Eidade de la Piedra

La Eidade de la Piedra[1] ye l período de la Pré-Stória an que ls seres houmanos criórun ferramientas de piedra, sendo la tecnologie mais abançada naquel tiempo. La madeira, ls uossos i outros materiales tamien fúrun ousados (cuornos, cestos, cuordas, cuiro...), mas la piedra (i, an special, dibersas piedras cun un partir a modo concha, cumo l sílex, l quartzo, l quartzito, la ousidiana...) fui ousada para fabricar ferramientas i armas, de corte ó percusson.

Assi i todo, esta ye ua circustáncia neçaira, mas ansufeciente pa la defeniçon deste período, yá que nel tubírun lugar fenómenos fundamentales pa l ser houmano, quanto als saberes tecnológicos (fuogo, ferramientas, moradie, roupa, etc), la eiboluçon social, las mudanças de l clima, l spalhar de l ser houmano por to l mundo habitable, zde l sou brício africano, i la reboluçon eiquenómica zde un sistema caçador-coletor, até un sistema an parte produtor (antre outras cousas).

L anterbalo de tiempo que alcança la Eidade de la Piedra ye pouco claro, çcutido i bariable cunsante la region an question. Por eisemplo, scabaçones amostrórun que anquanto an ciertos lugares cumo la Gran-Bretanha se bibie na Eidade de la Piedra, an outros, cumo Roma, Eigito i China, yá se ousában ls metales i conhecie-se la scrita. Alguns grupos houmanos nunca zambolbírun la tecnologie de l metal fundido i, portanto, quedórun nua eidade de la piedra até se ancuntráren cun culturas cun tecnologies mais zambolbidas [2].

An giral, acradita-se que este período ampeçou an África hai 2,5 milhones de anhos, cula feitura de la purmeira ferramienta houmana (ou pré-houmana). A este período seguiu-se l Calcolítico ou Eidade de l Cobre i, subretodo, la Eidade de l Bronze, an que las ferramientas desta liga chegórun a ser quemuns; esta transiçon dou-se antre 6000 a.C. i 2500 a.C.

thumb|250px|Biface triangular, ferramienta de piedra talhada Tradicionalmente debide-se la Eidade de la Piedra an Paleolítico, cun un sistema eiquenómico de caça-coleta i Neolítico, an que se dá la reboluçon pa l sistema eiquenómico produtibo: agricultura i pecuária.

La Eidade de la Piedra ancontra-se debedida ne ls períodos Paleolítico (ou Eidade de la Piedra Lascada), i Neolítico (ou Eidade de la Piedra Polida), cun un período pul meio chamado de Mesolítico, an que ousában, al mesmo tiempo, strumientos de piedra lascada i de piedra polida. Ls trés períodos, por sue beç, son inda subdebedidos.


Quando l clima ampeçou a sfriar na Ouropa oucidental, ls homes cubrírun-se de pieles de animales, buscando cabernas para se abrigar, i an sues paredes deixórun notables zeinhos, cumo ls ancuntrados na Spanha i Fráncia.

Ls bruxedos más antigos de l Neolítico fúrun ancontrados na Mesopotámia i Síria, benindo de arrimado a 4000 a.C. L sílex (peinha sedimentar) cun que ls homes fazien las ferramientas era sacado de minas, cortado i polido, streformando-se an ferramientas. L clima quedara mais ameno, i eilhes habien daprendido a cultibar i a criar animales. Yá custruíen casas, ampeçando a bibir an grupos mais grandes, muita beç an cabeços forteficados. Conhecien l barro, fazien roupas, rumpien caminos i anterrában ls muortos an pequeinhos montes.

Mesmo depuis que l bronze i l fierro se tornórun coincidos, las ferramientas i l modo de bida de la Eidade de la Piedra inda se mantubírun por algun tiempo.

Ls studiosos acradítan que, ua beç que l home de la Eidade de la Piedra inda nun conhecie la scrita, ls zeinhos que grababa nas paredes de las cabernas amóstrann la necidade de l ser-houmano quemunicar.

