Тона

Тона (лат. scientia, руз. наука, кезэрэнь уралонь кельсэ *tuna, "тонадома") — те ломань шкинемань ёнкс, эрямочидо-алкуксчидо содамонь шкамо ды вейкетямо ёнов.

«Масторава» морокерькс

«Масторава» морокерькс — те васенце эрзянь раськень эпосс (морокерькс), конань эйсэ вейтьс ульнезь пурназь икелень шкань эрямось.

Абрамов, Кузьма Григорьевич

Абрамов Кузьма Григорьевич (1914 иень сундерьковонь 12 чистэ эрзяньТашто Найман велесэ Покш Килейбуесэ- 2008 иень умарьковонь 4 чистэ) — эрзянь сёрмадей.

Седе пек содавикс кода ёвтнемань, повестень, романонь ды драмань сёрмадыця. Ды, паряк, пек аламот содыть: литературас васенце эскельксэнзэ сон теинзе стихень сёрмадоманть вельде. Лисезь васенце книгазояк — стихотворетянь пусмо («Стихть», 1940). Седе тов сти­хень сёрмадомань ёрокчись маштовсь тензэ рузонь ды мирэнь-масторонь классиканть, Россиянь ламо нациянь литературань сехте пара невтевкстнэнь эрзянь кельс ютавтомсто.

Боляень Акай

Боляень Акай, лиякс: Мурзакайка, мурза Кайко — эрзянь мурза, кона эрясь ХVII-це пингестэ.

Сон васня служась рузтнэнень Атямарь крепостьсэ. 1670 иестэ тусь туреме велень раськень аурексчинь кис, теевсь крестьянонь стякшнома ушмонь прявтокс Разинэнь ушмонь порксамодо мейле Симбирск ошонь ало. Мартонзо ульнесельть рузонь казаконь атаман Никитинский ды эрзянь казаконь атаман Елушонь Бажат.

Ветнесь мельганзо 15-20 тёжат ушмант ды туриця ломанть москувонь карательтнень каршо. Сонзэ апокшке мобильной отрядзо (20-30 ластейть) «казакокс» ливтязь каявкшнось ятнэнь лангс ды нейке оргодькшнэсть. Ожоковонь 24 чистэ Боляень Акай пурнась 7 тёжат ломанть. Истямо вийть марто макссь карательтненень виевь турема Усть-Урень велень маласо. Сынст прявтось - Ю. Барятинский эсь вийтнень марто потась Симбирск ошонь малас. Омбоце турема Усть-Урень маласо ютась сундерьковонь 6 чистэ. Те стака туремасо Акаень ранизь пулясо, ансяк карательтнень таго шаштызь. Стязь модатне Барыш ды Сура лейтнень юткова эзть лепштяво тенест. Седе мейле Кандрать велень вакссо ютась прявт турема, 15 тёжат ломатнть ды 12 пушкат пиризь кинть царень ушмонтень. Ансяк те туремасо карательтне изнизь Акаень вийтнень, ды Боляень Акай потатсь Сура леень тона пелей. Тосо Орданьбуень ваксо кармасть кирдеме кородоманть. Ацамковсто 1670 иестэ ульнесь сехте виевь турема москув ушмонть марто. Сестэ Тургенево велень ваксо Акай пурнась 20 тёжат малав ломанть, мартост ульнесть 20 малав пушкат. Те стака туремасо карательтне поркснизь Акай Боляень ушмонть ды пултызь весе стиця ломатненень лездыця велеть. Костяшево, Акаень тиринь велезэяк пултызь.

Кода ледстяви:

1671 иень якшамковонь 11 чистэ Долгоруков чирязось максь Боляйнень кеместызеть куломанзо:

Сонзэ кундызь ды седе мейле ускизь Краснослободск ошов куловтома таркав ды пурназь ломантнень сельмест икеле печксизь ды керьсизь прязо, кедензэ ды пильгензэ.

Боров, Михаил Романович

Миша Боров (1896 иестэ Самарань ёнкс Похвистневань буень Якстере Лисьмапрят велесэ - 1941 иестэ панжиковонь 29 чи Киев ошсо ) — бороциця, васенце чемпион Советень Россиянь профессиональной бороцицятьнень (классической стильсэ). Эрзя.

Заберезова (Якстерекуро буе)

Заберезова (руз. с. Заберезово) — мокшонь веле Якстерекуро буесэ, Мордовиясо.

Ашти Мокша леенть вейке сянглеенть лангсо. Кода лецтяви:

Эрицятнеде: 2002 иестэ ульнесь 35 лом., 2010 иень ловномасонть - 12 ломанть.

