Economia

Esta es la article sur economia. La categoria Economia conteni plu articles sur economia.

La economia es la siensa sosial cual studia la prosedes de la produi, distribui, comersia e consuma de cosas e servis en un situa de compete per recursos. Lo studia ance la produi e distribui de ricia.

La economia studia la sasia de la nesesas umana par recursos, partinte de la prinsipe ce la recursos natural e la cosas es limitada o nonsufisinte; esta es per dise ce on no pote sasia tota partisipantes de la economia, e ce la individuas o sosias debe deside entre alternativas diversa. Seguente, un aspeta sentral de la economia es la studia de la prosedes de deside en individuas o grupos. Jeneral, la economistes crede ce la motivas e preferes individua determina la plu la prosedes de deside. La variables studiada es cuantais mesurable, spesial en la situa de la "mercato".

New York Stock Exchange, Wall Street
La Asioneria de New York, a Wall Street

Etimolojia

La parola "economia" veni de la elinica οίκος (oikos) "casa" e νέμω (nemo) "leges", o "leges de la casa".

Vide ance

Africa

Africa es la continente sude de la Mar Mediteraneo, a este de la Mar Atlantica, e a ueste de la Mar Indian.

Africa norde es xef muslim, e la lingua la plu comun es arabi. Africa susaharan ave poplas diversa, con muslimes, cristianes, e persones ci crede a la relijios tribal. La plu de la linguas es de la familia bantu, ma on ave otra familias ance.

Africa ave diversa etnicos, cultures e linguas. En la sentenio 19 tarda la paises european ia coloni casi tota Africa. Africa ance varia consernante la ambientes, la economia, la lias economial e la sistemes de governa. An tal, multe de la statos corente en Africa ia orijina de la prosede de descoloni en la sentenio 20. La nasiones african ia atenta coopera tra la institui de la Uni African, de cual la xeferia es en Addis Ababa.

Africa sentral

Africa sentral es la rejion sentral de la continente de Africa. Lo inclui la paises de Burundi, la Republica Democrata de Congo, Ruanda, Sentrafrica, e Txad. Cuando la terma es usada par la Nasiones Unida (NU), lo inclui Angola, Camerun, Sentrafrica, Txad, Congo, Republica Democrata de Congo, Gine Ecuatoral, Gabon, e San Tome e Prinsipe. Tota de la statos en Africa sentral como definida par la NU, con ance la 11 statos cual es comun regardada como parteninte a Africa sentral, constitui la Comunia Economial de Statos de Africa Sentral. De cuando Sudan Sude ia autonomi en 2011, lo es ance comun regardada como un parte de Africa sentral.

Arabia Saudi

Arabia Saudi es un pais en Asia.

La area es sirca 2 149 690 cilometres cuadrida.

La cuantia de abitores, en la anio 2017, ia es sirca 32 938 213 persones.

La site capital es Riad.

La lingua major es arabi.

Barat

Barat (o India) es un pais en Asia.

La area es sirca 3 287 590 cilometres cuadrida.

La cuantia real de popla en Barat, en la anio 2016, es sirca 1 293 057 000 persones.

La site capital es Delhi Nova. La presidente de 2012 es Pranab K. Mukherjee (sentral-sinistra). La ministro xef es Manmohan Singh, un sic.

Barat ave 23 linguas oficial cual inclui engles, ma 22 es barati. La linguas major es hindi (30% a 40%), bangla, telugu, marati, tamil, urdu, gudjarati, malaialam, canada, oria, pandjabi, asames, kaxmiri, sindi, bodo, dogri, kokani, maitili, manipuri, nepali, santali, sanscrito, e engles.

La proportio de omes sircosideda es min ca 15% en Barat. La muslimes es usual sircosideda, ma no la indus e la sicistes. Sola 2,3% de Barat es cristian.

Botsuana

Botsuana, ofisial la Republica de Botsuana (setswana: Lefatshe la Botswana) es un pais en Africa sude. A otra tempos la Protejoria Brites de Bechuanaland, Botusana ia adota sua nom nova pos deveni nondependente en la Comnuni Brites de Nasiones en 30 setembre 1966.

La area es sirca 600 370 cilometres cuadrida.

La cuantia de abitores, en la anio 2007, ia es sirca 1 815 508 persones.

La site capital es Gaborone.

