Uni European

La Uni European (UE) es un junta de 28 statos cual manteni relatas spesial de coopera economial e political entre se, con un gol ultima de integra. La relatas economial es fundida en la libria de comersa, la move de laborores, e la intercambia de mone. Esta inclui la funda de un mone comun (la euro) aora en 17 de la nasiones - la "Eurozona".

Pos la Brexit, la Uni European va ave 27 membros.

Anio Istoria de membria de la Uni European Tota membros
1957 Beljia
Frans
Deutxland Uestea
Italia
Luxemburg
Nederland
6
1973 Danmarcb
Er
Rena Unida 9
1981 Elas 10
1986 Portugal Espania 12
1995 Osteraic
Suomi
Sveria 15
2004 Cipros
Txesco
Esti
Magiar
Latvia
Lietuvia
Malta
Polsca
Slovacia
Slovenia
25
2007 Balgaria Romania 27
2013 Corvatsca 28

a 3 Otobre 1990, la statos de Deutxland Este junta con Deutxland Ueste e deveni automatica parte de la UE.
b En 1985, La sitizanes de Gronland, pos deveni autonom de Danmarc en 1979, sorti de la UE.

La Uni European ave 24 linguas ofisial. Sua slogan es "Unida en diversia".

Gtk-find-and-replace.svg
Esta article es en construi.
Tu es bonvenida a aida en construi lo.
Si esta article no es editada pos alga dias, sutrae esta avisa.
Gtk-find-and-replace.svg
Flag of Europe
Bandera de Europa
Global European Union 2019
La Uni European
Beljia

Beljia, ofisial de Rena de Beljia es un pais federal en Europa ueste. Lo es un membro fundor de la Uni European e ave la xeferia de la Uni European, la OTAN e otra organizas conoseda. La capital es Bruxelles, cual es ance la capital de la Uni European. La area es sirca 30 528 cilometres cuadrida e la cuantia de abitores, en la anio 2006, ia es sirca 10 379 067 persones.

La major linguas es franses e nederlandes. La pais es divideda en tre rejiones e tre comunias: Flandre (do la abitores parla nederlandes), Ualonia (do la abitores parla franses e ualon) e la Capital (do la abitores parla xef franses ma ance un poca de nederlandes). Lo ave ance un comunia de parlores de deutx en Ualonia este. Sua diversia lingual e la disputas political relatada es refletada en sua istoria political e sus sistem de governa, formida par ses governas diferente.

Oji, Beljia es un monarcia constitual federal con un sistem de governa parlamental.

Corvatsca

Corvatsca (ofisial la Republica de Corvatsca) es un pais en Europa sentral e sude, a la Mar Adriatica. Sua capital es Zagreb, cual formi un de la sudivides xef de la pais, como ance sua dudes contias. Corvatsca ave un area de 56 594 cilometres cuadrida e un popla de 4,28 milion persones, de ci la majoria es catolica.

La corvatsces ia ariva en la area de Corvatsca moderna en la temprana de la sentenio 7 ec. Los ia organiza ja la stato a du duxias en la sentenio 9. Tomislav ia deveni la re prima en 925, levante Corvatsca a la grado de un rena. La Rena de Corvatsca ia reteni sua autonomia tra cuasi du sentenios, ateninte sua apico en la rena de la res Petar Krešimir 4 e Dmitar Zvonimir. Corvatsca ia entra a un uni personal con Magiar en 1102. En 1527, fasante un concista par la osmanianes, la Parlamento Corvatsce ia eleje Ferdinand 1 de la Casa de Habsburg a la trono corvatsce. En la temprana de la sentenio 19, partes de la pais ia es divideda en la Provinses Ilirian Franses, e Osteraic-Magiar ia ocupa sua lado de Bosnia e Hersegovina – un disputa reconsiliada par la Trata de Berlin en 1878.

En 1918, pos la Gera Mundal Prima, Corvatsca ia es incluida en la Stato (nonreconoseda) de Slovenianes, Corvatsces e Serbsces cual ia separa de Osteraic-Magiar e ia fusa con la Rena de Iugoslavia. Un stato pupetin corvatsce faxiste, suportada par Italia Faxiste e Deutxland Nazi, ia esiste en la Gera Mundal Du. Pos la gera, Corvatsca ia deveni un membro fundinte e un composante federal de la Republica Federal Sosialiste de Iugoslavia, un stato constitual sosialiste. A 25 junio 1991, Corvatsca ia declara sua autonomia, cual ia reali completa a 8 otobre de la mesma anio. La Gera Corvatsce de Autonomia ia aveni tra cuatro anios pos la declara.

Corvatsca es un republica governada su un sistem parlamental, e un economia developada con un indise multe alta de developa umana. Lo es un membro de la Uni European, la Nasiones Unida, la Consilio de Europa, OTAN e la Organiza Mundal de Comersia, e un membro fundinte de la Uni per la Mediteraneo. Como un partisipor ativa en la fortes de pas de la NU, Corvatsca ia contribui soldatos a la mision gidada par OTAN en Afganistan, e ia ave un seja nonpermanente en la Consilio de Securia de la NU en la periodo 2008–9.

