Comunisme

Comunisme (de la lingua latina communis = "comun") es la nom de la idea de un sosia sin clases, sin diferes sosial entre persones, e en cual la produis de labora es poseseda par tota membros de la sosia. Seguente la teorias de sosialisme developada par Karl Marx, Friedrich Engels, e Vladimir Lenin, comunistes vole aboli la posese privata de la modos de produi par posese par la popla.

Criticas de comunisme pote es divideda en du categorias: los consernante la aspetas pratical de la statos comuniste en la sentenio 20, e los consernante la teoria e prinsipes comuniste. Autores ci es critica con comunisme usual oposa ambos la prinsipes comuniste e la politicas istorial, spesial la crimes contra umania su la governas comuniste, incluinte la geras (interna e esterna), la prisonis e matas de protestores, minorias, e otras, e la controla sever de persones e sua libria de parla e move.

Red star with hammer and sickle
Stela roja e falxeta-e-martel, simbolinte la potia de la popla laborante.
Adolf Hitler

Adolf Hitler ia es la presidente de Deutxland entre 1933 e 1945. El ia es la xef de la Partito Sosialiste Nasional de Laborores Deutx o Partito Nazi, e la gidor de la Deutxland Nazi. La ideolojia de sua governa ia es fundida en razisme, antiiudisme e militarisme. El ia gida Deutxland en la Gera Mundal Du, cual el ia comensa con intende de reali sua projeta de estende Deutxland tra Europa.

En 1919, Hitler ia deveni un membro de la Partito de Laborores Deutx, la presedor de la Partito Nazi, e ia deveni la xef en 1921. En 1923, pos la colpa de stato en la bireria Bürgerbräukeller de Munchen, Hitler ia es enviada a prison per sinco anios par la Putsch de Munchen. En prison, el ia scrive la parte prima de sua libro "Mea luta" (Mein Kampf) en cual el ia descrive sua ideolojia con alga elementos autobiografial. A oto menses plu tarda, en 1924, el ia parti de prison e ia oteni suporta poplal per loda de pangermanisme, anti-iudisme e anti-comunisme, esplotante sua talento per parla publica, propaganda e consentra coletiva con multe simbolisme.

On ia nomi el canselor imperal (Reichskanzler) en janero 1933, e an un anio plu tarda, pos la mori de la presidente Paul von Hindenburg, el ia proclama se Führer ("gidor"), oteninte la controla asoluta de la stato deutx. El ia transforma la Republica de Weimar a la Reich Tre e ia governa con un partito fundida sola en la autocratia de la ideolojia nazi.

Sua ojeto ia es institui un Ordina Nova fundida sur la supremia de Deutxland nazi en Europa. Sua politica interna e esterna ia ave la ojeto de prende la Lebensraum ("spasio per vive") per la popla germanica. El ia promove la rearma de Deutxland e la invade de Polsca par la Wehrmacht a 1 setembre 1939, cual ia inisia la Gera Mundal Du. Con esta atas, Hitler ia viole la Trata de Versailles de 1919 cual ia institui la esijes de pas pos la Gera Mundal Un.

Albert Camus

Albert Camus (1913–1960) ia es un scrivor franses de jazairi. El ia nase en Mondovi, Jazair (alora un colonia franses) e ia es instruida a la Universia de Jazair. Pos la mori de sua padre en la Gera Mundal 1, la familia de Camus ia es povre e el ia susta se en sua studia par empleas diversa. Prima el ia labora en un compania de teatro e como un jornaliste.

Sua articles temprana La lado erante e la lado coreta ("L'Envers et l'endroit") e La rituos de sposi ("Noces") mostra la temas e la duplismes cual representa sua obras plu tarda. Sua novelas La stranjer ("L'Etranger"; 1942) e La pesta ("La Peste"; 1947) refere multe a esistentialisme en sua asentua de la asurdia e acasia de la vive. Sua otra obras inclui La mito de Sisyphus ("Le Mythe de Sisyphe") en 1943 e La revoltor ("L'Homme révolté") en 1951. La critica de Camus sur comunisme en esta libro ultima ia causa un disputa ferose con la filosofiste Jean-Paul Sartre.

