Eda de Bronze

La eda de bronze es un periodo istorial marcada par la usa de bronze, e par protoscrives en alga areas, e otra marcas de sivilia urban. La eda de bronze es la periodo prinsipe du de la scema de tre edas - petra, bronze - fero - como proposada par Christian Jurgensen Thomsen, per clasi e studia sosias antica.

Un sivilia antica es definada como en la eda de bronze o par produi bronze e fonde sua propre cupre e alia con stanio, arsenico, o otra metales, o par intercambia per bronze de otra areas de produi. Bronze mesma es plu dura e durante ca otra metales otenable a la periodo, permetente ce la sivilias con bronze per gania un vantaje tecnolojial.

Locas de cupre e stanio es rara, mostrada par la fato ce on no ave bronzes con stanio en Asia ueste ante intercambia de bronze ia comensa en la milenia tre aec. Mundal, la eda de bronze ia segue jeneral la periodo neolitica, con la calcolitica servinte como un periodo transversa. An si la eda de fero segue jeneral la eda de bronze, en alga areas (pe Africa susaharan) la eda de fero ia comensa direta pos la neolitica.

Bronze Age cultures differed in their development of the first writing. According to archaeological evidence, cultures in Mesopotamia (cuneiform script) and Egypt (hieroglyphs) developed the earliest viable writing systems.

Cultures de la eda de bronze ia difere en sua developa de scrive. Seguente la evidente arceolojial, cultures en Mesopotamia e Egipte ia developa la sistemes prima - cuneforma en Mesopotamia e hieroglifes en Egipte.

La tecnolojia de la produi de bronze nesesa un grupo de tecnicas. Stanio debe es minada e fondida separada, alora ajuntada a cupre fondida per produi la alia bronze. Esta eda ia es un periodo de usa estendeda de metales e de la developa de redes de intercambia. Un reporta de 2013 ia sujeste ce la bronze de alia de stanio prima es de la milenio sinco aec en Plocnik, Serbia en la culture de Vinca, and si esta cultur no es normal videda como un parte de la eda de bronze.

Per plu detalias, vade a:

  • Egipte en la eda de bronze
  • Asia sude-ueste en la eda de bronze (Mesopotamia, la Levante, Anatolia, e Iran)
  • Asia sude en la eda de bronze
  • Asia sentral en la eda de bronze (la Caucasos, la stepes de Rusia a Mongol)
  • Asia este en la eda de bronze (China, Corea, Japan, e Vietnam)
  • Europa sude-este en la eda de bronze (la Balcanes, Elas, e la Ejean)
  • Europa en la eda de bronze
  • Africa en la eda de bronze
  • America en la eda de bronze
Metallurgical diffusion
La crese de metalurjia
Avena

La avena (Avena sativa) es un spesie de gran sereal cual es cultivada per sua semes. La avena es comeda par umanas, ma es ance usada como comeda per bestas. La avena savaje (Avena sterilis) crese en la "cresente fertil" en Asia sude-ueste, ma on trova prima la avena domada en Europa en la Eda de Bronze.

Babilonia

Babilonia ia es un area cultural antica en Mesopotamia sude-sentral (como Irac moderna), con la site de Babilon como sua capital. Babilonia ia emerji cuando Hammurabi (vivente sirca 1696 - 1654 ace) ia crea un impero de la teritorios pasada de la Impero Acadian. Babilonia ia adota acadian, un lingua semita, per scrives ofisial, e ia usa la lingua sumer, no plu parlada alora, como un lingua relijial. La area ia resta un sentro cultural importante, an su renas stranjer, tra la eda de bronze e la comensa de la eda de fero.

Cultur Iamna

La cultur de Iamna (de ucrainsce Ямна, "caveta") ia es un cultur de la eda de cupre tarde a la eda de bronze temprana, en la rejion entre la rio Bug sude, rio Dniester, e rio Ural (pd, la stepe Pontica), 3300 - 2600 aec. La nom refere a sua tradision tipal de entera: un caveta simple covreda como un colina peti, nomida un curgan.

La popla de la cultur Iamna ia es probable un misca entre la eurasianes norde de Sibir e un popla de Asia sude-ueste, relatada a la cultivores de la neolitica temprana de la Caucasos o Iran norde. La cultur material es multe simil a lo de la cultur de Afanasevo en la montes Altai, de cual la popla no es jenetical distinguable.

Los es ance liada a cultures plu tarde cual ia estende tra Europa e Asia sentra, spesial la cultur de vasos cordida, ma ance la cultur de vasos campanin e la cultures Sintaxta, Andronovo, e Srubna. En esta grupos, partes de la cultur Iamna - la monta de cavalos, la stilos de entera, e a alga estende la economia pastoral. Studies jenetical ia indica ance ce esta poplas ia comparti partes grande de sua asendentes de la stepes.