La campo de servis domina la economia de Corvatsca, segueda par la campos industrial e cultival. Turisme internasional es un fonte importante de revenu en la estate, e Corvatsca es la numero 18 de la destinas la plu popular per turistes en la mundo. La stato controla un parte de la economia, con un spende notable par la governa. La Uni European es la asosior comersial la plu importante de Corvatsca.

De 2000, la governa corvatsce ia investi constante a la infrastrutur, spesial a vias de transporta e recursos longo la coredores paneuropean. Un parte major de enerjia es produida de fontes interna; la resta es importada. Corvatsca furni un sistem universal de aida medical e educa prima e liseal sin custa. Lo suporta cultur par multe instituidas publica e investis par companias a medias e publici.

La lingua major es corvatsce.

Deutxland

Deutxland es un pais en Europa sentral. La area de Deutxland es sirca 357 578 cilometres cuadrida. La cuantia de abitores, en la anio 2006, ia es judida como sirca 82,5 milion persones. Lo es formida par 16 statos composante e covre un area de 357 021 cilometres cuadrida. Con un cuantia de abitores de 82 miliones, lo es la stato plu poplada de la Uni European. A pos Statos Unida, lo es la destina de migra plu popular en la mundo. Sua capital es urbe plu grande es Berlin e otra sites importante es Hamburg, Munich, Cologne, Frankfurt, Stuttgart, Düsseldorf, Leipzig, Bremen, Dresden, Hannover e Nuremberg.

La lingua major es deutx.

England

England es un pais en Europa e, plu spesifada, en la Rena Unida. Lo comparti un borda con Scotland en la norde e con Cimri en la ueste. Lo ance borda la Mar Eres en la norde-ueste e la Mar Celta en la sude-ueste. England es separada de Europa continental par la Mar Norde a la este e par la Manga en la sude. La pais covre sinco otis de la isola de Britan (cual es en la Mar Atlantica norde) en la sentro e sude de la isola. Plu ca 100 isolas peti, per esemplo la Isolas de Scilly e la Isola de Wight, es ance parte de la pais. La zona de ora de England es GMT. Lo es la parte de la Rena Unida con la plu persones, con entre 50 milion e 60 milion, pd sirca 84% de la abitores de la Rena Unida.

La area cual es aora nomida England ia es abitada prima par umanas moderna en la periodo de la paleolitica alta; ma lo es nomida per la anglos, un de la tribus germanica ci ia abita ala en la sentenios 5 e 6. England ia deveni un stato unida en la sentenio 10. De pos la eda de descovre, cual ia comensa en la sentenio 15, lo ia ave un efeto cultural e legal importante sur la mundo. La lingua engles, la eglesa anglican, e lege engles - cual es la funda de la sistemes legal de lege comun de multe otra paises en la mundo - ia crese en England, e la sistem de governa parlamental de la pais ia es adota par multe otra nasiones. La revolui industrial ia comensa en England en la sentenio 18, e lo ia devein la nasion cual industri prima en la mundo.

La tereno de England es per la plu parte colinas basa e planos, spesial en England sentral e sude. An tal, on ave tereno alta en la norde (per esemplo, la Lake District montaniosa, e la Pennines) e la sude-ueste (per esemplo, Dartmoor e la Cotswolds). La capital es London, cual ave la urbe la plu grande en e la Rena Unida e la Uni European. La cuantia de abitores de plu ca 53 milion es 84% de la popla de la Rena Unida, e los es consentrada per la plu parte sirca London, la sude-este, e conurbes en la Midlands, la norde-ueste, la norde-este e Yorkshire, cada de cual ia crese como rejiones industrial major en la sentenio 19.

La Rena de England – cual ia inclui Cimri pos 1535 – ia sesa es un stato autonom a la 1 maio 1707, cuando la Atas de Uni ia reali la termas de la Trata de Uni de la anio presendente, provocante un uni political con la Rena de Scotia per crea la Rena de Britan. En 1801, Britan ia uni con la Rena de Er par un otra Ata de Uni per deveni la Rena Unida de Britan e Er. En 1922, la Stato Libre Eres ia gania autonomia de la Rena Unida e la stato ia deveni la Rena Unida de Britan e Er Norde.

Espania

Espania (España en espaniol), ance nomida Rena de Espania, (Reino de España) es un pais autonom e membro de la Uni European, constituida en un stato sosial e democrata de cual sua forma de governa es la monarcia parlamental. Sua teritorio es organizada en des-sete comunias autonom e du sites autonom, en ajunta a sincodes provinses. Sua capital es la site Madrid.

Esta pais es situada en Europa Ueste e en Africa Norde. En Europa lo ocupa la plu de la penisola iberian (conoseda como Espania penisolal) e la arcipelago de la isolas Baleare (en la Mar Mediteraneo ueste); en Africa es la sites Ceuta e Melilla, la isolas Canario (en la Mar Atlantica norde-este), la Isolas Txafarina (Mar Mediteraneo), la Roca de Vélez de Gomera (Mar Mediteraneo), la Isolas Alhucema (golfo de la Isolas Alhucema) e la Isola de Alboran (Mar de Alboran). La munisipa de Llivia en la Pirineos constitui un enclave ensircada par Frans. Un serie de isolas e isoletas completi la colie a lado de la costas penisolal.