Ber tamien

  • Alimentaçon na Eidade de la Piedra

Refréncias

  1. C. J. Thomsen apersenta an 1836 l sistema de las Trés Eidades para classeficar ls materiales pré-stóricos: Eidade de la Piedra, Eidade de l Bronze i Eidade de l Fierro.
  2. Inda hoije, an alguns lugares de l mundo, cumo la Nuoba Zelándia, hai tribos que mal stan a salir de l modo de bida de la Eidade de la Piedra. Algues de las tribos Maoris stan nessa situaçon
Agricultura

Agricultura ye l cunjunto de técnicas outelizadas para cultibar plantas cul oubjetibo d'obtener quemido, fibras, einergie, matéria-prima para roupas, custruçones, medicamientos, ferramientas, ó suolo para cuntemplaçon stética.

A quien trabalha na agricultura chama-se agricultor.

L perfixo agro ten ourige na palabra lhatina agru que quier dezir "tierra cultibada ó cultibable".

La ciéncia que studa las caratelísticas de las plantas i de ls suolos para melhorar las técnicas agrícolas ye la agronomie.

Antropologie

Antropologie (cuja ourige eitimológica deriba de l griego άνθρωπος anthropos, (home / pessona) i λόγος (logos - rezon / pensamiento) ye la ciéncia preocupada an studar l home i la houmanidade de maneira totalizante, ó seia, abrangendo todas las sues dimensones. La debison clássica de la Antropologie çtingue la Antropologie Cultural de la Antropologie Biológica. Cada ua destas, an sue custruçon abrigou dibersas corrientes de pensamiento.

Puode-se afirmar que hai poucas décadas la antropologie cunquistou sou lhugar antre las ciéncias. Purmeiramente, fui cunsidrada cumo la stória natural i física de l home i de l sou porcesso eibolutibo, ne l spácio i ne l tiempo. Se por un lhado essa cuncepçon benie sastifazer l seneficado lhiteral de la palabra, por outro restringie l sou campo de studo a las caratelísticas de l home físico. Essa postura marcou i lhemitou ls studos antropológicos por ancho tiempo, pribilegiando la antropometrie, ciéncia que trata de las mensuraçones de l home fócil i de l home bibo.

Eidade de l Bronze

La Eidade de l Bronze ye un período de la ciblizaçon ne l qual acunteciu l zambolbimiento desta liga metálica, resultante de la mistura de cobre cun stanho. Ampeçou-se ne l Ouriente Médio an torno de 3300 a.C. sustituindo l Calcolítico, ambora noutras regiones esta redadeira eidade seia çcoincida i la de l bronze tenga sustituído diretamente l período neolítico (popularmente coincida cumo Eidade de la Piedra). Na Africa negra, l neolítico ye seguido de la eidade de l fierro.

La data de adoçon de l bronze bariou segundo las defrentes culturas:

Na Asia central (Afeganistan, Eiran, etc) l bronze chega por buolta de 2000 a.C.

Na China, fui adotado na Dinastie Shang.

Ne l mar Eigeu stableciu-se ua ária de antenso comércio de l metal , percipalmente an Xipre adonde eisistian minas de cobre, benido l stanho de las ilhas británicas. Cun esso, ampeçou-se l zambolbimiento de la nabegaçon. L ampério minóico, sustituído apuis pul micénico, apareciu grácias a este grande comércio.

Na Ouropa central, este período ampeçou a partir de 1800-1600 a.C., seguido de l período 1600-1200 a.C., caratelizado pul anterro de cadabres an túmulos, prática que amostraba un alto grau de stratificaçon social.

La fin de la Eidade de l Bronze acunteciu antre 1300-700 a.C., caratelizado pula ancineraçon de l cadabres, prática que cuntinou na Polónia até als anhos 500 a.C., yá an plena Eidade de l Fierro, ne l período cultural Hallstatt (700-450 a.C.).

Guerra de l Bietname

La Guerra de l Bietname fui un cunflito armado oucorrido ne l Sudeste Asiático antre 1959 i 30 de abril de 1975. La guerra fui trabada antre la República Democrática de l Bietname (Bietname de l Norte) i sous aliados quemunistas i la República de l Bietname (Bietname de l Sul) apoiada puls Stados Ounidos i sous aliados na region.