En la teoria la plu asetada, la cultur es identifiada con la popla e la teritoria orijinal de la protoindoeuropeanes (vide Marija Gimbutas).

Cultur de tumulos

La cultur de tumulos (deutx:Hügelgräberkultur) ia domina Europa sentral en la eda de bronze media (sirca 1600 a 1200 aec). Lo ia es la desendente de la cultur Unetice, e inclui la area de sua asendente, plu Baiern e Wurttemberg. Lo ia es segueda par la cultur de campos de vaso (deutx: Urnfeld) de la eda de bronze tarde.

Como la nom sujeste, la cultur de tumulos es distinguida par la abitua de entera la mor su tumulos (acc curganes). La cultur ia es un sosia de gerores cual ia estende con xefias nova a este a la basin de la Carpates (asta la Rio Tisza) e norde a Polsca e la teritorios de la cultur Unetice, con colonias srerdeda sentrida en strutures fortida.

Cultur de vasos cordida

La cultur de vasos cordida es un "orizon" arceolojial vasta de Europa entre sirca 2900 a 2350 aec, de la neolitica tarde, tra la eda de cupre, e fininte en la eda de bronze temprana. Lo ia inclui un area grande, de la rio Reno a la ueste a la rio Volga a la este, partes de Europa norde, sentral, e este.

La nom "cultur de vasos cordida" es un tradui de la deutx Schnurkeramik-Kultur, prima introduida par la arceolojiste deutx, Friedrich Klopfleisch en 1883. La nom refere a la impresas o ornas cordin en sua vasos. Lo ia es ance nomida la cultur de enteras singular, per sua tombas, e la cultur de axes de gera, de la axas comun incluida en la tombas de omes.

Seguente W. Haak, la popla de la cultur ia es relatada jenetical prosima a la popla de la Cultur Iamna de la steppes de Ucraina e Rusia sude. Un teoria popular es ce la cultur iamna ia es composada de la popla protoindoeuropean, e ce los ia invade rapida par gera o lente par influe de cultur la areas de la cultur de Europa norde e este. La combina de la cultur Iamna e la cultures presedente de la area ia crea, seguente la teoria, la cultur de vasos cordida. Esta teoria sujeste ance ce la cultur de vasos cordida ia sperde la linguas protogermanica a protobaltoslavica. Plu, la cultur de vasos cordida ia mostra alga similia jenetica con la cultur sintashta, cual apare plu tarde, e ce esta ia es la orijin de la linguas protoindoiranica.

Arceolojistes nota ce la cultur de vasos cordida no ia es un cultur unida, car grupos cual ia abita un area jeografial tan vasta ia ave economias e modos de susista cual varia par rejion. A la mesma tempo, los ia ave alga cualias compartida trovada en tota grupos de la cultur, como sua metodos de entera, la vasos cordida, e la axas unica.

La cultur de vasos campanin ia coaveni partal con la estrema ueste de esta cultur, ueste de la rio Elbe, e ia contribui posible a la sperde de la cultur. An si la organiza sosial e ordina de colonias ia es simil a la cultur de vasos campanin, la cultur de vasos cordida no ia ave alga de la refinas cual ia deveni posible tra la intercambia e comunica par mar e rios.

Esta cultur ia es presededa par la cultur narva de Europa norde-este, la cultur de vasos embutin e la cultur de amforas globin de Europa norde-sentral. Lo esta segueda par la cultur de vasos campanin de Europa ueste, e la cultur Andronovo en Sibir ueste.

Eda de Bronze en India

La Eda de Bronze en la sucontinente de India (pd Barat) ia comensa sirca 3000 aec, e en la fini resulta en la Sivilia de la Vale Indo cual ia ave sua periodo matur entre 2600 e 1900 aec.. Lo continua a la periodo de la Rigvedas, la periodo temrpana de la period de la Vedas. Lo es segueda par la Eda de Fero en India, comensante sirca 1000 aec.

La abitantes de la vale de la Rio Indo, la Harappas, ia developa tecnicas nova en metalurjia e produida cupre, bronze, plomo, e stanio. La cultur tarde de la Harappas, datida de 1900 a 1400 aec, coaveni partal con la traverso de la Eda de Bronze a la Eda de Fero, donce lo es difisil per dati esta traversa esata. Lo es alegeda ce un brasaleta de cupre, fabricada en Mehrgarh en la forma de un raio de un rota sirca 6000 anios ante aora, e es la esemplo la plu temprana de la usa de la tecnica de sira perdeda en la mundo.

India sude, par contrasta, resta en la eda mesolitica asta sirca 2500 aec. En la milenio du aec, lo pare ce on ia ave contata cultural entre India norde e India sude, an ce India sude ia brinca supra la Eda de Bronze e ia entra la Eda de Fero de la calcolitica direta.