La area es sirca 504 782 cilometres cuadrida, e la pais es la numero cuatro de la plu grandes de la continente, pos Rusia, Ucraina e Frans. Con un altia media de 650 metres, lo es un de la paises la plu montaniosa de Europa. La cuantia de abitores, en la anio 2015, ia es sirca 46 439 864 persones. La teritorio penisolal ave fronteras con Frans e Andora en la norde, con Portugal en la ueste e con Jibraltar en la sude. En sua teritorios african Espania ave fronteras con Maroco. Lo divide con Frans la domina de la isola de la Fasianes en la boca de la rio Bidasoa.

Seguente la constitui espaniol, castelian o espaniol es la lingua ofisial de la stato, e tota la espanioles ave la debe de conose lo e la direto de usa lo. En 2006, lo ia es la lingua madral de la 89% de la espanioles. Otra linguas, ance espaniol, como catalan, galego e euscara es reconoseda como coofisial en diversa comunias autonom, seguente la Leges de Autonomia.

Europa

Europa es comun regardada como un de la sete continentes, ma fisical lo es un parte de la continente Eurasia. A la norde lo borda la Mar Artica, a la ueste la Mar Atlantica, a la este Asia, e a la sude la Mar Mediteraneo. La Montes Ural es la borda entre Europa e Sibir, cual on regarda como Asia norde.

La continente no ave la cuantia la plu grande de abitores, o la area la plu grande en la mundo, ma lo es famosa per sua istoria e cultur, e sua nivel grande de developa de siensa. Europeanes parla vera multe de linguas, de cual la plu parteni a la familia indoeuropean.

Frans

Frans es un pais locada xef en Europa ma cual ave ance multe teritorios locada en la mares e en otra continentes. Lo es un republica constitual. Sua capital es Paris, la lingua ofisial es franses, e la mone ofisial es la euro (e la franc pasifica en la teritorios en la Mar Pasifica). La slogan de Frans es Liberté, Égalité, Fraternité (Libria, Egalia, Fratia).

Frans ia es formida en la eda medieval, prendente sua nom de la francos. De la comensa de la sentenio 17 asta la dui prima de la sentenio 20, lo ia ave un impero colonial grande. De la desenio de 1950, lo es un de la atores xef de la construi de la Uni European. Lo ave un influe political, economial, militar e cultural notable en tota la mundo.

Italia

Italia (ofisial Republica Italian, en italian: Repubblica Italiana) es un pais en Europa sude. En la norde el ave la Alpes, do borda con Frans, Suiz, Osteraic i Slovenia. La statos de San Marino e la Site Vatican es du enclaves en la teritorio italian. La site capital, e la site la plu grande, es Roma. Italia es 301,230 cilometres cuadrida e la cuantia de popla en 2016 ia es sirca 61 milion.

La ministro prima es Giuseppe Conte.

El es la pais tre en Europa par cuantia de turistes per anio.

Italia es un de la paises la plu industrial de la mundo e el es un pais developada con un cualia de vive alta.

Lietuva

Lietuva (ofisial la Republica de Lietuva) es un pais en la rejion baltica de Europa norde. Un de la tre statos baltica, lo es situada longo la costa sude-este de la Mar Baltica, a este de Sveria e Danmarc. Lo es bordada par Latvia a la norde, Bielarus a la este e sude, Polsca a la sude, e Oblast Caliningrad (un esclave rusce) a la sude-ueste.

Lo ave un popla estimada de 2,8 milion persones en 2017, e sua capital e site la plu grande es Vilnius. Lietuvisces es un popla baltica. La lingua ofisial, lietuvisce, como ance latvisce, es un de sola du linguas vivente en la ramo baltica de la familia de linguas indoeuropean.

Tra sentenios, la costas sude-este de la Mar Baltica ia es abitada par tribus baltica diversa. En la desenio de 1230, la teras lietuvisce ia es unida par Mindaugas, la Re de Lietuva, e la stato lietuvisce prima unida (la Rena de Lietuva) ia es creada a 6 julio 1253. En la sentenio 14, la Duxia Grande de Lietuva ia es la pais la plu grande en Europa; la areas presente de Lietuva, Bielarus, Ucraina e partes de Polsca e Rusia ia es sua teritorios. Par la Uni Lublin de 1569, Lietuva e Polsca ia formi voleda un uni de du statos, la Comunia Polsce-Lietuvisce. La Comunia ia dura tra plu ca du sentenios, asta cuando paises visina ia desasembla sistemosa lo de 1772 a 1795, con ce la Impero Rusce ia propri la plu de la teritorio de Lietuva.