El ia gania la premio Nobel per leteratur en 1957. La teatrales La malcomprendeda ("Le Malentendu") e Caligula, e la novela La stranjer (la studia de un om asurda en un mundo asurda), esplora aspetas diversa de La bobo, an cuando La mito de Sisyphus es un trata filosofial de la mesma conseta. Con leteras a un ami deutx ("Lettres à un ami allemand"), La pesta, la teatral La state de aseja (L'Etat de siège), e La revoltor, Camus ia move se a via de la stranjeri metafisical e ia comensa esplora la problem de la sufri e revolta umana.

La om prima es un novela autobiografial, racontada par pronom de person tre. El ia ajusta per la teatro obras par Buzzati, Calderan, Dostoevsky, Faulkner, Larivey, e Lope de Vega. La cade ("La Chute") es cisa la obra la plu matur de Camus; lo segue un colie de naretas La escluida e la rena ("L'Exil et le royaume").

Camus ia mori lamentable en un colide de veculos en 1960.

Ambientisme

Ambientisme (o ecolojisme) promove la preserva, restora, e/o boni de la ambiente natural, e inclui un conserna per la controla de contamina e la proteje de la diversia de animales e plantas. Per esta razonas, consetas como la etica de tera e ambiente, biodiversia, ecolojia, e la ipotese de biofilia es forte incluida.

Ambientisme es la atenta per eculibra relatas entre umanas e la sistemes variosa de natura sur cual los depende en un modo cual dona la grado de susta coreta per tota la composantes. La mesuras esata e la resultas de esta ecuilibra es a veses controversal, e on ave multe modos diferente per espresa la consernas per la ambiente pote es espresada en pratica.

Esta consernas es comun representada par la color verde, ma esta asosia ia es prendeda par ajentes comersial en un malpresenta nomida "greenwashing" en engles, pd "lava" (sua produidas) con la color verde an si los no benefica la ambiente. Ambientisme es oposada par antiambientisme, cual dise ce la tera es min frajil ca alga ambientistes sujeste, e cual depinta ambientisme como reatante tro forte a la contribui umana a la ambiente (spesial la cambia de la clima) e, a la mesma tempo, como oposante la avansa de umanas.

Anarcisme

Anarcisme es un filosofia, ci suposa ce governa es no nesesada no justa.

Cada modo de opresa e viole par stato es negada.

La parola anarcisme (elinica αναρχία - sin domina)

sinifia la idea de un sosia sin domina e sin viole. Un sosia do

persones vive en egalia sin constrinje political, e donce pote developa libre.

Butan

Butan (o Druciul; en dzongca: འབྲུག་ཡུལ་ druk yul), nomida ofisial la Rena de Butan (en dzongca: འབྲུག་རྒྱལ་ཁབ་ druk gyal khap), es un pais sin costa en Asia sude. Lo es en la este de la Montes Himalaia. Lo borda Tibet a la norde, Barat a la sude, la stato de Barat nomida Sikkim e la Vale Txumbi de Tibet a la ueste, e la stato de Barat nomida Arunachal Pradesh a la este. Butan es jeopolitical en Asia sude e es la nasion la du de la min poplada en la rejion, seguente Maldives. La site capital e la plu grande es Timpu, en cuando Puntxoling es la sentro finansial. La cuantia de abitores, en la anio 2007, ia es sirca 2 327 849 persones. La lingua major es dzongca, un dialeto de tibetan.

La autonomia de Butan ia dura tra sentenios, e la teritorio ia es nunca colonida tra sua istoria. La stato butan - cual es en la Via de Seda entre Tibet, la sucontinente de India e Asia sude-este - ia developada un identia nasional distinguida cual es fundida en budisme. La teritorio ia es composada de multe feudos e ia es governada como un teocratia budiste par un xef spirital conoseda como la Zhabdrung Rinpoche. Pos un gera interna en la sentenio 19, la dinastia Wangchuck ia reuni la pais e ia comensa relatas con la Impero Brites. Butan ia crese un asosia stratejial con Barat tra la alti de comunisme xines e lo ave un borda disputada con la Republica Poplal de Xina. En 2008, lo ia cambia de un monarcia asoluta a un monarcia constitual e ia aveni sua vota nasional prima per la asembla nasional de Butan, cuan ave un sistem con du partitos cual distingui democrata butan.

La re de Butan es conoseda como la re dragon. Butan es ance notable car lo ia abri la via de la conseta de felisia nasional bruta. La area de la pais es sirca 47 000 cilometres cuadrida. La vista de la pais varia entre planos sutropical en la sude e la montania Himalaia sualpan en la norde, do on ave apicos con altia de plu ca 7000 metres. La monte la plu alta en Butan es Gangkhar Puensum, cual es ance un de la montes la plu grande en la mundo. Butan ance ave viventes savaje diversa.

