen, dat de Naam al in de Tiet vun de Germanen een heidnisch Vörjohrsfest meent hett.Dat schall sien Naam vun en heidnisch Göddin harrt hebben. In ooltengelsche Texten steiht de ehr Naam as Eostrae schreven. Dat is woll desülbige Göddin, de vedisch usra heten deit, ooltgreeksch Eos, up litausch ausra un in de Latiensche Spraak Aurora (Morgenroot). So warrt annahmen, dat düsse Göddin en Göddin vun dat Licht weer und ehr Fest harr denn wat mit dat Tonehmen vun dat Licht in dat Vörjohr to doon. So meen dat Beda Venerabilis al in dat 8. Johrhunnert in sien Schrift „de temporum ratione“. Jacob Grimm hett sik an düsse Meenung anslaten. Anner Forschers twiefelt dor an, ob dat bi de Germanen ehr Gloven so en Göddin överhaupt geven hett.
  • Annere Lüde meent, dat geiht bi dat Woort Oostern dorüm, dat in dat Middelöller de Dööp to Oostern in de Tiet vun dat Morgenroot ansett weer. Dorüm hett dat Dööpfest to Oostern den germaanschen Naam för dat Morgenroot kregen.
  • Honorius Augustodunensis meent in dat 12. Johrhunnert, Oostern keem vun Oosten. In düsse Gegend vun den Himmel geiht ja morgens fröh de Sünn up. Un dat Upgahn vun de Sünn weer doch en Teken för dat Upstahn vun de Doden.
  • Noch annere meent, dat Woort Oostern kümmt vun den latienschen christlichen Ökelnaam för de Week vun Oostern her: albae paschales (dat sünd de witten Kleeder för de Lüde, de nee döfft weert). De korte Form albae warrt denn direktemang in de germaansche Spraak översett un dor heet dat denn eostarum.
  • De Naamforscher Jürgen Uloph seggt, in de noordgermaanschen Spraken gifft dat en Familie vun Wöör, de to Oostern passen deit: ausa (Water geten) un austr (begeten). Dat Woort Oostern schall denn vun de Dööp her kamen, wo de Lüde mit Water begaten weert. Düsse Dööp is ja de Hööftsaak in de Goddesdeensten vun de Oosternacht.

In de meisten Spraken kümmt dat Woort för dat Oosterfest vun dat jöödsche Fest Pessach (Passa) vun her. So is dat bi dat ole plattdüütsche Woort för Oostern: Paaschen oder Paasch (dat in't Westen van't plattdütsche Gebiet noch bruukt woord), un ok in de Nedderlannsche Spraak: Pasen. Up italieensch heet Paaschen pasqua, up Spaansch pascua, up Franzöösch: Pâques, up Greeksch Πάσχα (= Pas'cha), up Russisch пасха (paskha), up Esperanto Pasko, up Sweedsch påskdagen un up Isländsch páskar. In de meisten Spraken vun de Slawen warrt to Oostern 'Grode Nacht' oder 'Grode Dag' oder ok 'Upstahn' seggt.

Dat christlich Osterfest

Vun dat Johr 1091 af an fangt de Festkrink vun Oostern in de Karken vun den Westen an'n Aschmiddeweek an. Dor folgt denn en Fastentiet vun 40 Daag up. Düsse Tiet wiest up de 40 Johr vun dat Volk Israel in de Wööst un ok up de 40 Daag, de Jesus to Anfang in de Wööst ween is to'n fasten. Düsse Bußtiet vör Paaschen geiht just mit den Sünnabend vör Oostern to Enn. De Sünndaag weert nich mitrekent un so sünd dat akraat 40 Daag. In de Karken vun den Oosten weert de Sünndaag mitrekent to de Fastentiet, man dor warrt nu wedder de Stille Week vör Oostern nich mit torekent. So kaamt se ok up 40 Daag. De leste Week vör Oostern heet Stille Week. Se fangt mit den Palmsünndag an. Dor fiert de Christen, dat Jesus as en König na Jerusalem intagen is. An'n Grööndunnersdag warrt Jesus sien lest Abendmahl fiert. An den Stillen Freedag denkt de Christen an Jesus sien Dood an dat Krüüz. Den Sünnabend vör Paaschen warrt de Roh vun dat Graff spöört un an den drüdden Dag vun den Stillen Freedag af an rekent, is dat Fest vun Jesus sien Sieg över den Dood.