La linguas parlada es setswana (78.2%), kalanga (7.9%), sekgalagadi (2.8%), engles (2.1%), e otras (8.6%).

Canada

Canada o la Federa de Canada es un pais grande en America Norde. En engles, lo es nomida Canada o Canadian Confederation; en franses, Canada o Confédération du Canada).

La area es sirca 9 984 670 cilometres cuadrida.

La cuantia de abitores, en la anio 2016, ia es sirca 36 155 487 persones.

La site capital es Ottawa.

La linguas major es engles e franses.

De 2015, la ministro xef es Justin Trudeau de Ottawa, Ontario, de la partito libriste. Sua casa ofisial es 1 Sussex Drive. La xef de stato es Rena Elizabeth 2.

Cipros

Cipros (elinica: Κύπρος, Kýpros, IPA: [ˈcipɾos]; Turces: Kıbrıs, IPA: [ˈkɯbɾɯs]) es un isola e pais en la Mar Mediteraneo.

Lo es, par tradision, la isola de Afrodite (Venus), la diva de la ama.

La area es sirca 9 250 cilometres cuadrida.

La cuantia de abitores, en la anio 2006, ia es sirca 1 100 000, con 784 000 persones ci parla elinica.

La site capital es Nicosia o, local, Lefkosia (elinica: Λευκωσία, turces: Lefkoşa). La capital de Cipros Norde es Nicosia Norde. La site capital es divideda (unica en Europe). Lo ave 330 000 abitores.

Otra sites inclui Limassol, con 220 000 persones, e Larnaca, con 70 000.

La linguas major es elinica e turces.

Pos 1974, Cipros es divideda a du partes, Cipros Norde, o la Republica Turces de Cipros (Kuzey Kıbrıs Türk Cumhuriyeti en Turces1), e la Republica de Cipros. Cipros Norde es reconoseda sola par Turcia.

En 2013, un presidente nova (Proedhros) ia es elejeda. En la vota prima, un conserviste ia gania 45% e la candidato AKEL (comuniste), la presidente corente, ia es numero du con 27%. Cipros es nonusual car on pote deveni presidente a un cuantia nonlimitada de veses. En la vota du, Nicos Anastasiades ia gania, 58–42%.

La Republica (capital Nicosia Sude) es un membro de la Eurozona. La economia es en crise.

1 Esta sinifia leteral: Norde Cipros Turces Republica (Cumhuriyeti es un parola arabi)

Cuait

Cuait (en arabi: الكويت‎‎ al-Kuwait, pronunsia golfo-arabi: [ɪl‿ɪkweːt] or [lɪkweːt]), nomida ofisial la Stato de Cuait, es un pais en Asia sude-ueste. Situada a la borda norde de Arabia este a la fini de la Golfo Persian, lo comparti fronteras con Irac e Arabia Saudi. En 2016, Cuait ia ave un popla de 4,2 milion persones, de ci 1,3 ia es cuaitis e 2,9 milion (cuasi 70%) es otra sitadanes a stranjer. La area es sirca 17 820 cilometres cuadrida. La site capital es Cuait, e la lingua major es arabi.

On ia descovre reservas de petrolio en 1938. Entre 1946 e 1982, la pais ia esperia un moderni grande. En la desenio de 1980, Cuait ia esperia un periodo de nonstablia jeopolitical e un crise economial pos un colasa finansial. En 1990, Cuait ia es invadeda par Irac. La ocupa iraci ia fini en 1991 pos interveni militar par fortes aliada. A la fini de la gera, on ia fa multe labora per revive la economia e reconstrui la infrastrutur nasional.

Cuait es un stato constitual con un sistem political semidemocrata. La constitui ia es proclamada en 1962. La pais ave un economia de revenu alta, suportada par reservas de petrolio cual es la numero ses de la plu grandes en la mundo. La dinar cuaiti es la mone la plu alta valuada en la mundo. Seguente la Banco Mundal, Cuait ave la revenu cuatro de la plu altas per person en la mundo. On nomi Cuait "la Hollywood de la Golfo" car sua telenovelas e teatrales es popular. Lo conteni la teatro de opera la plu grande en Asia sude-ueste.