Cuando la Gera Mundal Prima ia prosimi a sua fini, la Ata de Autonomia de Lietuva ia es suscriveda a 16 febrero 1918, declarante la fundi de la Republica de Lietuva moderna. En la media de la Gera Mundal Du, Lietuva ia es prima ocupada par la Uni Soviet e, a pos, par Deutxland Nazi. Cuando la Gera Mundal Du ia prosimi a sua fini e la deutxes ia retira se, Lietuva ia deveni la republica soviet prima cual ia declara sua autonomia, causante la restora de un Stato de Lietuva nondependente.

Lietuva es un membro de la Uni European, la Consilio de Europa, la Eurozona, la Acorda Schengen e OTAN. Lo es ance un membro de la Banco Nordica de Investi, e un parte de la coopera nordica-baltica de paises de Europa norde. La Indise de Developa Umana de la NU lista Lietuva como un pais de "developa umana multe alta". Lietuva ia es entre la economias la plu rapida cresente en la Uni European e es la numero 21 de mundo en la indise de fasilia de comersia.

Sua area es sirca 65 200 cilometres cuadrida.

Luxemburg

Luxemburg (ofisial la Duxia Grande de Luxemburg) es un pais sin costa en Europa ueste. Lo es bordada par Beljia a la ueste e norde, Deutxland a la este e Frans a la sude. Sua capital, Site Luxemburg, es (con Bruxelles e Strasbourg) un de la tre capitales ofisial de la Uni European e la seja de la Corte European de Justia, la autoria judal la plu alta en la UE. Sua cultur, popla e linguas es multe entretexeda con sua visinas, tal ce lo es vera un misca de cultures franses e germanica. Esta es asentuada par la tre linguas ofisial: letseburges, franses e deutx. Invades repeteda par paises visina, spesial en la Gera Mundal 2, ia causa un desira forte en la pais per arbitra entre Frans e Deutxland e ia gida a, entre otra cosas, la fundi de la Uni European.

Con area de 2586 cilometres cuadrida, lo es un de la paises la plu peti en Europa. En 2016, Luxemburg ia ave un popla de 576 249 persones: un de la paises la min poplada en Europa ma la pais con rapidia de crese de popla clar la plu alta. Como un democrata representante con monarca constitual, lo es dirijeda par un Duxe Grande e es la sola duxia grande restante en la mundo. Lo es un pais developada, con economia avansada e un de la produis interna bruta la plu alta per person de la mundo. En 1994, UNESCO ia declara la Site Luxemburg con sua partes vea e fortreses ia es declarada como un loca de erita mundal.

La istoria de Luxemburg comensa en 963, cuando conte Siegfried 1 ia oteni un promontania rocosa e sua fortreses roman, nomida Lucilinburhuc ("castel peti"), e sua area ensircante, de la Abaderia Imperal de San Maximin en Trier. La desendentes de Siegfried ia estende sua teritorio par sposi, gera e relatas de vasal. A la fini de la sentenio 13, la contes de Luxemburg ia rena un teritorio notable grande. En 1308, Heinrich 7, conte de Luxemburg, ia deveni la re de la deutxes e la Imperor Roman Santa. La Casa de Luxemburg ia produi cuatro Imperores Roman Santa a la apico de la Eda Media.

En 1354, Karel 4 ia alti la contia a la Duxia de Luxemburg. Car Sigismund ia ave no eritor mas, la Duxia ia deveni un parte de la Sirculo Burgunda e plu tarda un de la Des-Sete Provinses Nederlandes de Habsburg. Tra la sentenios, la site e fortres de Luxemburg, con importa stratejial major par causa de sua situa entre la Rena de Frans e la teritorios de Habsburg, ia es gradal aumentada a un de la fortreses la plu conoseda en Europa. Pos parteni a la Frans de Louis 14 e la Osteraic de Maria Theresia, Luxemburg ia deveni un parte de la Republica e Impero Franses Prima su Napoléon.

La stato presente de Luxemburg ia emerji a la Congresa de Wien en 1815. La Duxia Grande, con sua fortres potiosa, ia deveni un stato autonom, personal poseseda par Willem 1 de Nederland, con un garnison prusen per garda la site contra un plu invade par Frans. En 1839, pos la tumulta de la Revolui Beljes, la parte de Luxemburg do on ia parla franses ia es sededa a Beljia, e la parte letseburges ia deveni la stato presente de Luxemburg.

La pais ia es industrida en la comensa de la sentenio 20 par la industria de aser, esplotante la fero en la Teras Roja. Pos la declina de esta industria en la desenio de 1970, la pais ia foca a institui se como un sentro finansial global, e ia developa a un sentro reputada de bancos. De la comensa de la sentenio 21, sua governas ia foca a developa la pais a un economia de sabes, fundinte la Universia de Luxemburg e un program nasional de spasio, projetante la envolve prima en un mision robotal a la Luna ante la fini de 2020.

Luxemburg es un membro fundinte de la Uni European, la Organiza per Coopera e Developa Economial, OTAN e Benelux, refletante sua acorda political cual favore integra economial, political e militar. La site Luxemburg, cual es la capital e site la plu grande de la pais, es la seja de alga instituidas e ajenterias de la UE.