Oostern is en vun de beweglichen Festen vun dat Christendom. Jedet Johr liggt dat up'n annern Termin. All beweglichen christlichen Festen (as Himmelfohrt un Pingsten) weert vun Paaschen af an rekent. De Oostersünndag hangt nu direktemang mit de Jöden ehr Passafest tosamen. Dorüm is Oostersünndag jümmers an den Sünndag nah den 14. Dag vun den jöödschen Monaat in't Vörjohr, dat is de Nisan. Eenfach kann een seggen: Oostern is jümmers an den eersten Sünndag nah den eersten Vullmaand in't Vörjohr (wenn de Daag un de Nächt tominnst wedder gliek lang sünd).

Up wat för'n Dag liggt de Oostersünndag

Kiek ok na bi

(343) Ostara

(343) Ostara is en Asteroid ut den Hööftgördel, de an’n 15. November 1892 vun de düütschen Astronom Max Wolf in Heidelbarg opdeckt worrn is.

De Asteroid driggt den Naam vun de fröhnoordsche Fröhjohrsgöddin Ostara, vun de ok de Beteken Oostern afleidt is.

April

De April, ok as Aprilmaand un Oostermaand bekannt, is in’n Gregoriaanschen Klenner de veerte Maand in dat Johr. De April hett 30 Daag un höört to dat Fröhjohr.

De Naam kummt vermootlich von dat latiensche Woort aperire, wat soveel heet as open gaan. Dat betütt sik denn woll dorop, dat in’n Fröhjohr de Knospen open gaat. En olen düütschen Naam för dissen Maand is ok Oostermaand – de weer dör Karl den Groten in’n 7. Johrhunnert inföhrt worrn – wieldat Oostern meistens in’n April liggt. Annere Naams, de hüüt aver kuum mehr bruukt warrt, sünd Wannelmaand oder Launing .

In’n röömschen Klenner weer de April de tweete Maand. De April fangt jümmer mit den lieken Wekendag an as de Juli, man in Schaltjohren fangt he mit den lieken Dag as de Januar an.

De Begreep Aprilwedder steiht för dat wesselhafte Wedder, dat faken in’n April vörkummt. Dat seggt man hüüt aber ok, wenn dat gor nich in’n April is.

An’n 1. April mutt man oppassen, as dat Bruukdom is, annere Lüüd „in’n April to schicken“. Dat heet nix anners, as dat een annere Lüüd bannig verschietern un anlegen deit. Den Aprilschaabernack gifft dat tominnst al siet dat 16. Johrhunnert.

Dat heet ok, dat de Düvel an en 1. April ut den Heven verdreven worrn is.

Christian Heinrich Plaß

Christian Heinrich Plaß (* 29. Juli 1812 in Veern; † 6. Juni 1878 in Stood) weer en düütschen Pädagoog.

Plaß is 1812 as Söhn von Lucie, borene Zeidler, un den Koopmann Christian Heinrich Plaß (9. März 1769–17. Dezember 1815) in Veern boren. Hermann Gottlob Plaß weer sien Broder. He weer bet Oostern 1829 op de Doomschool Veern un hett von 1829 af an evangeelsche Theologie un Philologie an de Universitäten Halle (bet Oostern 1831), Jena (bet Michaelis 1832) un Göttingen (bet Oostern 1833) studeert un weer in disse Tied Maat von dat Corps Marchia Halle un Franconia Jena. Na dat Studium is he 1833 Privatschoolmeester in Wandsbek worrn. Michaelis 1835 keem he as Kollaborater na Stood an dat Athenaeum. Dor is he 1846 Kunrekter worrn un 1851 denn Rekter. He weer gliektiedig Rekter von de Real-, Börger-, Vör- un Middelschool. Dat is he bet to sien Dood 1878 bleven.

Von 1851 af an weer he ok in’n Vörstand von’n Vereen för Geschicht un Öllerdömer von de Hartogdömer Bremen un Veern un dat Land Hadeln. He weer Maat in’n evangeelschen Karkenvörstand in Stood un von 1863 af an in de Bezirkssynood.

Von’n 18. Mai 1848 bet 30. Mai 1849 weer he as Afornten för den 19. hannöverschen Wahlbezirk Maat von de Frankforter Natschonalversammlung (Württemberger Hof, Märzvereen). He hett dor för Friedrich Wilhelm IV. as düütschen Kaiser stimmt un weer in’n Utschuss för Karken- un Schoolsaken. In’n Juni 1849 weer he ok Deelnehmer von de Gothaer Versammlung.