En Asia sude, Butan es gradida como la prima en libria economial, fasilia de comersia, e pas; du en revenu per person; e es la pais la min frodante en Asia sude en 2016. An tal, Butan continua como un pais min developada. Idroeletrica es la majoria de la esportas de la pais. La governa es un democrata parlamental. Butan ave relatas diplomata con 52 paises e la Uni European, ma no ave lias formal con la sinco membros permanente de la Consilio de Securia de la Nasiones Unida. Lo es un membro de la Nasiones Unida, la Asosia Sudasian per Coopera Rejional, la BIMSTEC e la Promove de Paises No Aliniada. La Armada Real de Butan ave relatas militar estendosa con la fortes militar de Barat.

Capitalisme

Capitalisme es un sistem de economia fundida sur la posese privata de la modos de produi e sua opera per profita. Cualias sentral a capitalisme inclui propria privata, acumula de capital (un reserva de mone cual pote es usada per investa o fundi un compania), labor per salario, intercambia voluntar, un sistem de custas, e mercatos competente. En un economia de mercatos capitaliste, desides e investas es determinada par cada posesor de ricia, propria, o capasia per produi en mercatos de finansia e capital. A la otra lado, la custa e distribui de benes e servis es xef determinada par compete en mercatos de benes e servis.

Economistes, economistes politica, sosiolojistes, e istoristes ia adota perspetivas diferente en sua analises de capitalisme e ia reconose formas variosa de lo en pratica. Estas inclui capitalisme de mercatos libre ("laissez-faire", franses per "permete ce lo vade", pd sin restrinjes), capitalisme sosial (pd con aida sosial), e capitalisme statal (pd controlada par un alia de capitalistes e politicistes). La varias ave grados variante de mercatos libre, propria publica, restrinjes a compete libre, e politicas sosial promoveda par la stato. La grado de compete en mercatos, la rol de restrinje e regula, e la estende de propria de la stato varia entre esta modeles. La estende de libria e regulas, e la defini de propria privata es consernas de politica. La plu de economias capitaliste esistente es economias miscada, cual combina elementos de mercatos libre con interveni par la stato e, en alga casos, desinia de economia.

Economia de mercatos ia esiste su multe formas de governa e en multe edas, locas, e cultures variante. La sosias captitaliste moderne - marcada par la universali de relatas sosial fundida en mone, un clase de laborores grande ci debe labora per salarios, e un clase de capitalistes ci posese la modos de produi - ia developa en Europa ueste en un prosede cual resulta en la Revolui Industrial. Sistemes capitaliste con grados variante de interveni direta par governa ia deveni, de alora, en la mundo ueste, e lo continua sperde. Tra tempo, la nasiones capitaliste ia esperi crese economial continuinte e un crese en la nivel de vive.

Criticores de capitalisme dise ce lo institui potia en la manos de un clase capitaliste peti cual esiste tra la esplota de la clase laborante grande e sua labora; asentua profita supra la bonia de la sosia e la proteje de la ambiente e recursos; e suporta nonegalia, froda, e nonstablia economia. Suportores dise ce lo furni produidas plu bon e inova par competa, crea crese economia forte, e furni produosia e ricia cual benefia multe la sosia, e ce lo es la sistem la plu efetosa conoseda per la asinia recursos. Multe economistes sujeste ce un misca de capitalisme e sosialisme (democrata) ta es la plu bon, an si los desacorda la grado de cada.

Faxisme

La faxisme es la promove political inisiada en Italia en la comensa de la sentenio 20 par Benito Mussolini. Alga de sua ideas ia estende tra Europa con cualias diferente. Lo es un promove de cualia nasionaliste, autoritariste e totalitariste, ma ance un promove revoluiste e reatante. Ideolojial e sosial, lo es regardada como anticapitaliste e defende la divide de la sosia en clases.

