Cristoforo Colombo

Cristoforo Colombo (agosto o otobre 1451 – 20 Maio 1506) ia nase en Jenoa, Italia. El ia es un navigor e esploror ci ia es importante per la coloni de la Americas par Espania. El no ia es la descovror prima de la Americas de Europa (la vicinges, conduida par Leif Ericsson, ia veni a Canada sirca 1000 ec). Ma la viajas de Colombo ia inisia la conose de la "mundo nova" e la comensa de la coloni de America par la europeanes.

El ia atera a un isola de la Bahamas en 1492. Car el ia atenta trova un via a India, el ia refere a la nativas como "indianes", un nom usada comun oji per la americanes orijinal. El ia trova la continente de America en sua viaja tre en 1498.

Columbus-Standbild an der Kornhausbrücke (Hamburg)

Biografia

Vive temprana

La nom Cristoforo Colombo es la elefeni de la latina Christophorus Columbus. Sua nom en italian es Cristoforo Colombo e, en espaniol, Cristóbal Colón. On crede ce el ia nase ante la 31 otobre 1451 en la Republica de Genoa, ma la loca resta disputada. Sua padre ia es Domenico Colombo, un texor de lana ci ia labora en Genova e Savona e sua madre ia es Susanna Fontanarossa. Bartolomeo, Giovanni Pellegrino e Giacomo ia es sua frates. El ia ave un sore nomida Bianchinetta.

Aiti

Aiti, ofisial la Republica de Aiti (franses: République d'Haïti, creol aitian: Repiblik Ayiti) es un pais locida en la isola de Ispaniola en la Antilies en la Mar Caribe. Lo ave un tri de la isola, cual comparte con la Republica Dominican. La area es sirca 27 750 cilometres cuadrida e la cuantia de popla, en la anio 2007, ia es sirca 8 706 497 persones. La site capital es Port-au-Prince e la linguas major es franses e creol aitian.

America Sentral

America Sentral (en espaniol: América Central o Centroamérica) es un istmo e la parte de America Norde la plu sude. Lo es juntada a America Sude en la sude-este. America Sentral es bordada par Mexico en la norde, Colombia en la sude-este, la Mar Caribe en la este e la Mar Pacifica en la ueste. America Sentral es composada de sete paises: Beliz, Costa Rica, Salvador, Guatemala, Onduras, Nicaragua e Panama. La cuantia de abitores de America Sentral es entre 41 739 000 (la estima de 2009) e 42 688 190 (la estima de 2012).

America Sentral es un parte de la punto calda mesoamerican de biodiversia cual estende entre Guatemala norde e Panama sentral. Par causa de alga falias ativa e la arco volcanal de America Sentral, la rejion es sismica multe ativa. Erutas volcanal e tremateras aveni frecuente; esta desastres natural ia resulta la perde de multe vives e propria.

Americanes orijinal

La popla orijinal de la Americas es los ci ia abita en esta continentes ante la ariva de la esplorores european, e la desendentes de los. Los es ance nomida americanes nativa, nasiones prima e indianes american.

Seguente la model comun de migra a la Americas, la via la plu importante ia es Beringia, un ponte de tera cual, en la pasada, ia junta Asia e America tra la area cual es aora la Streta Bering. Esta migra ia aveni a minima 12 000 anios ante oji, ma on no conose la tempo plu antica. Alga siensistes crede ce persones de Europa o Australia ia ariva plu temprana. Seguente la americanes orijinal, los ia abita en America de la comensa de sua esiste.

La nom "indian" ia es un inventa de Cristoforo Colombo, ci ia crede ce el ia ariva a la Isolas de Indonesia (la Indias Este). La idea ce la americanes orijinal es un popla simple no es coreta, e los regarda se como poplas diversa.

Alga de la americanes orijinal ia es xasores e coliores; multe ia es cultivores. Los ia developa multe plantas cultival cual nos usa aora tra la mundo, e ia doma animales aora internasional domada. La sosias de la americanes orijinal ia varia entre poca grupos familial, tribus de cultivores con xefes e armadas, e imperos grande como la Maia, la Asteca, e la Inca.