He hett Berta Frank (21. März 1816–1855) freet. De beiden harrn de Kinner Marie (* 10. November 1840), Julius (* 3. März 1844), Hermann (* 9. Januar 1846), Anna (4. April 1848–25. Juli 1880), Elisabet (* 31. Dezember 1849) un Friedrich (* 29. Dezember 1851).Nadem sien eerste Fro doodbleven is, hett he in twete Eh Dorothea Krause (* 7. Februar 1830) freet. Mit ehr harr he den Söhn Kark (* 25. Juli 1860).Plaß is 1878 na en Slaganfall doodbleven.

Eduard Damköhler

Eduard Damköhler (* 13. März 1853 in Cattenstedt; † 26. Dezember 1934 in Blankenburg) weer en düütschen Schoolmeester, Volkskundler un Dialektoloog.

Damköhler is 1853 in Cattenstedt boren. He weer von Oostern 1866 bet Oostern 1874 op dat Gymnasium Blankenburg un hett denn bet Oostern 1877 an de Universität Göttingen klassische Philologie, Germanistik un Geschicht studeert. Dat Studium hett he mit dat Staatsexamen afslaten. Von Michaelis 1877 af an weer he an dat Gymnasium Helmstidde Kannedaat un wetenschoplichen Hülpslehrer. An’n 21. August 1879 is he dor as Gymnasiallehrer anstellt worrn. To Michaelis 1887 is he as Schoolmeester an dat Gymnasium Blankenburg wesselt.

Ferdinand Vollbrecht

Johann August Ferdinand Vollbrecht (* 20. August 1812 in Ostroe; † 24. März 1897 in Hannover) weer en düütschen Pädagoog.

Vollbrecht is 1812 in Ostroe boren un weer dor von Juni 1817 af an op de gymnasiale Stadtschool. De School hett he 1830 afslaten. Kort vörher, dör de Verordnung von’n 11. September 1829, mit de in dat Königriek Hannover Maturitätsprüfungen vörschreven worrn sünd, harr de School aver dat Recht verloren, dat de Schölers na de Universität wesseln dröfft. Dorüm müss Vollbrecht to Michaelis 1830 an dat Andreanum in Hilmssen gahn. Dor hett he 1832 de Maturitätsprüfung maakt.Vollbrecht wull egentlich Theologie studeren, aver Rekter Gottfried Seebode hett em to de Philologie bröcht, de he denn an de Universität Göttingen studeert hett.1837 hett he dat examen pro facultate docendi bestahn un hett to Oostern 1837 an de Stadtschool Ostroe sien Probejohr anfungen. As dat Johr rüm weer, hett he sik op en Steed in’n Schooldeenst von dat Königriek Hannover beworven, aver kunn toeerst keen Steed kriegen. Bet 1840 is he as Lehrer an de Stadtschool bleven un hett sik as Huuslehrer dörslahn. Eerst to Oostern 1840 hett he en Steed as provisorischen Kullaborater an dat Gymnasium Lingen kregen.

He weer von 1856 bet 1885 Rekter von de Högere Börgerschool Oterndörp, de von 1882 af an Realprogymnasium weer. 1885 is he in Rohstand gahn.Vollbrecht hett 1885 den Roden Aadlerorden IV. Klass kregen.

Georg Friedrich Schrader

Georg Friedrich Schrader (* 7. September 1797 in Bleikd; † 14. August 1875 in Göttingen) weer en düütschen Verwaltungsbeamten.

Schrader is 1797 in Bleikd boren. He weer von Oostern 1812 bet Oostern 1815 op de Kloosterschool Ilfeld.1821 weer he Auditer bi dat Amt Garze. He weer denn Amtsassesser in dat Gericht Land Hadeln in Oterndörp un von 1837 bet 1841 dor interimistisch Amtsverwalter. Von 1841 bet weer he as Amtsassesser intermistisch Amtsverwalter in dat Amt Jemgum.

1846 is Schrader as Nafolger von Amtmann Carl Christoph Niemeyer Amtsverwalter von dat Amt Sieenborg worrn. Toeerst weer he noch Amtsassesser, is denn aver richtigen Amtmann worrn. As dat Amt Sieenborg 1852 oplööst worrn is, is Schrader Oberamtsrichter von dat Amtsgericht Lingen worrn. Dat is he bet 1858 bleven.

