Shemot

Shemot (en ivrit שמות, "nombres") es el sigundo livro de la Tora. Es yamado ansina por el sigundo biervo ke aparese eskrito, Ve-ele shemot (i.e., "i éstos son los nombres"). Este livro aze referensia espesialmente a kuando El Dio kitó al puevlo djudio de Ayifto.

Parashot de Shemot

Este livro es meldado en 11 parashot:

  1. Shemot
  2. Vayirá
  3. Bo
  4. Beshalah
  5. Yitró
  6. Mishpatim
  7. Terumá
  8. Tetzavé
  9. Ki Tisá
  10. Vayahel
  11. Pekudé
 
Livros de la Torá
Köln-Tora-und-Innenansicht-Synagoge-Glockengasse-040.JPG

Bereshit | Shemot | Vayikrá | Bamidbar | Dvarim

Agada

La Agadá (del ivrit הגדה, "narrasiyon"), es el teksto ke es meldado enel seder de Pesah, el kualo endemas kontiene la istorya de kuando el pueblo djudio fue kitado de Ayifto, ansina komo aparese eskrito enel livro de Shemot. Kada djudio kale ke melde a sus ijos este afito. La Agadá tiene eskrita la istorya de todo este afito istoriko, el kualo definió al puevlo djudio komo tal, endemas de las tefilot, kantikas i reflanes djudios espesiales de este hag. En verdad no egziste un teksto uniko de Agadá; kada komunita djudia i minhag tiene sus versiyon, asigun la orientasiyon del haham de kada kal. Afilu entreprisas e institusiones pueden tener su propio teksto partikolar de Agadá.

Akademia de artes i desen "Bezalel"

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

La Akademia de artes i desen "Bezalel" es la eskola nasyonala de arte de Israel, fondada enel anyo 1906 por Boris Schatz, i era la primera akademia de arte kriada enel syeklo XX. El su nombre es tomado komo emprestimo de Bezalel, el ijo de Uri (en ivrit: בְּצַלְאֵל בֶּן - אוּרִי‎), el kualo fue yamado por Moshe Rabenu kon el buto de azer el desen i echar un ojo al fraguamyento del Mishkan (Shemot 35:30).

Avraam ben Meir Ibn Ezra

Avraam ben Meir Ibn Ezra (en ivrit אברהם אבן עזרא; en arabo ابن عزرا) era un poeta, linguista, komentador de la Tora, filósofo, astrónomo i médiko. Ibn Ezra nasió en Tudela enel anyo 1092, ke para antonses era parte de la Taifa de Saragosa, gran parte de la su vida la bivió en Espanya. Asigun la leyenda, Ibn Ezra se kazó kon la ija de Yehuda Halevi, kon el kualo tinía una emportante relasion, ma se konose poko del resto de su vida i su famiya. La sigunda i mas konosida epoka de su vida tiene su empesijo enel anyo 1140, kuando fuyó de Espanya verso Roma; se kreye ke el su ijo Itshak izo konversiyon al Islam. Ibn Ezra bivió trokando su residensia de un lado verso otro i esta es la epoka en la kuala eskrivió la mayor parte de sus ovras. En Roma eskrivió su ovra ensiva de la lingua ebrea, Moznei Lashon a-Kodesh i un kurto komentario de los livros de Ijob i Daniel, endemas de tresladar livros de gramatika ebrea del arabo al ivrit. Enel anyo 1145 bivió en Lucca, ande eskrivió un kurto komentario de la Tora, entre otras ovras; dempués se fue a bivir a Verona, ande eskrivió Sefer a-Ibur, Sefer a-Mispar i Safá Brurá. Enel anyo 1147 fuyó verso Provenza i dempués al nord de Fransia, ande eskrivió Ta'amei a-Luhot i Sefer a-Shem, ansina komo komentarios de los livros de Daniel, Teilim, Shir Ashirim i ovras de astrolojiya komo Yesod a-Mispar, Mishpetei a-Mazalot, Sefer a-Moladot i Reshit Hohmá, Sefer a-Te'amim, Sefer a-Mivharim, Sefer a-Me'orot i Sefer a-Olam.