En febrero 2006, un ensenior en la vileta de Sembian-Kandiyur en Tami Nadu ia descovre un sisel de bronze con un enscrive cual es estimada de sirca 3500 anios ante aora. La epigrafiste Iravatham Mahadevan ia sujeste ce la scrive ia es en la alfabeta de Indo, e ia sujeste ce la lingua ia es relatada a la linguas dravidian. Ma la asentia de un Eda de Bronze en India sude, contrastada con la sabia de la tecnolojia de fabrica con bronze en la cultures de la vale de la Indo, sujeste ce sua ipotese no es probable coreta.

Eda de Bronze en Xina

En Xina, la fabricadas de bronze la plu temprana ia es trovada en la loca de la cultur Mijiayao (3100 a 2700 aec).

La terma "la eda de bronze temprana" es a veses usada como egal a la Dinastia Shang e preistoria xines (sentenios 16 a 11 aec), e "la eda de bronze tarde" como la Dinastia Zhou (sentenios 11 a 3 aec). Ma on pote vide ce la eda de bronze como definada par sua aveni en Europa e Asia sude-ueste ia no fini vera en Xina, car on no ave un clar cambia a un eda de fero. En Xina, la bronze (con la arte de jada) ia es videda como la materia prima per arte ritual cuando comparada con fero o petra. Petra ia deveni popular sola per tombas de la Han pos influe de India, recambiante per la usa de lenio.

La usa de bronze en Xina ia orijina en la periodo Erlitou, cual alga istoristes ia suseste pone lo en la eda de la Dinastia Shang. Otras ia crede ce la locas Erlitou parteni a la Dinastia Xia presedente. En cada caso, lo pare ce la usa de bronze ia fini subita a la desintegra de la rena de la Dinastia Zhou ueste.

La usa vasta de bronze en metalurjia xines dati a un periodo sinifiante plu tarde, probable la resulta de influe de la ueste, posible via la cultures de Xinjiang. Ma lo es ance posible ce la usa de bronze ia developa separada en Xina, con la ojetos de bronze la plu vea ia es descovreda a la loca Majiayao en Gansu, e no en Xinjiang.

La Dinastia Shang de la vale de la Rio Jala ia deveni potiosa pos la Dinasta Xia sirca 1600 aec. La plu de informa sur la Dinastia Shang es de la scrive sur osos de oraculo (cascas de tortugas, scapulas de boves, etc) cual ave glifos cual formi la arcivo prima de scrive xines.

Fero ia es trovada de la Dinastia Zhou, ma sua usa es minima. Leteratur xines datida de la sentenio ses aec indica sabia de fonde fero, ma bronze ia continua ave la sinifia xef per alga tempo plu. La usa de fero no ia pasa bronze asta la sentenio du aec.

Ojetos de bronze xines ia es fabricada per usa, como punto de lansas, testas de axias, otra armas, e utiles comun. Bronze es ance usada per fabrica cosas ritual, cual es varias plu detaliosa de vasos dial en materiales cara. Los tende es multe decorada, comun con la motif taotie, con fases de animales multe stilida. Otra decoras inclui demones, animales stilida, e simboles astrata. Multe bronzes ave enscrives moldida cual es la parte la plu grande de la scrives temprana cual ia aida la istoristes e arceolojistes reconstrui la istoria de Xina, spesial de la Dinastia Zhou.

La bronzes de la Dinastia de Zhou ueste inclui partes de istoria no trovada en otra testos comun composada par persones de state e an clase nonserta. Plu, la bronze moldida ia ave un permane no posible per manuscritos. La enscrives pote conteni referes a dato e loca, la nom de un aveni onorada, un liste de donadas a la artisan per la bronze, e un dedica. Estas dona la rexercor un indica de la tempo e loca de la periodo, permetente ce los trasa la evolui de la vasos e la avenis ce los descrive.

Eda de Fero

La eda de fero es la eda final de la sistem de tre edas, presededa par la neolitica (eda de petra) e la eda de bronze. Orijinal lo ia refere a un eda arceolojial en la preistoria de Europa e Asia sude-ueste, ma ia es estendeda par analojia a otra partes de la mundo.

La dura de la eda varia dependente a la rejion considerada. Lo es definada par la produi de utiles e armas de fero e aser plu bon ca sua egales en bronze. En Asia sude-ueste antica, esta aveni pos la colasa de la eda de bronze en la sentenio 12 aec. La tecnolojia ia sperde rapida tra la rejion de la Mediteraneo e a Asia sude.