Каргт

Каргт — эрзянь пакшатнень театрализовань налксемаст. Тундонь ды кизэнь налксема. Налк􏰀 семась моли луганар лангсо.

Налксицятне 6 — 12 иесэ тейтернеть ды цёрынеть. Ла􏰀 мочист коряс—зяро пуро􏰀 мить.

Кечказсо

Кечказсо — эрзянь пакшатнень телень ды кизэнь чыйнема-чарамо налксемась.

Налксицятнеде 9 — 15 иесэ цёрынеть.

Умонь шкане «Кечказсо» налксильть ансяк тельня. Ансяк сестэ понгиль эрявикс кедьёнксось, телень эйпоколь эли алашань шояк (кельмезь навоз).

Неень шкане те налксемась икельценть коряс лиякстомсь. Сонзэ эйсэ арасть сеть эшксематне, конат теить томбавкст налксицятненень. Ней налксить эйсэнзэ тельняяк, кизнаяк.

Кулома озкс

Ку́лома озкс — кода ломанесь (сэредицясь) берянь — сы лангозонзо кулома шка, сестэ ацыть столь ланкс столешник, кирвастить штатол, кармить чекамо. Чекамсто озныть истя:

Паз чанготь, нолдыть Иванонь грехенхэ-пижетензэ,

Конататьнень Иван тейнинзе мастор лангсо эрямсто,

Касы сэрень касомсто, ды якамсто-пакамсто,

Ды удомсто-аштемстэ, ды тевтеме аштемстэ, берянь тевень теемстэ.

Покштят-бабат, кулыйть-емийть, весень кулый Оська,

Виде чисэ эрицят, видень-кичкерень содыцят,

Вере паз икеле шатицят, Вере Пазнэнь озныцят,

Улезе чанстенк, максодо паро, ознодо Вере паз икеле.

Паряк, Иванонь кулома шказо эзь са,

Паряк кулома шкадонзо икеле Иван сыргась куломо.

Улиндеряй истяня, илинк сайть Иванонь оймензэ,

Кадынк Иванонь эрьва чистэ эрямо,

Мастор ланга якамо, паро тевень тееме,

Ули-паронь пурнамо, вишка эйдень кастомо,

Сыре тетянь-авань калмамо.Коли вансызь ломанесь карми куломо, путыть вальма лангс ведь (оймеведь), веденть трокс путыть чевне. Кода лиси оймесь прок се ведесэнть экшели, юты веденть трокс чевненть ланга ды туи Вере паз икелев. Кулыця ломаненть турванзо вадьсызь медьсэ (ойме лисема шкастонть кулыця ломаненть курго потмозо, мерить, пек сэпей).

Кода карми ломанесь куломо, чевте ацавкс алонзо а кадыть. Ацавкстнэнь-тодовкснень кулыцянть алдо сайчызь, кадсызь ломаненть куломо чаво эземс. Тодов кулыця ломанть алов а кадыть, пелить тона чисэ кармавтсызь кулыцянть толгатнень ловномо. Кулындеряй ломанесь апак фатя тодов лангс, калмамсто кулыцянть картнень-пракстатьнень марто, кулыцянть судрямо сурсеманть марто ды кандолаз лаксевкснэнь марто каить калмонь перька латконтень, колмо толгат тодовстонть, кона лангс кулось ломанесь. Толгатнень каямсто озныть истя:Покштят-бабат, кулыйть-ёмийть, васень кулый Оська, виде чисэ эрицят,

Видень — кичкерень содыцят, Вере паз икеле аштицят,

Вере пазнэнь озныцят: улезэ чанстенк, максодо паро, ознодо Вере пащ икеле!

Вана минек Иван кулось тодов ланкс.

Вана минь кандынек се толгатнеде колмо толгат.

Илинк ловновт Иванонь кедьстэ весе толгатнень, ловновтынк ансяк не колмо толгатнень!

Од Эстония

Од Эстония (эст. Noor-Eesti) ― литературонь-артовксонь эстэнь группа, ульнесь 1905―1915 иетнесэ.

Панжомат

Панжомат — эрзянь пакшатнень телень ды кизэнь чыйнема-чарамо налксема.

Покш Толкан веле (Похвистнева буень)

Покш Толкан веле (руз. Большой Толкай) — эрзянь веле, Похвистнева буесэ, Самарань ёнкс лембеёнов.

Покш Толкан велесь ашти Покш Толкан леенть чиресэ, Чихан пандо ало. Велестэнть 32 вп буенть куншка таркас — Похоснёвс ды 131 вп Самар ошонть видс.

Веленть кувалмозо 7 вп. 95 % эрицятнеде — эрзят.

