Cultur de tumulos

La cultur de tumulos (deutx:Hügelgräberkultur) ia domina Europa sentral en la eda de bronze media (sirca 1600 a 1200 aec). Lo ia es la desendente de la cultur Unetice, e inclui la area de sua asendente, plu Baiern e Wurttemberg. Lo ia es segueda par la cultur de campos de vaso (deutx: Urnfeld) de la eda de bronze tarde.

Como la nom sujeste, la cultur de tumulos es distinguida par la abitua de entera la mor su tumulos (acc curganes). La cultur ia es un sosia de gerores cual ia estende con xefias nova a este a la basin de la Carpates (asta la Rio Tisza) e norde a Polsca e la teritorios de la cultur Unetice, con colonias srerdeda sentrida en strutures fortida.

Zuse Museum Huenfeld Maedchen von Molzbach Lebensbild 2017
Un reconstrui de un fem de Molzbach (en Hesse, Deutxland) de la cultur de tumulos
Cultur Unetice

La cultur Unetice (pronunsiada unetitse; de txesce) es un cultur arceolojial de la comensa de la Eda de Bronze de Europa sentra, de sirca 2300 a 1600 aec. La nom deriva de un vila locada en Txesco sentral, norde-ueste de Praha. La cultur ave sirca 1400 locas en Txesco e Slovensco, 550 en Polsca, e 500 en Deutxland. La cultur es ance trovada en Osteraic norde-este e Ucraina ueste. Lo ia es presededa par la cultur de vasos campanin e segueda par la cultur de tumulos.

Resente, la cultur Unetice es nomida un fenomeno cultural "pan-european", pd un cultur cual ia influe areas grande par intercambia intensa, con vasos e otra fabricadas de bronze trovada en Er, Scandinavia, Italia, e la Balcanes. En esta modo, la cultur lia un continua de ja sperdeda linguas indo-european norde-ueste, asendente a la linguas italica, celtica, germanica, e posible balto-slavica, con parolas frecuente intercambiada e un vocabula comun e alga isoglosas compartida.

La cultur Unetice es distinguida par sua ojetos metal tipal, incluinte torces, axas plata, dagas plata triangulo, braseletas con finis spiral, spinos con testas remin, e anelos risa, cual ia es distribuida tra un area vasta de Europa sentral e a ultra.

La casas ia es construida de lenio, con un teto frontonida, de un desinia retangulo con un entra a la lado ueste. La tetos ia es construida de palia e otra materias de plantas, furninte insuli termal e proteje contra la pluve. Car palia es plu lejera, min lenio ia es nesesada en la strutur de la testo per suporta lo. La mures ia es construida con vim e fango, un grilia entretexeda de bandas de lenio e covreda con un misca de arjila, arena, feces de animales, e palia. Mures interna ia es construida sola con la grilia de bandas de lenio.

Un cosa spesial asosiada con la vilas de la cultur Unetice es cavetas per reservas. Los ia es locada su la casas, e ia es profonda e spasiosa, con un colo silindre o poca cono, mures arcida, e un fonda relativa plata. Estas ia es comun usada como granerias.

La majoria de abitadas es composada de alga casas congregada en la spasio comunial de la vila o vileta. Vilas plu grande e fortida, con murones e fortresas de lenio, ia es ance trovada.

Cultur de campos de vasos

La cultur de campos de vasos (sirca 1300 a 750 aec) ia es un cultur de Europa sentra de la eda de bronze tarde. La nom deriva de la costum de seni la mor e pone sua senes en vasos cual ia es alora enterada en la campos. Tra multe partes de Europa, la cultur ia segue la cultur de tumulos e ia es segueda par la cultur Hallstatt. Lo es posible ce la popla de esta cultur ia parla un forma temprana de celta, posible la orijinal proto-celta.

La cuantia de vilas ia crese rapida, comparada con la cultur de tumulos presedente, an si poca ia es escavada completa. Vilas fortida, comun sur colinas o en curvas de rios, es tipal. Los es fortida par murones de petra o lenio. Escavas de vilas abrida es rara, ma los mostra ce casa grande con tre o cuatro coredores, construida sur postos de lenio e un mur de vim e arjila, es comun. casas partal sutera es trovada ance; los ia es posible usada per reserva furnis. A lagos de Deutxland sude e Suiz, multe abitadas sur palos ia es construida. Los es composada de casas simple de un sala de vim e arila, o construida de troncos.

La periodo de la cultur temprana (sirca 1300 aec) ia es un eda cuando la gerores de eruopa sentral ia es armurida pesosa, con elmos e scermos de bronze, e spadas formida como folias longa.