La eda de fero en Asia sude-este ia comensa con la descovre de la fonde de fero e la tecnicas de forja en Anatolia, la Caucasos, e la Balcanes en la milenio du aec. La creas de fero ia trovada en la loca arceolojial Kultepe, Azerbaijan, mostra ce la fonde de fero ia es bon conoseda e usada ante la milenio du. La usa de un forno basa per fonde la plu temprana ia es trovada a Tell Hammeh, Urdun, de sirca 930 aec.

Un forno basa es un tipo de forno usada per fonde fero de sua osides. Lo ia es la plu temprana de fornos con la capasia de fonde fero. La produi de la forno ia es un masa porosa de fero e scoria nomida fero reduida. Esta es tipal solidida e plu fondeda a fero forjada. En la eda moderne, la forno basa ia es recambiada par la forno alta, cual produi fero ru.

La spadas de la eda de fero temprana ia es multe diferente de la spadas de aser plu tarde. Los ia es no plu dur e forte ca la spadas de bronze. La spadas ia pote es fasil curvada o contorseda cuando usada.

Ultima, la fornores ia aprende ce, par ajunta un cuantia de carbono (ajunta en fonde en la forma de carbon de lenio) a la fero, los pote produi un alia plu bon, aora conoseda como aser. Par fria la fero en acua o otra licuida, e tempera lo par recaldi e refria lo, la spadas ta sufri min dana e pote rebondi a sua forma orijinal si curvada. Ma esta tecnolojia ia evolui lente, e an a la fini de la periodo medieval temprana, multe spadas ia es ancora fabricada con fero nondurida. Sola par produi aser pote la prosedes resulta en utiles e armas cual ia es egal o plu bon ca bronze.

Egipte antica

Egipte antica ia es un sivilia de Africa norde-este, consentrada longo la estende basa de la rio Nilo, en lo cual oji es Misre. Lo es un de la ses sivilias global cual ia apare autonom. La sivilia egiptian ia segue Egipte preistorial e ia fusa sirca 3150 aec (como diseda par cronolojia normal egiptian) con la uni political de Egipte Alta e Egipte Basa sur Menes (ci on identifia comun con Narmer). La istoria de Egipte antica ia aveni como un serie de renas stable, cual ia es separada par periodos de nonstabilia relativa cual es nomida la Periodos Media: la rena vea de la temprana de la eda de bronze, la rena media de la media de la eda de bronze e la rena nova de la tarda de la eda de bronze.

Egipte ia ateni la zenite de sua potia en la rena nova, en la periodo de Ramses, cuando lo ia egali la Impero Hitita, la Impero Asirian e la Impero Mitani, pos cual lo ia entra un periodo de declina lenta. Egipte ia es invadeda o concistada par un serie de potias stranjer, per esemplo la cananes, la libis, la nubis, la asirianes, la babilonianes, la farsis acemenan, e la macedonsces en la Periodo Media Tre e la Periodo Tarda de Egipte. En la tempo seguenta la mori de Alexandro la grande, un de sua jenerales, Ptolemeo 1, ia institui se como la renor nova de Egipte. Esta Rena Ptolemeo elinica ia governa Egipte asta cuando, sur Cleopatra 7, lo cade a la Impero Roman e ia deveni un provinse roman.

La susede de la sivilia de Egipte anitca ia veni partal de sua capasia per ajusta a la constrinjes de la rio Nilo per cultiva. La inonda perdisable de la vale fertil ia produi un suprapasa de cultivas, cual ia suporta un popla plu densa, e crese sosial e cultur.

Egipte en la eda de bronze

En Egipte antica, la eda de bronze ia comensa en la periodo protodinastial (sirca 3150 aec). Seguente direta la uni de Egipte basa e alta es la periodo dinastial temprana e de sua eda de bronze. Lo inclui la dinastias prima de du, estendeda a sirca 2686 aec, o la comensa de la Rena Vea. En la dinastia prima, la capital ia move de Abidos a Memfis con un Egipte unida renada par un dio-re egiptian. Abidos ia resta la pais santa major en la sude. La cualias alta de la sivilia de Egipte antica, como arte, arciteta, e multe aspetas de relijio, ia formi en esta periodo. Memfis en la eda de bronze temprana ia es la site la plu grande de la eda. La Rena Vea es la nom donada a la periodo en la milenio tre aec cuando Egipte ia ateni sua culmina prima de sivilia.

La periodo prima de transita, comun descriveda como un periodo oscur en la istoria de Egipte antica, estende sirca sento anios pos la fini de la Rena Vea de sirca 2181 a 2055 aec. Poca evidentes monumental survive de esta periodo. Ma lo ia es un eda dinamical cuando la rena de Egipte ia es divideda entre du potias competente: Heracleopolis en Egipte basa, e Tebes en Egipte alta. Esta du ta veni ultima en desacorda, con la res de tebes concista la norde, resultante en la reuni de Egipte su sola un re en la parte du de la dinastia 11.

