Ideolojias political

En la studias sosial, un ideolojia political es un colie de ideales etical, prinsipes, credes, mitos, o simboles de un promove o instituida sosial, un clase o grupo grande, cual esplica como un sosia debe opera e cual ofre un desinia political e cultural per un ordina sosial spesifada. Un ideolojia political conserna se xef con como on debe asinia potia e a cual finis lo debe es usada. Alga partitos political segue un ideolojia spesifada multe prosima, en cuando otra pote prende sola alga inspira de un grupo de ideolojias relatada sin abrasa forte cualce de los. La poplaria de un ideolojia es partal la resulta de la influe de emprendores moral, ci ata a veses sola en sua propre interesas. Ideolojias political ave du dimensiones:

  • Goles: como la sosia debe es organizada.
  • Metodos: cual es la modo la plu conveninte per ateni esta gol.

Un ideolojia es un colie de ideas. Tipal, cada ideolojia conteni alga ideas sur cual lo vide como la forma de governa la plu bon (pe democratia o autocratia) e la sistem de economia la plu bon (pe sosialisme o capitalisme). A veses, la mesma parola es usada per identifia ambos un ideolojia e un de sua ideas xef. Per esemplo, "sosialisme" pote refere a un sistem economial, o lo pote refere a un idealojia cual suporta acel sistem economial. La mesma terma pote ance es usada per refere a ideolojias multiple, cual es la razona cual siensistes political atenta trova definis acordada per esta termas. Per esemplo, an si la termas cual ia es confusada a veses, "comunisme" ia deveni como referente a governas soviet e ideolojias marxiste-leniniste, ma "sosialisme" ia deveni como referente a un estende plu vasta de ideolojias diferente, distinguida de marxisme-leninisme.

Ideolojia political es un terma plen de problemes, e ia es a veses nomida "la conseta la plu evitante en tota siensa sosial". Ma ideolojias tende identifia se par sua loca sur la spetra political (como la sinistra, la media, o la destra), an si esta es comun controversal. Final, ideolojias pote es distinguida de stratejias political (pe poplisme) e de cosas singular sirca cual un partito pote es construida (pe oposa a integra european o la legali de canaba). On ave alga studias cual mostra ce ideolojia political es eritable en familias.

A su es un lista de alga ideolojias la plu bon conoseda:

Ambientisme

Ambientisme (o ecolojisme) promove la preserva, restora, e/o boni de la ambiente natural, e inclui un conserna per la controla de contamina e la proteje de la diversia de animales e plantas. Per esta razonas, consetas como la etica de tera e ambiente, biodiversia, ecolojia, e la ipotese de biofilia es forte incluida.

Ambientisme es la atenta per eculibra relatas entre umanas e la sistemes variosa de natura sur cual los depende en un modo cual dona la grado de susta coreta per tota la composantes. La mesuras esata e la resultas de esta ecuilibra es a veses controversal, e on ave multe modos diferente per espresa la consernas per la ambiente pote es espresada en pratica.

Esta consernas es comun representada par la color verde, ma esta asosia ia es prendeda par ajentes comersial en un malpresenta nomida "greenwashing" en engles, pd "lava" (sua produidas) con la color verde an si los no benefica la ambiente. Ambientisme es oposada par antiambientisme, cual dise ce la tera es min frajil ca alga ambientistes sujeste, e cual depinta ambientisme como reatante tro forte a la contribui umana a la ambiente (spesial la cambia de la clima) e, a la mesma tempo, como oposante la avansa de umanas.

Anarcisme

Anarcisme es un filosofia, ci suposa ce governa es no nesesada no justa.

Cada modo de opresa e viole par stato es negada.

La parola anarcisme (elinica αναρχία - sin domina)

sinifia la idea de un sosia sin domina e sin viole. Un sosia do

persones vive en egalia sin constrinje political, e donce pote developa libre.

Capitalisme

Capitalisme es un sistem de economia fundida sur la posese privata de la modos de produi e sua opera per profita. Cualias sentral a capitalisme inclui propria privata, acumula de capital (un reserva de mone cual pote es usada per investa o fundi un compania), labor per salario, intercambia voluntar, un sistem de custas, e mercatos competente. En un economia de mercatos capitaliste, desides e investas es determinada par cada posesor de ricia, propria, o capasia per produi en mercatos de finansia e capital. A la otra lado, la custa e distribui de benes e servis es xef determinada par compete en mercatos de benes e servis.