En Fransia se izo amigo del haham Jacob Tam. Enel anyo 1158 se fue a bivir a Londra, ande eskrivió Yesod Mora i endemas Yigeret Shabbat, ma enel anyo 1161 tornó a Narbona, Fransia. Se kreye ke kuando ya estava aedado se fue a Eretz Yisrael. Asigun la leyenda, Ibn Ezra es konosido komo un ombre modesto, el kualo se konformava kon poko i no akseptava un hatir de dinguno. En un manuskrito ke guadrado en la Libreriya Nasionala de Viena se melda: "el sigundo diya de la luna mueva del primér mes de

Adar de 1167, Ibn Ezra murio, de edad de 75 anyos".

Bamidbar

El livro de Bamidbar (grégo:Αριθμοί, arithmoi, ke sinyifika "numeros": en ivrit במדבר, enel desyerto (de Sinai)) es el katreno livro de la Tora. Este livro tiene tres partes:

El puevlo djudio es kuentado enel Sinai i se apresta a sigir su marcha (1–10:10).

El viaje del Sinai asta Moab, el afito de los espias, el raporto de lo ke ankontraron en la Tyerra de Israel i en konsekuensa, el egzilio por 40 anyos (10:11–21:20).

En las tyerras de Moab antes de pasar el Yarden (21:21–36).

Bereshit

Bereshit (en ivrit בְּרֵאשִׁית, Bereshit, "enel empesijo", el kualo es elprimér biervo del livro) es el primer livro de la Tora i endemás el primer livro del Tanah. Asigun Bereshit, el ombre fue kriado a imajen de El Dio, ansina komo El Dio krio el mundo en sesh diyas i en shabbat deskansó. En este livro aparesen varios de los personajes emportantes para el puevlo djudio, komo Noah, Avraam Avinu, Itshak, Yaakov i Yosef Atsadik, por enshemplo. Este livro es meldado en 12 parashot.

Djudaizmo

El Djudaizmo es la relijion monoteísta sigida por el puevlo djudio.

Dvarim

El livro de Dvarim (en ivrit דְּבָרִים, biervos) es el sinkeno livro de la Tora. Este livro es el diskórso kon el kual Moshe Rabenu va despedirsen del puevlo djudio en la rejion de Moab.

Kashrut

El kashrut (del ivrit כַּשְׁרוּת, "korrekto" o "apropiado"; tódu akeyo el kualo kumple kon los preseptos del kashrut es kasher, כָּשֵׁר, konosido tambien por la su pronunsiasiyon en idish, kósher) es la parte de los preseptos del djudaismo la kuala trata de lo ke los djudios pueden i no pueden komer, bazado en los preseptos ke estan en la Tora, en Vayikrá 11. Tales reglas, enterpretadas i ekspandidas a lo largo de los syéklos, determinan kon presisiyon kualo se konsidera puros para ser uzados en la kumida, es dizir, kualos kumplen kon los preseptos de la relijion i kualos no son kasher (estos se yaman, en ivrit, trefá, טְרֵפָה).

Jeneralmente se relasiyona la idea de kashrut kon dos de las kostumbras en kuanto a kumida de los djudios: la ke dize ke las karnes no se deben komer al miesmo tyempo ke los produktos de leche; i la ke aze defendido para los djudios de komer karne de porko en kualkera de las sus formas (Vayikrá 11:7). Esta idea de lo kualo es kasher es sólu un poko korrekta, déke las leyes de kashrut son muncho má grandes i se ekstiende a todos los alimentos i todas las kumidas.

La sinyal etiketada de kasher (afilú es má kolay ankontrar la palavra kosher) ke resiven alkunos produktos indika ke fueron fabrikados respetando las leyes de kashrut i ke antonses se konsideran puros i aptos para ser kumidos por los djudios.