La Rena Media de Egipte ia dura de 2055 a 1650 aec. En esta periodo, la culta funeral de Osiris ia leva per domina la relijio popular de Egipte. La periodo ia ave du fases: la dinastia 11, cual ia rena de Tebes, e la dinastia 12 e 13, sentrida en el-Lisht.

En la periodo du de transita, Egipte antica ia cade en desordina per la ves du, entre la fini de la Rena Media e la comensa de la Rena Nova. Lo es conoseda xef per la rena de la Hicsos, renante en la dinastia 15 e 16. La Hicsos ia apare prima en la dinastia 11, ia comensa sua leva a potia en la dinastia 15, e ia emerje de la transita controlante Avaris e la Delta de la Nilo. A la dinastia 15, los ia rena Egipte basa, e los ia es espulsada a la fini de la dinastia 17.

En la eda de bronze tarde, la Rena Nova de Egipte, ance conoseda como la Impero Egiptian, ia dura de la sentenio 16 a la 11 aec. La Rena Nova ia segue la periodo du de transita e ia es segueda par la period tre de transita. Lo ia es la eda la plu rica e ia marca la culmina de la potia de Egipte. La Rena Nova plu tarde, pe la dinastias 19 e 20 (1292 - 1069 aec) es ance conoseda como la periodo de Rameses, per la 11 faraones cual ave acel nom.

Elas

Elas (ance conoseda como Grecia; la nom ofisial es Ellinikí Dhemokratía, o Ellada en elinica moderna) es un pais en Europa. La area es sirca 131 940 cilometres cuadrida e la cuantia de popla, en la anio 2006, ia es sirca 10 688 058 persones. La site capital es Atina. La lingua major es elinica.

Lo ia es un republica ("Dhemocratia") de 1973, ma la bandera es inspirada par la bandera de Danmarc, de do la casa real ia veni ultima. La ministro xef es Antónis Samarís (Nea Dhimocratía / Republic Nova). Presente, la pais es en un crise economial.

La istoria de Elas es un de la plu longas de mundo. On regarda la pais como la cuna de la sivilia ueste, como la loca de nase de la democratia, la filosofia ueste, la Juas Olimpial, la leteratur ueste, la istoriografia, la politica, la prinsipes matematical e siensal e la drama ueste. La elinicas ia es prima unida su Filipo 2 de Macedonia en la sentenio 4 aec. Sua fio Alexandro la Grande ia concista la plu de la mundo vea, estendente la cultur elinica de la Mediteraneo este a la Rio Indo. Ajuntada par Roma en la sentenio 2 aec, Elas ia deveni un parte de la Impero Roman e sua seguor, la Impero Bizantian. La sentenio 1 ec iia vide la institui de la Eglesa Ortodox Elinica, cual ia formi la identia elinica moderna e ia transmete la tradisiones elinica a la mundo ortodox. Cadente en la domina osmanian en la sentenio 15, la nasion moderna de Elas ia emerji en 1830 pos la gera de autonomia.

Europa preistorial

Europa preistorial ia estende de la comensa de la eda paleolitica asta la eda istorial, o de sirca 1800 mil anios ante aora asta la sentenios final aec. De la paleolitica temprana a la media de la paleolitica tarda (sirca 18 mil aec), Europa ia es poplada par Homo erectus e Homo neanderthalensis. En la paleolitica tarda e la mesolitica (41 mil aec asta 4 mil aec), Europa ia ave ance xasores-coliores de Homo sapiens. En la eda glasial la plu resente, multe partes de Europa ia es despoplada e alora, sirca 13 mil aec, ia es repoplada. La eda neolitica ia comensa sirca 7 mil aec en Europa sude-este, e ia estende a Europa norde sirca 5.5 mil aec, cuando la eda de cupre ia comensa.

La eda de bronze ia comensa sirca 3200 aec en Elas. La eda de fero ia comensa sirca 1200 aec e ia estende a Europa norde sirca 500 aec, cuando Europa ia ateni la periodo istorial. Alfabetisme ia veni a Europa sirca la sentenio oto aec a la costa mediteranean, ma multe areas de Europa norde e este ia resta preistorial asta tan tarda como la eda media.

Ieroglifes

Ieroglifes egiptian ia es la sistem de scrive formal usada en egipte antica. Lo ia combina elementos glifal, silabal, e alfabetal, con sirca un mil sinias unica. Ieroglifes corente ia es usada per leteratur relijiosa sur papiro e lenio. La scrives egiptian plu tarde - ieratica e demotica - ia developa de scrive ieroglifal; meroitica (la silabario de la Rena Kux de Egipte sude) ia es un deriva tarde de demotica.

