Susu

Susu iolah cairan banutrisi bawarna putiah nan dihasiakan dek kelenjar susu mamalia, salah satunyo manusia. Susu iolah sumber gizi utamo untuak bayi sabalun inyo dapek mancerna makanan padek. Susu binatang (biasonyo jawi) bisa diolah pulo manjadi baragam produk sarupo mentega, yogurt, es krim, keju, susu kental manih, susu bubuak, dan lain-lainnyo untuak konsumsi manusia.

Kini, susu mampunyoi banyak fungsi jo manfaaik. Untuak umua produktif, susu dapek mambantu patumbuahannyo.[1] Samantaro itu, untuak urang lanjuik usia, susu mambantu manopang tulang supayo indak rapuah. Susu sacaro alami manganduang nutrisi pantiang, sarupo bamacam-macam vitamin, protein, kalsium, magnesium, fosfor, jo zinc, pandapaik lain manambahan baso susu manganduang mineral jo lamak.[2] Dek karano itu, satiok urang dianjurkan minum susu. Kini banyak susu nan dikameh dalam bantuak nan unik. Tujuannyo supayo urang katuju untuak mambali jo minum susu. Ado juo susu nan babantuak fermentasi sarupo dadiah.

Milk glass
Sagaleh susu jawi

Rujuakan

  1. Tahukah anda manfaat susu
  2. Susu Kedelai vs Susu Sapi di Beritaunik.net
Binatang manyusuan

Binatang manyusui atau mamalia adolah kelas hewan vertebrata nan tarutamo dicirian dek adonyo kelenjar susu, nan pado batino manjadian susu sabagai sumber makanan anaknyo; adonyo rambuik; dan tubuah nan endoterm atau "badarah paneh". Utak maatur sistem jalannyo darah, tamasuak jantuang nan punyo ampek ruang. Mamalia tadiri labiah dari 5.000 genus, nan tabagi dalam 425 kaluarga dan hinggo 46 ordo, walaupun hal iko tagantuang klasifikasi ilmiah nan dipakai.

Sacaro filogenetik, nan disabuik Mamalia adolah sadonyo turunan dari anduang moyang monotremata (takah echidna) dan mamalia theria (punyo plasenta dan bakantuang atau marsupial)

Cokelat

Artikel iko manganai cokelat sabagai bahan makanan. Untuak panggunoan lain silakan mancaliak cokelat (disambiguasi).

Cokelat adolah sabutan untuak hasil olahan makanan atau minuman dari biji kakao (Theobroma cacao). Cokelat patamo kali dikonsumsi dek panduduak Mesoamerika kuno sabbagai minuman, walaupun dipacayo jikok dahulu cokelat hanyo dapek dikonsumsi dek para bangsawan.Cokelat umumnyo dibarikan sabagai hadiah atau bingkisan di hari rayo. Dangan bantuak, corak, dan raso nan unik, cokelat acok digunokan sabagai ungkapan tarimo kasih, simpati, atau parhatian bahkan sabagai panyatoan cinto. Cokelat juo alah manjadi salah satu raso nan paliang populer di dunia. Salain dikonsumsi paliang umum dalam bantuak cokelat batangan, cokelat juo manjadi bahan minuman hangek dan dingin.

Dadiah

Dadiah marupoan susu kabau nan difermentasi sacaro alami di dalam buluah atau ruej batang batuang. Biasonyo, fermentasi nan tajadi balangsuang saindaknyo salamo sahari panuah. Pado umumnyo dadiah nan ka dijua di pasa iolah dadiah nan baumua duo hari. Dari sigi bahaso, kato dadiah sarupo jo dudh, bahaso dari etnis Sindhi (India dan Pakistan). Samantaro itu, tabiaik urang Parsia mamakan susu nan alah diparam samo bawang putiah jo mantimun, sarupo jo tabiaik urang Minangkabau maso dulu nan mamakan dadiah.

Dadiah diparam di dalam batuang nan ditutuik jo daun pisang atau daun waru nan alah dilayuan di ateh api. Caro pamaraman dikarajoan dalam suhu ruangan hinggo tajadi gumpalan kiri-kiro 2 hinggo 3 hari.

