Diocesi

La diocesi (in latin dioecesis, del grech διοίκησις, che 'l vör dì "aministraziun") a l'era in urigin una südivisiun aministrativa de l'Imperi Ruman; a l'è anca una südivisiun di ges Cristian.

In del Cristianesim

La diocesi a l'è, in de la Gesa Catoliga e in di alter ges de urdinament episcupal, un toch de la cumünità cristiana cunt i sò limit terituriaj e sota el guern pastural d'un vescuv.

Varda anca

Ales

Ales (inscì anca in Piemuntes; Alice Castello, ma antigament Alice Inferiore, in Italian; in tücc i cas l'acent el va in sü la a) a l'è un cumün de la Pruvincia de Vercei.

El gh'ha ona popolaziun de 2 724 abitàncc (dàto del Dicember 2013), cunt ona superfis de 24,8 km² e ona densità de popolaziun de 110 ab./km².

El paes el se tröva al cunfin cun la Pruvincia de Biela (cumün de Cavajà, Ropul e Viverun) e 'l fa part de la Diocesi de Ivrea.

Arcidiocesi de Milan

L' Arcidiocesi de Milan (Archidiœcesis Mediolanensis in Latin) l'è una circuscrisiòn metrupulitana d'la cesa catòlica italiana, e la fa part d'la Cunferensa Episcupàl Italiana.

Bobi

Bobi (insì anca in emilian, Bobbio in talian, Bobium in latin, Bêubbi in ligür) l'è un cumün italian de 3.724 abitant in pruincia de Piasenza. Insema a Piasenza el furma la sede del vesch de la Diocesi de Piasenza-Bobi.

L'è una cità d'urigin medioeval e la se tröva int la zona di Quater Pruinc, ai pé del Penes (1.460 m.), ins la sponda manzina del Trebia.

Diocesi de Cum

La Diocesi de Cum (Dioecesis Comensis in Latin) l'è una circuscrisiòn d'la cesa catòlica italiana, che la dipènd da la pruìncia d'la Lumbardia, da la diocesi metrupulitana de Milan e la fa part d'la Cunferensa Episcupàl Italiana.

Diocesi de Lod

La Diocesi de Lod (Dioecesis Laudensis in Latin) l'è una circuscrisiòn d'la cesa catòlica italiana, che la dipènd da la pruìncia d'la Lumbardia, da la diocesi metrupulitana de Milan e la fa part d'la Cunferensa Episcupàl Italiana.

Piev de Angera

La Piev de Angera l'era vuna di vegg piev de l'Arcidiocesi de Milan e del sò Ducaa, che la gh'eva 'me capploeugh el paes varesott de Angera, in sul Lagh Magior.

El sò patron l'eva Santa Maria Assonta.

L'è nassuda in del XIV secol, e l'ha veduu modificàss el sò territori duranta i secoi, anca perchè cont el passà del temp l'ha perduu importanza. In del 1797 l'ha perduu (compagn de tutt i olter piev) i sò fonzion aministrativ, e del pont de vista eclesiastegh l'ha veduu la soa fin in del 1972.

La piev la comprendeva i comun de Angera, Barzoeula, Cabroeunn, Ispra, Lentaa, Lisanza, Mercall, Orian, Ranch, Sest, Tain e Chej, oltra che i parocchi de Dagnent, Meina e Nebiun (passaa in del 1819 a la diocesi de Novara).

Piev de Brivi

La piev de Brivi l'è stada ona piev religiosa e ministrativa del Milanes, che la gh'eva 'me capploeugh el comun brianzoeu de Brivi.

I sò patron eren San Martin e San Lissander.

L'è stada citada per la prima voeulta in del 966.

In del 1786 la comprendeva i comun de Brivi, Calch, Imbersagh, Irun, Izur, Meraa, Mondonegh, Novaa, Olgiaa, Paderno, Robiaa, Sabionscell, Sartirana, Verdee de Sora, Verdee de Sotta, Bagaggera.

