Ostere

Ostere, d'r Ostersonndaach eß für de Christe et hüxte Fess em Johr. Aan dämm Sonndaach fiere se, dat Jesus Christus von de Duude op-erstande eß. Et eß et ählste Fess von de Kirch un jeht op et Passah-Fess von de Jüdde zeröck.

Fröhe däät me die Naach vür Ostere waache, öm op et Morjeruud ze waade un sich su op dat huhe Fess enzestimme. Deshalef wutt dat Fess „Eostro“ jenannt, watt em Indojermanische „Morjeruud“ bedück (Althuhdeutsch „Ostarun“).

Ostere wierd am Sonndaach noh em ierschte Vollmoond em Fröhling jefiert, fröhstens am 22. Määrz, spädestens am 25. April. Weil 2008 d'r ierschte Fröhlingsvollmoond op Fröhlingsaanfangk feel, wor Ostere 2008 schon am 23. Määrz.

All bewäächliche Fessdääch werde vom Ostersonndaach uss berechnet: (D'r Fastelovend), Äschermettwoch, de Karwoch, Christi Himmelfahrt, Pingste un Fronleichnam.

Och die andere Sonndääch em Johr sen als Fierdaach von d'r Woch zom Jedenke aan d'r Ostersonndaach jesetzliche Ruhedaach.

Grunewald - christ
Matthias Grünewald, Isenheimer Altar.
Dreikünninge

Op Dreikönninge am 6. Januar, och Dreikönningsdaach jenannt, fiere de Christe en de Oss- wie en de Wesskirch dat Huhfess von d'r Erscheinung vom Herr „Epiphanie“. An dämm Daach hann noh'm Evangelium vom Mattes drei Weise uss em Morjeland, griechisch Anatolië (Μάγοι από ανατολών, „Magoi apo anatolôn“), et Jesuskind besök un imm Weihrooch, Jold un Mürre dajebraat, weil se nem Stään jefolesch wore, dä öwe Bethlehem stonn jebliwe es. Dat Stäänzeiche däät noh ahle Prophezeihunge bedügge, dat dä neue Könning un Messias jeboore es.

De Hillije drei Künninge wooren, esu hëijs_et, ennem Shtän jefollesch, dä inne der Wääsh noh Betlehemm jwiise hätt. Hück weed dä jähn als_enne Komeet met enem Shtätz jemohlt un foshtannde. Dofun eß ävver em Ojinaal nix jesaat, un de Weßßeschaff jläuf hück och miehter aan jët am Naach_Hemmel, wat mer nit fun övverall op de Ääd joot hät beloore künne.

Ne ahle Brauch es, dat zwesche Neujohr un Dreikönninge kleen Pänz, de Stäänsinger, durch de Stroße trecke, für ärm Lück sammele, un öwe jede Huusdür met jeweihte Krick de Aanfangsbuchstabe von Christus Mansionem Benedicat (Christus sään dat Huus) schriewe, für Zweidausenddröckzehn: 20 * C + M + B * 13.

Für Kölle es de Dreikönningsdaach ne janz besonders huhe Fierdaach, weil en singe Stadtmuure de Jebeine von de helije drei Könninge em Dreikönningsschring ruhe, öwe dämm de Kölner Dom jebaut wudde es. De Dreikönninge sen für Kölle su wichtig, dat me suja ihr Krone en et Stadtwappe opjenomme hätt.

De Dreikönningsdaach es en de mietste katholische un orthodoxe Länder e'ne jesetzliche Fierdaach, nur en Nordrhein-Wessfale, wo se lië, net. Un dat es e'ne Skandal, denn für et Erzbißdom Kölle es Dreikönninge sujätt wie e'ne Nationalfierdaach.

Als se zo de Dreikönningsmess 2011 lügge dääte, hätt öwerijens dä Klöppel vom Decke Pitter schlapp jemaat un es éraffjefloore. Kölle moot deshalef für fass e janz Johr op die Lüggerei vom Decke Pitter verzichte. Enzwesche hätt'e äwe widde ne neue Klöppel jekräje un lügg aan Huhfesste schöne als je zevür.

Fronleichnam

Fronleichnam, dat aam zweite Donnerschdaach noh Pingste jefiert wierd, es et färweprächtichste Fess von de katholische Kirch un es de Eucharistie jewidmet. Die meddelhuhdeutsche Öwersetzung von "Corpus Christi" met "vron lichnam" för "Liev vom Herr" joff dämm Fess singe Naam. Aan dä traditionelle Fronleichnams-Prozession durch bloomejeschmöckte Stroße nämme Honoratiore, Handwerker un Jemeindemetjlieder deel. En de Mett von dä Prozession jeht unger'nem Baldachin de Pastur met e'ner staazen Monstranz, en dä et Allerhelichste ussjesatz es. Am Engk von dä Prozession wierd de Eucharistische Sääje jejowe un et Te Deum jesunge.

Fronleichnam hätt me ze-iersch em Bistum Lüttich jefiert, en de Nopperschaff em Erzbisdom Kölle es dann späder 1279 de ierschte Fronleichnamsprozession jejange. Hückzedaach es Fronleichnam en dä mietste katholische Länder e'ne jesätzliche Fierdaach.

En Müllem en Kölle jeht aan Fronleichnam die beröhmte Scheffsprozession Mülheimer Gottestracht, bei dä et Allerhelichste op e'nem jeschmöckte Scheef von de Köln-Düsseldorfer, bejleit durch kleene Scheffe, bes aan die ahle Stadtjrenz von Kölle jefahre weed. Op dä Scheff un aan dä Ufer vom Rhing weed jebääd un de Herrjott en de Monstranz met Jlockelügge un Böllerschöss jejröß.