An 1965, ls Stados Ounidos ambiórun tropas para ampedir l gobierno de l Bietname de l Sul de antrar an colapso cumpleto i eibitar la ambason de l Norte i la unificaçon de l Bietname sob l regime quemunista. Antretanto, ls norte-amaricanos falhórun an sous oubjetibos, sendo oubrigados la se retiráren de l paíç an 1973 i dous anhos depuis l Bietname fui reouneficado sob gobierno socialista, tornando-se oufecialmente, an 1976, la República Socialista de l Bietname. Na guerra, aprossimadamente trés a quatro milhones de bietnamitas de ls dous lhados morrírun, para alhá de outros dous milhones de cambojane ls i laocianos, arrastrados para la guerra cula propagaçon de l cunflito, i de cerca de 50 mil suldados de ls Stados Ounidos.

Durante l cunflito, las tropas de l eisército de la Bietname de l Norte trabórun ua guerra cumbencional contra las tropas norte-amaricanas i sul-bietnamitas, i las milícias de l bietcongs, menos eiquipados i treinados, lhutórun ua guerra de guerrilha na region, ousando las selbas de l Bietname, spalhando armadilhas mortales als suldados einimigos, anquanto ls Stados Ounidos se armórun de grande poder de fuogo, an artilharie i abiaçon de cumbate, para çtruir las bases einimigas i ampedir sues oufensibas.

A la eiceçon de las lhinhas de cumbate alredror de l perímetros fortificados de bases i campos melitares, nun houbo nesta guerra la formaçon clássica de lhinhas de frente i las ouperaçones acuntecírun an zonas delimitadas; missones de busca i çtruiçon por parte de las fuorças norte-amaricanas, cul uso de bumbardeios maciços cun armas químicas çfolhantes i sabotaiges de la guerrilha na retaguarda de las zonas ourbanas.

Trabada cun ua grande cobertura diária de l meios de quemunicaçon, la guerra lhebou a ua fuorte ouposiçon i debison de la sociadade norte-amaricana, que gerou ls Acordos de Paç de Paris an 1973, causando la retirada de las tropas de l paíç de l cunflito. Eilha prosseguiu cula lhuita antre l norte i l sul de l Bietname debedido, treminando an abril de 1975, cula ambason i acupaçon quemunista de Saigon, anton la capital de l Bietname de l Sul i la rendiçon total de l eisército sul-bietnamita.

Para ls Stados Ounidos, la Guerra de l Bietname resultou na maior cunfrontaçon armada an que l paíç yá se biu ambolbido, i la derrota probocou la 'Síndrome de l Bietname' an sous cidadanos i sue sociadade, causando perfundos reflexos na sue cultura, na andústria cinematográfica i grande mudança na sue política sterior, até la eileiçon de Ronald Reagan, an 1980.

Metalurgie

Metalurgie zeigna un cunjunto de procedimientos i técnicas para straçon, fabricaçon, fundiçon i tratamiento de l metales i sues ligas.

Zde mui cedo, hai mais de dieç mil anhos, l home aprobeitou ls metales para fabricar ferramientas, cumo l cobre, l chombo, l bronze, l fierro, l ouro i la prata tubírun amplo uso na antiguidade.

Ls purmeiros altos-fornos aparecírun ne l seclo XIII. La andústria metalúrgica tubo nuobo ampulso ne l seclo XVIII cula reboluçon andustrial.

Nelas

Nelas ye ua bila pertuesa ne l Çtrito de Biseu, region Centro i sub-region de l Dan-Lhafones, cun cerca de 4 700 habitantes.

Ye sede dun munecípio cun 127,82 Km² de ária i 14 037 habitantes (2011), subdebidido an 9 freguesies. L munecípio ye lhemitado a nordeste pul munecípio de Mangualde, a suiste por Seia i Oulibeira de l Spital, a oeste por Carregal de l Sal i a noroiste por Biseu. L cunceilho zeignou-se Senhorin até 1852 quando la sede passou para Nelas.

Pré-stória

Modelo:Stória/Épocas

La pré-stória correspunde a la era de la stória que acunteciu antes de la ambençon de la scrita (eibento que marca l ampeço de l tiempos stóricos registrados), que acunteciu alredror de 4000 a.C..