Ertra

Ertra es un pais en Africa. La area es sirca 121 320 cilometres cuadrida e la cuantia de abitores, en la anio 2007, ia es sirca 4 906 585 persones. La nom Ertra veni de la nom elinica de la Mar Roja (Ἐρυθρὰ Θάλασσα "Erythra Thalassa"), cual ia es prima adotada per Ertra Italian en 1890.

La site capital es Asmara.

La linguas major es afar, arabi, tigre, kunama, tigrinia e otra linguas cuxitica.

Espania

Espania (España en espaniol), ance nomida Rena de Espania, (Reino de España) es un pais autonom e membro de la Uni European, constituida en un stato sosial e democrata de cual sua forma de governa es la monarcia parlamental. Sua teritorio es organizada en des-sete comunias autonom e du sites autonom, en ajunta a sincodes provinses. Sua capital es la site Madrid.

Esta pais es situada en Europa Ueste e en Africa Norde. En Europa lo ocupa la plu de la penisola iberian (conoseda como Espania penisolal) e la arcipelago de la isolas Baleare (en la Mar Mediteraneo ueste); en Africa es la sites Ceuta e Melilla, la isolas Canario (en la Mar Atlantica norde-este), la Isolas Txafarina (Mar Mediteraneo), la Roca de Vélez de Gomera (Mar Mediteraneo), la Isolas Alhucema (golfo de la Isolas Alhucema) e la Isola de Alboran (Mar de Alboran). La munisipa de Llivia en la Pirineos constitui un enclave ensircada par Frans. Un serie de isolas e isoletas completi la colie a lado de la costas penisolal.

La area es sirca 504 782 cilometres cuadrida, e la pais es la numero cuatro de la plu grandes de la continente, pos Rusia, Ucraina e Frans. Con un altia media de 650 metres, lo es un de la paises la plu montaniosa de Europa. La cuantia de abitores, en la anio 2015, ia es sirca 46 439 864 persones. La teritorio penisolal ave fronteras con Frans e Andora en la norde, con Portugal en la ueste e con Jibraltar en la sude. En sua teritorios african Espania ave fronteras con Maroco. Lo divide con Frans la domina de la isola de la Fasianes en la boca de la rio Bidasoa.

Seguente la constitui espaniol, castelian o espaniol es la lingua ofisial de la stato, e tota la espanioles ave la debe de conose lo e la direto de usa lo. En 2006, lo ia es la lingua madral de la 89% de la espanioles. Otra linguas, ance espaniol, como catalan, galego e euscara es reconoseda como coofisial en diversa comunias autonom, seguente la Leges de Autonomia.

Iaman

La Republica de Iaman (arabi: الجمهورية اليمنية), conoseda como Iaman (arabi: اليَمَن‎), es un pais en Asia sude-ueste.

Sua area es sirca 527 970 cilometres cuadrida e lo ia ave sirca 22 230 531 abitores en la anio 2007. La site capital es Sana. Sua tera inclui 200 isolas: la plu grande es Suqutra. Lo es la sola stato de la Penisola Arabi cual ave un sistem pur republican (ma no en la pratica).

En febrero e marto 2011, la revolta iamani de 2011 ia comensa contra la governa, e la scaramuxas con la polisia ia intensi.

Island

Island (islansce Ísland, /ˈistlant/) es un pais nordica en Europa norde, cual es un isola en la norde de la Mar Atlantica. Lo ave un area de sirca 103 000 cilometres cuadrida. La cuantia de abitores ia es plu ca 330 000 persones en 2016, tal ce lo es la pais la min densa poplada en Europa.

La governa es ”roja-verda”. La congresa es la Alþingi. La lingua major es islansce, un lingua norde germanica, o lingua nordica.

Island es locada en la norde de la Mar Atlantica, prosima a la Sirculo Artica. Jeografial, on regarda lo como un parte de Europa, ma jeolojial lo parteni a Europa e America.

Sua capital e site xef es Reykjavík, pronounsiada como Reiciavic. Sua nom sinifia aprosima ”baia de fuma”. Sirca 220 000 persones abita en Reykjavík e la area prosima. Otra sites importante es Akureyri, Reykjanesbær, Kópavogur e Hafnarfjörður.

En la tempo temprana de abita umana en Island, 25 % de la isola ia es covreda par forestas. Aora, sola 1 % de la area es foresta. Arbores nativa inclui betul, cual ia formi forestas en la pasada, e poplo tremante, sorbo, juniper, e otras como salses.