Antigua e Barbuda

Antigua e Barbuda es un pais locada entre la Mar Caribe e la Mar Atlantica. Lo es formida par du isolas xef: Antigua e Barbuda, e otra isolas plu peti (incluinte la isolas de Great Bird, Green, Guinea, Long, Maiden e York e, plu sude, la isola de Redonda). La area es sirca 442,6 cilometres cuadrida e la capital es Saint John's, locada en la isola de Antigua.

La cuantia de abitores, en la anio 2007, ia es sirca 69 481 persones.

Antiles Nederlandes

La Antiles Nederlandes, conoseda en la pasada como La Indias Ueste de Nederland, inclui tre isolas en la Mar Caribe: Bonair, prosima a la costa de Venezuela, e San Eustasio e Saba, a sude-este de la Isolas Virjin. La isolas es un parte autonomial de Nederland. La economia de la isolas es xef fundida en turisme e petrolio.

En la pasada, la Antiles Nederlandes ia inclui ance Curasau, Aruba, e San Marten. Los es aora nasiones nondependente, ma es ancora incluida en la Rena de Nederland.

Asia

Asia es la continente entre la Mar Mediteraneo, la Mar Negra e la Montes Ural a la ueste, la Mar Pasifica a la este, la Mar Artica a la norde, e la Mar Indian a la sude. Asia e Europa es frecuente regardada como un sola continente, Eurasia, e lo comparti la tera continental de Afroeurasia con Europa e Africa. 3720 milion persones abita en Asia, la cuantia de abitores la plu grande en la mundo. La area de Asia es sirca 43,4m km², sirca 30% de la tera e 8.7% de la surfas intera de la Tera. La continente, cual ia es longa la casa de la majoria de la popla umana, ia es la loca de multe de la sivilias prima. Asia es notable per no sola sua grandia e cuantia grande de abitores, ma ance per sua abitadas densa e grande, e per sua rejions vasta con poca abitores en la continente con 4.4 bilion abitores.

Esta continente conteni multe grupos de cultures e linguas, incluinte farsi, arabi, turces, xines, hindi, corean, japanes, viet, e indonesian. Xina e India ia alterna como la economias la plu grande en la mundo entre 1 e 1800 ec. Xina ia es un potia economial major e ia atrae multe persones a la este. Per multe persones, la ricia lejendal de la cultur antica de India ia personi Asia; lo ia atrae comersia, esplora e colonialisme european. La discovre asidental de America par Cristoforo Colombo en cuando el ia xerca per India mostra esta fasina profonda. La Via de Seda ia deveni la via de comersia este-ueste xef en la interna de Asia en cuanto la Streta Malaka ia es la via maral xef.

Car Asia es multe grande, on pote ance considera suareas: Asia norde (Sibir), Asia este, Asia sude-este, Asia sude, Asia sude-ueste, e Asia sentral.

Beliz

Beliz (en engles Belize, en creol belizean Bileez, en espaniol Belice) ante Onduras brites, es un pais nondependente en la costa este de America Sentral. Lo ave fronteras a norde con Mexico, a ueste e sude con Guatemala e a este con la Mar Caribe. Sua area es 290 cilometres longa e 110 cilometres larga. La site capital es Belmopan.

La area es sirca 22 966 cilometres cuadrida e la cuantia de abitores, en la anio 2007, ia es sirca 294 385 persones. Sua densia de popla es la plu basa de America Sentral. La taso de crese es de 1,87% per anio (2015), la du plu alta en la rejion e un de la plu alta en la emisfera ueste.

La sivilia maia ia estende a la area de Beliz entre 1500 aec e 300 ec e ia flori asta 1200. Campanias de esplora european ia comensa en 1502 cuando Cristoforo Colombo ia naviga longo la Golfo Onduras. Colonias european ia comensa con la colonistes engles en 1638. Esta periodo ia es ance marcada par reclamas sur la area de Espania e Britan asta ce Britan ia vinse Espania en la batalia de la caio San Jorjio (1789) Lo ia deveni un colonia brites en 1840, conoseda como Onduras Brites, e un colonia de la Corona en 1862. La pais ia ateni nondepende de Rena Unida en 21 setembre 1981.