Macedonia Norde

Macedonia Norde (macedonsce Северна Македонија) es un pais en la Balcanes en Europa sude-este. Lo es un de la statos seguente de Iugoslavia, de cual lo ia declara sua autonomia en 1991. Lo ia deveni un membro de la Nasiones Unida en 1993, ma, como resulta de un disputa corente con Elas su la usa de la nom "Macedonia", lo ia es asetada la nom Republica de Macedonia Norde, un nom usada par organizas internasional como la Uni European, la Consilia de Europa e la OTAN.

La area es sirca 25 333 cilometres cuadrida e la cuantia de abitores, en la anio 2006, ia es sirca 2 050 554 persones. La site capital es Skopje, e la lingua major es macedonsce.

Magiar

Magiar o Ungaria es un pais en Europa sentral. Lo covre un area de 93 030 cilometres cuadrida, situada en la Basin Panonia, es e bordada par Slovensco a la norde, Romania a la este, Serbia a la sude, Corvatsca a la sude-ueste, Slovenia a la ueste, Osteraic a la norde-ueste, e Ucraina a la norde-este. Con sirca 10 milion abitores, Magiar es un stato membro de grandia media de la Uni European. La lingua ofisial es magiar, cual es la lingua uralica la plu parlada de mundo. La capital e site la plu grande de Magiar es Budapest, un sentro economial major e clasida como un site major global.

Pos sentenios de abita par celtas, romans, slavicas ueste, gepidas e avaros, Magiar ia es fundida en la tarda de la sentenio 9 par Árpád, un prinse magiar, en la concista de la Basin Panonia. Sua duneto István 1 (Stefano 1) ia ateni la trono en 1000, convertinte la pais a un rena cristian. Ja en la sentenio 12, Magiar ia deveni un potiosa media en la mundo ueste, ateninte un eda oro en la sentenio 15. Pos la Batalia de Mohács en 1526 e sirca 150 anios de ocupa partal par la osmanianes (1541–1699), Magiar ia veni su la rena de Habsburg, e plu tarda lo ia formi la Impero Osteraic-Magiar con Osteraic.

La fronteras presente de Magiar ia es instituida en 1920. par la Trata de Trianon pos la Gera Mundal Prima, cuando la pais ia perde 71% de sua teritorio, 58% de sua popla e 32% de magiares etnical. Pos la periodo intergeral, Magiar ia junta se a la Potias de Ase en la Gera Mundal 2, sufrinte un cuantia notable de danas e moris. Magiar ia deveni un stato pupetin de la Uni Soviet, contribuinte a la institui de la republica sosialiste cual ia dura tra cuatro desenios (1947–89). La pais ia es internasional multe atendeda par causa de la Revolui de 1956 e la abri influosa de sua frontera restrinjeda con Osteraic en 1989, cual ia aselera la colasa de la Bloco Este. A 23 otobre 1989, Magiar ia deveni denova un republica parlamental democrata.

En la sentenio 21, Magiar es un potiosa media e ave la economia 57 de la plu grandes de mundo par produida interna bruta. Como un ator importante en alga campos de industria e tecnolojia, lo es la esportor 35 e la importor 34 de la plu grandes de mundo. Magiar ave un economia de revenu alta con un norma de vive multe alta. Lo manteni un sistem de suporta finansial, un sistem de aida medical universal, e un sistem de educa de universia sin costa.

Magiar ia junta se a la Uni European en 2004. e es un parte de la Area Schengen de 2007. Lo es un membro de la Nasiones Unida, OTAN, la Organiza Mundal de Comersia, la Banco Mundal, la Consilio de Europa e otras. Bon conoseda per sua istoria cultural rica, Magiar ia contribui major a artes, musica, leteratur, sportes, siensa e tecnolojia. Lo es la pais 11 de la plu populares en Europa como destina de turisme, atraente 14,3 milion turistes internasional en 2015. Lo conteni la sistem de cavas la plu grande de acua termal de mundo, la lago termal du de la plu grandes de mundo, la lago la plu grande en Europa sentral e la savana natural la plu grande en Europa.

Noria

Noria (ofisial la Rena de Noria) es un pais en Europa, de cual sua teritorio es composada de la parte ueste de la Penisola Scandinavian plu Jan Mayen (un isola distante) e la arcipelago Svalbard. Noria reclama ance un parte de Antartica nomida la Tera de Rea Maud. Asta 1814, la rena ia inclui la Isolas Faro, Calalitnunat e Island. Lo ia inclui ance Bohuslän asta 1658, Jämtland e Härjedalen asta 1645, Shetland e Orkney asta 1468, e la Hebrides e Isola Man asta 1266.

Noria ave un area intera de 385 252 cilometres cuadrida e un popla de 5 258 317 persones (en janero 2017). La pais comparti un frontera este longa (1619 cilometres) con Sveria. Noria es bordada par Suomi e Rusia a la norde-este, e par la streta Skagerrak a la sude, con Danmarc a la otra lado. Noria ave un costa estendosa, fasante la Mar Atlantica norde e la Mar Barents.