Cuasi tota de la eletrica de Island veni de recursos renovable.

Italia

Italia (ofisial Republica Italian, en italian: Repubblica Italiana) es un pais en Europa sude. En la norde el ave la Alpes, do borda con Frans, Suiz, Osteraic i Slovenia. La statos de San Marino e la Site Vatican es du enclaves en la teritorio italian. La site capital, e la site la plu grande, es Roma. Italia es 301,230 cilometres cuadrida e la cuantia de popla en 2016 ia es sirca 61 milion.

La ministro prima es Giuseppe Conte.

El es la pais tre en Europa par cuantia de turistes per anio.

Italia es un de la paises la plu industrial de la mundo e el es un pais developada con un cualia de vive alta.

Magiar

Magiar o Ungaria es un pais en Europa sentral. Lo covre un area de 93 030 cilometres cuadrida, situada en la Basin Panonia, es e bordada par Slovensco a la norde, Romania a la este, Serbia a la sude, Corvatsca a la sude-ueste, Slovenia a la ueste, Osteraic a la norde-ueste, e Ucraina a la norde-este. Con sirca 10 milion abitores, Magiar es un stato membro de grandia media de la Uni European. La lingua ofisial es magiar, cual es la lingua uralica la plu parlada de mundo. La capital e site la plu grande de Magiar es Budapest, un sentro economial major e clasida como un site major global.

Pos sentenios de abita par celtas, romans, slavicas ueste, gepidas e avaros, Magiar ia es fundida en la tarda de la sentenio 9 par Árpád, un prinse magiar, en la concista de la Basin Panonia. Sua duneto István 1 (Stefano 1) ia ateni la trono en 1000, convertinte la pais a un rena cristian. Ja en la sentenio 12, Magiar ia deveni un potiosa media en la mundo ueste, ateninte un eda oro en la sentenio 15. Pos la Batalia de Mohács en 1526 e sirca 150 anios de ocupa partal par la osmanianes (1541–1699), Magiar ia veni su la rena de Habsburg, e plu tarda lo ia formi la Impero Osteraic-Magiar con Osteraic.

La fronteras presente de Magiar ia es instituida en 1920. par la Trata de Trianon pos la Gera Mundal Prima, cuando la pais ia perde 71% de sua teritorio, 58% de sua popla e 32% de magiares etnical. Pos la periodo intergeral, Magiar ia junta se a la Potias de Ase en la Gera Mundal 2, sufrinte un cuantia notable de danas e moris. Magiar ia deveni un stato pupetin de la Uni Soviet, contribuinte a la institui de la republica sosialiste cual ia dura tra cuatro desenios (1947–89). La pais ia es internasional multe atendeda par causa de la Revolui de 1956 e la abri influosa de sua frontera restrinjeda con Osteraic en 1989, cual ia aselera la colasa de la Bloco Este. A 23 otobre 1989, Magiar ia deveni denova un republica parlamental democrata.

En la sentenio 21, Magiar es un potiosa media e ave la economia 57 de la plu grandes de mundo par produida interna bruta. Como un ator importante en alga campos de industria e tecnolojia, lo es la esportor 35 e la importor 34 de la plu grandes de mundo. Magiar ave un economia de revenu alta con un norma de vive multe alta. Lo manteni un sistem de suporta finansial, un sistem de aida medical universal, e un sistem de educa de universia sin costa.

Magiar ia junta se a la Uni European en 2004. e es un parte de la Area Schengen de 2007. Lo es un membro de la Nasiones Unida, OTAN, la Organiza Mundal de Comersia, la Banco Mundal, la Consilio de Europa e otras. Bon conoseda per sua istoria cultural rica, Magiar ia contribui major a artes, musica, leteratur, sportes, siensa e tecnolojia. Lo es la pais 11 de la plu populares en Europa como destina de turisme, atraente 14,3 milion turistes internasional en 2015. Lo conteni la sistem de cavas la plu grande de acua termal de mundo, la lago termal du de la plu grandes de mundo, la lago la plu grande en Europa sentral e la savana natural la plu grande en Europa.

Magrib

Magrib (ance nomida Maroco) es un pais en Africa.