Op dä Dörpe em Vürjebirsch schmöcke se de Stroße met Bloometeppiche, die nur vom Pastur met de Monstranz beträdde weerde dürfe.

Kirshejoor

Et Kirchejoor rejelt wann de Christe bestimmte Feste un Namensdare fiere. Et jitt Huhfeste wie Weihnachte, Ostere un Pingste, un janz jewöhnliche Dach. Dä Bejriff is em 16. Jahrhundert injeführt wudde, als et ene neue Kalender jov der vun däm vun de Kirch avweeche dät.

Jrundsätzlich han die drei jruße Christliche Kirche, nämlich de Katholische, de Evangelelische un de Orthodoxe, dä gliche Kalender. Et sin äver doch noch jede Menge Ungerscheed dobei.

Osterhaas

Näwe 'em Ei es de Osterhaas et bekannteste Symbol von de Osterbräuch, denn de Haas jilt en Europa ad zick dausende Johre als et Zeiche für et neue Läwe em Fröhjohr.

De Osterhaas, su wie me inn hück kennt, es äwe en Erfindung vom städtisch-evangelische Börjerdom, dat am Aanfangk vom 18. Johondert en Fijur nüdisch hatt, öm dä Pänz aan Ostere de Eie ze brenge, weil se als strenge Protestante jätt jägen de katholische Eieweih hatte.

Pingste

Pingste oddo Pingxte vom Griechische „πεντη κοστή (ἡμέρα)“, op latteinesch: pente coste (hēmera), fiere de Christe fuffzich Daach noh Ostere. Kirchlich jesenn eß et dat Fess vom Hellije Jees, dä övve de Apostele kom, als se met de Modderjoddes Maria en Jerusalem en e'nem Saal sohße un jebätt hann.

Unger em Hellije Jees versteht de Bibel de schöpferische Maach von allem Lävve. Hä eß noh de kirchliche Lier en de Welt jescheck wudde, öm Person, Woord un Werk von uusem Herrjott Jesus Christus lebendich ze haale.

Pingste jilt deshalef als Jebuurtsdaach von d'r Kirch.

Zwesche Hemmelfahrt un Pingste trecke om Land och hück noch Bittprozessione övve de Felde, öm für jood Wädde un en joode Äärnt em Somme ze bädde.

Pooschte

Pooschte oder Posch is dä aahle kölsche Nohme för Ostern. Kütt vun Ostern lateinisch pascha, von hebräisch pessach.

Sonndaach Laetare

Am Sonndaach Laetare (uss_em Latteinesche övversaz heiß dat: „freu Dich“) dämm mettlere Faastesondaach hann die Christe de Hälef von d'r Faastezick hinger sich. Zick Äschermettwoch wor die Zick von Zeröckjetrockenheet jepräch. Aff dämm Sonndaach Laetare solle die Christe äwe fruh dämm Palemsonndaach entjäjesehe, dä für de Enzoch vom Jesus Christus en Jerusalem, dämm singe Opferduud un domet d'r Erlüsung vom Minschejeschläch steht.

Beß en et 19. Johrhundert troat am Sonndaach Laetare d'r Paps en Rom met e'ner joldenen Ruuß vür et Volek. Su wollt hä op die bevürstohnde Karwoch hinwiese. De Ruuß jilt als Sinnbild vum Jesus Christus, un deshalef wierd d'r Sonndach Laetare och Ruuse-Sonndaach jenannt.

En Kölle hät sich am Ruuse-Sonndach 1822 et Fesskomittee jetroffe, un vereinbart, dat 1823 am Mondaach vür Fastelovend ne Fastelovendszoch durch Kölle trecke soll. Doruss eß dann späde de Russemondaach m'em Ruusemondaachszoch entstande. Su hängen Fasteleovend un Ostere, dat hüxte Fess von de Christe, wie e Zwillingspäärche zesamme. Un deshalef eß de Kirch uss'em Fastelovend och net wegzedenke. Zick 2006 jeht d'r Proklamtion vom Dreijestiern suja en feierliche Miss em Kölner Dom op Kölsch vürruss.

Äschermettwoch

Am Äschermettwoch es de Fastelovend vorbei un de Fastezick vür Ostere, die vierzich Daach lang duurt, fängk aan. De Sonndääsch werde dobei net metjezallt. De Fastezick deent dozo, sich innerlich op Ostere vürzebereide.

Am Äschermettwoch wierd en katholische Kirche et Äschekrüx ussgedeelt. Dobei nimmp de Pastur jätt Äsch von ahle verbrannte Palemzweich, un mohlt domet e Krüx op de Stiern von de Jläubije. Dobei säät hä: "Denk doran Minsch, weil de uss Stöbb bes, wiers de widde ze Stöbb werde." (Lateinisch: „Memento homo, quia pulvis es, et in pulverem reverteris“).

Für Katholike es de Äschermettwoch näwe em Karfriedaach ne strenge Fastedaach aan dämm se nur een Mohlzick un kee Fleesch eiße dürfe.

Et Datum vom Äschermettwoch hängk wie bei velle Feste vom Ostersonndaach aff. Donoh es de Äschermettwoch de 45. Daach vür'em Ostersonndaach. Hä kann fröhstens op de 4. Februar un spädestens op de 10. Määrz falle.

2011: 9. Määrz

2012: 22. Februar

2013: 13. Februar

2014: 5. Määrz

2015: 18. Februar

En ander Schprohche

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.