Beliz ave un sosia diversa cual es composada de multe cultures e linguas cual refleta sua istoria rica. Engles es la lingua ofisial de Beliz, en cuando creol belizan es la lingua nasional la plu parlada (32.9%), esente lingua prima de plu ca un tri de la abitores. Plu ca la dui de la popla es multilingual e espaniol es la lingua du la plu parlada (46%). Otra linguas parlada es maia (8.9%), garifuna (3.4%) e deutx 3.3%. La pais es conoseda par sua Selebras de Setembre e sua parador de coral.

La abunda de spesies teran e maral e sua diversia de ecosistemes fa ce Beliz ave un loca xef en la Coredor Biolojial Mesoamerican. Lo es considerada un nasion caribe e de America Sentral. Lo es membro de la Comunia Caribe (CARICOM), la Comunia de Statos Latina e CAribe (CELAC) e la Sistem de Integra de America Sentral (SICA), esente la sola pais membro en la tre organizas rejional. Beliz es parte de la Comunia de Nasiones e la rea Elizabeth 2 es sua monarca e xef de stato.

Dominica

Dominica (en engles: Dominica /ˌdɒmɪˈniːkə/; en franses: Dominique; en caribe: Wai‘tu kubuli), nomida ofisial la Comunia de Dominica (en engles: Commonwealth of Dominica; en franses: Commonwealth de la Dominique) es un pais en la Mar Caribe. La site capital, Roseau, es en la lado suventa de la isola. La isola es a la sude-sude-este de Guadelupe e a la norde-ueste de Martinic. La area de la pais es sirca 754 cilometres cuadrida. La punto la plu alta en la pais, Morne Diablotins, ave 1 447 metres de altia. La cuantia de abitores, en la anio 2014, ia es sirca 72 301 persones. La linguas major es engles e un dialeto de franses.

La isola ia es abitada prima par la Calinago, e plu tarda lo ia es coloni par europeanes, xef par la franses de la desenio de 1690. Los ia arivada a un ves cual ia es longa pos Cristoforo Colombo ia pasa la isola en soldi, 3 novembre 1493; la nom nativa de la isola es derivada de la parola latina per "soldi". La Rena de Britan ia prende controla de la isola en 1793, pos la Gera de Sete Anios, e institui gradal engles como la lingua ofisial. La isola ia autonomi como un republica en 1978.

Dominica ia es nometida la "Isola de Natur de la Caribe" per sua ambiente natural. Lo es la isola la min vea de la Antiles Minor. Lo ia es formida par ata jeotermal volcanal, como mostrada par la fonte calda la du de la plu grande en la mundo, Lago Boiling. La isola ave forestas pluvosa montaniosa, e es la casa de multe animales e plantas rara, e multe spesies de avias. Alga de la rejiones costal ave areas multe seca, ma areas interna ave multe pluve. La papagaio imperal, cual on pote trova sola en la isola de Dominica, es la avia nasional de la isola e apare sur la bandera nasional. La economia de Dominica depende sur turisme e cultiva.

Espania

Espania (España en espaniol), ance nomida Rena de Espania, (Reino de España) es un pais autonom e membro de la Uni European, constituida en un stato sosial e democrata de cual sua forma de governa es la monarcia parlamental. Sua teritorio es organizada en des-sete comunias autonom e du sites autonom, en ajunta a sincodes provinses. Sua capital es la site Madrid.

Esta pais es situada en Europa Ueste e en Africa Norde. En Europa lo ocupa la plu de la penisola iberian (conoseda como Espania penisolal) e la arcipelago de la isolas Baleare (en la Mar Mediteraneo ueste); en Africa es la sites Ceuta e Melilla, la isolas Canario (en la Mar Atlantica norde-este), la Isolas Txafarina (Mar Mediteraneo), la Roca de Vélez de Gomera (Mar Mediteraneo), la Isolas Alhucema (golfo de la Isolas Alhucema) e la Isola de Alboran (Mar de Alboran). La munisipa de Llivia en la Pirineos constitui un enclave ensircada par Frans. Un serie de isolas e isoletas completi la colie a lado de la costas penisolal.

La area es sirca 504 782 cilometres cuadrida, e la pais es la numero cuatro de la plu grandes de la continente, pos Rusia, Ucraina e Frans. Con un altia media de 650 metres, lo es un de la paises la plu montaniosa de Europa. La cuantia de abitores, en la anio 2015, ia es sirca 46 439 864 persones. La teritorio penisolal ave fronteras con Frans e Andora en la norde, con Portugal en la ueste e con Jibraltar en la sude. En sua teritorios african Espania ave fronteras con Maroco. Lo divide con Frans la domina de la isola de la Fasianes en la boca de la rio Bidasoa.