Ideolojias political

En la studias sosial, un ideolojia political es un colie de ideales etical, prinsipes, credes, mitos, o simboles de un promove o instituida sosial, un clase o grupo grande, cual esplica como un sosia debe opera e cual ofre un desinia political e cultural per un ordina sosial spesifada. Un ideolojia political conserna se xef con como on debe asinia potia e a cual finis lo debe es usada. Alga partitos political segue un ideolojia spesifada multe prosima, en cuando otra pote prende sola alga inspira de un grupo de ideolojias relatada sin abrasa forte cualce de los. La poplaria de un ideolojia es partal la resulta de la influe de emprendores moral, ci ata a veses sola en sua propre interesas. Ideolojias political ave du dimensiones:

Goles: como la sosia debe es organizada.Metodos: cual es la modo la plu conveninte per ateni esta gol.Un ideolojia es un colie de ideas. Tipal, cada ideolojia conteni alga ideas sur cual lo vide como la forma de governa la plu bon (pe democratia o autocratia) e la sistem de economia la plu bon (pe sosialisme o capitalisme). A veses, la mesma parola es usada per identifia ambos un ideolojia e un de sua ideas xef. Per esemplo, "sosialisme" pote refere a un sistem economial, o lo pote refere a un idealojia cual suporta acel sistem economial. La mesma terma pote ance es usada per refere a ideolojias multiple, cual es la razona cual siensistes political atenta trova definis acordada per esta termas. Per esemplo, an si la termas cual ia es confusada a veses, "comunisme" ia deveni como referente a governas soviet e ideolojias marxiste-leniniste, ma "sosialisme" ia deveni como referente a un estende plu vasta de ideolojias diferente, distinguida de marxisme-leninisme.

Ideolojia political es un terma plen de problemes, e ia es a veses nomida "la conseta la plu evitante en tota siensa sosial". Ma ideolojias tende identifia se par sua loca sur la spetra political (como la sinistra, la media, o la destra), an si esta es comun controversal. Final, ideolojias pote es distinguida de stratejias political (pe poplisme) e de cosas singular sirca cual un partito pote es construida (pe oposa a integra european o la legali de canaba). On ave alga studias cual mostra ce ideolojia political es eritable en familias.

A su es un lista de alga ideolojias la plu bon conoseda:

Ambientisme

Anarcisme

Autonomisme

Capitalisme

Comunisme

Conservalisme

Faxisme

Internasionalisme

Libralisme

Monarcisme

Nasionalisme

Nazisme

Panasionalisme

Razisme

Secularisme

Sentrisme

Sosialisme

Umanisme

Libralisme

Libralisme es un filosofia political e moral fundida sur libria e egalia. Libralistes suporta un varia de vistas, dependente de sua comprende de esta prinsipes, ma los suporta jeneral la diretos sivil, democratia, secularisme, egalia de sesos e razas, internasionalisme, e la librias de parla, primi, relijio, e mercatos.

Librisme ia deveni un promove distinguida en la Eda de Lumina, cuando lo ia deveni popular entre filosofistes e economistes de la mundo ueste. Libralisme ia promove la recambia de la normas de vantaje erital, relijion de stato, monarcia asoluta, la direto divin de res, e conservalisme tradisional, con democratia represental e la rena de lege. Libralistes ia para politica mercantiliste, monopolios real, e otra paradores de comersia, e en loca promove mercatos libre.

La filosofiste John Locke es comun atribuida con la funda de libralisme como un tradision distinguida, razonanate ce cada person ave un direto natural per vive, libria, e propria, ajuntante ce governas debe no viole esta diretos fundida sur la contrata sosial.

La xefes en la Revolui Gloriosa de 1688, la Revolui American de 1776, e la Revolui Franses de 1789 usada la filosofia libral per suporta la suverti militar de tirania real. Libralisme ia comensa estende se rapida spesial pos la Revolui Franses. En la sentenio 19, governas libral ia es instituida en nasiones tra Europa e America Sude, e lo deveni bon juntada con republicanisme en la SUA. En Britan Victorian, lo ia es usada per critica la instituida politica, apelante a siensa e razona per la benefica de la popla.

En la sentenios 19 e 20 temprana, libralisme en la Impero Osmanian e Asia ueste ia influe periodos de reforma como la Tanzimat e Al-Hahda, e ance la comensa de secularisme, constituisme, e nasionalisme. Esta cambia, con otra fatores, ia crea un sensa de crise en Islam, cual continua a oji e condui a revivalisme islamiste.

Ante 1920, la oposante ideolojial major de libralisme clasica ia es conservalisme. Ma alora, libralisme ia fasa defias ideolojial major de oposantes nova: faxisme e comunisme. Ma, en la sentenio 20, ideas libraliste ia sperde an plu - spesial en Europa ueste - en cuando democratias liberaliste ia trova se a la lado vinsente de ambos Geras Mundal.