La re presente de Noria es Harald 5 de la Casa Dansce-Deutx de Glücksburg. Erna Solberg ia deveni la ministro xef en 2013, recambiante Jens Stoltenberg. Un monarcia constitual, Noria divide la potia de governa entre la parlamento, la consilio de ministros e la corte suprema, como determinada par la constitui de 1814. La rena es instituida como un fusa de alga renas peti diversa. Si on segue la conta tradisional de la anio 872, la rena esiste ja continuante tra 1145 anios, e la lista de monarcas norsce inclui plul ca sesdes res e contes.

Noria ave sudivides dirijal e political a du niveles: contias e munisipas. La popla sami ave alga autonomia e influe sur teritorios tradisional par la Parlamento Sami e la Ata de Finnmark. Noria manteni relatas prosima con la Uni European e la Statos Unida. Lo es un membro fundinte de la Nasiones Unida, OTAN, la Asosia European de Comersia Libre, la Consilio de Europa, la Trata Antartica e la Consilio Nordica. Lo es ance un membro de la Area Economial European, la Organiza Mundal de Comersia e la Organiza per Coopera e Developa Economial, e un parte de la Area Schengen.

La pais manteni un combina de un economia mercatal e un model nordica de aida sosial, con aida medical universal e un sistem completa de securia sosial. Noria ave reservas grande de petrolio, gas natural, minerales, lenio, comedas de mar, acua dulse e enerjia idraulical. La industria de petrolio representa sirca un cuatri de la produi interna bruta de la pais. Per person, Noria es la produor la plu grande de petrolio e gas natural en la mundo, estra Asia sude-ueste.

La site capital es Oslo. La lingua major es norsce.

Polsca

Polsca (ofisial la Republica de Polsca) es un pais en Europa sentral. Lo es un stato unial, divideda en 16 sudivides dirijal, covrente un area de 312 696 cilometres cuadrida con un clima jeneral temperada. Con popla de plu ca 38,5 milion persones, Polsce es la stato ses de la membros de la Uni European. Sua capital e site la plu grande es Warszawa. Otra sites inclui Kraków, Wrocław, Poznań, Gdańsk and Szczecin.

On pote trasa la institui de un stato polsce a 966, cuando Mieszko 1, renor de un teritorio simil a Polsca presente, ia converti a cristianisme. La Rena de Polsca ia es fundida en 1025, e en 1569 lo ia seli un asosia political longa con la Duxia Grande de Lietuva par suscrive la Uni de Lublin. Esta uni ia formi la Comunia Polsce-Lietuvisce, un de la paises la plu grande (a sirca 1 milion km²) e poplada de Europa en la sentenios 16 e 17, con un sistem political unica libraliste cual ia declara ia constitui prima de Europa.

Pos la divides de Polsca a la fini de la sentenio 18, Polsca ia regania sua autonomia en 1918 con la Trata de Versailles. En setembre 1939, la Gera Mundal Du ia comensa con la invade de Polsca par Deutxland Nazi, segueda un invade de Polsca par la Uni Soviet longo la Trata Molotov–Ribbentrop. Plu ca ses milion de la sitadanes de Polsca ia mori en la gera. Pos la gera, la Republica de la Popla Polsce ia es instituida como un stato satelitin su influe soviet. Pos la revoluis de 1989, xef par la emerji de la promove Solidarność (Unia), Polsca ia deveni un republica democrata.

Polsca es un potiosa rejional e ance un potiosa mundal cisa emerjinte. Lo ave la economia oto de la plu grandes en la Uni European, e un de la plu dinamicales, simultan ateninte un grado multe alta en la Indise de Developa Umana. En ajunta, la Asioneria Polsce en Warszawa es la plu grande e importante en Europa sentral e este. Polsca es un pais developada e democrata, cual manteni un economia de revenu alta como ance normas multe alta de cualia de vive, securia, educa e libria economial. Longo la Banco Mundal, Polsca ave un de la sistemes xef de educa scolal en Europa. La pais furni educa a universias sin custa, securia sosial finansiada par la governa, e un sistem universal de aida medical per tota sitadanes.

Situada entre cultures de Europa este e ueste, e formida par un istoria cambiante, Polsca ia developa un erita cultural rica, incluinte multe monumentos istrial e 15 Locas UNESCO de Erita Mundal. Sirca 17,5 milion turistes visita lo en cada anio (2016), tal ce lo es la pais 16 de la plu visitadas en la mundo. Lo es un stato membro de la Uni European, la Area Schengen, la Nasiones Unida, OTAN e la Organiza per Coopera e Developa Economial.

La lingua major es polsce.