Seguente la constitui espaniol, castelian o espaniol es la lingua ofisial de la stato, e tota la espanioles ave la debe de conose lo e la direto de usa lo. En 2006, lo ia es la lingua madral de la 89% de la espanioles. Otra linguas, ance espaniol, como catalan, galego e euscara es reconoseda como coofisial en diversa comunias autonom, seguente la Leges de Autonomia.

Filosofia de la renase

Pos la eda medieval, la situa en Europa ia deveni plu bon: la economia ia boni; on ave un reveni a construi, catedrales, universias, sites; un reveni a "lusosia", como paper, teatro, musica, la artes jeneral; un reveni a inventa, como la busola, primi; un reveni a esplora - Africa, America, la Pasifica. Lo ia es la renase, cual on dati, aprosima, de 1400 a 1600. La eda ia es enerjiosa, interesante, e perilosa.

La aristocratas ia gania la potia supra la monarcias avietin e an la mano sever de la eglesa, a min per la momento. Donce, on ave colies grande de esta persones de la clase alta, comun rica, e amante de la idea de se mesma. Pensores, relijiosa e secular, ia es librida, a un grado, de la autoria sentral e potiosa de la eglesa, per crea sua propre filosofias relijiosa - a veses razonante e a veses tota nonrazonante. E mercatores ia descovre ce mone pote compra cuasi tota cosas, incluinte la respeta tradisional cual la aristocratas ia reseta. Vera, un titulo aristocrata e la ricia de un mercator ia es un combina perfeta per un bon sposi.

Esta aristocratas e mercatores ia crede ce umania pote es perfetable: Nos pote deveni umanas plu bon. Plu importante, nos pote deveni plu potiosa e rica - plu aristocrata. Multe atende ia es mostrada a la gol de condui se como un cavalor o dama, como refletada, per esemplo, en la libro gidante per condui sofisticada par Baldesar Castiglione, La libro de la person de la corte.

Esta popla ia es pratical, interesada par avenis real e persones real en la mundo real. Los ia es individualiste e competosa, e tipal ia crede en la idea ce la mundo es un caso de "can come can", e los ia gusta sua politica e ia gusta jua bruta.

Ma, los ia es ance anti-inteleto e an orgulosa en sua nonsabe. Los ia tende vide la eruditas como seca e nonpratical, ci pote posible predise eclises, ma no ia pote probable lia sua propre sapatos, e serta no capas de gania ricas o maneja proprias.

E los ia es superstisiosa, spiritiste, fasinada par astrolojia, Egipe antica, la cabala, alcimica, majia - sua varia de nosa promove de la "eda nova".

Du avenis spesial es representante de la renase: La prima ia es primi. Johann Gutenberg (sirca 1400-1467) de Mainz ia inventa la primador e tipo movable, e alora primida, en 1455, la Biblia de Gutenberg.

La aveni du ia es la descovre de la "mundo nova", cual ia sinifia cuantias grande de oro e arjento e un economia internasional ensendeda, e un modo de evade par los no felis con la vive en Europa - cual alga deutxes ia nomi "lebensraum" - spasio per vive). Esta es comun atribuida a Cristoforo Colombo (1451-1506), ma incluinte tota de la esplorores (o esplotores) no ia studia en scola.

Grenada

Grenada (en engles: Grenada /ɡrᵻˈneɪdə/ (escuta); en franses: La Grenade) es un pais en la sude-este de la Mar Caribe. Lo es composada de la isola de Grenada, e de ses isolas min grande a la lado sude de la cadena de isolas de la Grenadines. Lo es locada a la norde-ueste de Trinidad e Tobago, a la norde-este de Venezuela e a la sude-ueste de San Vinsent e la Grenadines. La area de lo es sirca 344 cilometres cuadrida. La cuantia de abitores, en la anio 2007, ia es sirca 89 971 persones, e en la anio 2012 on estima ce lo ia es sirca 110 000 persones. La site capital de Grenada es Saint George's. Grenada es ance conoseda como la "Isola de Spise" par causa de sua produi de cultivas de muscada e masis, de cual lo es un de la esportores la plu grande en la mundo. La avia nasional de Grenada es la pijon de Grenada, cual es parilida estrema. La linguas major es engles e un dialeto de franses.