Dadiah biasonyo dimakan pas sarapan pagi, dicampua jo ampiang jo gulo merah. Dadiah buliah juo dimakan jo nasi sabagai samba.

Dari babarapo panalitian dikatahui bahwasanyo dadiah manganduang bakteri nan elok yaitunyo asam laktat (Lactobacillus casei) nan potensial sabagai probiotik. Asam laktat di dalam dadiah bagno dalam pambantuakan tekstur jo cito raso. Bakteri asam laktat sarato jo produk turunannyo dapek mancagah timbulnyo babagai panyakik sarupo mancagah enterik bakteri patogen, manurunan kadar kolesterol di dalam darah, mancagah kanker usus, anti mutagen, anti karsinogenik, jo maningkekan daya tahan tubuah. Salain tu, dadih sangaik baguno sabagai antivaginitis.

Dairi

Dairi dapek marujuak kapado babarapo hal barikuik:

Namo sabuah suku Batak di Sumatera Utara.

Bahaso Pakpak-Dairi nan ditutuakannyo.

Namo Kabupaten Dairi tampeknyo barasa.

Namo untuak produk susu.

Es campua

Es Campua adolah minuman nan baasa dari Sumatera Barat. Ciri khas dari minuman ko isi di dalam nyo ado agar-agar, sagu mutiara, kolangkaliang, cincau, karambia mudo, pokat, bijo salasiah, es batu, sirup, susu, dan pamanih buatan (aia gulo). Isi dalam Es Campua ko ado nan masih babahan mantah nan harus diabuih dulu sarupo kolangkaliang, sagu mutiara, kacang padi, dan ado bahan nan alun dibantuak modenyo sarupo cincau, agar-agar, cubadak masak, pokat, es batu.

Langkah salanjuiknyo masuak katahap maabuih, angek an aia sampai mandidiah (manggalagak). Masuak an kolangkaliang ka dalam aia angek mandidiah, tunggu sampai nyo masak (lunak), siap tu dibangkik. Sasudah tu lanjuik ka sagu mutiara, masuak an sagu mutiara ko kadalam aia angek mandidiah, tunggu sampai nyo mangambang siap tu bangkik. Sasudah tu kacang padi, cukuik dirandam jo aia angek mandidiah, tunggu sampai mangambang dan buang aia tu pakai panyariang supayo kacang padi ko ndak tabuang.

Sasudah tahap maabuih, masuak ka tahap salanjuiknyo bantuak agar-agar samo cincau ko dibantuak kotak-kotak ketek sarupo dadu, sasudah tu lanjuik cubadak masak nan diiris sasaui jo salero. Sasudah tu pokat, isi pokat diambiak mangguno an sendok, caro maambiak isi pokat tu jan sampai tabaok nan warna hijaunyo atau jan sampai takulik, kalau lah takulik isi pokat tu taraso paik. Salanjuiknyo es batu, dapek sajo dipacahan, dan dapek juo di aluihan pakai masinnyo.

Masuak ka tahap manyadioan Es Campua, ambiak mangkuak untuak palatak an nyo. Sasudah tu ambiak isi an dari Es Campua tu sarupo, cubadak masak, agar-agar, cincau, kolangkaliang, kacang padi, pokat, alah tu tambahan es batu sasuai salero masiang-masiang, dan tambahan pamanih buatan (aia gulo) sacukuiknyo, tambahan sirup jo susu kental sacukuiknyo. Dan minuman tu dapek siap sajian. Minuman ko disabuik dan banyak dikenal urang namonyo Es Campua.

Es tebak

Es tebak adolah es campua dari Sumatera Barat. Nan dimukasuik jo istilah "tebak" adolah olahan dari tepuang bareh katan nan dicampua jo tepuang sagu nan dimasak samo aia garam dan kapur sirih. Kalau alah masak, adonan nan alah siap dicetak tipih takah cindua. Barulah pelangkok lainnyo takah sirup sirah, susu kental manis, jo es batu serut ditambahkan.

Es teler

Es teler adolah minuman buah asli Indonesia. Pokat, Karambia Mudo, Cincau, Nangko, dan buah-buahan lainnyo dihidangan jo santan, susu kental manih, daun Pandanus amaryllifolius (biasanyo dalam bantuak sirup raso karambia jo pandan), gulo, jo saketek garam.