Kidush

Kidush sinyifika Santifikazion. El Kidush es una beraha ke se dize enriva del vino en Shabat i hagim. Egziste el menester de dezir el kidush en la nochada de shabat i en todas las fiestas de la Tora, abzados en la katrena mitsva, la kuala avla de akodrarse del shabat (Shemot 20:8). En la Tora no se avala de dezir la beraha enriva del vino; el uzo de este enel kidush es de muestros hahamim. Endemas se dize kidush en la manyana de Shabat i Hagim, ma eso es mandado por muestros hahamim.

Para el kidush es uzada una kupa de plata, kon una kapachita de al menos un revi'it (150 mililitros). Diskues de ke la persona ke disho el kidush bevio el vino, partaja kon los demas asentados ala meza. Durante el kidush, el pan es vestido kon un panyo para "kitarlo de la meza", deke la beraha dicha para el pan va antes ke la del vino; este panyo endemas es en rekodro del man.

Me'am Lo'ez

Me'am Lo'ez (en ivrit מעם לועז), empesijado por el haham Ya'akov Huli enel anyo 1730, es un livro de komentarios ensima del Tanah eskrito en la lingua djudeo-espanyola i se kreye es el livro amijor konosido en esta lingua.

En los dias del sinyor haham Huli, muncha djente en la Turkiya no tenían muncha konosensya del ivrit kon el buto de meldar i estudiar la Tora i sus komentarios en la lingua orijinala. Antonses el haham Huli dechidió el empesijo del lavoro de kriar un livro enel kual los mas emportantes temas de la Tora puediesen ser meldados en esta lingua. El livro fue partajado de akodro kon la parashat ashavua, i kada detalyo es eksplikado de akódro kon el Midrash i el Talmud. En la su entroduksiyon, el haham Kuli dize ke "kualunke ke meldase el Me'am Lo'ez kada diya va pueder dezir en los Shamayim ke ambezó toda la Tora, ya ke todos los sus aspektos estan enel".

Mezuzá

Mezuzá (en ivrit מְזוּזָה, plural mezuzot) es una kashika la kuala va afiksada al marko de las puertas de las kazas i burós djudios, las kualas guádran ariéntro un pergamino arolyado kon pesukim de la Tora. Es la manera mas kolay de identifikar si la kaza es de un djudio.

Pesah

Pesah (en ivrit פֶּסַח), ke sinyifika literalmente "saltar", es la fiesta judia en la kual se adora y festeja la yegada del puevlo judio de Ayifto, asigun se melda enel livro de Shemot. El pueblo djudio konsidera la kitada de Ayifto komo el empejo de la su vida como nasyon.

Este es uno de los tres hagim yamados Shalosh Regalim del djudaismo, deke en la epoka del Bet Amikdash, la jente de todo Israel vijitava el Bet Amikdash i azía ofrendas.

Este hag dura syete diyas (ocho enel Galut) i durante eya esta defendido komer alimentos echos kon los sinko sereales (trigo, sevada, senteno, avena i espelta) fermentados, yamados en ivrit Hamets (חמץ) (la raíz de este biervo indika "fermentasiyon"). Antonses se kome matsá (מצה) un pan echo sin fermentarsen la masa. Asigun la tradisiyon, los djudios se kitaron de Ayifto kon poko tyémpo i no dio shans de azer fermentar el pan para el kamino, i por esto nase la kreyensya de tener defendido komer hamets.

Durante la priméra noche de la fyesta i las dos primeras noches enel Galut, aze una seudá tradisionala, yamada Leil aSéder o "Séder" (סדר), durante la kuala se melda la Agadá, la istorya de komo los djudios fueron kitados de Ayifto.

Pesah es yamada endemas Hag aAviv, "fyesta de la primavera", deke en Eretz Israel esta estasiyon tiene el su empesijo estos diyas; tambien es yamada Hag Herutenu, la "fyesta de la muestra libberasiyon" i Hag aMatsot, la "fyesta de las Matsot".

Rosh Ashana

Rosh Ashaná (en ivrit: ראש השנה, rosh ha-shānā, "la kabesa del anyo") es el Anyo Muevo espiritual djudio i se fiesta el primero i el sigundo diya de Tishre (un mes en el kalendario ebreo).