Economistes, economistes politica, sosiolojistes, e istoristes ia adota perspetivas diferente en sua analises de capitalisme e ia reconose formas variosa de lo en pratica. Estas inclui capitalisme de mercatos libre ("laissez-faire", franses per "permete ce lo vade", pd sin restrinjes), capitalisme sosial (pd con aida sosial), e capitalisme statal (pd controlada par un alia de capitalistes e politicistes). La varias ave grados variante de mercatos libre, propria publica, restrinjes a compete libre, e politicas sosial promoveda par la stato. La grado de compete en mercatos, la rol de restrinje e regula, e la estende de propria de la stato varia entre esta modeles. La estende de libria e regulas, e la defini de propria privata es consernas de politica. La plu de economias capitaliste esistente es economias miscada, cual combina elementos de mercatos libre con interveni par la stato e, en alga casos, desinia de economia.

Economia de mercatos ia esiste su multe formas de governa e en multe edas, locas, e cultures variante. La sosias captitaliste moderne - marcada par la universali de relatas sosial fundida en mone, un clase de laborores grande ci debe labora per salarios, e un clase de capitalistes ci posese la modos de produi - ia developa en Europa ueste en un prosede cual resulta en la Revolui Industrial. Sistemes capitaliste con grados variante de interveni direta par governa ia deveni, de alora, en la mundo ueste, e lo continua sperde. Tra tempo, la nasiones capitaliste ia esperi crese economial continuinte e un crese en la nivel de vive.

Criticores de capitalisme dise ce lo institui potia en la manos de un clase capitaliste peti cual esiste tra la esplota de la clase laborante grande e sua labora; asentua profita supra la bonia de la sosia e la proteje de la ambiente e recursos; e suporta nonegalia, froda, e nonstablia economia. Suportores dise ce lo furni produidas plu bon e inova par competa, crea crese economia forte, e furni produosia e ricia cual benefia multe la sosia, e ce lo es la sistem la plu efetosa conoseda per la asinia recursos. Multe economistes sujeste ce un misca de capitalisme e sosialisme (democrata) ta es la plu bon, an si los desacorda la grado de cada.

Faxisme

La faxisme es la promove political inisiada en Italia en la comensa de la sentenio 20 par Benito Mussolini. Alga de sua ideas ia estende tra Europa con cualias diferente. Lo es un promove de cualia nasionaliste, autoritariste e totalitariste, ma ance un promove revoluiste e reatante. Ideolojial e sosial, lo es regardada como anticapitaliste e defende la divide de la sosia en clases.

Kurt Vonnegut

Kurt Vonnegut (11 novembre 1922 - 11 april 2007) ia es un scrivor american. En un carera cual ia estende tra 50 anios, el ia publica 14 novelas, tre colies de naretas, sinco presentas teatral, e sinco libros de fato. El es la plu famosa per sua novela bonvendeda ma de satira oscur Slaughterhouse-Five ("mataderia sinco", 1969).

Naseda e elevada en Indianapolis, Indiana, Vonnegut ia vade a la Universia de Cornell, ma ia abandona en janero 1943 per enscrive en la Armada de la SUA. Como parte de sua instrui, el ia studia injenia a la Carnegie Institui de Tecnolojia e la Universia de Tennessee. El ia es asinia a Europa per combate en Gera Mundual 2 ma ia es caturada par la deutxes en la Batalia de la Bulge. El ia es prisonida en Dresden e ia survive la bombarda par la Alias par trova refuja en un caxa de carne de la mataderia do el ia es prisonida. Pos la gera, Vonnegut ia sposi Jane Marie Cox, con ci el ia ave tre enfantes. Plu tarda, el ia adota la tre fios de sua sore, pos ce el ia mori de canser e sua sposo ia es matada en un asidente de un tren.