Jawi

Jawi adolah hewan taranak dari famili Bovidae dan subfamili Bovinae. Jawi dipaliharo tarutamo untuak dimanfaatkan susu jo dagiangnyo sabagai pangan manusia. Hasia sampingan, sarupo kulik, isi paruik, tanduak, jo kotorannyo juo dimanfaatkan untuak babagai kaparaluan manusia. Di sajumlah tampek, jawi dipakai pulo sabagai paelo alaik transportasi, pangolahan lahan tanam (bajak), jo alaik industri lain (sarupo parameh tabu). Karano banyak kagunoan ko, jawi alah manjadi bagian dari babagai kabudayoan manusia sajak lamo.

Kabanyakan jawi taranak marupokan katurunan dari jinih lia nan dikenal sabagai Auerochse atau Urochse (dibaca auerokse, bahaso Jerman nan bararti "sapi kuno", namo ilmiah: Bos primigenius), nan alah punah di Eropa sajak 1627. Namun, ado babarapo spesies jawi lia lain nan katurunannyo didomestikasi, tamasuak jawi bali nan banyak ditaranakkan di Indonesia.

Kabau

Kabau adolah binatang nan manjadi taranak bagi banyak urang di dunia, utamonyo di Asia. Binatang ko adolah domestikasi dari kabau lia nan masih dapek ditamukan di daerah-daerah Pakistan, India, Bangladesh, Nepal, Bhutan, Vietnam, Tiongkok, Filipina, Taiwan, Indonesia, jo Thailand.

Kini populasi kabau lia di Asia lah makin manurun nan dicamehan di maso nan ka datang tiadonyo populasi kabau lia nan dapek ditamukan. Kabau dewasa dapek mampunyoi barek sakitar 300 kg inggo 600 kg. Kabau lia dapek mampunyoi barek nan labiah, kabau lia batino dapek mancapai barek 800 kg jo kabau lia jantan dapek mancapai barek inggo 1200 kg. Barek rato-rato kabau jantan iolah 900 kg sarato tinggi rato-rato di pundaknyo mancapai 1,7 meter.

Salah satu ciri nan mambedakan kabau lia d.ari kabau piaroan adolah baso kabau piaroan mampunyoi paruik bulek. Dek adonyo pancampuran katurunan antaro kabau-kabau antaro populasi nan babeda, barek badan kabau dapek baragam.

Klasifikasi kabau masih alun pasti, tetapi Bubalus bubalis biaso dikalompokkan manjadi tigo anak jinih:

Kabau lia (B. bubalis arnee), muyang dek kabau sungai

Kabau sungai (B. bubalis bubalis) nan barasa dari Asia Selatan.

Kabau rawo (B. bubalis carabauesis) nan barasa dari Asia Tenggara.Muyang kabau rawo indak lai basobok sacaro lia, tetapi dikatahui baso genom kabau rawo tadiri dari 24 pasang kromosom, sadangkan kabau sungai mampunyoi 25 pasang kromosom. Katurunan pasilangan dari duo anak jinih ko dapek ditamukan jo dapek mangasiakan katurunan (fertil). Kabau indak dapek bakawin silang jo jawi nan mampunyoi 60 kromosom, walaupun masih tamasuak dalam anak suku nan samo Bovinae.

Susu dari kabau banyak digunokan dek manusia. Contohnyo sabagai bahan keju Mozzarella jo dadiah. Dagiang kabau juo marupokan hasia ekspor utamo di India. Walaupun baitu dagiang kabau kurang disukoi di Asia dek karehnyo. Kulik kabau acok digunokan juo subagai bahan sapatu, wayang kulik, jo helm sapeda motor.

Kambiang

Kambiang taranak (Capra aegagrus hircus) marupokan salah satu subspesies kambiang nan dipiaro atau dijinakan dari kambiang lia Asia Barat Daya jo Eropa Timur. Kambiang marupokan anggota dari kaluarga Bovidae dan basudaro jo jo domba dek kaduonyo tagolong dalam sub famili Caprinae. Ado labiah 300 jinih kambiang nan babeda-beda. Kambiang adolah salah satu di antaro spesies nan paliang lamo ditaranakan, iyolah untuak diambiak susu, dagiang, bulu, jo jangek di saluruah dunia. Pado taun 2011, populasi kambiang nan iduik di saluruah dunia mancapai 924 juta manuruik Organisasi Pangan dan Patanian Perserikatan Bangsa-Bangsa.