Tamien puode ser cuntestualizada para un determinado pobo ó nacion cumo l período de la stória desse pobo ó nacion subre l qual nun haba decumientos scritos. Assi, ne l Eigito, la pré-stória terminou alredror de 3500 a.C., anquanto que ne l Brasil terminou an 1500 i na Nuoba Guiné eilha terminou alredror de 1900. Para muitos storiadores l própio termo "pré-stória" ye anganhador, pus nun eisiste nada antes de la stória i si a la scrita.

La transiçon para la "stória propiamente dita" dá-se por ua era chamada proto-stória, que ye çcrito an decumientos, mas ó son decumientos un cachico apuis de la era ó decumientos sternos. Antoce, la palabra pré-stória amostra, la amportánça de la scrita para la cibelizaçon oucidental.

Ua beç que nun hai decumientos deste sfergante de la eiboluçon houmana, l sou studo depende de l trabalho de arqueólogos ó antropólogos, i a las bezes de outros cientistas, que analisan restros houmanhos i ferramientas perserbados para saber l que acuntecie.

Storiografie

Storiografie (de "storiógrafo", de l griego Ιστοριογράφος, de Ιστορία, "Stória" i -γράφος, de la raiç de γράφειν, "screbir": "l que scribe, ó çcribe, la Stória") ye ua palabra polissémica. Zeigna nun solo l registro scrito de la Stória, la mimória establecida pula própia houmanidade atrabeç de la scrita de l sou própio passado, mas tamien la ciéncia de la Stória.

Stória de la Ouropa

La Stória de la Ouropa çcribe la passaige de l tiempo zde ls purmeiros houmanos que habitórun l cuntinente ouropeu até la atualidade. La purmeira eibidéncia de l Homo sapienes na Ouropa data de 35 000 a.C. L relato mais antigo feito subre l cuntinente ye la Eilíada, de Homero, de la Antiga Grécia, que data de 700 a.C. La república romana fui stablecida an 509 a.C., i usurpada pul Nuobo Ampério de Otabiano na metade de l purmeiro seclo. La religion crestiana fui adotada ne l seclo IV i ourganizada ne l sesto, drento de l Ampério, pul Amperador Justiniano I (527-565) cumo ua Pentarquia an sues cinco cidades mais amportantes: Roma, Custantinopla, Antioquia, Jarusalen i Alexandria. Cunfrontado cun ataques bárbaros i la praga, l Ampério fui debedido antre Leste i Oeste, i la Eidade Média se anstalou ne l coraçon de la Ouropa Oucidental. L Ampério Bizantino mantebe la luç de la ceblizaçon queimando ne l Lheste. L cisma drento de la outoridade de la eigreija an 1054 acuntiu an seguida a la debison anterior de 451, i fui prosseguida de las Cruzadas de l oeste para recuperar l lheste de la Ambason de l Muçulmanos. La sociadade feudal ampeçaba a ruir anquanto ls ambasores mungóles carregában la peste negra culs. Ls muros de Custantinopla caen an 1453, i inda l Nuobo Mundo ye çcubierto an 1492, por einiciatiba de Pertueses i Spanholes. La Ouropa acorda de l período mediebal atrabeç de l redescobrimiento de l ansinamiento clássico. La Renacença fui seguida de la Reforma Protestante, de l padre alman Martico Lhutero, que atacou la outoridade papal. La guerra de l 30 anhos, l Tratado de Bestfália i la reboluçon Gloriosa dórun la base para ua nuoba era de spanson i l Eiluminismo.