En Europa e America Norde, la institui de libralisme sosial ia deveni un parte importante en la estende de la aida sosial. Oji, partitos libral continua sua potia e influe tra la mundo. Ma libralisme debe dirije se ancora a taxes enorme en Africa e Asia. En la mesma tempo, la mercatos libre ia estende a un capitalisme estrema, e la nesesa per restrinje los ia deveni plu importante. Libria individua es a veses nonconveninte con la bonstate de la popla, la nasion, e an la mundo.

La elementos fundal de sosia moderne ave radises libraliste, e la ondas temprana de libralisme ia populari la [[individualisme economial en cuando los estende la governa constitual e autoria parlamento. Libralistes ia institui un ordina cual favore libres individua, como libria de parla e de asosia, un juderia autonom e prosedes par juria, e la aboli de vantajes aristocratal. Ondas plu tarde de pensa libraliste ia es forte influeda par la nesesa per estende diretos sivil. Libralistes ia promove egalia de la sesos e razas en sua promove de diretos sivil e en la sentenio 20 ia ateni alga de esta goles. Ma an tal, multe plu eforta es ancora nesesada.

Monarcisme

Monarcisme es la promove de un monarca o de rena monarcal. Un monarciste es un person ci suporta esta forma de governa. La promove oposada a rena monarcal es comun nomida republicisme. Dependente de la nasion, un monarciste pote suporta la rena de la person ci es sur la trono, un reclamor, o algun ci ta rena estra ce el ia es desponeda.

Rena par un monarca es entre la instituis la plu vea. Monarcia ia es comun proclamada commo resetante sua diretos de un potia supranatural, pe "la direto divin" de res en Europa, o "la comanda de sielo" per imperores en Xina.

En la sentenio 18, la Revolui American e la Revolui Franses ia move la cultur de la ueste a via de la potia de monarcas. Cada en sua modo propre ia mostra la conseta de la autonomia popular descriveda par Jean-Jacques Rousseau. En 1848, un onda de revoluis contra la monarcias european ia comensa.

Aora, la majoria de monarcias es constitual. En la plu de estas, la monarcas ave sola potia simbolin, an si en algas la monarcas ave un rol en cosas political. En Tai, per esemplo, re Bhumibol Adulyadej, ci ia rena de 1946 a 2016, ia ave un rol importante en la politica de la nasion. Simil, re Mohammed 6 de Magrib ave potia sinifiante ma no asoluta.

On ave alora un grupo peti de nasiones en cual la monarca es la renor vera. La majoria de esta nasiones es la monarcias arabi e muslim cual produi petrolio como Arabia Saudi, Barain, Catar, Uman, e la Amirias Arabi Unida. Otra monarcias forte inclui Brune e Suaziland.

Nazisme

Nazisme o sosialisme nasional (deutx Nationalsozialismus) es la ideolojia e la rena cual ia governa Deutxland de 1933 asta 1945 cuando la Partito Sosialiste Nasional de Laborores Deutx de Adolf Hitler ia govena Deutxland; Osteraic pos la Anschluss ("afisa"), e otra teritorios. On conose la Deutxland de esta periodo como Deutxland Nazi.

Patriotisme sosialiste

Patriotisme sosialiste refere a la forma de patriotisme promoveda par la promove marxiste.

Politica

Esta es la article sur politica. La categoria Politica conteni plu articles sur politica.Politica es un prosede de desides grupal per governa un sosia. La orijina de la terma es la parola elinica πολις (polis) cual sinifia "site".

La ideolojias es ance parte de la politica:

Monarcia

Tirania

Republica

Democratia

Anarcisme

Sosialisme

Comunisme

Liberalisme

Libertarisme

Conservisme

Faxisme

Nazisme

Roja

Roja es la color a la estrema de la spetro de lus vidable, con longias de onda la plu longa, a lado de orania e a la otra estrema ca violeta. La oios de umanas persepi roja cuando los vide lus con un longia de onda entre 620 e 740 nanometres. Lus con un longia de onda plu longa ca roja, ma plu corta ca radia de teraherze e microondas, es nomida infraroja.

