Cultur de campos de vasos

La cultur de campos de vasos (sirca 1300 a 750 aec) ia es un cultur de Europa sentra de la eda de bronze tarde. La nom deriva de la costum de seni la mor e pone sua senes en vasos cual ia es alora enterada en la campos. Tra multe partes de Europa, la cultur ia segue la cultur de tumulos e ia es segueda par la cultur Hallstatt. Lo es posible ce la popla de esta cultur ia parla un forma temprana de celta, posible la orijinal proto-celta.

La cuantia de vilas ia crese rapida, comparada con la cultur de tumulos presedente, an si poca ia es escavada completa. Vilas fortida, comun sur colinas o en curvas de rios, es tipal. Los es fortida par murones de petra o lenio. Escavas de vilas abrida es rara, ma los mostra ce casa grande con tre o cuatro coredores, construida sur postos de lenio e un mur de vim e arjila, es comun. casas partal sutera es trovada ance; los ia es posible usada per reserva furnis. A lagos de Deutxland sude e Suiz, multe abitadas sur palos ia es construida. Los es composada de casas simple de un sala de vim e arila, o construida de troncos.

La periodo de la cultur temprana (sirca 1300 aec) ia es un eda cuando la gerores de eruopa sentral ia es armurida pesosa, con elmos e scermos de bronze, e spadas formida como folias longa.

Europe late bronze age
Un mapa de Europa en la eda de bronze tarde, con la cultur de campos de vasos en mostarda
Burgstallkogel Sulm valley
La loca de un fortres a un colina en Burgstallkogel
Pfahlbauten Bodensee -- Steinzeitdorf (7644121684)
Reconstrui de un vila sur pilos a Unteruhldingen a la Lago Bodensee
Urnfield culture 001
Vasos funeral de la cultur, de Marburg, Deutxland

Entera

La grandia de la campos ia varia. En Baiern, los ia conteni sentos de enteras, en cuando la semetero plu grande en Baden-Wurttemberg en Dautmergen ia ave sola 30 enteras. La mor ia es poneda sur piras, covreda con sua joalas personal, cual comun mostra trasas de la foco e a veses la ofres de comedas.

La osos de la seni pote es poneda en caveta simple. A veses, la cuantia de osos indica un contenador de material organica, e a otra veses, la oso ia es simple sperdeda.

Si la osos ia es poneda en vasos, estas ia es tipal covreda par un bol basa o un petra. En un tipo spesial de entera (la enteras campanin) la vasos ia es tota covreda par un vaso plu grande inversada. Sirca 12 enteras inclui vagones de cuatro rotas con partes de bronze.

Economia

Boves, porcos, oveas, e capras ia es elevada en la periodo de campos de vasos, e ance cavalos, canes, e gansos. La boves ia es alga peti, con un altia de 1.2 m a la crus. Cavalos no es multe plu grande ca un promedia de 1.25 m.

Desforesti ia es intensa en la periodo de la campos de vasos. Probable, prados abrida ia es creada per la ves prima, a esta tempo, seguente analise de polen.

Trigo e orzo ia es cultivada, con legumes e la fava de visia. Semes de la papavera ia es usada per olio o como un medisin. Milio e avena ia es cultivada per la ves prima en Magiar e Boemia, segal ia es cultivada ja, ma plu ueste, lo ia es videda sola como un malerba. Lino pare es de importa reduida, posible car lana ia es usada per vestes. Nozetas, pomas, peras, prunas (de la pruno spinosa), e cuercas ia es colieda. Alga enteras rica ia conteni tamis de bronze cual ia es probable usada per vin.

Cultur Hallstatt

La cultur Hallstatt ia es la cultur major de Europa ueste e sentral de la eda de bronze tarde de 1200 a 800 aec, en cuando lo es un parte de la cultur de campos de vasos, e de la eda de fero temprana de la sentenios 800 a 450 aec, la cultur Hallstatt plu esata. Lo es segueda par la cultur La Tene. Lo es comun asosiada con popla proto-celta e celt en la ueste, e con ilirianes en la este.

La cultur es nomida per sua loca de tipo a Hallstatt, un vileta a lado de un lago sude-este de Salzburg en Osteraic, a do on ave un mina rica per sal e alga 1300 enteras con multe fabricadas eselente.

Per la sentenio ses aec, lo ia estende per inclui teritorios vasta, con du zonas, este e ueste, covrente la plu parte de Europa ueste e sentral a sude a la Alpes, e estendente en Italia norde. Partes de Britan e Iberia ia es incluida en la estende ultima de la cultur.

La cultur ia es fundida sur cultiva, ma fabrica de metal ia es multe avansada, e par la fini de la periodo, intercambia entre la area e la cultures mediteranean ia es economial importante. Distinguis sosial ia deveni plu importante, con clases elite de xefes e gerores e posible los con otra capasias. Sosia ia es organizada sur un funda tribal. Ma sola un poca de vilas grande, como Heuneburg en Deutxland sude, ia es vera vilas e no viletas par la espetas moderne.

La vilas ia es tipal fortida, situada sur colinas, e comun incluinte la fabricerias de bronzores, arjentores, e orores. La enteras de a elite ia es tumulos con un sala, grande en alga casos, foreda con lenio e con la corpo e la benes funeral ordinada sirca la sala. On ave alga enteras cual inclui carones. Alga vagones funeral, probable usada per porta la corpo a la tumulo, es ance enterada. Seramicas, vasos e armas de bronze, e joalas de oro es ance trovada a tal enteras.