Cont el passà di secoi, i sò confin s'hinn spostaa: per esempi, in del 1787 l'ha perduu i territori de Cavrin, Sant Antoni, San Paol, Torr di Bus e Villa d'Adda, passaa a la Diocesi de Bergom; in del 1854 Meraa l'è deventada la sede de ona piev noeuva, ma inscambi Brivi l'ha guadagnaa i parocchi de Rovagnaa e Peregh.

Piev de Dairagh

La piev de Dairagh l'è stada vuna di piev religios e ministrativ del Milanes.

El sò patron l'eva San Genes.

La confinava a nord cont i piev de Somma, Galaraa e Olgiaa, a est con la piev de Parabiaj, a sud con quella de Corbetta e a ovest con la diocesi de Noara.

La comprendeva i comun de Dairagh, Arconaa, Bienaa, Borsan, Bispiccol, Buscaa, Casten, Cugionn, Furaa, Indun, Invrun, Lonaa Pozzoeu, Magnagh, Malvaj, Nosaa, Robecchett, Sant Antonin, Tornavent, Turbigh, Vanzaghell e Villa Cortesa.

Piev de Derv

La piev de Derv l'era vuna di piev religios e ministrativ del Milanes.

I patron eren i sant Peder e Paol.

La confinava a nord e a ovest con la diocesi de Comm, a sud-est con la piev de la Valsasna e a sud con la piev de Belan.

La comprendeva i comun de Derv, Corenn, Dor, Suej, Introzz, Vestren e Tremenegh.

Piev de Gajan

La piev de Gajan l'è stada vuna di piev religios e ministrativ del Milanes.

La gh'ha 'vuu 'me capploeugh prima el paes de Gajan (rion de Cantù), e poeu in del 1584 gh'è staa spostaa la sede a Cantù. Per 'sta reson l'era ciamada anca Piev de Cantù.

El sò patron l'era San Vincenz (a Gajan) e poeu San Paol (a Cantù).

La confinava a ovest con la diocesi de Comm, a nord con la piev de Inscin, a est con la piev de Marian e a sud con quella de Seves.

La comprendeva i comun de Cantù, Alzaa, Carimaa, Cusciagh, Figin, Intimian, Montorfen e Novedraa.

Piev de Garlaa

La piev de Garlaa l'era vuna di piev religios e civil del Milanes.

El sò patron l'eva San Steven.

In del 1574 però el San Carlo Boromee l'ha spostaa la sede de la piev a Olginaa.

La confinava a ovest con la piev de Ogionn, a nord-ovest con quella de la Valassina, a nord con quella de Mandell (diocesi de Comm), a nord-est con quella de Lecch, a est con la diocesi de Bergom e a sud con la piev de Brivi.

La tirava denter i comun de Olginaa, Garlaa, Bartesaa, Bij, Capiaa, Consonn, Dosc, Galbiaa, Malgraa, Pescaa, Sala, Cherghentin e la Vall.

Piev de Inscin

La piev de Inscin l'era vuna di piev religios e ministrativ del Milanes.

La soa sede l'è stada prima in del paes de Inscin e poeu, a partì del 1584, a Erba. La prima patrona l'è stada Sant'Ufemia, e poeu l'è deventada Maria Nassenta.

La confinava a ovest e a nord con la Diocesi de Comm, a nord-est con la Squadra di Maur, a est con la Squadra de Nibionn e a sud con la piev de Marian.

La comprendeva i comun de Inscin, Albes, Cassan, Alseri, Anzan, Fabrica, Arscellasch, Busnigh, Carchen, Crevenna, Erba, Luragh, Colciagh, Lambrugh, Meron, Monguzz, Orsenigh, Pravesin, Pont Lamber, Lescia e Villa.

Piev de Lecch

La piev de Lecch l'è stada vuna di piev religios e ministrativ del Milanes.

El patron l'eva San Nicolò.

A l'è nassuda in del 1584, perchè prima la sede de la piev l'eva a Castell, che però cont el passà del temp l'aveva perduu importanza. A ogni bon cunt, al contrari de olter piev nassuu in del Cincent, quella de Lecch l'ha gh'ha 'vuu anca di fonzion ministrativ, e minga domà eclesiastegh.