Gregoriaansch Klenner

De Gregoriaansche Klenner is de Klenner, de vundaag in de mehrsten Delen vun de Welt gellt. Nöömt is de na den Paapst Gregor XIII., de den ann Enn vun’t 16. Johrhunnert utklamüstert laten hett. In de verleden Johrhunnerten hett de Gregoriaansche Klenner vele annere Klennerformen aflöst. De letzte Ümstellen weer 1949 in China.

Harsfeld

Harsfeld (hoochdüütsch Harsefeld) is de Hauptoort von de Gemeen Harsfeld (Samtgemeen Harsfeld) in’n Landkreis Stood in Neddersassen.

Histoorscch gellt Harsfeld as Flecken. To’n Flecken Harsfeld höört ok de lüttjeren Öörd Griemshorst un Wittenfell mit to.

Hinnerk Braasch

Hinnerk Braasch (* 21. Juli 1878 in Kutenhult; † 16. Februar 1968 in Bissendärp, Wiemark) weer en plattdüütschen Schriever.

Braasch is 1878 in Kutenholt op de Stoder Geest boren un weer von 1898 bet 1902 op dat Seminar in Stood. To Oostern 1904 is he as Schoolmeester na Bissendärp tagen. An’n 21. Juli 1904 hett he sien Froo Sophie freet, mit de he twee Döchter harr. He hett üm un bi 1930 dat ole Lusthuus in’n groten Amtsgoorn in Bissendärp (vondaag In’n Wöhren 5) köfft, dat he Haus Urfried nömen dee.Braasch hett Texten, Gedichten un Bidrääg för den Schoolfunk un Radiosennungen op Platt schreven, de över de Senners NORAG, den Riekssenner Hamborg un den NWDR utstrahlt worrn sünd.

In’n Heimatbund Neddersassen weer he Ehrenliddmaat.

An’n 2. September 1954 hebbt de neddersassische Ministerpräsident Hinnerk Willem Kopp un Landdagspräsident Karl Olfers Braasch för sien Insetten för de plattdüütsche Spraak dat Bundsverdeenstkrüüz tokennt. He is Ehrenbörger von Bissendärp.

Dat Richard-Brandt-Heimatmuseum in Bissendärp wiest Stücken to Braasch sien Leven un Arbeid.

Lüder Gottlieb Kückens

Lüder Gottlieb Kückens (* 6. Dezember 1797 in Ranzenbüttel; † 7. April 1842 in Deesdörp) weer en ollnbörgschen Verwaltungsbeamten.

Kückens is 1797 as Söhn von Gesche, borene Schmidt, un den Landmann Klaus Kückens in Ranzenbüttel boren. He is op’n Hoff von de Öllern opwussen un schull later den Hoff von sien Vader övernehmen. Bet to sien Kumfermatschoon weer he blots op de eenfache School. Eerst 1814 hett he beslaten to studeren. Den eersten Ünnerricht in de ölleren Spraken hett he bi’n Katecheet Muhle in Berne kregen. As Muhle in’n Harvst 1815 Pastoor in Hude worrn is, güng Kückens mit em. To Oostern 1816 is he denn op dat Gymnasium Ollnborg opnahmen worrn. Dor hett he ok Privatünnerricht von Rekter Friedrich Reinhold Ricklefs kregen. Al to Oostern 1818 hett he dat Abitur maakt un hett denn en Studium von de Juristeree an de Universität Göttingen anfungen. Dor weer he ünner annern Schöler von Hugo un Thibaut. In’n Harvst 1818 is he denn aver för dree Semester an de Universität Heidelberg wesselt. Dor weer he Schöler von Thibaut, Zachariae, Roßhirt, Cropp un Gensler. To Oostern 1820 keem he wedder an de Universität Göttingen un hett dor ünner annern Eichhorn, Heeren un Bergmann höört.1821 keem he na dat Groothartogdom Ollnborg trügg un is an’n 9. November 1821 Amtsauditer bi dat Amt Minsen worrn. Von dor is he in’n Sommer 1832 in dat Amt Gannerseer wesselt un Anfang 1826 in dat Amt Bockhorn. An’n 24. Dezember 1825 hett he dat Staatsexamen bestahn un is an’n 13. September 1827 tweten Regerungssekretär worrn. An’n 3. März 1829 is he eersten Sekretär worrn. In’n Harvst 1830 hebbt se em as tweten Beamten un Amtmann in dat Amt Jever versett. Von dor is he an’n 3. März 1833 as eersten Beamten na Deesdörp in dat Amt Landwörden wesselt. Dat is he bet to sien Dood 1842 bleven.Kückens hett an’n 23. September 1825 in Gannerseer Gesina Friederike Kückens freet. De beiden harrn dree Kinner.