Para el empesijo del anyo ebreo egsizten dos kriterios: asigun la Tora, el mes de Nisan (por marso-avril) será el primero de los meses del anyo (Shemot 12:2). Ma dempues, la tradisiyon djudia establesió el empesijo del anyo en el mes de Tishre (por syetiembre-oktobre), kuando se fiesta el Anyo Muevo Djudio o Rosh Ashaná, por konsiderarse kualo es el mes en que El Dio krió el mundo i es a partir de esta selebrasiyon kuando se kuentan los anyos. En este diya, asigún la tradisiyon, fue kriado el primer ombre: Adan.

La fiesta empiesa kuando kae el sol el diya anterior. El shofar se tanye durante sha'hrit. El sonete de este korno, kaji siempre de kodrero, yama a los djudios a la meditasiyon, al avtoanálisis i al arrepentimiento, endemas de rogar de dar sanedad, i huersa para pueder gerreyar kon las difikultades ke las personas rankontran kada diya. Es el primero de los diyas de arrepentimiento i de balanso de las échas i de las aksiyones realisadas, de meldadura i sensibilidá espesialas (Aseret Yemei Teshuva) las kualas akaban kon el Yom Kippur (Díya del Pardón).

Endemas se konose como el Día del Djuzgo i komo el Día del Rekódro déke, asigún la tradisiyon, este diya El Dio djuzga a los ombres, abriendo tres livros: uno, kon los malos (los kualos kedan inskritos i timbrados para la muerte); otro, kon los buenos (los kualos kuedan inskritos i timbrados para la vida), i el treséro, para kenes van ser djuzgados en el Yom Kippur.

Rosh Ashaná (Empesijo del Anyo), endjunto kon Yom Kippur (Diya del Padrón), konforman en la tradisiyon djudia una unidad yamada Yamim Noraim (Diyas Temibles), por ser el momento en kualo El Dio djuzga al mundo i dekreta lo ke va akonteser enel muevo anyo.

El 1º de Tishrei no es sólu el primer diya del anyo, sino endemas la su "kabesa". Ansina komo la kabeza kontrola al resto del puerpo, del mismo modo en este diya se predestinan todos los echos ke van akonteser enel anyo.

Shabat

El shabat, sabá o sabbad es el sieteno diya de la semana i se topa entre el viernes i el alhad. El su nombre da orijin ala ekspresion en lingua latina sábbatum i en mizmo tiempo de la ekspresion en ebreo שבת, shabbat ke sinyifika deskanso. Endemas de esto, el sábbatum es el kriador de la etimolojiya del biervo "sábado" en la lingua kastilyana. Enel djudaismo, los diyas estan definidos al paso del sol; los diyas tienen su empesijo i su fin en la tadre, kuando el sol se eskonde, i no ala media nochada komo en Oksidente. Ansina, el sieteno diya de la semana, el Shabat, tiene el su empesijo el viernes, kuando el sol se eskonde, i eskapa la nochada del sabado. Esta idea tiene el su orijin en la kriasion del 'olam . En esa istorya, El Dio kria el 'olam i todo durante sesh diyas. Enel sieteno diya, El Dio desha de lavorar. De esta manera, los djudios kale ke lavoren los primeros sesh diyas de la semana i diskues deskansar enel Shabat.

En la Tora se melda ke esta defendido lavorar en Shabbat, deke es un diya para deskansar i ambezar la Tora. D'akodro kon la Alaha, en Shabat es el diya de fiesta mas emportante de los djudios, ainda mas emportante ke Rosh Ashana i Yom Kippur . Los mistikos djudios dizen ke el diya de Shabat apresenta un 'olam perfekto; en este 'olam, todos konosen a El Dio i le dan kavod i amor. Eyos dizen ke este tipo de olam no es konosido desde Ganeden i no va pueder ser mirado fina la arivada del Mashiah.