La confinava a nord-ovest con la piev de Mandell, a nord con quella de la Valsasna, est e a sud con la diocesi de Bergom, a sud-ovest con la piev de Garlaa.

La tirava denter i comun de Lecch, Quaa, Balabi de Sora, Balabi de Sotta, Belee, Bruman (incoeu in diocesi de Bergom), Castell, Germanee, Laorca, Morteron, Olaa, Ransc, San Gioann, Cius.

Piev de Legiun

La Piev de Legiun l'è stada vuna di piev religios e ministrativ del Milanes.

El sò patron l'eva San Steven.

La confinava a ovest con la diocesi de Noara, a nord con la piev de la Valtravaja, a est con quella de la Valcuvia, a sud con quella de Brebbia.

La tirava denter i comun de Legiun, Balaraa, Celina, Sangian, Aroeu, Scerr, Laven, Mombell.

Piev de Mandell

La Piev de Mandell l'è stada vuna di piev religios e ministrativ del Ducaa de Milan.

El sò patron l'era San Lorenz.

El sò status l'era putost particolar, perchè se del pont de vista civil la partegniva al Statt de Milan, de quell religos inscambi la pertoccava a la Diocesi de Comm. Quell chì l'è staa el resultaa de compromess de ona longa contesa del territori in tra i città de Milan e Comm. Anca 'dess a Mandell se conserva el rito roman.

La piev la confinava a ovest cont el rest de la Diocesi de Comm, a nord con la piev de Varenna, a nord ed est con quella de la Valsasna, a sud-est con quella de Lecch, a sud con quella de Garlaa, a sud-ovest con quella de la Valassina.

La comprendeva i comun de Mandell, Rongg, Somana, la Badia, Linzanegh, Lierna, Olcc e Vassena.

Piev de Pontiroeu

La Piev de Pontiroeu l'è stada vuna di piev religios e ministrativ del Milanes.

La confinava con la Piev de Brivi a nord, quei de Vimercaa e Gorgonzoeula a ovest, con quella de la Gera d'Adda a sud-est e con la Diocesi de Bergom a est.

Propi per la soa posizzion de confin in tra el Ducaa de Milan e la Republica de Venezzia, la piev l'è stada al center di guerr in tra i duu statt: e per quella reson chì, l'ha cambiaa despess la grandezza e 'l numer de paes sotta la soa ministrazzion. Inscì, invers la fin del Medioev, la sede de la piev l'è stada spostada a Trezz; pussee tardi i territori bergamasch vegneven organizaa del governa spagnoeu in de la noeuva Piev de la Gera d'Adda. Inoltra el cardinal Borromee, in de la segonda metaa del Cincent, l'ha destaccaa de la piev anca la città de Trevij e l'ha organizaa la piev de Verdell, che la quattava dent i parocchi bergamasch passaa sotta el controll venezzian.

La piev de Trezz l'ha conservaa apena i comun in su la sponda ocidental de l'Adda: l'ha perduu el sò roeul ministrativ in del 1786 (ai temp di reform civil de la Lombardia del governa austriegh), e quei religios in del 1972, quand che l'è stada abolida insemma a tucc i olter piev.

A la fin del XVIII secol a gh'era denter i comun de Trezz, Basian, Busnagh, Ronscell, Cassan, Cassinn San Peder, Colnagh, Concesa, Cornaa, Port, Gresciagh, Groppell, Pozz, Trescian e Vaver.

Piev de Porlezza

La Piev de Porlezza l'era vuna di piev religios e civil del Milanes.

El sò patronn a l'era el San Vitor.

La confinava con la Piev de la Valsolda a ovest, con la Piev de la Cavriasca a nord e con la diocesi de Comm a est e sud.

L'era ona piev importanta perchè l'era part de la strategia de serciament de la diocesi comasca operaa de la gesa ambrosiana.