Ante la coloni european de America, Grenada ia es abitada par la arauaces e plu tarda par la caribes isolal. Cristoforo Colombo ia vide Grenada en 1498 en sua viaja tre a America. An si lo ia es reputada como un posese de la re de Espania, on ave no arcivos cual sujesta ce la espanioles ia atera o coloni la isola a cualce ves. Pos alga atentas par europeans per coloni la isola, cual ia es nonsusedosa par causa de la resiste de la caribes isolal, coloni franses ia comensa en 1650 e ia continua per la sentenio seguente. En 10 febrero 1763, la franses ia sede Grenada a la brites sur la Trata de Paris. Governa brites de la isola ia continua - con eseta de un periodo de governa franses entre 1779 e 1783 - asta 1974. Entre 1958 e 1962, Grenada ia es un parte de la Federa de la Indias Ueste, un federa de la Colonias de la Indias Ueste Brites cual ia esiste per un tempo corta. En 3 marto 1967, Grenada ia es permeteda autonom completa sur sua consernas interna como un stato asosiada. Herbert Blaize ia es la ministro xef prima de la Stato Asosiada de Grenada entre marto e agosto 1967. Eric Gairy ia es la ministro xef entre augosto 1967 e febrero 1974.

Istoria de Espania

La istoria de Espania envolve tota la poplas e nasiones de la penisola iberian e la paises Espania, Andora, Portugal e Jibraltar. El estende de la Iberia preistorial, tra la asende e la declina de un impero global, asta la istoria resente de Espania como membro de la Uni European.

La umanas moderna ia entra a la Penisola Iberian ante 32 000 anios. Poplas e cultures diversa ia segue tra la milenios, incluinte la iberianes, tartesicas, celticas e celtiberianes, fenisias, elinicas, punicas, romanes, suebas e visigotas.

En 711, la moros, un armada de berberes e arabis, ia invade e ia concista cuasi tota la penisola. En la 750 anios seguente, statos muslim autonom ia es constituida, e la area intera de controla muslim ia es conoseda como Al-Andalus.

Entretempo, la renas cristian en la norda ia comensa la recovre longa e lenta de la penisola, un prosede nomida la Reconcista, cual ia es concluida en 1492 con la cade de Granada.

La Rena de Espania ia es creada en 1492 con la uni de la Rena de Castelia e la Rena de Aragon. La prima viaja de Cristoforo Colombo a la Mundo Nova ia susede en la mesma anio, comensante la developa de la Impero Espaniol. La Incuisisio ia es instituida e la iudistes e la muslimes ci ia refusa converti ia es escluida de la pais.

En la tre sentenios seguente, Espania ia es la potia colonial la plu importante de mundo. Lo ia es la stato la plu potiosa en Europa e potia global la plu importante en la sentenio 16 e en parte grande de la sentenio 17. La leteratur espaniol e artes bela e filosofia ia flori en esta tempo. Espania ia institui un impero vasta en America, estendente de California a Patagonia, e colonias en la Pasifica ueste.

Partal finansiada par la tesoros de la colonias, Espania ia deveni envolveda en la geras relijial de Europa, perdente sua posesedas en Nederland, Italia, Frans e Deutxland, e engranada en geras contra Frans, England, Sveria e la Impero Osmanli en la Mediteraneo e en Africa norde. La geras de Espania en Europa ia gida a dana economial, e en la parte ultima de la sentenio 17 on ia esperia un declina gradal de potia su un dinastia Habsburg plu descurante e torpe. La declina ia culmina en la Gera de Erita de Espania, cual ia fini con la retrosede de Espania de un state de potia gidante ueste a un suordinada, an si lo ia resta (con Rusia) la potia colonial inisial.

Istoria de Europa

La istoria de Europa covre la poplas ce abita Europa de la Preistoria asta oji. Alga de la sivilias la plu conoseda de la preistoria european ia es la minoan e la micenean, cual ia flori en la eda de bronze asta cuando los ia cade en 1200 aec.