Oostereis

Oostereis is en Oort un Gemeen in de Samtgemeen Sürsen in’n Landkreis Rodenborg (Wümm) mit 923 Inwahners (Stand 31. Dezember 2017). To de Gemeen höört ok de Oortsdeel Rocks.

Oosterfüer

Oosterfüür warrt to Oostern ansteken. Dat is en olen Bruuk, den dat al to vörchristliche Tieden geven hett. De Heiden wullen fiern, dat dat Vörjohr noch wedder över’n Winter wunnen hett. Dat weer in wiede Delen vun Europa begäng. Ünner de Christen schull dat en Enn hebben. Doch dat wull nich överall klappen un so müssen se dat Füür christlich ümdüden un hebbt dat denn to Oostern fiert.

Dat is vun Gegend to Gegend un faken vun Dörp to Dörp verscheden, ob dat Füür Sünnavend, Sünndag oder Maandag ansteken warrt.

Dat gifft aver ok noch Gegenden, woneem Füür to annere Tieden as Oostern ansteken warrt. Noordfreesland hett dat Biikebrennen in Februar, bi Fulda kennt se dat Hutzelfeuer an'n eersten Sünndag in’e Fastentiet.

Oosterhaas

De Oosterhaas (ok Paaschhaas) is en Haas, de to Paaschen Eier anmaalt in in Gaarn versteckt. De Oostereier weert an den Morgen vun den Oostersünndag vun de Kinner söcht. Düsse Bruuk is in ganz Middeleuropa bekannt.

Man de Oosterhaas is nich de eenzigst, de Oostereier bringen deit. In de Swiez is de Kuukuuk dor för tostännig. In Delen vun Westfalen un vun Hessen maakt dat de Voss, in Döringen is de Hahn dormit togangen.

Peter Seidensticker

Peter Seidensticker (* 2. März 1904 in Brunshusen; † 26. August 1977 in Stood) weer en düütschen Maler un Grafiker un plattdüütschen Schriever.

Seidensticker is 1904 as Söhn von’n Baas von de Glashütt in Brunshusen bi Stood boren. He weer von 1910 bet 1918 op de Volksschool Brunshusen, von 1918 bet 1921 op de Präparandenanstalt in Stood un 1921 bet 1924 op dat Lehrerseminar Stood. Oostern 1924 hett he de eerste Schoolmeesterprüfung maakt. Von 1924 bet 1928 weer he denn Schoolmeester an en Volksschool in Hamborg. Oostern 1927 hett de de twete Schoolmeesterprüfung maakt. Blangenbi hett he von April 1924 bet März 1927 de Landskunstschool in Hamborg besöcht. An’n 1. Oktober 1928 is he Tekenlehrer an dat Athenaeum in Stood worrn un dat bet to’n 30. September 1931 bleven. 1935 güng he as Dozent an de Hoogschool för Lehrerbildung in Hirschberg. Na’n Tweten Weltkrieg keem he na Stood trügg, weer toeerst fre’en Künstler un is 1956 Rekter von de Pestalozzi-School in Stood worrn. 1969 is he in Rohstand gahn.

Schokolaad

Schokolaad is wat Sötet to eeten dat vun de Bohn vun den tropischen Kakao (Plant)boom makt word. Schokolaad is een Deel vun veel Schnökerkraam, Koken, Plätzken un Nardisks.

Schokolaad hett dat Mesoamerikaansche Volk utfunnen un de Maya un Azteken, het se achteran kultiviert, as se de Kakaobohn anbaut hebbt un in Soßen un in wat to drinken indaun. De Bohnen hef se mohlt un mit Water mischt. Man blot besünnere Lü so as Priesters un Adelige dössn dat domolt drinken.

Dat Wort "Schokolaad" kummt vun dat nahuatlsche Woort Xocol (Utspraak: Schockol, dat heet bitter) un Atl (dat heet Water).