Roja es un de la colores xef de la sistem de colores ajuntal de lus vidable, con verde e blu, en la sistem de colores RGB, cual es usada per crea cada de la colores sur un scermo de un televisador o computador. Roja es un de la colores suordinada en la sistem de colores sutral, resultante de la combina de jala e majenta en la sistem de colores CMYK. Tradisional, lo ia es videda como un de la colores xef en la sistem de colores sutral, spesifada en la sistem de colores RYB, con jala e blu, cual es usada en depinta per produi cada de la colores. La tinjes de roja varia entre ros multe pal e bordo o burgonia multe oscur, e entre la roja oranin de scarleta e la roja bluin de carmesi. La color oposada de roja es sian.

En natur, la color roja de sangue es causada par emoglobina (la protena cual conteni fero), cual es trovada en la eritrosites de tota vertebratos. La color roja de la Canion Grande e otra spesifadas jeolojial es causada par ematita o ocer roja, de cual ambos es formas de osido de fero; esta causa ance la color roja de la planeta Marte. La sielo roja a la reposa de sol e la leva de sol es causada par un efeto otical nomida sperde de Rayleigh, cual grandi la longia de onda de la lus cual ateni la oios cuando la sol es basa o su la orizon. La color de folias en autono es causada par pigmentos nomida antosianinas, cual es produida prosima a la fini de estate, cuando clorofila verde es no plu produida. Entre un e du persentos de umanas ave capeles roja; la color es produida par cuantias grande de la pigmento rojin feomelanin (cual causa ance la color roja de labios), e cuantias relativa peti de la pigmento oscur eumelanin.

Car roja es la color de sangue, lo ia es istorial asosiada con sacrifia, peril e coraje. Sondas moderna en la SUA mostra ce roja es ance la color la plu asosiada con caldia, ativia, pasion, sesia, coleria, ama e joia. En Xina, India e multe otra paises asian, lo es la color cual simboli felisia e bon fortuna. De la sentenio 19, roja es ance asosiada con sosialisme e comunisme.

Scola de Frankfurt

La Scola de Frankfurt es un scola de teoria sosial e filosofia asosiada con la Institui per Rexerca Sosial a la Universia Goethe en Frankfurt. Comensante en la perioda entre la geras, la scola es composada de neomarxistes no comfortable con la sistemes esistente de capitalisme, faxisme, o comunisme. Multe de esta teoristes ia crede ce teoria tradisional no pote esplica bon la developa turbosa e nonespetada de sosias capitaliste en la sentenio 20. Critical de ambos capitalisme e comunisme, los ia atenta descove un via alternativa per la developa sosial.

Per pleni la ometes ce los ia persepi en marxisme clasical, los atenta estra respondes de otra scolas de pensa, usante la intuis de sosiolojia antipositiva, psicoanalise, esistentialisme, etc. La pensores major ia vole deriva gida de la obras de Immanuel Kant, Georg Hegel, Karl Marx, Sigmund Freud, Max Weber, Georg Simmel, e Georg Lukás.

La tradision filosofial es posible la plu asosiada con Max Horkheimer, ci ia deveni la diretor de la institui en 1930, e ci ia enscrive multe de la teoristes la plu talentosa, incluinte Theodor W. Adorno, Erich Fromm, e Herbert Marcuse.

La developa de la scola ia es afetada multe par la turbo political de la anios entre geras en Deutxland. La pensores ia es spesial influeda par la fali de la revolui comuniste en Europa ueste (do Marx ia prediseda la revolui ta aveni) e par la asende de nazisme en un nasion tan avansada economial e tecnolojial como Deutxland.

Sosialisme

Sosialisme es un varia de sistemes sosial e economial marcada par posese sosial e la autodirije de la modos de produi par la laborores, e ance la teorias political e promoves asosiada con los. Posese sosial pote refere a formas de posese publica, coletiva, o coopera, o a la posese de valuas par sitadanes. On ave multe varias de sosialisme e no defini singular pote capsuli tota, ma posese sosial es la elemento comun compartida par los.

Sistemes economial sosialiste pote es divideda entre formas mercato e nonmercato. Sosialisme nonmercato inclui la sustitui de mone e la valuas de imobilas, labora, e capital, par valuas calculada sola sur usa. La intende es la crea de un sistem economial cual evita la nonefetosia e crises asosiada con la acumula de capital e la sistem de profita. Contrastante, sosialisme mercato reteni la usa de mone e la valuas de imobilas, labora, e capital, e en alga casos an la motiva de profita, en relata a la opera de emprendes sosial poseseda e la rasiona de benes de capital entre los. Profitas jenerada par esta companias ta es controlada direta par la laborores de cada compania, o cumula a la sosia intera en la forma de un dividendo sosial. Sosialistes debata la praticalia e metodos de distribui de recursos per un sistem sosialiste.