Vonnegut ia publica sua novela prima, Player Piano ("piano automata", 1952). La novela ia es bon reseniada ma no ia susede comersial. En la 20 anios cual seguende, Vonnegut ia publica alga novelas cual es no plu ca cuasi susedosa, como Cat's Cradle ("cuna de gato", 1963) e God Bless You, Mr. Rosewater ("dio bondise tu, sr Rosewater). La novela cual ia garantia sua susede ia es sua novela ses, Slaughterhouse-Five. La senti antigera ia resona con sua lejores durante la Gera de Vietnam e sua resenias ia es jeneral positiva. Pos sua publica, Slaughterhouse-Five ia ariva a la culmina de lista de novelas la plu bonvendeda en la New York Times. El ia es invitada per dona parlas, lesones, e presentas a comensas de universias tra la nasion, e ia reseta multe premios e onoras.

Plu tarda en sua carera, Vonnegut ia publica alga esajos autobiografial e colies de naretas, incluinte Fate Worse Than Death ("destinas plu mal ca mori", 1991) e A Man Without a Country ("un om sin un pais", 2005). Pos sua mori, el ia es adorada como un comentor morbosa comica sur la sosia en cual el vive, e como un de la scrivores moderna la plu importante. Mark Vonnegut, sua fio, ia publica un colie de la composas nonpublicada de sua padre, Armageddon in Retrospect ("apocalise en retrospeta") En 2017, On ia publica un colie de naretas, incluinte sinco naretas no publicada, colieda e introduida par amis de Vonnegut e eruditas Jerome Klinkowitz e San Wakefield. Multe obras erudita ia esamina la scrives e umor de Vonnegut.

An ce el ia resta un scrivor produosa en la desenio de 1980, Vonnegut ia luta con depresa e ia atenta suiside en 1984. El ia mori 11 april 2007 en Manhattan, la resulta de dana a sua serebro, alga semanas a ante, de un cade de sua casa en New York. El ia ave 84 anios.

Vonnegut ia nomi George Orwell como sua scrivor favoreda, e ia confesa ce el ia atenta imita el. "Me gusta sua conserna per la povres, me gusta sua sosialisme, me gusta sua simplia" Vonnegut ia dise. El ia dise ance ce Nineteen Eighty-Four ("1984") par Orwell, e Brave New World ("mundo nova corajosa") par Aldous Huxley, ia influe sua novela prima, Player Piano. El ia comenta ance ce la naras de Robert Louis Stevenson ia inspira sua modo de composa. La autor teatral e sosialiste George Bernhard Shaw ia es un eroe e influe grande per Vonnegut. E el ia dise ce sua madre, Edith, ia ave la influe la plu grande sur el.

Temprana en sua carera, Vonnegut ia deside ce el ta usa la stilo de Henry David Thoreau, ci ia scrive con la perspetiva de un enfante, cual ta permete ce sua obras ta es plu comprendable. Otra influes inclui The War of the Worlds ("la gera de la mundos") par H. G. Wells, la satiriste Jonathan Swift, la jornaliste H. L. Mencken, e la sosialiste Eugene V. Debs.

Vonnegut ia es un [[Ateisme}ateiste]] e un umaniste, e ia servi como un presidente onoral de la Asosia Umaniste American. Ma el no ia despeta los ci ta nesesa la comforta furnida par relijio. Vonnegut ia iniora la ideolojias political comun, preferente sosialisme, cual el ia crede pote furni un sustitui valuable per la Darwinisme sosial e spirito de "survive de la forte" en sosia american. El ia crede ce sosialisme ta es bon per la person comun.

Monarcisme

Monarcisme es la promove de un monarca o de rena monarcal. Un monarciste es un person ci suporta esta forma de governa. La promove oposada a rena monarcal es comun nomida republicisme. Dependente de la nasion, un monarciste pote suporta la rena de la person ci es sur la trono, un reclamor, o algun ci ta rena estra ce el ia es desponeda.

Rena par un monarca es entre la instituis la plu vea. Monarcia ia es comun proclamada commo resetante sua diretos de un potia supranatural, pe "la direto divin" de res en Europa, o "la comanda de sielo" per imperores en Xina.

En la sentenio 18, la Revolui American e la Revolui Franses ia move la cultur de la ueste a via de la potia de monarcas. Cada en sua modo propre ia mostra la conseta de la autonomia popular descriveda par Jean-Jacques Rousseau. En 1848, un onda de revoluis contra la monarcias european ia comensa.