La reboluçon andustrial, ampeçando na Grana-Bretanha, permitiu a las pessonas, pula purmeira beç, nun dependíren mais de material de susisténcia. L recente Ampério Británico debediu-se assi cumo sues quelónias na América reboltadas para stablecer un gobierno repersentatibo. Ua mudança política na Ouropa acuntiu a partir de la Reboluçon Francesa, quando las pessonas gritában “Lhiberté, Eigalité, Fraternité”. L lhíder francés seguinte, Napoleon Bonaparte, cunquistou i reformou la strutura social de l cuntinente atrabeç de guerras até 1815. Quanto mais i mais duonhos de pequeinhas propiadades ganhában poder de boto, na Fráncia i ne l Reino Ounido, la atebidade socialista i de ls sindicatos zambolbiu-se i la reboluçon se anstalou na Ouropa an 1848. Ls redadeiros bruxedos de serbidon fúrun abolidos de la Áustria-Hungria ne l mesmo anho. La serbidon russa fui abolida an 1861. Las naciones balcánicas ampeçórun a ganhar sues andependéncias de l Ampério Otomano. Depuis de la Guerra Franco-Prussiana, Eitália i Almanha fúrun formadas de grupos de principados an 1870 i 1871. Cunflitos zamcadeórun-se al redror de l globo, nua série de ampérios, até que la percura de l lhugar al sol acabou cul ampeço de la Purmeira Guerra Mundial. Ne l desespero de la guerra, la Reboluçon Russa prometie al pobo “paç, pan i tierra”. Para alhá de houmilhada cul Tratado de Bersalhes, la Almanha ten sue eiquenomie çtruída cula grande depresson i ua nuoba grande guerra. Cula bitória de l capitalismo i de l quemunismo subre l fascismo, ampeçou ua nuoba orde mundial coincida cumo guerra frie. La Ouropa Oucidental formou ua ária de lhibre comércio, debedida pula Cortina de Fierro de la Ounion Sobiética. Quando l muro de Berlin caiu an 1989, la Ouropa assinou un nuobo tratado de ounion, que an 2007, cumprendia 27 países ouropeus.

Stória de la Índia

Este artigo apersenta las lhinhas gerales de la stória de la Índia, que ten ampeço cul registro arqueológico de la persença de l homo sapiens hai cerca de 34 000 anhos. Ua ceblizaçon de la Eidade de l Bronze eimergiu an época aprossimadamente cuntemporánea a las ceblizaçones de l Ouriente Médio. Cumo regra, la stória de la Índia abrange to l subcontinente andiano, correspondente als atuales República de la Índia, Paquiston, Bangladesh, Sri Lhanka, Nepal i Buton.

La ceblizaçon de l Bal de l Ando surgiu ne l seclo XXXII a.C. i atingiu la maturidade a partir de l seclo XXV a.C. Seguiu-se-le la ceblizaçon bédica. La ourige de l ando-arianos ye un punto de relatiba cuntrobérsia. La maiorie de ls studiosos acradita an algun tipo de heipótese de migraçon ando-ariana, segundo la qual ls arianos, un pobo semi-nómade possiblemente de la Ásia Central ó de l norte de l Eiran, tenerien migrado pa l noroeste de l subcontinente antre 2000 i 1500 a.C. La natureza de tal migraçon, l lhocal de ourige, i até mesmo la própia eisisténcia de ls arianos cumo pobo çtinto, son fuortemente çcutidos. La fuson de la cultura bédica cun las culturas drabídicas que le éran anteriores (presumiblemente ls çcendentes de la ceblizaçon de l Bal de l Ando) aparentemente resultou na cultura andiana clássica, ambora ls detalhes specíficos de l porcesso son cuntrobersos. Alguns antenden, por outro lhado, que la ceblizaçon de l Bal de l Ando era eissencialmente bédica i que se tenerie spalhado para partes de la Ouropa antre l sesto i l segundo milénio a.C. Ls nacimientos de Mahabira i de Buda ne l seclo VI a.C. marcan l ampeço de la fase más bien registrada de la stória andiana. Puls 1500 anhos seguintes, la Índia porduziu la sue ceblizaçon clássica i, segundo alguns storiadores, la maior eiquenomie de l mundo antigo antre ls seclos I i XV d.C., al cuntrolar antre un-terço i un-quarto de la riqueza mundial até la época mogol, apuis de l qué declinou debrebe sob domínio británico.