La usa de scrive ieroglifal ia orijina de sistemes de simboles de la eda de bronze temprana, sirca la sentenio 32 aec, com la frase prima desifrable scriveda en la lingua egiptian de la dinastia du (sentenio 28 aec). La ieroglifes ia developa a un sistem matur usada per enscrives a monumentos en la lingua clasica de la periodo de la Rena Media. En esta periodo, la sistem ia usa sirca 900 sinias unica. La usa de esta sistem ia continua en la Rena Nova e la periodo tarde, e a la periodos persian e ptolemean. Surviventes tarde de usa de ieroglifes ia es trovada tan tarde como la periodo roman, estendente a la sentenio cuatro ec.

Con la clui final de la templos pagan en la sentenio sinco, sabia de scrive ieroglifal ia es perdeda. An si algas ia atenta, la scrive ia resta nondesifrida en la Eda Medieval e la periodo temprana moderne. La desifri de scrive ieroglifal ta es atenida en la desenio de 1820 par Jean-François Champollion, con la aida esensal de la Petra Rosetta.

Istoria temprana de la mongoles

Esta article es sur la istoria temprana de la mongoles. Comensante con la abitantes preistorial, la istoria es recordada en la multe scrives xines sur sua visinas "barbar". La eda fini con la cade de imperos mandju e turces e la renase de la mongoles con la hanes mongol, spesial Txingis Han.

La evidente de umanas multe temprana no es trovada en la area de Mongol, cual no es tan surprendente si on considera la clima tra la milenios ala. Arceolojistes ia descovre alga utiles de petra en la rejion sude de la Deserto Gobi, e desinias en cavas en provinses Khovd e Bayankhongor. Un abitada de cultivores neolitica ia es trovada en provinse Dornod. Otra evidentes de Mongol ueste inclui sola campas tempora de xasores e pexores.

La cultur de enteras de bloco de la Edas Bronze tarda e Fero temprana, relatada a la proto-mongoles, sperdeda tra Mongol e partes de Xina norde, Rusia sude, e Mandju. Esta cultur ia es la trovada major de Mongol de la Eda de Bronze.

Petras de reno e curganes peti (kheregsuures) es de esta eda, ma alga teoristes dati los como de la sentenio 7 e 8 aec. Petras de reno es megalitos antica gravada con simboles, cual es trovada tra Eurasia sentral e este, ma es consentrada xef en Sibir e Mongol. Los es posible asosiada con enteras antica, como gardores de la mor. Los pote es asosiada con xamanisme de la eda sirca 1000 aec. Sirca 900 petras ia es descovreda, 700 en Mongol, la plu en la area de Lago Baical e la Montes Altai. Un cuantia peti de petras de reno ia es trovada en Cazacstan, Asia sude-ueste, Ucraina, e an un esemplo prosima la Rio Elbe.

Per la sentenio 8 aec, la abitantes de la parte ueste de Mongol ia es migrores nomada indoeuropean, probable scitianes o yuezhi. En partes sentral e este, la multe tribus ia es xef asian este, spesial mongoles. Popla turcica ia abita norde de la mongoles, e mandjus a la este.

Un compleso vasta de entera de la Eda de Fero, de sentenio 5-3 aec, ia es desenterada prosima a Ulaangom, cual ia es plu tarda usada par la xiongnu. Con la apare de armas de fero per la sentenio 3 aec, la abitantes de Mongol ia comensa formi alias de clanes vivente en la stilo de xasores e pastores.

An si la plu parte de Asia sentral ia ave modos de vive simil, la situa en la stepes mongol ia es unica car migra ia es limitada par impedis natural como la Montes Altai]] a la este, la Deserto Gobi en la sude, e la taiga de Sibir en la norde, tota nonconveninte per la modo de vive nomada. Esta impedis ia limita migra, ma ance limita invadores. La clanes mongol sola alia con otra clanes mongol, ci comparti la lingua, relijio, e modo de vive mongol. Esta ta es plu tarda un vantaje contra la menasa de la imperos xines. Los ave combates repeteda con la dinastias xines de Shang e spesial de Zhou, cual ia comensa conciste e sclavinte mongoles. Per la eda de la Statos Gerante en Xina, la dinastias de Zhao, Yan, e Qin ia comensa prosimi e concista Mongol sude. Cuando la dinastia Zin ia uni tota de la renas de Xina en un impero, la Rena Sahun de la popla xiongnu ia es formida sur la stepes mongol e la clanes autonom ia es unida como un stato, e la mongoles ia es secur de la xines estendente.

