Monarchia

La monarchia l'è la forma de governo indoa el podè l'è in man ad ona persona e che la governa fin a la soa mort o a la soa abdicazion. Quella figura li l'è ciamada monarca.

I podè del monarca cambien sossenn da sistema a sistema, in di monarchij parlamentar l'è limitaa dal Parlament, e donca el monarca a l'è on simbol, in di monarchij costituzional el monarca el gh'ha pussee libertà, ma l'è limitaa da ona costituzion, inveci in di monarchij assoluu el monarca el gh'ha tucc i podè e l'è despess consideraa "sora" di gent.

La succession l'è dada squasi semper da ona fameja reala, anca se gh'hinn di cas de monarchia elettiva ('me el Sacher Roman Imperi o, incoeu, 'l Vatican).

L'è contrapposta a la Republega.

World Monarchies
     Monarchia assoluta     Monarchia costituzional cont on gran podè del monarca     Monarchia parlamentara     Regn del Commonwealth in Union personala cont el Sovran del Regn Unii     Monarchij subnazionai

Vos corelaa

Abdicazion

L'abdicazion a l'è l'att de 'n monarca de renonzia al trono. In del cas de 'n càpo de Stat republegan se parla de dimission, in del cas del Papa de renonzia.

Belgi

El Belgi (België in Flamengh, Belgique in Frances, Belgien in Tudesch) l'è un stat de l'Europa ucidental.

A nord l'è tacaa ai Pais Bass, a est a la Germania e el Lüssembürgh, a sud e süd-ovest a la Francia e a nord-ovest el da ins el Mar del Nord.

Gh'è pö da dì ch'el Belgi l'è al cunfin tra l'Europa germanofuna e l'area linguistica rumanza. L'è divis in tre region: i Fiander, induè che se parla el flamengh (pü o meno el 58% de la pupulazion); la Valonia (con el 32% de la pupulazion); e la region de la cità de Bruxelles, uficialment bilinguv e induè che ghe sta el 10% de la pupulazion.

El Belgi l'è staa vün di fundadur de l'Ünion europea e la so capital l'è la sed d'un bel po d' istituzion cumünitari.

Capo de Stat

El Capo de Stat a l'è l'orghen che l'è mittuu a la guida, cont di competenz different a segonda de l'ordinament, de 'n Stat e 'l reppresenta la soa sovranità. De solit a l'è 'n orghen monocratich, ma ad esempi in Isvizzera l'è tutt el Consili Federal a vess Capo de Stat, a San Marin e Andorra gh'è 'na diarchia.

A segonda del sistema el Capo de Stat o l'è elegiuu, direttament o indirettament, in del cas de la Republega e de la monarchia elettiva, o passaa in tra i member de 'na familia, cioè in la monarchia ereditaria. A segonda del sistema el Capo de Stat el pò avègh di podè marcaa, 'me quell de mett el veto ai legg, che 'l pò vess superaa (per esempi in la Costituzion di Stat Unii) o no (comé in la Costituzion del Liechtenstein), nomenà el governo, sia 'me roeul cerimonial sia formal, e di voeult guidàll, e garantì el sistema giudiziari, despess cont la nomina de 'n quaj giudes.

Di alter ròbb generalment guarentii ai Capi de Stat a hinn l'immunità sovrana, la guida formala di Forz Armaa e de la diplomazia e la possibilità de dà la grazia e commutà i pen.

Costituzion del Liechtenstein

La Costituzion del Liechtenstein a l'è la legg fondamental del Liechtenstein, in vigor del 1921. L'ha rimpiazzaa la Costituzion del 1862 e l'ha trasformaa el Prenzipaa in d'ona monarchia costituzional, l'ha sbassaa l'età per votà e l'ha tolt via i mèmber del Landtag nominaa dal Prenzip. L'è stada approvada durant del Regn del Giovann II.

L'è stada reformada in d'on poo de occasion: I pussee important a hinn staa in del 1984, durant del Regn del Franzesch Isepp II e l'ha daa el dirizz de votà ai donn e in del 2003 sotta 'l Regn del Giovann Adamm II, che l'ha daa pussee podè al Prenzip e l'ha daa la possibilità de secession per i comun e de toeu via la monarchia cont on referendum.