Portuges (lingua)

Portuges (português o língua portuguesa) es un lingua romanica (de la grupo ibero-romanica) cual es la sola lingua ofisial de Angola, Brasil, Capo Verde, Gine-Bisau, Mosambic, Portugal e San Tome e Prinsipe. Lo es un de la linguas ofisial de Gine Ecuatoral, Macau e Timor Este. Portuges e creoles portuges es ance parlada en la India Portuges antica: Goa, Damao, Diu, e Dadra e Nagar Haveli, en la Unia Indian aora e per multe comunias de migrantes ci parla portuges en partes variosa de la mundo. Papiamentu, un creol con influe portuges, es parlada en la Isolas ABC. Creol capoverdean es la creol portuges parlada la plu comun. La state de la lingua en Galisia es controversal, consernante ce un parte de la sosia galisian e alga linguistes considera los parte de la sistem lingual galego-portuges.

Portuges es un parte de la grupo ibero-romanica cual ia evolui de alga dialetos de latina poplal en la Rena de Galisia medieval, e ia reteni alga fonolojia celta. Con plu ca 200 milion parlores nativa, portuges es la propre lingua ses de la plu popular en la mundo, la lingua european tre en termas de parlores nativa, e la lingua romanica du, sola suprapasada par la espaniol. Lo es un lingua major de la emisfera sude. Lo es ance la lingua la plu parlada en America Sude e la du en American latina, seguente espaniol. Lo es un lingua ofisial de la Uni European, Mercosur, la Organiza de la Statos American, la Comunia Economial de Statos de Africa Ueste, e la Uni African.

Romania

Romania es un pais en Europa sude-este. Lo borda la Mar Negra, Balgaria, Ucraina, Magiar, Serbia e Moldova. Lo ave un area de 238 397 cilometres cuadrida e un clima continental temperada. Con cuasi 20 milion abitores, la pais es la numero sete de la statos membros la plu poplada en la Uni European. Sua capital e site la plu grande, Bucuresti [bucurexti], es la site ses de la plu grandes en la UE, con 1 883 425 abitores en 2011.

La Rio Danubio, la rio du de la plu longas en Europa, fonti en Deutxland e flue en dirije jeneral sude-este tra 2857 km e des paises, ante emerji en un delta en Romania. La Montes Carpati, cual traversa Romania de la norde asta la sude-ueste, inclui Moldoveanu con altia de 2544 metres.

La Romania moderna ia es formida en 1859 par un uni personal de la Prinsipias Danubian de Moldavia e Walachia. La stato nova, ofisial nomida Romania de 1866, ia gania autonomia de la Impero Osmanian en 1877. A la fini de la Gera Mundal Prima, Transilvania, Bucovina e Besarabia is uni con la Rena de Romania. En la Gera Mundal Du, Romania ia es un aliada de Deutxland Nazi contra la Uni Soviet, bataliante a lado de la Wehrmacht asta 1944, cuando lo ia junta se a la potiosas Aliada e ia fronti ocupa par soldatos de la Armada Roja. Romania ia perde alga teritorios, de cual Transilvania Norde ia es reganiada pos la gera. Pos la gera, Romania ia deveni un republica sosialiste e membro de la Trata de Warszawa. Pos la Revolui de 1989, lo ia comensa un cambia en dirije a democratia e un economia de mercato capitaliste.

Romania es un pais developante e un de la plu povres en la Uni European, con grado 50 en la Indise de Developa Umana. Pos un crese rapida de economia en la temprana de la desenio de 2000, Romania ave un economia xef fundida sur servis, e es un produor e esportor de macinas e enerjia eletrical. Lo es un membro de OTAN de pos 2004, e un parte de la Uni European de pos 2007. Un majoria forte de la popla identifia se como cristianes ortodox este e parla romanian, un lingua romanica, como sua lingua propre. On refere frecuente a la istoria cultural de Romania en relata a artistes, musicistes, inventores e sportores influente.

Romanian (lingua)

La lingua romanian es un lingua indo-european, e un parte de la sugrupo este de la linguas romanica. Entre la linguas romanica, romanian es la numero sinco par cuantia de parlores, pos la espaniol, portuges, franses e italian.

Lo es parlada en soma par sirca dudes-ses milion persones. Entre estas, dudes milion abita en Romania (do romanian es la lingua ofisial e, seguente la conta de 2002, la propre lingua de plu ca 90% de la popla).

Lingua romanian ave la state de lingua de stato en la Republica de Moldova (do lo porta la nom de lingua moldovan, esente la propre lingua de 76% de la popla) e es un de la ses linguas ofisial en la Provinse Autonome de Voivodina (en Serbia).

Simil, lo es un lingua ofisial o manejal en alga comunicas e organizas internasional (en Uni Latina e Uni European – de 1 janero 2007).

La lingua romanian ave la nometa Lingua de Eminescu, de Mihai Eminescu, poesiste nasional de la romanianes e moldovanes.

Slovenia

Slovenia (ofisial la Republica de Slovenia) es un pais en la sude de Europa sentral. La pais es locada a la crus de vias cultural e comersial european. Lo es bordada par Italia a la ueste, Osteraic a la norde, Magiar a la norde-este, Corvatsca a la sude e sude-este, e la Mar Adriatica a la sude-ueste. Lo covre 20 273 cilometres cuadrida e ave un popla de 2,06 milion persones. Lo es un republica parlamental e un membro de la Nasiones Unida, la Uni European e OTAN. Sua capital e site la plu grande es Ljubljana.