La colasa en la eda de bronze tarda

En la eda de bronze tarde, un colasa subita de la economia de la cultures sirca la Mar Mediteraneo ia aveni, cual ia resulta en un "eda oscur". La economia de la palasios de la rejion de la Mar Ejean e Anatolia cual ia marca la eda de bronze tarde desintegra e cambia a cultures de vilas peti e isolida de la eda oscur elinica. La dui sentenio sirca 1200 e 1150 aec ia inclui la colasa cultural de la renas misenean, de la dinastia de casitas de Babilonia, de la Impero Itita en Anatolia e la Levante, e la Impero Egiptian, la destrui de Ugarit e la statos amorita en la levante, la frati de la statos luvian de Anatolia ueste, e un periodo de caos en Canan. La dejenera de esta governas ia disturba la vias de comersia e ia redui sever la alfabetisme de la mundo conoseda. En la fase prima de esta periodo, cuasi tota site entre Pilos e Gaza ia es destruida savaje, e multe ia es abandonada, incluinte Hatusa, Misenea, e Ugarit.

Sola alga statos potiosa, como Asiria, Egipte (an si debilida sever), e Elam ia survive la colasa - ma per la fini de la sentenio 12 aec, Elam diminui pos sua defeta par Nebucadnezar 1, ci ia revive corta la fortunas babilonian ante sufri un serie de defetas par la asirianes. Pos la mori de Axur-bel-cala en 1056 aec, Asiria ia comensa declina per sirca 100 anios seguente, e sua impero ia diminui sinifiante. Per 1020 aec, Asiria ia pare controla sola la areas en sua visinia; la partes bon defendeda no ia es menasada en la colasa.

Gradal, par la fini de la eda oscur, restas de la ititas ia fusa como statos siro-itita peti en Cilicia e la Levante. Los en la Levante ia es composada de governas itita e aramean. Comensante en la media de la sentenio 10 aec, un serie de renas aramean peti ia forma en la Levante, e la filistines ia comensa abita Canan sude, do la semitas ci ia parla canan ia fusa como un cuantia de governas como Israel, Moab, Edom, e Amon. De 935 aec, Asiria ia comensa reorganiza e denova estende se, resultante en la Impero Neoasirian (911-605 aec), cual ia controla ultima un area vasta de la Caucasos a Egipte, e de Cipros a Persia. Frigianes, cimerianes, e lidianes ia ariva en Anatolia, e un governa hurian nova de Urartu ia formi en Anatolia este e la Caucasos sude, do la colcianes (cartulis) ia emerje ance. Popla irani, como la persianes, medes, partianes, e sargatianes ia apare prima en Iran antica pos 1000 aec, deslocante la popla nonindoeuropean plu temprana, como la casitas, hurianes, e gutianes en la norde-ueste de la rejion. La lingua isolida de la elamitas e maneanes nativa a la area ia continua domina la rejiones sude-ueste e de Mar Caspian en ordina. Pos la periodo de influes de la este en la Mar Ejean, Elas clasica ia emerje.

Un colie de esplicas per la colasa ia es proposada, sin cualce ateni un acorda jeneral; probable, multe fatores ia ave un rol. Estas pote inclui cambias de la clima (incluinte la resultas de erutas de volcanes), invades par la Popla de Mar e otras, la efetos de la sperde de metalurjia de fero, la developa de armas e taticas militar, e un colie de falis de sistemes political, sosial, e economial.

Poplas de la mar

La Poplas de la Mar ia es un federa suposada de tribus de marinores ci ia ataca Egipte, Anatolia, e la Levante en la eda de bronze tarde. La poplas variosa ia es proposada como orijina de locas cual inclui Anatolia ueste, la isolas de la Mar Ejean, la isolas de la Mar Mediteraneo como Sisilia e Sardinia, e locas en Europa sude-sentral. La espresa ia es introduida (como peuples de la mer) par la egiptolojiste franses Emmanuel de Rougé en un descrive de relevadas de Medinet Habu sur la anio oto de Ramese 3.

Un lista de la grupos rejistrada par la egiptianes, e sua nomes egiptian (reconstruida); nota ce la identias de tota de los no es serta!

Denyen - elinicas (danaoi), o posible israeli (tribu de Dan)

Ekwesh - elinicas (aceanes)

Lukka - licianes (Anatolia sud-ueste)

Peleset - filastinas, posible de isolas ejean

Shekelesh - de la Ciclades (isolas ejean), o posible sisilianes

Sherden - siceles (de Sardinia)

Teresh - etruscans? sardinianes?

Tjeker - no conoseda; posible de Anatolia ueste

Weshesh - elinicas (aceanes)

Tableta

Un tableta es un bloco plata de petra, arjila, lenio, o sira.

En Asia sude-ueste, on ia scrive sur tabletas de arjila, en la sistem cuneforma de scrive, tra tota la eda de bronze e un parte grande de la eda de fero.