Shirat Ayam

Shirat Ayam (ivrit: שירת הים, Shirat Ayam, endemas konosida komo Az Yashir Moshe) aparese en Sefer Shemot 15:1-18. Diskues aparese en los pesukim 20 i 21 una kansion kurta kantada por Miriam i las otras mujeres. Shirat Ayam (la kansion de la mar) la kantaron los djudios diskues de krusar la mar Kolorada i fiesta la destruksion de la armada de los Ayifsianos de la mano de El Dio i espera la konkista de Kenaan.

La poeziya aparese en los sidurim i es dicha todos los dias en Shah'rit. Endemas, aze parte de la primera oda de la Iglesia Ortodoksa, en la kuala es yamada La Kansion de Moshe Es uzada tambien en la Iglesia Katolika Romana, en la kuala a vezes es yamada del mismo modo.

Sidur

El sidur (en ivrit סידור‎) es el livro uzado por los djudios para meldar enel, kon el buto de azer orden (סדר, seder) al momento de arrogar i azer tefilá. Egzisten munchos tipos de sidurim, tanto para askhenazim komo para sefardim i las tefilot en eyos estan bazadas tanto en la Tora komo enel Talmud.

Enel sidur se topan todas las tefilot ke se dizen en shahrit, minha i arvit, ansina komo endemas otras tefilot espesialas para Shabbat i otras fyestas relijiozas. Para fyestas komo Rosh Ashana, Yom Kippur, Pesah, Shavuot i Sukkot es uzado otro tipo de livro yamado mahzor. Para otras fyestas komo Yom A'atzmaut, egzisten alkunos sidurim ke tienen las tefilot de este diya, ama egzisten otros livrikos espesiales.

Tanah

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

El Tanah (del akronimo en ivrit תַּנַ"ךְ) es el kondjunto de los 24 livros relijiozos djudios. Konforma, endjunto a otros livros, el yamado por los kristyanos Antiko Testamento. Endemas es konosido komo Mikra (מקרא, ke sinyifika "meldadura" o "lo ke es meldado").

Torá

El Pentateuk o la Torá (תּוֹרָה), son los sinko primeros livros de la Biblia o de la Tanah תָּנָ"ךְ (la Biblia Ebrea) ke korresponde a la Viejo Testamento kristiano. Konosidos tambien komo Los Sinko Libros de Moises, i en la traduksiyon del ebreo al gréko en la Septuaginta, komo Pentateuk. Afilú los djudios tambien se refieren a toda la revelasion i ambezanzas djudias komo la Tora.

La Torá es una palabra ebrea ke signifika ambezanza, instruksion, o espesifikamente Ley. En la Tora es la istoria fueron eskritos por Moshe Rabenu, desde de Bereshit asta Debarim, la istoria de la Kriasion del Olam ke antes de la Torah, fueron kontada de padre a ijo ke es konosido komo la Ley Orala ke segundo el djudezmo aze tambien parte de la Torah eskrita

Los sinko libros son Djenesis (Bereshit בְּרֵאשִׁית ), Eksodo (Shemot שְׁמוֹת), Levitik Vaïqrora (וֶיִּקְרָא), Numeros (Bemidbar בְּמִדְבֶּר) i Deuteronomi (Devarim דְּבָרִים). En la version griega de la Tora, estes sinko libros konforman el Pentateuk (del griego πεντάτευχος ke quiere dizir "sinko kontenedores"), Khamishora humshe Tora (חֲמִשָׁה חֻמְּשֵׁי תוֹרָה; ebreo ke quiere dizir "Las sinko partes de la Tora"), i kada uno de eyos es un khummaish (חֻמָּש "quinto").

Los livros an sido redaktados por la fuzion de tekstos diversos, asigun la ipotesis dokumental (ke algunos kritikos estiren a otros volumenes biblikos).

Vayikrá

Vayikrá (en ivrit וַיִּקְרָא, "I el (Dio) yamó") es el tresér livro de la Tora. Enel livro se ankontran las instruksiyones para los leviyim, los kualos azían el lavoro relijiozo.

En otras linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.