Sua area es sirca 446 550 cilometres cuadrida. En la anio 2007, lo ia ave sirca 33 757 175 abitores. La site capital es Rabat. La linguas major es arabi, dialetos de berber, e franses.

Nederland

Nederland (Nederland [ˈneɪdərlɑnt] en nederlandes; Nederlân en frisce ueste; e Hulanda en papiamento) es un pais en Europa cual es parte de la Rena de Nederland (Koninkrijk der Nederlanden; "der" es gramatica vea per "van de" ("de la")). Nederland sinifia leteral "Tera Basa".

La area es sirca 41 848 cilometres cuadrida.

En la anio 2011 la pais ia ave sirca 16 660 700 abitores.

La site capital es Amsterdam (Holland-Norde), e la seja de la governa es Den Haag (Holland-Sude). La site tre es Rotterdam. (Holland-Sude).

Nion

Nion (o Japan) es un pais en Asia.

La area es sirca 377 835 cilometres cuadrida.

La cuantia de popla, en la anio 2015, es sirca 127 110 047 persones.

La site capital es Tocio.

La Ministro Prima de desembre 2012 es Sr Shinzo Abe (PLD). La Emperor de 2019 es Naruhito.

La lingua major es la lingua nion o japanes.

Nion es un pais isola en Asia este, a la lado este de Xina en la mar Pasifica. Nion es composada de cuatro isolas grande e un catena de otra isoletas. Los es culminas de montanias su acua. La terena es rocin, sola un oti es cultivable. La costa es longa e nonregulada, con multe baias refujidas. Nion no ave rios grande e la plu de sua lagones es en la montanias. La terenos plata situa en vales de montanias e la planos alta situa longo la costas. La montanias de Nion inclui multe volcanes ativa e nonativa. La punto la plu alta es la volcan dorminte Mount Fuji, alta a 3776 m. Tremas de tera es frecuente en Nion. Siclones sever aveni temprana en otobre. La recurso la plu importante es cultiva; la pais debe emporta tota sua minerales nesesada.

Romania

Romania es un pais en Europa sude-este. Lo borda la Mar Negra, Balgaria, Ucraina, Magiar, Serbia e Moldova. Lo ave un area de 238 397 cilometres cuadrida e un clima continental temperada. Con cuasi 20 milion abitores, la pais es la numero sete de la statos membros la plu poplada en la Uni European. Sua capital e site la plu grande, Bucuresti [bucurexti], es la site ses de la plu grandes en la UE, con 1 883 425 abitores en 2011.

La Rio Danubio, la rio du de la plu longas en Europa, fonti en Deutxland e flue en dirije jeneral sude-este tra 2857 km e des paises, ante emerji en un delta en Romania. La Montes Carpati, cual traversa Romania de la norde asta la sude-ueste, inclui Moldoveanu con altia de 2544 metres.

La Romania moderna ia es formida en 1859 par un uni personal de la Prinsipias Danubian de Moldavia e Walachia. La stato nova, ofisial nomida Romania de 1866, ia gania autonomia de la Impero Osmanian en 1877. A la fini de la Gera Mundal Prima, Transilvania, Bucovina e Besarabia is uni con la Rena de Romania. En la Gera Mundal Du, Romania ia es un aliada de Deutxland Nazi contra la Uni Soviet, bataliante a lado de la Wehrmacht asta 1944, cuando lo ia junta se a la potiosas Aliada e ia fronti ocupa par soldatos de la Armada Roja. Romania ia perde alga teritorios, de cual Transilvania Norde ia es reganiada pos la gera. Pos la gera, Romania ia deveni un republica sosialiste e membro de la Trata de Warszawa. Pos la Revolui de 1989, lo ia comensa un cambia en dirije a democratia e un economia de mercato capitaliste.

Romania es un pais developante e un de la plu povres en la Uni European, con grado 50 en la Indise de Developa Umana. Pos un crese rapida de economia en la temprana de la desenio de 2000, Romania ave un economia xef fundida sur servis, e es un produor e esportor de macinas e enerjia eletrical. Lo es un membro de OTAN de pos 2004, e un parte de la Uni European de pos 2007. Un majoria forte de la popla identifia se como cristianes ortodox este e parla romanian, un lingua romanica, como sua lingua propre. On refere frecuente a la istoria cultural de Romania en relata a artistes, musicistes, inventores e sportores influente.