Kambiang marupokan binatang manyusui nan ukurannyo sadang. Kambiang taranak (Capra aegagrus hircus) adolah subspesies kambiang lia nan sacaro alami taseba di Asia Barat Daya (daerah "Bulan sabik nan subur" dan Turki) dan Eropa. Kambiang lia jantan maupun batino mampunyoi tanduak sapasang, namun tanduak pado kambiang jantan labiah gadang. Umumnyo, kambiang mampunyoi jangguik, kaniang cambuang, ikua agak ka ateh, dan banyak nan barambuik luruih dan kasa. Panjang tubuah kambiang lia, indak tamasuak ikua, adolah 1,3 meter - 1,4 meter, sadangkan ikuanyo 12 sentimeter - 15 sentimeter. Bobot kambiang batino 50 kilogram - 55 kilogram, sadangkan nan jantan dapek mancapai 120 kilogram. Kambiang lia taseba dari Spanyol ka arah timur sampai India, dan dari India ka utara sampai Mongolia dan Siberia. Habitat nan disukoinyo adolah daerah pagunuangan nan babatu-batu.

Kambiang alah dibudidayokan manusia kiro-kiro 8000 inggo 9000 taun nan lalu. Biasonyo, kambiang iduik bakalompok 5 sampai 20 ikua. Dalam pajalanannyo mancari makanan, kalompok kambiang ko dipimpin dek kambiang batino nan paliang tuo. Samantaro kambiang-kambiang jantan baparan manjago kaamanan kawanan. Wakatu aktif mancari makannyo siang maupun malam hari. Makanan utamonyo adolah rumput-rumputan jo daun-daunan.

Kambiang boer

Kambiang boer adolah kambiang nan barasa dari Afrika Selatan dan alah manjadi ternak nang ta-registrasi salamo labiah dari 65 tahun. Kata "Boer" artinyo patani. Kambiang boer marupokan kambiang pedaging nang sasungguahnyo karano patumbuahannyo sangek capek.

Kambiang iko pado umua limo hinggo anam bulan alah dapek mancapai barek 35 – 45 kg, jo ratoan patambahan berek tubuh antaro 0,02 – 0,04 kg per hari. Karagaman iko tagantuang pado banyaknyo susu dari induak dan ransum pakan sahari-harinyo. Kambiang boer jantan akan tumbuah jo barek badan 120 – 150 kg pado katiko dewasa (umua 2-3 tahun), sadangkan Batino dewasa (umua 2-3 tahun) akan mampunyai barek 80 – 90 kg. Boer batino maupun jantan kaduonyo batanduak. Dibandingkan jo kambiang perah lokal, persentase dagiang pado karkas kambiang boer jauh labiah tinggi dan mancapai 40% – 50% dari berek tubuhnyo

Keju

Keju adolah sabuah makanan nan dihasilan dangan mamisahan zat-zat padek dalam susu malalui proses pamakekan atau koagulasi. Proses pamakekan iko dilakuan dangan bantuan amo atau enzim tatantu nan disabuik rennet. Hasil dari proses tasabuik nantinyo ka dikeringan, diproses, jo diawetan dangan babagai macam caro. Dari sabuah susu dapek diproduksi babagai variasi produk keju. Produak-produak keju bavariasi ditentuan dari tipe susu, caro pamakekan, temperatur, caro pamotongan, pangaringan, pemanasan, juo proses pamatangan keju jo pengawetan. Umumnyo hewan nan dijadian sumber aia susu adolah sapi. Aia susu unto, kambiang, domba, kudo, atau kabau digunoan pado babarapo tipe keju lokal.

Makanan iko dikenal di saluruah dunio, namun didugo partamo kali dikenal di ranah sakitar Timur Tangah. Walaupun indak dapek dipastian bilo keju partamo kali ditemukan, manuruik lagenda keju partamo kali ditemuan sacaro indak sangajo dek saurang pangembara dari Arab.