Tadjicistan

Tadjicistan (ofisil la Republica de Tadjicistan) es un pais montaniosa e sin costa en Asia sentral. Lo ave un popla de 8 milion persones (estimada en 2013) e un area de 143 100 cilometres cuadrida. Lo es bordada par Afganistan a la sude, Uzbecistan a la ueste, Cirgistan a la norde e Jonguo a la este. A sude es Pacistan, separada par la Coredor Wakhan streta. La teras tradisional de la popla tadjic ia inclui la paises moderna Tadjicistan, Afganistan e Uzbecistan.

La teritorio presente de Tadjicistan ia es abitada par cultures antica, incluinte la site Sarazm de la Neolitica e la Eda de Bronze, e ia conteni plu tarda renas de poplas de relijios e cultures diversa, incluinte la sivilia de Oxus, la cultur de Andronovo, budisme, cristanisme nestorian, zoroastrisme, manisme e islam. La rejion ia es renada par multe imperos e dinastias, incluinte la Impero Acemenan la Impero Sasanian, la Impero Heftalita, la Impero Samanida, la Impero Mongol, la Dinastia Timurida, la Impero Rusce, e final la Uni Soviet. Cuando la Uni Soviet ia desintegra en 1991, Tadjicistan ia deveni un nasion autonom. Un gera interna ia aveni cuasi direta pos la autonomi, entre 1992 e 1997. Pos la gera, la stablia political nova e aida esterna ia permete la crese de economia de la pais.

Tadjicistan es un republica presidental, composada de cuatro provinses. La plu de sua 8 milion persones parteni a la etnico tadjic, ci parla la lingua tadjic (un dialeto de farsi). Multe tadjices parla ance rusce como sua lingua du. La rejion Gorno-Badakhshan, poca poplada, conteni un diversia stonante de diversia lingual. Montanias covre plu ca 90% de la pais. Lo ave un economia traversante cual depende multe de la produi de aluminio e coton.

La site capital es Duxanbe.

Urdun

Urdun (ofisial la Rena Haximita de Urdun) es un pais arabi en Asia ueste, a la riva este de la Rio Urdun. Lo es bordada par Arabia Saudi a la este e sude; Irac a la norde-este; Suria a la norde; Israel, Filastin e la Mar Mor a la ueste; e la Mar Roja a sua sude-ueste estrema. Urdan es stratejial locada a la crus de vias de Asia, Africa e Europa. La capital de Urdun, Aman, es la site la plu poplada de la pais e ance sua sentro economial, political e cultural.

Lo cual es aora Urdun es ja abitada de umanas de la periodo paleolitica. Tre renas stable ia emerji ala a la fini de la eda de bronze: Amon, Moab e Edom. Renas plu tarda ia inclui la Rena Nabatea, la Impero Roman e la Impero Osmanian. Pos la Revolui Arabi Grande contra la osmanianes en 1916, la Impero Osmanian ia es divideda par Britan e Frans. La Amiria de Transurdun ia es instituida en 1921 par la amir alora Abdullah 1, e lo ia deveni un protejeda brites. En 1946, Urdun ia deveni un stato autonom, ofisial nomida la Rena Haximita de Transurdun. Urdun ia catura la Riva Ueste en la Gera Arabi-Israeli de 1948, ma ia perde lo en 1967, e la nom de la stato ia es cambiada a la Rena Haximita de Urdun en 1949.

Urdun es un membro fundinte de la Alia Arabi e la Organiza de Coopera Muslim, e es un de du statos arabi cual ia suscrive un trata de pas con Israel. La pais es un monarcia constitual, ma la re ave multe potias de dirije e legi.

Urdun es un pais relativa peti e semiseca, sin costa, con popla de 9,5 milion persones. Islam suni, praticada par sirca 92% de la popla, es la relijio xef en Urdun. Lo coesiste con un minorio cristian nativa. On regarda Urdun como un de la paises arabi la plu secur en Asia sude-ueste, e lo ia evita terorisme e nonstablia durante. A media de tumulta ensircante, lo ia es multe bonveninte, asetante refujadas de cuasi tota geras visina tan temprana como 1948, con un cuantia estimada de 2,1 milion filastinis e 1,4 milion suris en abita en la pais. Lo es ance un refuja per miles de cristianes iraci ci fuji de Daex. An si Urdun continua aseta refujadas, la enflue grande resente de Suria ia ajunta un tensa notable a la recursos e infrastrutur nasional.

On clasi Urdun como un pais de "developa umana alta", con un economia de "revenu media alta". La economia urduni, un de la plu petis en la rejion, ma con laborores capas, es atraente a investores stranjer. La pais es un destina major per turises, e atrae ance turisme medical par causa de sua campo bon developada de sania. An tal, un manca de recursos natural, un flue grande de refujadas e alga tumulta rejional ia impedi la crese economial.

La area es sirca 92,300 cilometres cuadrida. La lingua major es arabi.

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.