Taiuan

Taiuan es un stato en Asia este. Lo es ance nomida la Republica de Xina, cual es un stato autonom, ma lo es reclamada par la Republica Poplal de Xina (o Xina propre), cual borda lo en la ueste. Nion borda lo en la norde-este, e la Pilipinas borda lo en la sude. Taiuan es la stato la plu poplada cual no es un membro de la Nasiones Unida e ave la economia la plu grande estra la NU. La cuantia de popla, en la anio 2007, es sirca 22 858 872 persones. La area es sirca 35 980 cilometres cuadrida. La site capital es Taipe. La linguas major es putong, min, e dialetos de haca.

Xciperia

Xciperia o Albania (ofisial la Republica de Xciperia) es un pais en Europa sude e sude-este. Lo covre 28 748 cilometres cuadrida e ia ave 3 milion abitores en 2016. Lo es un republica constitual parlamental unial, con capital en Tirana, la site la plu poplada de la pais e sua sentro xef de economia e comersia.

Xciperia ocupa la parte sude-ueste de la Penisola Balcan, bordada par Tsernagora a la norde-ueste, Cosovo a la norde-este, Macedonia a la este, e Elas a la sude e sude-este. La tereno es notable diversa, con la Alpes Xcip en la norde, la Montes Corab en la este, la Montes Ceraun en la sude e la Montes Skanderberg en la sentro. Lo ave un costa a la norde de la Mar Mediteraneo, la Mar Adriatica a la ueste e la Mar Ionio a la sude-ueste, forminte la Riviera Xcip. Xciperia es a min ca 72 cilometres de Italia a traversa de la Streta Otranto, cual lia la Mar Adriatica a la Mar Ionica.

En la eda clasica, Xciperia ia es abitada par tribus antica diversa de Iliria, Tracia e Elas, e ance par alga colonias elinica instituida en Iliria. En la sentenio tre aec, la rejion ia es prendeda par Roma e ia deveni un parte de la provinses roman Dalmasia, Macedonia e Mesia Superior. La Prinsia de Arbër ia emerji unida en 1190, instituida par arconte Progon en la Krujë, en la Impero Bizantian. En la tarda de la sentenio 12, Charles de Anjou ia concista la teritorios xcip de la bizantianes e ia institui la Rena de Albania medieval, estendente de Durrës longo la costa asta Butrint en la sude. Esta rena ia cade en la media de la sentenio 15 su domina osmanian.

Xciperia ia emerji como pais moderna en 1912, pos la colasa de la Impero Osmanian e la Geras Balcan. La Rena de Xcip ia es invadeda par Italia en 1939, forminte Albania Grande, ante deveni un protejeda de Deutxland Nazi en 1943. En la anio seguente, un republica poplal sosialiste ia emerji su la gida de Enver Hoxha e la Partito de Labora. La pais ia esperia cambias sosial e political vasta en la eda comuniste, e ia deveni ance isolida de multe de la comunia internasional. Pos la revoluis de 1991, on ia disolve la republica sosialiste e ia institui la Republica cuatro de Xcip.

Xciperia es un pais democrata e developante con un economia de revenu alta-media. La campo de servis domina la economia, segueda par la campos industrial e cultival. Pos la colasa de comunisme en 1990, Xciperia ia cambia de un economia sentrida a un economia de mercato. Lo ave un grado alta en la Indise de Developa Umana e es la numero 37 en la mundo per espeta de vive. Lo furni aida medical universal e educas prima e liseal a sua sitadanes. Lo es un membro de la Nasiones Unida, la Banco Mundal, UNESCO, OTAN, la Organiza Mundal de Comersia, la Consilio de Europa, la Organiza per Securia e Coopera en Europa, e la Organiza de Coopera Muslim. Lo es ance un aspiror ofisial per parteni a la Uni European. Lo es un de la membros fundinte de la Comunia de Enerjia.

La lingua major es xcip.

Siensa
Siensas naturalAstronomiaBiolojiaCimicaClimatolojiaEcolojiaFisicaJeneticaJeolojiaMatematicaMedicaPaleontolojiaPrirodneNauke
Siensas umana AntropolojiaArceolojia • Economia • FilosofiaIstoriaJeografiaLegeLinguisticaPoliticaPsicolojiaSosiolojia
Filosofia de siensa • Istoria de siensa

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.