La teritorio es xef montaniosa con un clima xef continental, con eseta de Primorska do la clima es sumediteranean, e la norde-ueste do la clima es alpan. La pais, marcada par un diversia biolojial major, es un de la plu ricas de acua en Europa, con un rede densa de rios, un sistem rica de acuiferes e cursos de acua suteran. Plu ca un dui de la teritorio es covreda par forestas. La abita umana de Slovenia es sperdeda e noncoerente.

Istorial, Slovenia ia es la crus de vias de la linguas e cultur ueste slavica, sude slavica, germanica, romanica e magiar. An si la popla no es omojen, la majoria es slovenian. Slovenian, un lingua sude slavica, es la lingua ofisial tra la pais. Slovenia es un pais xef secularida, ma sua cultur e identia ia es major influeda par catolicisme e ance luteranisme. La economia es peti, abrida, fundida sur esportas, e forte influeda par la state internasional. Lo ia es grave danada par la crise de la Eurozona cual ia comensa en la tarda de la desenio de 2000. La campo xef de economia es servis, segueda par industria e construi.

Slovenia ia es un de la ses republicas de ex-Iugoslavia. Lo ia deveni un stato autonom en la anio 1991.

Sveria

Sveria (ofisial la Rena de Sveria) es un pais nordica e scandinavian en Europa norde. Lo borda Noria a la ueste e norde e Suomi a la este, e es liada en la sude-ueste a Danmarc par un ponte-tunel cual traversa la Öresund. Con 450 295 cilometres cuadrida, Sveria es la pais tre de la plu grandes en la Uni European par area, ma con mera 10 milion persones, sua densia de popla es basa (22 persones per cilometre cuadrida); la densia la plu alta es en la dui sude de la pais. Sirca 85% de persones abita en rejiones urban.

Poplas germanica ia abita Sveria de edas preistorial, emerjinte en istoria como la gotos scandinavian e la svensces, e composante la poplas maral conoseda como nordicas. Sveria sude es xef cultival, ma la norde es forestosa. Sveria es un parte de la rejion jeografial Fenoscandia. La clima es jeneral multe temperada per un latitude tan norde, par influe de la mar: la pais ave estates continental calda.

Oji, Sveria es un monarcia constitual e democratia parlamental, con monarca per xef de stato. La site capital es Stockholm, cual es ance la site la plu poplada en la pais. La potia leginte parteni a la Riksdag, un legeria con un salon de 349 membros. La potia esecutante parrteni a la governa, presideda par la ministro xef. Sveria es un stato uniforma, presente divideda a 21 contias e 290 munisipas.

Sveria ia emerji como un pais autonom e unida en la Eda Media. En la Eda Media, la plu sude e ueste partes de Sveria de aora no ia es svensce, con ce Suomi alora ia es parte de Sveria. En la sentenio 17, lo ia estende sua teritorios per formi la Impero Svensce, cual ia deveni un de la potias grande de Europa asta la temprana de la sentenio 18. Teritorios svensce estra la Penisola Scandinavian ia es gradal perdeda en la sentenios 18 e 19, fininte con la propri de Suomi presente par Rusia en 1809.

La gera final en cual Sveria ia partisipa direta ia es en 1814, cuando Noria ia es militar forsada a uni. Pos alora, Sveria ia es pasosa, manteninte un politica ofisial de neutralia en cosas esterna. La uni con Noria ia es pasosa abolida en 1905, resultante la fronteras presente de Sveria. An si Sveria ia es formal neutral en ambos geras mundal, Sveria ia partisipa en laboras umaniste, como aseta refujadas de Europa deutx ocupada.

Pos la fini de Gera Fria, Sveria ia junta se a la Uni European a 1 janero 1995, ma pos un referendo lo ia rejeta membria de la Eurozona. Lo es ance un membro de la Nasiones Unida, la Consilia Nordica, la Consilia de Europa, la Organiza Mundal de Comersia, e la Organiza per Coopera e Developa Economial. Sveria no es membro de OTAN.

Sveria manteni un sistem nordica de aida sosial cual furni aida medical universal e educa universial per sua sitadanes. Lo ave la revenu oto de la plu altas de mundo per person, e apare alta en multe mesuras nasional, incluinte cualia de vive, sania, educa, proteje de librias sivil, competosia economial, egalia, ricia e developa umana.

La lingua major es svensce.

Europa
IstoriaPreistoriaAnticia (Anticia clasicaanticia tarda) • Eda medievalEda modernaEda contempora
Jeografia Paises • Sites • Isolas • Lagos • Montes • Rios
Cultur Arte (Depinto • Sculta • Musica • Arciteta • Leteratur • Filma) • Siensa • Filosofia • Relijio • Cosina • Veste • Sporte
Sosia Linguas • Educa • Etnicos
Economia Organizas: CEFTA • CUBKR • EAEC • EFTA • Istoria
Politica Uni European • CIS • CoE • CSTO • NATO • OSCE

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.