Jamaica

Jamaica es un pais en la Mar Caribe, e la isola tre de la plu grandes de la Antiles Major. Con area de 10 990 cilometres cuadrida, lo es situada a sirca 145 cilometres a sude de Cuba, e a 191 cilometres a ueste de Ispaniola (la isola cual conteni la paises Aiti e Republica Dominican).

Abitada par la poplas nativa arauac e taino, la isola ia es renada par Espania pos la ariva de Cristoforo Colombo en 1494. Multe de la persones nativa ia mori de maladia, e la espanioles ia move sclavos african a Jamaica como laborores. Nomida Santiago, la isola ia resta como un poseseda de Espania asta 1655, cuando England ia concista lo e ia renomi lo Jamaica. Su rena colonial brites, Jamaica ia deveni un esportor major de zucar, con un economia de cultiverias cual ia depende de sclavos transportada de Africa.

La briteses ia libri tota sclavos en 1838, e multe de los ia eleje ave sua cultiverias propre de susiste en loca de labora sur cultiverias de zucar. Comensante en la desenio de 1840, la briteses ia usa laborores jonguo e barati su acordas formal per labora sur cultiverias de zucar. La isola ia deveni autonom a 6 agosto 1962.

Con 2,9 milion persones, Jamaica es la pais tre de la plu popladas con lingua engles en la Americas (pos la Statos Unida e Canada), e la numero cuatro de la paises la plu poplada en la Mar Caribe. Kingston es la capital e site la plu grande, con popla de 937 700 persones. Jamaicanes ave xef asendentes african, ma minorias importane esiste con asendentes european, jonguo, barati e miscada. Par causa de un taso alta de migra a via per labora de pos la desenio de 1960, Jamaica ave un diaspora grande sirca la mundo, spesial en Canada, la Rena Unida e la Statos Unida.

Jamaica es un membro de la Comunia de Nasiones, con Rea Elizabeth 2 como sua monarca e xef de stato. La representor asiniada de la rea en la pais es la Governor Jeneral de Jamaica, un posto ocupada par Sir Patrick Allen de 2009. Andew Holness servi como la xef de governa e Ministro Xef de Jamaica de marto 2016. Jamaica es un monarcia constitual parlamental con potia de leji en la Parlamento de Jamaica, cual es compsada de un Salon Alta asiniada e un Salon Basa direta elejeda.

La lingua major es engles.

On ave du partidas political, la PNP (Partida Nasional de la Popla – sinistriste) e la JLP (Partida de la Laborores – destriste). De 2012 la Ministro Prima es la Multe Onorable Sra Portia Simpson-Miller (PNP).

On ave ance un comunia blanca. Per esemplo: Sr. Michael Manley, de la PNP, Ministro Prima 1972–80 e 1989–92; e Chris Blackwell, fundor de la casa de discos Island (Isola), cual ia orijina como un "eticeta" per rege.

La isola es famosa per multe stilos de musica, incluinte sca, rege, e danshal, cual ave parolas violente a multe veses.

Porto Rica

Porto Rica (espaniol: Puerto Rico), ofisial la Comunia de Porto Rica, es un teritorio noncorporada de la Statos Unida, locada en la norde-este de la Mar Caribe. La area es sirca 13 790 cilometres cuadrida.

Un arcipelago entre la Antiles Major, Porto Rica inclui la isola xef (nomida Porto Rica) e alga plu petis, como Mona, Culebra e Vieques. La site capital e la plu poplada es San Juan. Sua linguas ofisial es espaniol e engles, ma espaniol domina. La isola ave sirca 3,4 milion abitores. Par causa de sua istoria, clima tropical, vistas natural, cosini tradisional e beneficas finansial, lo es un destina per viajores de sirca la mundo.

Orijinal poplada par la popla nativa taino, la isola ia es reclamada per Espania en 1493 par Cristoforo Colombo en sua viaja du. Plu tarda, lo ia sufri invades atentada par Frans, Nederland e Britan. Cuatro sentenios de governa colonial espaniol ia influe la cultur de la isola con ondas de sclavos african e colonistes canarian e andalus. En la Impero Espaniol, Porto Rica ia fa un rol stratejial, ma minor en compara con colonias plu rica como Peru e Espania Nova. La controla distante par Espania ia continua asta la fini de la sentenio 19, produinte un cultur e lingua de creol espaniolin cual ia combina elementos de la americanes orijinal, africanes e iberianes.