La promove political de sosialisme inclui un grupo de filosofias political cual orijina en la promoves revoluinte de la sentenio 18, e en la conserna per la problemes sosial cual ia es asosiada con capitalisme. En ajunta a la debata sur mercatos e metodos, la varias de sosialisme difere en sua consetas de posese sosial, como dirijores ta es organizada en instituis produinte, e la rol de la stato en construi sosialisme. Diferes sentral inclui reformiste contra revoluinte e sosialisme de la stato contra sosialisme libraliste. Politicas sosialiste ia es sentraliste e desentralida, internasionaliste e nasionaliste, organizada par partitos political e oposada a politicas de partitos, a veses incluinte sindicatos e a otra veses autonom de e critical de sindicators, presente en nasiones industrialida e nasiones developante. An si tota varias de sosialisme vide se mesma como democrata, la espresa "sosialisme democrata" es comun usada per asentua la suporta e valua de prosedes democratal, e contra sistemes political autoritar, como en nasiones comuniste.

A la sentenio 19 tarde, pos la obras de Karl Marx e sua colaboror Friedrich Engels, sosialisme ia comensa sinifia un oposa a capitalisme e un promove de un sistem poscapitaliste fundida sur alga forma de posese sosial de la modos de produi. En la desenio de 1920, la du tendes political cual domina la promove sosialiste internasional ia es la comunisme e sosialisme democrata. E, pos esta tempo, sosialisme ia emerje como "la promove secular la plu influente de la sentenio 20 en tota la mundo".Con la emerje de la Uni Soviet como la state prima cual nomi se mesma sosialiste, sosialisme ia deveni asosiada en multe mentes con la model economial soviet, cual multe economistes sujeste ia es plu un forma de capitalisme de la stato o un economia de comanda. Partitos sosialiste resta un fortia political con grados variante de potia e influe sur tota continentes, gidante governas nasional en multe nasiones de la mundo. Oji, alga sosialistes ia adota ance la causas de otra promoves sosial, per esemplo ecolojia sana, egalia femiste, e libralisme sosial.

Tirana

Tirana es la capital e site xef de Xciperia como ance la cor cultural, economial e governal de la pais. Lo es locada en la sentro ueste de la pais, a 700 cilometres de Atina, a 290 cilometres de Skopje, a 250 cilometres de Pristina e a 160 cilometres de Podgorica. En la anio 2008, Tirana ia ave 624 642 abitores. La area de Tirana es 41,8 cilometres cuadrida.

Vietnam

Vietnam (ofisial la Republica Sosialiste de Vietnam) es la pais la plu este en la Penisola Indoxina en Asia sude-este. Con sirca 94,6 milion abitores en 2016, lo es la pais 14 de la plu popladas de mundo, e la numero 9 de la paises asian. Lo es bordada par Xina a la norde, Lau a la norde-ueste, Camputxa a la sude-ueste, Tai ultra la Golfo Tai a la sude-ueste, e par la Pilipinas, Malaisia e Indonesia ultra la [[Mar Xina Sude a la este e sude-este. Sua site capital ia es Hanoi pos la reuni de Vietnam Norde e Sude en 1976, con ance la Site Ho Chi Minh como un site istorial.

La parte norde de Vietnam ia parteni a Xina imperal tra plu ca un milenio, de 111 aec asta 939 ec, cuando un stato viet autonom ia es formida pos un vinse viet en la Batalia de la Rio Bạch Đằng. Un serie de dinastias imperal viet ia flori en cuando la nasion ia crese jeografial e political en Asia sude-este, asta cuando la Penisola Indoxina ia es colonida par Frans en la media de la sentenio 19.

Pos un ocupa nion en la desenio de 1940, la vietes ia batalia la rena franses en la Gera Prima de Indoxina, ultima escluinte la franseses en 1954. A pos, Vietnam ia es political divideda a du statos oposada, Vietnam Norde (ofisial la Republica Democrata de Vietnam) e Vietnam Sude (ofisial la Republica de Vietnam). La desacorda entre la du lados ia intensi en lo cual es conoseda como la Gera de Vietnam, con un interveni forte par la Statos Unida per aida Vietnam Sude entre 1965 e 1973. La gera ia fini con vinse per Vietnam Norde en 1975.