Keju mamiliki ampia kasado kandungan nutrisi pado susu, sarupo jo protein, vitamin, mineral, kalsium, jo fosfor namun juo lamak jo kolesterol nan dapek manyababan masalah kesehatan apobilo dikonsumsi sacaro balebiahan, Basaran kandungan lamak dalam keju tergantung pado jinih susu nan digunoan. Keju nan dibuek dangan susu murni atau nan lah ditambah dangan krim mamiliki kandungan lamak, kolesteroll, jo kalori nan tinggi. Keju sangaik bamanfaat karano kayo ka protein, tarutamo bagi anak ketek, karano mareka mambutuahan protein nan labiah sambuah dibandingkan urang dewasa.

Louis Pasteur

Louis Pasteur (lahia di Dole, Jura, Franche-Comté, Prancis, 27 Desember 1822 – maningga di Marnes-la-Coquette, Hauts-de-Seine, Prancis, 28 September 1895 pado umua 72 taun) adolah ilmuwan kalahiran Prancis. Sabagai ilmuwan, baliau barasia manamukan caro managah pambusuakan makanan inggo babarapo wakatu lamonyo jo proses pamanehan nan biaso disabuik pasteurisasi. Louis Pasteur mamulai kariernyo sabagai ahli fisika di sabuah sikolah lanjutan ateh. Pado umua 26 taun liau alah manjadi profesor di Universitas Strasbourg, kudian liau pindah ka Universitas Lille dan di sinan pado taun 1856 liau malakukan panamuan nan amaik baguno di bidang kadotoran. Panamuan awanyo adolah pasteurisasi iyolah mamatikan bakteri nan ado di susu jo pamanehan.

Louis Pasteur ilmuwan pandukuang teori Biogenesis tanamo jo teori "Omne ovum ex vivo omne vivum ex ovo"

Pasteur juo mambuek ubek untuak panagah panyakik antraks jo suntikan malawan panyakik anjiang gilo (rabies). Pado wakatu itu urang nan tagigik dek anjiang gilo ka mandarito panyakik nan disabuik hidrofobia. Suntikan rabies Pasteur indak hanyo managah tapi juo maubek panyakik tu. Pado ari ulang tahunnyo nan ka 70 dotor-dotor jo ilmuwan dari saluruah dunia bakunjuang ka Paris untuak mahoromatinyo. Sajak taun 1888 karya Pasteur dilanjuikan di Institut Pasteur di Paris. Kini institut itu mampunyoi cabang di 60 nagara. Makamnyo ado di bawah institut tasabuik, jenazahnyo dimasuakan ka dalam peti mati tabuek dari marmar jo granit.

Pangkalan Susu, Langkat

Pangkalan Susu adolah marupoan sabuah kecamatan nan ado di kabupaten Langkat, provinsi Sumatera Utara, Indonesia.

Templat:Pangkalan Susu, Langkat

Pinukuik

Pinukuik adolah sabuah makanan nan barasa dari sumatra barat,npunukuik ko sabuah camilan nan dapek dimakan untuak makan pagi atau untuak sakedar dimakan untuak bakumpua-kumpua. Pinukuik tabuek dari tapuang bareh nan dirandam dalam aia. Proses pambuekan pinukuik ko,pinukuik dicampua jo santan,karambia kukua,gulo,jo bahan lainnyo. Pinukuik dimasak pakai cetakan logam nan dibaka pakai sabuik karambia, sasudah tu tunggulah sampai pinukuik bawarna agak kacoklatan sarato jo tacium baun harum khas pinukuik. Raso pinukuik jadi taraso lamak dek adonyo santan jo gulo nan tacampua apolai pado penyajiannyo ditambah susu kental nan mambuek raso pinukuik jadi tambah lamak.

Pisang

Pisang marupokan namo umum nan diagiah ka tanaman terna raksasa badaun gadang memanjang dari suku Musaceae. Babarapo janihnyo (Musa acuminata, M. balbisiana, dan M. ×paradisiaca) mahasilkan buah konsumsi nan dinamokan samo. Buah iko tasusun dalam tandan dangan kalompok-kalompok tasusun manjari, nan disabuik sikek. Hampia kasado buah pisang punyo kulik bawarna kuniang katiko masak, walaupun ado babarapo nan bawarna jingga, sirah, hijau, ungu, atau bahkan hampia hitam. Buah pisang sabagai bahan pangan marupokan sumber energi (karbohidrat) jo mineral, tarutamo kalium.