En 1898, pos la Gera Espaniol-American, la Statos Unida ia propri Porto Rica su la Acorda de Paris. Portoricans es legal sitadanes natural de la Statos Unida e pote move libre entre la isola e la continente.

En la temprana de 2017, un crise de deta ia crea problemes major per la governa. La deta ia profondi tra un desenio de retrosede. Esta ia es la crise finansial major du cual ia afeta la isola pos la Depresa Grande, cuando la governa SUA ia aida en 1935. En agosto 2017, la deta ia es $72 bilion, e 45% de persones ia es povre.

En la tarda de setembre 2017, Siclon Maria ia colpa Porto Rica, danante e ruinante. La rede eletrical ia es cuasi intera destruida, e on ia previde ce la reparas va ocupa menses, causante la rompe de eletrica la plu grande en la istoria de la SUA. En la tarda de novembre 2017, plu ca 200 000 abitores ia move ja a Florida.

Sentenio 15

La sentenio des-sinco es la periodo entre la anios 1401 e 1500 de la eda comun.

Statos Unida de America

La Statos Unida de America (SUA) es un republica federal en America Norde, formida par sincodes statos e un distrito federal. Lo es la pais tre de la plu grandes de la mundo, con 9,83 milion km² e 308 milion abitores. La linguas major es engles e espaniol.

Tra la sentenio 19, la Statos Unida ia desloca la tribus nativa, ia oteni tera de Frans, Espania, Rena Unida, Mexico e Rusia, e ia ajunta la Republica de Texas e la Republica de Hawaii. La disputas entre la sude e la norde sur sclavia e la diretos de la statos ia provoca la Gera Interna American en la desenio de 1860. La vinse par la norde ia preveni la divide de la pais e ia gida la fini de sclavia en la Statos Unida. La Gera Espaniol-American e la Gera Mundal Prima ia confirma la state de la pais como un potia militar. Lo ia emerji de la Gera Mundal Du como la pais prima con armas nucleal e como un membro permanente de la Consilio de Securia de la Nasiones Unida. La resulta de la Gera Fria ia es la disolve de la Uni Soviet, lasante la Statos Unida como la sola suprapotia. La SUA fa 43% de la spende militar global e lo es la fortia prima, cultural, political e economial en la mundo.

Trinidad e Tobago

Trinidad e Tobago (ofisial la Republica de Triniada e Tobago) es un pais de du isolas, prosima a la norde de la continente America Sude, a mera 11 km de la costa de Venezuela norde-este e 130 km a sude de Grenada. Lo borda la Mar Caribe a la norde e comparti fronteras de mar con otra nasiones incluinte Barbados a la norde-este, Grenada a la norde-ueste, Guiana a la sude-este e Venezuela a la sude e ueste.

La isola Trinidad ia es un colonia espaniol de la ariva de Cristoforo Colombo en 1498 asta la sede de la governor espaniol, Don José María Chacón, a la ariva de un flotila brites de 18 barcones de gera a 18 febrero 1797. En la mesma periodo, la posese de la isola Tobago ia cambia entre colonistes espaniol, brites, franses, nederlandes e curlandes, a plu veses ca cualce otra isola en la Caribe. Trinidad e Tobago ia es sededa a Britan en 1802 con la Trata de Amiens, e ia resta separada asta 1889. La pais Trinidad e Tobago ia deveni autonom en 1962, e ia deveni un republica en 1976.

Lo es la pais tre de la plu ricas par produi interna bruta per person en la Americas, pos la Statos Unida e Canada. Plu, la Banco Mundal reconose lo como un economia de revenu alta. No como la plu de la Caribe de lingua engles, la economia de la pais es xef industrial, focada a petrolio e petrocimicales. On atribui la ricia de la pais a sua reservas grande e esplota de petrolio e gas natural.

La area es sirca 5,128 cilometres cuadrida. La site capital es Port-of-Spain.

La popla en la anio 2007 ia es sirca 1 056 608 persones. La majoria es de orijina asian. La lingua major es engles, ma multe persones parla espaniol.

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.