In del 1640 gh'è staa destaccaa el territori de la Valsolda: inoltra, in del 1786, l'imperador austriegh Giusepp II l'ha spostada in de la Provincia de Comm, per poeu vess riportada in del Milanes del sò sucessor, Leopold II.

Compagn de tutt i olter piev milanes, l'ha perduu el sò roeul civil in del 1797 e quell religios in del 1972.

A la fin del XVIII secol la gh'eva denter i comun de Porlezza, Tavord, Buggioeu, Seghebbia, Carlasc, Cavargna, Scima, Scin cont Osten, Corred, Cusin, Gotter, Pian, San Bortol e San Nazzar.

Piev de Somma

La Piev de Somma l'è stada vuna di piev ministrativ e religios del Milanes.

La confinava a nord con la piev de Brebbia, Angera e Vares, a est quei de Visever e Olgiaa, a sud con quella de Parabiaa, a ovest con la Diocesi de Noara. La patrona l'era la Santa Gnesa.

La piev l'è nassuda intorna al XII secol, anca se i primm notizzi cert che gh'emm de lee a hinn del 1398. Compagn de tutt i olter piev, l'ha perduu i sò fonzion civil in del 1797. Del pont de vista religios, a partì del Cincent la piev l'è stada spartida in duu tocch: i dò sedi plebann a eren Mezana e Arsagh. In del 1972 la piev religiosa l'è stada sostituida cont on Decanad.

A la fin del XVIII secol in de la piev a gh'era i comun de Somma, Albusciagh, Arsagh, Caidaa, Casal, Casoraa, Castelnovaa, Corgen, Crugnoeula, Cuviron, Menzagh, Mezana, Montonaa, Mornagh, Quinzan, San Pancrazzi, Sesona, Sumiragh, Vergiaa, Villa, Vorasecca, Vinagh, Vizzoeula e Zimber.

Piev de la Gera d'Adda

La piev de la Gera d'Adda l'era vuna di piev religios e ministrativ del Milanes, che la gh'eva 'me capploeugh el comun bergamasch de Carevasg.

Al contrari de la pupart di piev, in del cas de la Gera d'Adda l'aspett ministrativ e civil l'era ben pussee important de quell religios: quell chì l'eva dovuu anca a la posizzion de la piev, al confin con la Republica de Venezzia; inoltra, tanti comun de la piev partegniven a la Diocesi de Cremona. Foeura del territori de la piev la restava la città de Trevij, che l'era ministrada direttament del governa central milanes.

La piev la confinava a ovest cont i piev de Cornean e de Pontiroeu, a nord e a est con la Diocesi de Bergom e a sud con la Diocesi de Cremona.

La comprendeva i comun de Calonega, Castell Rozzon, Pontiroeu, Fara, Badalasca, Pagazzan, Carevasg, Brignan, Misan, Carvenzan, Rivoeulta, Arzagh, Casiraa, Gnidell, Pandin, Vailaa, Dovera, Roncadell, Torm, Cort Palasi e Boffalora.

Piev de la Valsasna

La Piev de la Valsasna l'è stada vuna di piev ministrativ e religios del Milanes.

I sò patronn a eren i sant Peder e Paol. La gh'aveva duu capploeugh: Introeubi (sede civil) e Premaluna (sede religiosa).

La confinava a nord e a est con la Diocesi de Bergom, a sud con la Piev de Lecch, a ovest con quei de Mandell, Varenna e Belan.

Compagn de tutt i olter piev, l'ha perduu i sò fonzion civil in del 1797, e quei religios in del 1972, quand che l'è stada sostituida del Distrett de Introeubi.

A la fin del XVIII secol la gh'aveva denter i comun de Introeubi, Premaluna, Barcon, Cortabbi, Gerr, Pessina, Vimogn, Barz, Casargh, Cornoeuva, Cremen, Cassina, Conzenee, Margn, Crandola (cont Indoeuver), Pagnona, Pastur, Bajee, Promana, Tasen, Bind, Perlasch, Vendrogn, Perlee, Isen de Sora e Isen de Sotta.

Alter lenguv

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.