Раськень Озкс

Раськень Озкс — те веси масторонь эриця эрзятнень ознома-пурнамо коест.

Тона (смустьтне)

Тона:

тона — (руз. тот, англ. that) — те таркавалось.

Тона — (руз. наука) — те ломань теемань ёнкс.

Ур мельга пансема

Ур мельга пансема — эрзянь пакшатнень налксемаст.

Налксемась моли тунда ды кизна. Налксицятнеде седе ламо цёрынеть. Эйстэст зняро, зяро пуромить.

Чирязонь теште

Раськень Озксонь анокстамонь меельце эвтемань читне улнесть вадрядояк вадрят. Манейть, лембеть, кувакат. Истямо читнестэ, мерят, ойметькак сэрей менельганть ливтни-укшны, тува, кува раужиньке налткекс-салмукскекс неявозь ювныть цянакатне, кува пачк нетви ашо парсеень кондямо шожда сувнэтне венстизь локсеень сёлмост певтеме менеленть келес. Лембе ялткетне састыне пувсить сынст чивалгома ёндо чилисемав.

Эрзятне ванды пурнавить ине покшчис. Сеть, кинь ойместэ эзь нардавт эрзянь мелесь, эрзянь койтне-илатне, палозь палыть те чинтень анокстамо тевтнесэ. Тевтнеде… Пест арасть… Эрявить важодиця машинаткак, кедтькак, валдо превтькак. Ломантнеде аламо, ансяк сеть, кить састь те ине чинтень, анокстамонзо-ютавтомонзо, кемить — весемезэ топавтови шкастонзо.

Кода эно. Тевтнень вети сонсь Пиргуж эрзянь Инязорось. Ломанесь кеме, теке ламо пингень тумонь мукорь. Сон таргошка тия лаки. Ардтни тей-тов. Пиже валскестэ талай вес маряви кемевтиця-меревтиця вайгелезэ. Васня Кшуманця ды Игнад велесэ, мейле Чукалсо, мааронть перькава, ды мейле мекев… Истя чинь чоп. Чамазо чинть каршо тюжт мери шумбрачинь вийсэ. Валдо сельмесэнзэ, мелявкстнэнь пачк неяви эрямонь вий ды маней, виев потмо ёжо.

Вакссонзо — кеме нежеть, нардев лездыцят: Гайнинькань Пичай, Кирдянонь Васяй, Юринь Михал… Сынь сизема а содыть, шканзо молеманть а марить. Лаказь лакить тевтнень топавтомсто. Лиякс эрзятне а маштыть, зярдо кундыть мельс туиця тевс.

Покштнэ важодить — мельгаст пштисэ вана ва колмоце чи пштисэ ванныть колмо цёрынень весемень неиця сельминеть…

Колмоце чи мааронть ваксс чиньстямо марто малавикс велестэнть чийнить неть кеменьшка иесэ эрзянь цёрабайтне. Мезеяк тесэ а юты пшти сельмест вакска…

Вана од цёрась витни мааронь кевенть. Цёрынетне чарыть перькаванзо: — Те мень кев? — Мень тешкс истямо мазый теезь лангсонзо? — Кие кевенть теизе?..

Теке киска левкст чарыть цёрынетне эрзянь мазый, од цёранть перька. Налкстыть тензэ. Тона кшувавтсынзэ, иляст меша. Сеть, теке озяскеть, ливтить ве ёнов, шкань ютазь одс маар кевенть перька пурнавить…

Тосо вана солавтыть шта, конанть эйстэ мейле валовтови Пазонь Штатолось. Гувны пси толгельсэ толпандясь. Тей кантневи ведь, тесэ лазновить пенгть… Тияяк велить пакшатне. Тенст эряви содамс, кода солавтови штась, мейсь эряви ведесь, кода валови Штатолось…

Маласо вирьнесэнть анокстави ведень саема ды симема тарка. Вирев латконть потмова чуди чудикерькс. Ведезэ — сиянь, ванькс, тантей. Лисьмапрятне, косто саеви чудикерьксэсь — а васолот. Секскак ведезэ симемскак маштови. Содасть минек покштятне, кува озксонь ютавтома таркатнень кочкамс! Цёрынетне лездыть Пичай лелянтень сёлтонь теемстэ. Синтрить тарадткеть пирявкскентень, ацыть коське тарадсо яннэнть, кона вети сёлткенть малас, теить ютамо-чалгамо тарка, пильгест ломантнень иляст начко ведень саемстэ.