Paralu disadari, istilah "pisang" dipakai juo untuak sajumlah janih nan indak mahasiakan buah konsumsi, takah pisang abaka, pisang hias, jo pisang kipas. Artikel iko hanyo mambahas pisang pahasia buah konsumsi sarato karabaiknyo nan bakaikan.

Teh talua

Teh talua adolah minuman khas Sumatera Barat nan biasonyo ado di kadai-kadai tapi jalan ataupun restoran Padang. Namo minuman ko barasa dari duo bahan utamo pambueknyo iyolah teh jo talua. Minuman ko tadiri dari campuran teh, gulo, talua, jo saketek perasan asam kapeh (jeruk nipis). Talua nan dipakai biasonyo talua ayam kampuang, tapi buliah juo jo talua itiak. Bagian kuniang talua nan lah dipisahan dari bagian putiahnyolah nan dipakai. Teh talua biasonyo diminum dek patani nan ka pai maladang untuak panambah stamina karajo.

Caro mambueknyo nan lai mudah yakni tingga mangocok kuniang talua nan diagiah saketek susu jo gulo inggo kambang, ditandoi jo barubahnyo rono kuniang talua manjadi agak putiah. Siap tu diseduh jo aia teh angek. Perasan asam kapeh baguno untuak manyamarkan baun amih dari taluanyo.Kok dipadiaman sabanta sasudah diseduh jo aia teh angek, timbua lapisan-lapisan sabanyak tigo lapih. Nan paliang ateh ado busa, nan di tangah barono putiah, sadang nan di bawah barono kacoklatan.

Urang Minang

Urang Minang, disingkek dari Minangkabau, adolah kalompok etnis dari ras atau rumpun banso Melayu di Nusantara nan babaso jo manjunjuang adaik Minangkabau. Wilayah kabudayaannyo maliputi Sumatra Barat, saparuah daratan Riau, bagian utara Bengkulu, bagian barat Jambi, bagian selatan Sumatra Utara, barat daya Aceh, dan juo Negeri Sembilan di Malaysia.

Urang minang manganuik agamo islam, dan manggunoan motto adaik basandi syara', syara' basandi ka kitabullah

Urang Minang dikana juo sabagai Urang Awak nan punyo masakan khas, dan populer di Indonesia bahkan sampai ka kawasan rantau nan disabuik juo sabagai masakan Padang.

Manuruik A.A. Navis, Minangkabau labiah kapado kultur etnis dari suatu rumpun Melayu nan tumbuah jo gadang dek sistem monarki, sarato punyo sistem adaik nan khas, nan dicirikan dek sistem badunsanak malalui jalur padusi atau matrilineal, walaupun budayonyo sangaik kuek diwarnai dek ajaran agamo Islam. Katiko Thomas Stamford Raffles, malakukan ekspedisi ka padalaman Minangkabau tampek kaduduakan Karajaan Pagaruyuang, sainggo bapandapek bahosonyo Minangkabau tu adolah pusek kakuasoan sarato asa bangso Melayu, nan kamudian panduduaknyo taseba marato di Kapulauan Timur.

Utami Roesli

dr., Utami Roesli, SpA, IBCLC, FABM (lahia di Semarang, Jawa Tengah, 17 September 1945; umua 74 taun) adolah surang dotor Indonesia. Utami dikana sabagai surang panggiat nan gigiah mampajuangan hak-hak bayi untuak mandapek-an ASI nan baiak. Manuruik Utami bayi indak sapantasnyo diagiah susu formula nan barasa dari susu jawi.Sabagai surang panggiat jo pajuang ASI, Utami jo babarapo urang tokoh lainnyo mandirian limbago Sentra Laktasi Indonesia (Selasi) sarato manjabat sabagai katuanyo. Disampiang tu Utami bapraktek pulo di Klinik Lakstasi Rumah Sakit St. Carolus Salemba, Jakarta.

Kagigiahan Utami mangampanyean ASI eksklusif sarato maajaan "Inisiasi Menyusui Dini" indak talapeh dari pangalaman paiknyo katiko gagal manyusui 2 urang anaknyo sacaro samparono atau eksklusif iyolah salamo 2 taun.

Dalam bahaso lain

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.