Aora, la majoria de monarcias es constitual. En la plu de estas, la monarcas ave sola potia simbolin, an si en algas la monarcas ave un rol en cosas political. En Tai, per esemplo, re Bhumibol Adulyadej, ci ia rena de 1946 a 2016, ia ave un rol importante en la politica de la nasion. Simil, re Mohammed 6 de Magrib ave potia sinifiante ma no asoluta.

On ave alora un grupo peti de nasiones en cual la monarca es la renor vera. La majoria de esta nasiones es la monarcias arabi e muslim cual produi petrolio como Arabia Saudi, Barain, Catar, Uman, e la Amirias Arabi Unida. Otra monarcias forte inclui Brune e Suaziland.

Nasionalisme

Nasionalisme es la sistem political, sosial, e economial marcada par la promove de la intereses de un nasion spesifada, spesial con la gol de gania e manteni autonomia de la propre pais. La ideolojia political de nasionalisme teni ce un nasion debe governa se mesma, libre de interfere de estra, e es liada a la conseta de autonomia. Nasionalisme es orientada a la developa e manteni de un identia nasional, fundida sur cualias sosial compartida, como cultur, lingua, relijio, e politica, e la crede en un asendentia comun. Nasionalisme, donce, vole conserva la cultur de un nasion, par la media de orgulo en atenis nasional, e es liada prosima a patriotisme, cual, en alga casos, inclui la crede ce la nasion debe controla la governa e modo de produi de la pais.

Istorial, nasionalisme es un conseta moderne cual ia comensa en la sentenio 18, de un estende ideolojial plu grande ca la afisa a la familia, a autoria local, e a la pais nativa. On ave tre modeles consetal per comprende la orijines e fundas de nasionalisme. La model prima es primordialisme o perenialisme, cual proposa nasionalisme como un fenomeno natural, ce nasiones ia esiste sempre. La model du es etnosimbolisme, un vista complicada e istorial, cual esplica nasionalisme como un fenomeno dinamica e evoluinte, saturada con sinifia istorial par la lias sujetal de la popla a simboles nasional. La model tre es modernisme, cual proposa ce nasionalisme es un fenomeno sosial resente cual nesesa la strutures sosioeconomial de sosias moderne per esiste.

On ave definis variante per cual composa un nasion, cual resulta en formas variante de nasionalisme. Lo pote es un crede ce sitadania en un stato debe es limitada a un grupo etnical, cultural, relijial, o idential, o ce la multinasionalia en un sola stato debe, par nesesia, inclui la direto per espresa e pratica un identia nasional an par minorias. La adota de identia nasional como developa istorial ia es comun la resulta de un responde par grupos influentosa nonsasiante con identias tradisional car los vide un noncoere entre la ordina sosial como los defini e la esperiea de acel ordina sosial par sua membros, resultante en un situa de stranjeri cual nasionalistes vole solve. Esta stranjeri resulta en un sosia o sosias reinterpretante identia, reteninte elementos cual es videda como asetable e sutra elementos videda como nonasetable, per crea un comunia unida. Esta developa pote es la resulta de problemes de strutur interna, o la resulta de amargia o odia par un grupo esistente contra otra comunias, spesial potias stranjer cual es o es persepida como controla los. Sloganes, imajes, banderas, imnos, linguas, mitos, e otra simboles de la identia nasional es multe importante en nasionalisme.

An si nasionalisme pote es un promove positiva e an nesesada, per esemplo per libri un popla de domina par potias stranjer como colonialisme, o malvolente como en un autocratia, lo pote ance deveni multe negativa. En sua esaia clasica sur la topica, George Orwell distingui entre nasionalisme e patriotisme. Patriotisme, el dise, es la dedica a un loca spesial, ma nasionalisme es "un famia per potia, moderada par autoengana.":

Un nasionaliste es un ci pensa sola, o xef, en la lingua de prestijia en compete. El pote es un nasionaliste positiva o negativa - cual es per dise, el pote usa sua enerjia mental o en suporta o en desvalua - ma en cualce modo, sua pensas depende sempre de vinses, defetas, ganias e desonora. El vide istoria, spesial istoria contempora, como la asende e desende de unias de potia grande, e cada aveni pare a el como un mostra ce sua propre lado es altinte e alga oposor odiada es basinte. Ma, final, lo es importante ce on no confusa nasionalisme con la adula simple de susede. La nasionaliste no segue la prinsipe de alia se con la lado la plu potiosa. En loca, car el ia eleje sua lado, el convinse se ce lo es la plu potiosa, e es capas per adere a sua crede an cuando la fatos es inondante contra el.