La cultur material ia es sufisinte per dona un economia stable. Comersia con la colonias elinica e la cultur de laEtruscas ia causa cambias sosial e cultural en la locas norde de la Alpes. Xefes potiosa ia emerje ci ia controla la redistribui de benes lusosa de la mundo mediteranean, cual deveni un cualia de la cultur de la Tene. Spadas de fero ia apare en periodos plu tarde, de la sentenio oto, con utiles veninte plu tarde. Orijinal, fero ia es cara e ia es usada como un material prestijosa per joalas. E la rota de la vasor apare a la fini de la periodo.

Europa preistorial

Europa preistorial ia estende de la comensa de la eda paleolitica asta la eda istorial, o de sirca 1800 mil anios ante aora asta la sentenios final aec. De la paleolitica temprana a la media de la paleolitica tarda (sirca 18 mil aec), Europa ia es poplada par Homo erectus e Homo neanderthalensis. En la paleolitica tarda e la mesolitica (41 mil aec asta 4 mil aec), Europa ia ave ance xasores-coliores de Homo sapiens. En la eda glasial la plu resente, multe partes de Europa ia es despoplada e alora, sirca 13 mil aec, ia es repoplada. La eda neolitica ia comensa sirca 7 mil aec en Europa sude-este, e ia estende a Europa norde sirca 5.5 mil aec, cuando la eda de cupre ia comensa.

La eda de bronze ia comensa sirca 3200 aec en Elas. La eda de fero ia comensa sirca 1200 aec e ia estende a Europa norde sirca 500 aec, cuando Europa ia ateni la periodo istorial. Alfabetisme ia veni a Europa sirca la sentenio oto aec a la costa mediteranean, ma multe areas de Europa norde e este ia resta preistorial asta tan tarda como la eda media.

Preistoria de la popla PIE (Teoria Balcan)

Esta article descrive la preistoria de la popla PIE de la vista de la Teoria Balcan. (Per discutes sur la preistoria de la popla PIE (Teoria Curgan) o la preistoria de la popla PIE (Teoria Anatolian), per favore vade ala.)

La poplas "pre-PIE" (pre-proto-indo-european) ia parla un varia de dialetos, prima en la refujia de la Balcanes. Pos la fini de la eda glasial, los ia estende se a la norde, ueste, e este, probable seguente la animales migrante. La cuantia de popla ia es poca e sperdeda tra la taiga, e la cultures ia es xasores-coliores de la tipos de la paleolitica.

A la mesma tempo, popla de la area de Frans sude e Espania norde (pd la Montes Pirineo) estende se ance, per la plu parte a Frans norde, Beljia, e Britan. Lo es posible ce los ia parla un colie de linguas relatada a un asendente distante de Euscara.

E en la este, en Rusia, xef a ueste de la Urales, la popla ci ta deveni la asendentes de la parlores de la linguas uralica ia estende a la norde, ueste, e este, a Scandinavia, la area de la Mar Baltica, Rusia norde, Bielarus, e ance a Sibir ueste, Cazacstan, e Ucraina este.

Colonistes de Anatolia ia porta la tecnolojia de cultiva a la area cual es aora Elas, do los fundi la cultures Cultur Sesclo, Cultur Dimini, etc, sirca 7000 aec. Los ia es probable relatada a la popla de la Mar Ejeo, ci ta deveni la minoanes de Criti. Otra colonistes ia ariva ance, de un loca en la Levante, a la costa de Iliria (aora Xciperia), e posible a la partes sude de Italia, portante un otra cultur cultivante, la cultur de vasos cardian.

De la cultivores en Elas norde-este, la xasores-coliores pre-PIE en Balgaria e partes de Romania (longo la Danubio basa) ia aprende la siensa de cultiva e ia comensa crese rapida como la "cultur prima de la neolitica temperada". Parlante alga de la dialetos pre-PIE, los ta deveni la fundores de un popla PIE "nova", la asendente plu direta de la linguas indo-european moderna.

La cultur de esta popla PIE ia estende a ueste e este. En la ueste, lo ia segue la Danubio a la rejion cual es aora Magiar e ultra lo a Txesco, Slovensco, Osteraic e Deutxland, un area cual es ja abitada par sua relatas distante de xasores-coliores.

La popla cual ia migra a la este ia segue la costa norde de la Mar Negra, traversa la stepes de Ucraina, e move longo la Rios Dnistr, Bug, Dnepr, e Donets. Los ance ia asorbe sua relatas xasor-colior ja en la Ucraina e ia aprende un otra stilo de vive de los.

Car la cultivores de la Balcanes ia parla un colie de dialetos de PIE cual ia es adotada par la xasores-coliores ja en la areas a cual la cultivores migra, la "suprastrato" no es tro distante de la "sustrato", cual esplica la asentia de indicas forte de sustratos non-PIE en multe de la desendentes de PIE. Cuando los ia estende a areas ja abitada par la popla atlantica, uralica, e (plu tarde) otras, influes de sustratos deveni plu clar.

En la Balcanes, do la cultures orijinal de PIE - la Starcevo-Koros-Cris en la ueste de 7000 aec e la Karanovo a la este de 6000 aec - ia domina, otra grupos e cultures ia developa. Plu tarde, cultures como la Vinča-Turdas (5700 a 4500 aec) en lo cual es aora Serbia, e la Hamangia (5200 a 4500 aec) longo la costa balcan de la Mar Negra, ia developa.

Plu tarde, cuatro etnicos - la dacianes a la norde, la tracianes a la este, la ilirianes a la ueste, e la proto-elinicas a la sude (Macedonia e Elas norde) - ia continua crese. Pos 2000 aec, la elinicas ta entra Elas sude e ia prende controla de la penisola intera, la costa ueste de Anatolia, e la isolas de la Ejean, deslocante o asorbente la poplas ejean, incluinte la minoanes (e ance adotante alga de sua cultures).

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.