Vietnam ia deveni alora unida su un governa marxiste-leniniste, ma ia resta povre e political isolida. En 1986, la governa ia inisia un serie de reformis economial e political cual ia comensa la via de Vietnam a integra en la economia mundal. Ja en 2000, Vietnam ia crea relatas diplomata con tota nasiones. De 2000, sua taso de crese economial es entre la plu altas de mundo, e en 2011 lo ia ave la grado la plu alta de 11 economias major en la Indise de Jenerores de Crese Global. Par causa de sua reformis economial susedosa, lo ia junta se a la Organiza Mundal de Comersia en 2007. Lo es ance un membro de la Coopera Economial Asia-Pasifica e la Organiza Internasional de Francofonia. Vietnam resta un de cuatro statos sosialiste de un partito cual promove ofisial comunisme.

La area es sirca 329,560 cilometres cuadrida.

La lingua major es viet.

Xciperia

Xciperia o Albania (ofisial la Republica de Xciperia) es un pais en Europa sude e sude-este. Lo covre 28 748 cilometres cuadrida e ia ave 3 milion abitores en 2016. Lo es un republica constitual parlamental unial, con capital en Tirana, la site la plu poplada de la pais e sua sentro xef de economia e comersia.

Xciperia ocupa la parte sude-ueste de la Penisola Balcan, bordada par Tsernagora a la norde-ueste, Cosovo a la norde-este, Macedonia a la este, e Elas a la sude e sude-este. La tereno es notable diversa, con la Alpes Xcip en la norde, la Montes Corab en la este, la Montes Ceraun en la sude e la Montes Skanderberg en la sentro. Lo ave un costa a la norde de la Mar Mediteraneo, la Mar Adriatica a la ueste e la Mar Ionio a la sude-ueste, forminte la Riviera Xcip. Xciperia es a min ca 72 cilometres de Italia a traversa de la Streta Otranto, cual lia la Mar Adriatica a la Mar Ionica.

En la eda clasica, Xciperia ia es abitada par tribus antica diversa de Iliria, Tracia e Elas, e ance par alga colonias elinica instituida en Iliria. En la sentenio tre aec, la rejion ia es prendeda par Roma e ia deveni un parte de la provinses roman Dalmasia, Macedonia e Mesia Superior. La Prinsia de Arbër ia emerji unida en 1190, instituida par arconte Progon en la Krujë, en la Impero Bizantian. En la tarda de la sentenio 12, Charles de Anjou ia concista la teritorios xcip de la bizantianes e ia institui la Rena de Albania medieval, estendente de Durrës longo la costa asta Butrint en la sude. Esta rena ia cade en la media de la sentenio 15 su domina osmanian.

Xciperia ia emerji como pais moderna en 1912, pos la colasa de la Impero Osmanian e la Geras Balcan. La Rena de Xcip ia es invadeda par Italia en 1939, forminte Albania Grande, ante deveni un protejeda de Deutxland Nazi en 1943. En la anio seguente, un republica poplal sosialiste ia emerji su la gida de Enver Hoxha e la Partito de Labora. La pais ia esperia cambias sosial e political vasta en la eda comuniste, e ia deveni ance isolida de multe de la comunia internasional. Pos la revoluis de 1991, on ia disolve la republica sosialiste e ia institui la Republica cuatro de Xcip.

Xciperia es un pais democrata e developante con un economia de revenu alta-media. La campo de servis domina la economia, segueda par la campos industrial e cultival. Pos la colasa de comunisme en 1990, Xciperia ia cambia de un economia sentrida a un economia de mercato. Lo ave un grado alta en la Indise de Developa Umana e es la numero 37 en la mundo per espeta de vive. Lo furni aida medical universal e educas prima e liseal a sua sitadanes. Lo es un membro de la Nasiones Unida, la Banco Mundal, UNESCO, OTAN, la Organiza Mundal de Comersia, la Consilio de Europa, la Organiza per Securia e Coopera en Europa, e la Organiza de Coopera Muslim. Lo es ance un aspiror ofisial per parteni a la Uni European. Lo es un de la membros fundinte de la Comunia de Enerjia.

La lingua major es xcip.

En otra linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.