Vondaag word Schockolaad vun de gerösteten un fermentierten Bohne vun de Kakaoplant mokt. De Bohn schmöck bannig bitter un dorum kummt veel Zucker in de Schokolaad. Tohope mit Fett un Melk maakt se Tafeln un Riegel dorut, de de Lüt dann Schokolaad nennt. To Oostern un Wiehnachten giff dat ook Figuren as den Osterhasen oder den Wiehnachtsmann ut Schokolaad.

Vun de Bohn makt se aver ook wat to drinken (Heete Schokolaad oder Kakao).

Stillfreedag

De Stillfreedag oder Stille Freedag is de Freedag vör Oostern. He folgt op den Grööndunnersdag un is de Dag vör den Stillsünnavend. He is de eerste Dag vun de Dreedaagsfier to Oostern (Triduum paschale). De Dag erinnert an dat Krüzigen vun Jesus Christus.

Stood

Stood is en Stadt in de Gemeen Stood in’n Landkreis Stood in Neddersassen. Se liggt twüschen Cuxhoben un Hamborg.

Theodor Brodthage

Georg Friedrich Theodor Brodthage (* 28. Februar 1871 in Gütsel; † 1945 in Hannover) weer en düütschen Pädagoog.

Brodthage is 1871 in Gütsel boren. He hett to Oostern 1889 sien Abitur an dat Raadsgymnasium Ossenbrügge maakt un denn an de Universitäten Marburg un Berlin klassische Philologie un Geschichte studeert. In Marburg weer he siet dat Sommersemester 1889 Maat von de Marburger Burschenschaft Rheinfranken. 1895 hett he in Marburg dat Staatsexamen maakt.Na dat Studium hett he von Oktober 1895 af an en Seminarjohr an dat Königliche Realgymnasium Leer maakt un von Oktober 1896 af an dat Probejohr an dat Königliche Willemsgymnasium Emden. Von Oktober 1897 bet Oostern 1898 hett he en Kursus an de Königliche Turnlehrerbildungsanstalt Berlin maakt. To Oostern 1898 keem he as Hülpslehrer toeerst an dat Kaiserin-Auguste-Viktoria-Gymnasium in Linden un is von dor to Michaelis 1898 an dat Doomgymnasium Veern versett worrn. In Veern is he 1902 as Oberlehrer ernannt worrn. 1907 güng he trügg na Linden, is denn aver wedder wesselt, nu an dat Athenaeum in Stood. Dor is he an’n 19. Dezember 1912 to’n Königlichen Gymnasialdirekter ernannt worrn. He is bet 1917 in Stood bleven. In dat Johr güng he as Direkter an dat Königliche Willemsgymnasium Emden. 1919 is he Provinzialschoolraad bi dat Provinzialschoolkollegium von de prüüßsche Provinz Stettin worrn. 1921 is he dor Direkter worrn. Von 1923 af an weer he Direkter un Viezpräsident von dat Provinzialschoolkollegium von de Provinz Hannover. Dat is he bleven, bet dat Kollegium 1933 oplööst worrn is.

Willi Meyne

Willi Meyne (* 22. September 1888; † 1985) weer en düütschen Kunsthistoriker un Heimatforscher.

Meyne is 1888 as Söhn von’n Buur Wilhelm Meyne in Süttörp boren. Na de Volksschool un de Präparandenanstalt hett he in’n Harvst 1906 mit dat Lehrerseminar in Lümborg anfungen. De twete Lehrerprüfung hett he an’n 19. Mai 1911 maakt. He hett von Oostern 1909 bet Harvst 1911 an de Volksschool in Hützel arbeidt un denn von Harvst 1911 af an an de Volksschool in Mesborg. In’n Eersten Weltkrieg weer he för dree Johr Soldaat. 1927 hett he an de Universität Berlin en Ergänzungsprüfung för Latien un Greeksch maakt. He hett denn en Studium von de Kunstwetenschoppen anfungen, för dat he 6 Semesters von de School freestellt weer un dree Semesters deelwies freestellt. 1931 hett he sien Dokter maakt över dat Thema Werke der Holzplastik im Bezirk Stade bis 1530.

He hett en Reeg Böker över de Geschicht von siene Heimat schreven.

He is Ehrenbörger von de Gemeen Mesborg.

Annere Spraken

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.