Весе, мезе иляст тее тесэ покш ломантне, пек тукшны цёрынетнень мельс. Мейле мон некшнынь Раськень Озксонть ютавтомсто неть цёрынетнень. Сынь пштистэ вансть, кода стявтыльть Штатолонть, кода ютась Штатолонь кирвазтемась, Инешкипазнэнь ды покштятнэнень Пшкадемась, мааронь одкстомтомась, раськекирьксэнь теемась… Эрьва косо сынь ульнесть, эрьва ков кенерьсть…Штереть…Ёрот…

Ансяк сехте пек мельсэм кадовсь вана се…

Чокшнэ ёнов, зярдо тевтне прядома лангсольть, минь, эрзянь Чирязтнэ, тердинек Инязоронть ютавтомо истямо Раськень Озксонь икелень коенть: лисьмапрянь ведьсэ Инязоронь шлямо. Тень туртов теезель сёлтке, чиреванзо ацазель ансяк ледезь, тантейстэ качадыця тикше. Путынек Инязоронть тикшенть лангс ды ваньксстэ ванькс ведьсэ валнынек-шлинек прясто пильгс! Инязорось мик урнось-ирнэсь истямо мельспародонть ды зярдо стясь тикшестэнть кеме пильгензэ лангс — икеленек вельмесь теке од цёра: Ванькс! Виев! Валдо ойме! Кеняркс варштавкс! Алкуксонь эрзянь Инязор!

Те коенть лангс, сельмень пезнавтозь, вановтонь апак сайне, пштистэ вансть неть цёрынетне. Каявсь сельмезэм эйстэст вейкесь: ашола прине, валдо, превей сельмине. Кевкстимизь сон, келя, те мень кой истямо? Те кие истямось — Эрзянь Инязоро? Мень теште поводезь Чирязтнэнь ды Инязоронть мештьсэ?

Зярс оршнинек, Пичай чирязось лембестэ кутмордынзе цёрынень лавтовонзо ды ёвлесь тензэ эрзянь Инязортнэде. Невлесь тензэ: — Вант! Те вана икелеть алкуксонь эрзянь Инязорось!- Тона аволь пилесэ, панжадо сельмсэ-оймесэ кунсолось… Неявсь, арсеманзо верьга-васолга ливтнесть…

Меельцекс Пичай лелясь кевкстизе цёрыненть: — Мезе, ней содат, кие те, эрзянь Инязорось? Тона ахолдась прясонзо. Пичай поладызе кевкстеманзо: — Ули мелеть, зярдо касат, улемс эрзянь Инязорокс?

Цёрынесь таго ахолдась прясонзо ды кеместэ мерьсь: — Ули! Карман Инязорокс!

Пичай, кеме, сэрей эрзянь цёрась, састыне саизе цёрыненть кавто кавалалдо ды кепедизе виев кедьсэнзэ цёрыненть верев, менельс: — Ванодо, эрзят! Вана кодамо эрзянь цёра касы тенек Инязорокс!

Мон саия кирьгастом чирязонь тештенть ды понгавтыя цёрыненть мештьс: — Кирдть, цёра, Чирязонь тештенть! Те чешксэсь невтьсы теть кинть, кода теевемс эрзянь раськень Инязорокс!

Омбоце чистэнть, Толай чирязось, кона теизе ды казизе тень те кандтнема тештенть, марявсь, аламодо а мельсэ, кевкстимим: — Мекс Чирязонь Чешксэнть-тештенть а канднят?

Визделгадынь икелензэ, мейле ёвтния — кинь мештинесэ ней Чирязонь тештесь. Толай атясь мельспаросо мерсь: — Паро тев теить… Инязор касы…

Монгак тенень кеман: — Каст, Эрзянь Инязор!

Эрюш Вежай 2007 ие.

Шка

Шка — те пертпельксканть эрьва кодат молемат, конат лиякстовтомить.

Валонть лисьмпарязо — суоминь-угрань кельюрось.

Малавиксэнзэ: суом. hetki руз. «мгновение; сейчас; момент»; эст. hetk руз. «миг; момент»; коми чöж (послеслог) руз. «в течение, в подолжение»; мар. шыштэ руз. «время»; хан. sḹṡ ~sis руз. «время, срок, терпение». Вейсэнь кельденть икеле čečke.

Шлыгансо

Шлыгансо (Папоксо) — эрзянь пакшатнень кизэнь чыйнема-чарамо налксема. Налксить 9 — 15 иесэ цёрынеть.

Кавоньгирдань лементь налксемась кандтни сень кувалма, кодамо налксе􏰀 мапелесь сайневи те эли тона велетне􏰀 сэ — шлыганось эли папокось. Налксе􏰀 мась кадови текесь.

Шумбрачинь максомась

Шумбрачинь максомась

Лия кельсэ

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.