Europa preistorial

Europa preistorial ia estende de la comensa de la eda paleolitica asta la eda istorial, o de sirca 1800 mil anios ante aora asta la sentenios final aec. De la paleolitica temprana a la media de la paleolitica tarda (sirca 18 mil aec), Europa ia es poplada par Homo erectus e Homo neanderthalensis. En la paleolitica tarda e la mesolitica (41 mil aec asta 4 mil aec), Europa ia ave ance xasores-coliores de Homo sapiens. En la eda glasial la plu resente, multe partes de Europa ia es despoplada e alora, sirca 13 mil aec, ia es repoplada. La eda neolitica ia comensa sirca 7 mil aec en Europa sude-este, e ia estende a Europa norde sirca 5.5 mil aec, cuando la eda de cupre ia comensa.

La eda de bronze ia comensa sirca 3200 aec en Elas. La eda de fero ia comensa sirca 1200 aec e ia estende a Europa norde sirca 500 aec, cuando Europa ia ateni la periodo istorial. Alfabetisme ia veni a Europa sirca la sentenio oto aec a la costa mediteranean, ma multe areas de Europa norde e este ia resta preistorial asta tan tarda como la eda media.

Preistoria de la popla PIE (Teoria Balcan)

Esta article descrive la preistoria de la popla PIE de la vista de la Teoria Balcan. (Per discutes sur la preistoria de la popla PIE (Teoria Curgan) o la preistoria de la popla PIE (Teoria Anatolian), per favore vade ala.)

La poplas "pre-PIE" (pre-proto-indo-european) ia parla un varia de dialetos, prima en la refujia de la Balcanes. Pos la fini de la eda glasial, los ia estende se a la norde, ueste, e este, probable seguente la animales migrante. La cuantia de popla ia es poca e sperdeda tra la taiga, e la cultures ia es xasores-coliores de la tipos de la paleolitica.

A la mesma tempo, popla de la area de Frans sude e Espania norde (pd la Montes Pirineo) estende se ance, per la plu parte a Frans norde, Beljia, e Britan. Lo es posible ce los ia parla un colie de linguas relatada a un asendente distante de Euscara.

E en la este, en Rusia, xef a ueste de la Urales, la popla ci ta deveni la asendentes de la parlores de la linguas uralica ia estende a la norde, ueste, e este, a Scandinavia, la area de la Mar Baltica, Rusia norde, Bielarus, e ance a Sibir ueste, Cazacstan, e Ucraina este.

Colonistes de Anatolia ia porta la tecnolojia de cultiva a la area cual es aora Elas, do los fundi la cultures Cultur Sesclo, Cultur Dimini, etc, sirca 7000 aec. Los ia es probable relatada a la popla de la Mar Ejeo, ci ta deveni la minoanes de Criti. Otra colonistes ia ariva ance, de un loca en la Levante, a la costa de Iliria (aora Xciperia), e posible a la partes sude de Italia, portante un otra cultur cultivante, la cultur de vasos cardian.

De la cultivores en Elas norde-este, la xasores-coliores pre-PIE en Balgaria e partes de Romania (longo la Danubio basa) ia aprende la siensa de cultiva e ia comensa crese rapida como la "cultur prima de la neolitica temperada". Parlante alga de la dialetos pre-PIE, los ta deveni la fundores de un popla PIE "nova", la asendente plu direta de la linguas indo-european moderna.

La cultur de esta popla PIE ia estende a ueste e este. En la ueste, lo ia segue la Danubio a la rejion cual es aora Magiar e ultra lo a Txesco, Slovensco, Osteraic e Deutxland, un area cual es ja abitada par sua relatas distante de xasores-coliores.

La popla cual ia migra a la este ia segue la costa norde de la Mar Negra, traversa la stepes de Ucraina, e move longo la Rios Dnistr, Bug, Dnepr, e Donets. Los ance ia asorbe sua relatas xasor-colior ja en la Ucraina e ia aprende un otra stilo de vive de los.

Car la cultivores de la Balcanes ia parla un colie de dialetos de PIE cual ia es adotada par la xasores-coliores ja en la areas a cual la cultivores migra, la "suprastrato" no es tro distante de la "sustrato", cual esplica la asentia de indicas forte de sustratos non-PIE en multe de la desendentes de PIE. Cuando los ia estende a areas ja abitada par la popla atlantica, uralica, e (plu tarde) otras, influes de sustratos deveni plu clar.

En la Balcanes, do la cultures orijinal de PIE - la Starcevo-Koros-Cris en la ueste de 7000 aec e la Karanovo a la este de 6000 aec - ia domina, otra grupos e cultures ia developa. Plu tarde, cultures como la Vinča-Turdas (5700 a 4500 aec) en lo cual es aora Serbia, e la Hamangia (5200 a 4500 aec) longo la costa balcan de la Mar Negra, ia developa.

Plu tarde, cuatro etnicos - la dacianes a la norde, la tracianes a la este, la ilirianes a la ueste, e la proto-elinicas a la sude (Macedonia e Elas norde) - ia continua crese. Pos 2000 aec, la elinicas ta entra Elas sude e ia prende controla de la penisola intera, la costa ueste de Anatolia, e la isolas de la Ejean, deslocante o asorbente la poplas ejean, incluinte la minoanes (e ance adotante alga de sua cultures).

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.