Estrema destra

L'estrema destra l'è l'ideologia politega che la esalta e la interprata radicalment i idej de la destra.

L'è on concett che l'è mudaa assee in di agn, vist el cambiament di idej de la destra: Ad esempi in del 1800 l'era la posizion di assolutista monarchegh che voreven guarnà i privilegi de la monarchia, e quand che 'l period monarchich l'è finii l'è 'gnuu a indicà i posizion reazionari e conservativ in sui diritt politegh, civil e religios, e cont el nass del fassism i moviment de estrema destra scomincen a indentificàss con quell, cont el socialism de destra.

Inveci, in di Stat Unii, indova l'esperienza fascista e monarchega la gh'è mai staja, l'estrema destra la se troeuva in chi tocch a destra del Partii Republegan contrari a tucc i intervent del Stat in de l'economia, sociada tendenzialment a 'na vision pseudo-cristiana de la vida e despess razzista: a l'è representada del Ku Klux Klan e de olter insci ciamaa White Supremacy Groups, ciovè moviment razzista, comè per esempi la Alt-Right del Richard Spencer.

Etrusch

I etrusch hinn staa on popol de l'Italia central, originari de la terra in tra l'Arno e 'l Tever. I eren ciamaa di Roman Tusci, e 'l nomm de la Toscana el vegn de li. I etrusch parlaven 'na lengua minga indoeuropea, anmò misteriosa per i lenguista. Han avuu el sò period de spendor in tra el secol quell de 7 e quell de 6 a.C, cont on domini che 'l rivava da la Campania a la bassa Lombardia: però dopo de la fin del Regn de Roma, cont ona monarchia etrusca, i Roman han scominciaa a slargàss in terra etrusca, e hinn descomparuu intorna al segond secol a.C.

Forma de govern

La forma de govern a l'è quella organizzazion che on Stat sovran el scerniss per gestì la soa sovranità e pussee in general la division di poder in tra el Capo del Stat, el Governo, el Parlament i autonomij local.

Imperi d'Austria

L'Imperi d'Austria a l'è stada 'na monarchia assoluda de l'Europa in pee formalment dal 1804, cont la fin del Sacher Roman Imperi, al 1867, cont la parificazion de l'Ongaria e la creazion de l'Imperi Austro-Ongarich. El gh'eva 'me dipendenz el Regn Lombardo-Venet e 'l Regn d'Ongaria.

El territori imperial austriegh a l'éra giamò autònom in del Sacher Roman Imperi, ch'a l'éra governaa di Asborgh e l'éra ciamaa Arciducaa d'Austria: L'elevament a Imperi a l'è staa faa del Franzesch I d'Austria a seguit de la disgregazion del Sacher Roman Imperi per tegnì el titol imperial.

Liechtenstein

El Liechtenstein (officialment Principaa del Liechtenstein, in todesch Fürstentum Liechtenstein, in alemann Förschtatum Liachtaschta) a l'è 'na monarchia costituzionala europea, situada in tra la Svizzera e l'Austria.

Monarchia assoluta

La monarchia assoluta a l'è el sistema de monarchia indova el monarca a l'è minga limitaa de nissuna legg, regolament o tradizion e 'l gh'ha dònca el podè assoluu in sui decision del Stat.

Monarchia costituzionala

La monarchia costituzionala l'è 'na forma de govern monarchega indova el podè del Sovran l'è limitaa de 'na Costituzion. In di monarchij costituzional d'incoeu l'è spandegada la separazion di podè e tendenzialment el Sovran l'è a capo del governo, carega che 'l pò delegà a on primm minister o no, e in del podè legislativ el gh'ha el diritt, parzial o total, de veto.

Monarchia elettiva

La monarchia elettiva l'è ona forma de governo monarchega indova che 'l capo de stat el gh'ha on titol da monarca (Re, Papa, Imperador) e l'è elegiuu, squasi semper da on consej di prinsep, ma di voeult anca da di assemblee pussee grand. La forma inversa, pussee spantegada, l'è la monarchia ereditaria.

Monarchia federala

Per monarchia federala se intend on Stat cont la monarchia ch'a l'è anca 'na federazion e indova che sotta gh'è di alter monarca o di formi de governa minga monarchich.