A las ancursones por eisércitos árabes i centro-asiáticos ne ls seclos VIII i XIII seguiran-se las de comerciantes de la Ouropa, a partir de l final de l seclo XV. La Cumpanha Anglesa de las Índias Ourientales fui fundada an 1600 i ampeçou, zde 1757, la colonizaçon de partes de la Índia. Na altura de 1858, apuis de derrotar ua cunfederaçon sique ne l Panjabe an 1849, la corona británica assumira l cuntrole político de birtualmente to l subcontinente. Tropas andianas ne l eisército británico zampenhórun un papel bital an ambas las guerras mundiales. La resisténcia nó-biolenta al quelonialismo británico, xefiada por Mahatma Gandhi, Ballabhbhai Patel i Jawaharlal Nehru, lhebou a la andependéncia frente al Reino Ounido an 1947. L subcontinente fui partilhado antre la República de la Índia, secular i democrática, i la República Islámica de l Paquiston. Cumo resultado dua guerra antre aqueilhes dous países an 1971, l Paquiston Ouriental tornou-se l Stado andependiente de Bangladesh. Ne l seclo XXI, la Índia ten oubtido ganhos spressibos an ambestimiento i porduçon eiquenómicos, custituindo-se na maior democracie de l mundo, cun ua populaçon de más de 1 bilhon de pessonas, i na quarta maior eiquenomie de l planeta (critério PPP) .

Fura de l sul de la Ásia, la stória, la cultura i la política de la Índia frequentemente se subreponen als países bezinos. La cultura, eiquenomie i política andianas eisercírun anfluéncia al lhongo de milénios na stória i na cultura de países ne l sudeste asiático, ne l lheste i ne l centro de la Ásia, cumo Andonésia, Cambodja, Tailándia, China, Tibete, Afeganistan, Eiran i Turqueston. Apuis de ancursones árabes na Índia ne l ampeço de l segundo milénio d.C., missones semelhantes an busca de la lhendária riqueza andiana anfluenciórun fuortemente la stória de la Ouropa mediebal, a partir de la chegada de Basco de la Gama. Cristófe Colombo çcubriu la América quando percuraba ua nuoba rota para la Índia, i l Ampério Británico oubtebe grande parte de sous recursos apuis de la ancorporaçon de la Índia (la "Jóia de la Corona") de l final de l seclo XVIII até 1947.

Para la stória de la Índia apuis de la andependéncia an 1947, ber Stória de la República de la Índia.

Índia

La Índia (an hindi भारत, transl. Bharat; an anglés India), ye un paíç federal asiático qu'acupa la maior parte de l subcontinente andiano i inda las ilhas Laquedibas i Andamon i Nicobar. Lemita al norte cula República Popular de la China, l Nepal i l Boton, a leste cun Mianmar, al sul i a leste cul Bangladesh i la Baía de Bengala, al sul cul Streito de Palk, defronte la ilha de l Ceilon (Sri Lanka), cul ouceano Índico i l mar das Laquedibas, l'oeste cul mar Arábico i l'oeste i norte cul Paquistan. La sue cuosta litoránea atinge 7.517 Km. Ye l segundo paíç mais populoso de l mundo (apuis de la China), cun mais dun bilhon d'habitantes, i l sétimo maior por ária. L nome oufecial de l paíç ye República de la Índia, i la capital ye Nuoba Délhi.

Berço de la Ciblizaçon de l Bal de l Ando i ua region de rotas de comércio stóricas i d'ampérios bastos, l subcuntinente andiano fui eidantificado cun sue riqueza comercial i cultural durante grande parte de sue stória. Quatro de las percipales religiones de l mundo, hinduísmo, budismo, jainismo i sikhismo ampeçórun alhá, anquanto l zoroastrismo, l judaísmo, l crestianismo i l slamismo chegórun ne l purmeiro milénio de la era crestiana i dírun forma a la dibersidade cultural de la region. Aneixada al poucos pula Cumpanha de las Índias Ourientales Británica zde l'ampeço de lseclo XVIII i quelonizada pul Reino Ounido zde ls meados de lseclo XIX, la Índia tornou-se ua nacion moderna an 1947 apuis dun sfuorço para l'andependéncia que fui marcada pula difundida rejisténcia nó-biolenta.

La Índia ye ua república parlamentar que cunsiste an 28 stados i an 7 territórios federales. Ten la décima segunda maior eiquenomie de l mundo an termos de taxas de cámbio de mercado i la quarta maior an poder de cumpra. Las reformas eiquenómicas transformórun-na na segunda grande eiquenomie de mais rápido crecimento; antretanto, inda sufre d'altos nibles de la pobreza, analfabetismo, i malas nutriçon. Ua sociadade pluralista, multiléngua, i multi-étnica, la Índia ye eigualmente l berço dua dibersidade d'animales salbaiges an ua bariadade d'habitates portegidos.

Noutras lhénguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.