Nazisme

Nazisme o sosialisme nasional (deutx Nationalsozialismus) es la ideolojia e la rena cual ia governa Deutxland de 1933 asta 1945 cuando la Partito Sosialiste Nasional de Laborores Deutx de Adolf Hitler ia govena Deutxland; Osteraic pos la Anschluss ("afisa"), e otra teritorios. On conose la Deutxland de esta periodo como Deutxland Nazi.

Sosialisme

Sosialisme es un varia de sistemes sosial e economial marcada par posese sosial e la autodirije de la modos de produi par la laborores, e ance la teorias political e promoves asosiada con los. Posese sosial pote refere a formas de posese publica, coletiva, o coopera, o a la posese de valuas par sitadanes. On ave multe varias de sosialisme e no defini singular pote capsuli tota, ma posese sosial es la elemento comun compartida par los.

Sistemes economial sosialiste pote es divideda entre formas mercato e nonmercato. Sosialisme nonmercato inclui la sustitui de mone e la valuas de imobilas, labora, e capital, par valuas calculada sola sur usa. La intende es la crea de un sistem economial cual evita la nonefetosia e crises asosiada con la acumula de capital e la sistem de profita. Contrastante, sosialisme mercato reteni la usa de mone e la valuas de imobilas, labora, e capital, e en alga casos an la motiva de profita, en relata a la opera de emprendes sosial poseseda e la rasiona de benes de capital entre los. Profitas jenerada par esta companias ta es controlada direta par la laborores de cada compania, o cumula a la sosia intera en la forma de un dividendo sosial. Sosialistes debata la praticalia e metodos de distribui de recursos per un sistem sosialiste.

La promove political de sosialisme inclui un grupo de filosofias political cual orijina en la promoves revoluinte de la sentenio 18, e en la conserna per la problemes sosial cual ia es asosiada con capitalisme. En ajunta a la debata sur mercatos e metodos, la varias de sosialisme difere en sua consetas de posese sosial, como dirijores ta es organizada en instituis produinte, e la rol de la stato en construi sosialisme. Diferes sentral inclui reformiste contra revoluinte e sosialisme de la stato contra sosialisme libraliste. Politicas sosialiste ia es sentraliste e desentralida, internasionaliste e nasionaliste, organizada par partitos political e oposada a politicas de partitos, a veses incluinte sindicatos e a otra veses autonom de e critical de sindicators, presente en nasiones industrialida e nasiones developante. An si tota varias de sosialisme vide se mesma como democrata, la espresa "sosialisme democrata" es comun usada per asentua la suporta e valua de prosedes democratal, e contra sistemes political autoritar, como en nasiones comuniste.

A la sentenio 19 tarde, pos la obras de Karl Marx e sua colaboror Friedrich Engels, sosialisme ia comensa sinifia un oposa a capitalisme e un promove de un sistem poscapitaliste fundida sur alga forma de posese sosial de la modos de produi. En la desenio de 1920, la du tendes political cual domina la promove sosialiste internasional ia es la comunisme e sosialisme democrata. E, pos esta tempo, sosialisme ia emerje como "la promove secular la plu influente de la sentenio 20 en tota la mundo".Con la emerje de la Uni Soviet como la state prima cual nomi se mesma sosialiste, sosialisme ia deveni asosiada en multe mentes con la model economial soviet, cual multe economistes sujeste ia es plu un forma de capitalisme de la stato o un economia de comanda. Partitos sosialiste resta un fortia political con grados variante de potia e influe sur tota continentes, gidante governas nasional en multe nasiones de la mundo. Oji, alga sosialistes ia adota ance la causas de otra promoves sosial, per esemplo ecolojia sana, egalia femiste, e libralisme sosial.

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.