Incoeu a hinn di monarchij federaj el Canadà, Saint Kitts e Nevis e l'Australia, che compartissen el midemm monarca degià che hinn di Reamm del Commonwealth, la Malesia e i Emiraa Arab Unii, che eleggen i sò monarca in tra i monarca locai, e 'l Belgi, faa su de Region e Comunità. Despess, anca se l'è minga formalment ona federazion, anca la Spagna l'è sociada al concett, per i sò autonomij.

Monarchia parlamentara

La monarchia parlamentara a l'è la forma de monarchia costituzionala indova che 'l ver titolar de la sovranità a l'è el Parlament e 'l monarca el gh'ha 'n roeul de garanzia.

Referendum

El Referendum l'è 'n istitut elettoral doperaa per dà la possibilità al popol de scernì in su 'na question precisa.

El referendum el dà scerna in tra di opzion, normalment du (Sì/No, Monarchia/Republega, Restà/Lassà), anca se in Isvizzera l'è anca spantegaa el referendum a opzion multipla, e l'è la forma pussee basica e doperada de democrazia diretta.

Per i referendum in su la sovranità de 'n Stat, donca la soa forma de governo o i sò confin l'è pussee doperaa el termen "plebiscitt"

I referendum pòden vess spartii in:

Referendum consultiv, bon comé opinion e senza oblegh de vess respettaa

Referendum vincolant, che 'l dà on oblegh al poder esecutiv e al poder legislativ.Tipicament se fann di referendum in su:

L'abolizion de 'na legg (referendum abrogativ)

L'autodeterminazion de 'na nazion

La ratifega di trattaa interazionai

Reggenza

La reggenza a l'è la gestion de la sovranità de part de 'na personna che l'è minga el monarca, per condizion soa - per esempi età sotta quella minima o malann - o per soa decision. El capita despess che 'l reggent el sia 'n parent del monarca.

Incoeu gh'è du reggent: El Luis del Liechtenstein, reggent dal 2004 per permett al pader de gestì el patrimoni de familia e per fàgh fà esperienza, e 'l Tengku Hassanal Shah, quand che 'l sò bobà a l'è staa elegiuu Yang di-Pertuan Agong de la Malesia.

Republega

La Republega, dal latin res pubblica, che 'l voeur dì roba publega, l'è ona forma de governo doperada in de la democrazia reppresentativa o aristocratega. In de la Republega, el poder l'è daa per elezion o nomina, mia per trasmission ereditaria, e l'è mia proprietà privada de quell che 'l ghe l'ha. Donca, l'è in contrapposizion con la monarchia.

Spagna

La Spagna - nòmm official in Spagnoeù Reino de España (Regn de Spagna) - l'è un Stat formaa da una monarchia parlamentàri ch'el se tróva a sudòvest de l'Europa. La capital l'è Madrid. Insèma al Portogal, Andòrra e Gibiltèrra la forma la Penisola Ibèrica. A nordest la gh'ha i mont Pirenei, e la confina con Francia e Andòrra, inveci a sud la confina con Gibiltèrra (che l'è ona colonia del Regn Unii). In di sò territòri african, la confina per tèrra e per mar con Marocch

Fin dal 1561 la capital l'è Madrid, che la gh'ha pussee o meno 3 milion d'abitant, e l'è ancasì la città con pussee gent.

La lengua oficial del stat l'è el spagnoeù, e se parla anca el catalan/valenzan, el basch, el galizian, occitano che hinn lengu official int i sò region, e hinn prottèt da la Costituzion spagnoeùla.

Gh'hinn ancasì alter parlà che lor hinn prottèt ma lor hinn mingaa riconossuu officialment come lengu. Quèsti hinn: Asturian, Leones, Estremadurian, Cantabrian e Aragones.

Union personala

L'union personala a l'è la situazion de du Stat cont el midemm monarca ma che hinn sovran e independent in tra de lor. L'esempi pussee famos a l'è quell di Reamm del Commonwealth, di Stat sovran che comparissen el Re d'Inghilterra 'me monarca.

I Union personai pòden nass per di question dinastegh che menen pussee Stat a 'vègh el midemm monarca, a di accord in tra i Paes o per di question storegh, 'me in del cas del Commonwealth di Nazion o de guerra, come in del cas de l'Albania italiana, nominalment independent ma cont el Re d'Italia 'me Re.

Alter lenguv

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.