Канму

Канму — этӧ котырлӧн политика структура.

Америкаись Ӧтлаасьӧм Штаттэз

Америкаись Ӧтлаасьӧм Штаттэз, дженыта АӦШ (ингл. United States of America, USA, эсп. Estados Unidos de América) — ыджыт канму Ойвыв Америкаын. Мушар вылас супервын.

АÖШ-ыслöн под мувывторыс куйлö Лöнь океансянь рытвылын да Атлантика океанöдз асыввылын. Ойвылас сія межаасьö Канадакöт, лунвылас Мексикакöт. Торйын куйлö Аляска Америка — континент ойвыв-асыввыв помын да Гавайи — діэз вылын Лöнь океанын. Быдсöн штаттэз 50-а.

Канкарыс Вашингтон, сулалö асыввыв вадöрын.

Ватикан

Ватика́н (латин кыв вылын: Civitas Vaticana, ит. Città del Vaticano, м.ш.: Ватикан кар) — медучӧт канму му югытын. Куйлӧ Европаын, Итальяись канкар Рома пытшкын. Мезмыт канмуӧн Ватикан лыддиссьӧ сысянь, мыля татӧн олӧ Ромаись Папа, христиана-католиккезлӧн вежа ай.

Италья

Италья (ит. Italia [iˈtaːlja], роч. Италия) — итальян отирлӧн канму Европа лунвылын, Мушӧр саридз ареал медшӧрын. Куйлӧ Апеннин кӧдж вылын, По волькытінын, Альпаэз лунвыв покаттэз вылын, а сідзжӧ Сардиння, Січилья да эшӧ кынымкӧ поснитжык ді вылын.

Ойвылас Итальян республика межаасьӧ Франскӧт (488 км кузя визирыс), Швейцармукӧт (740 км), Австриякӧт (430 км) да Словениякӧт (232 км). Италья пытшкын куйлӧны кык учӧтик канму: Ватикан (визиррес 3,2 км кузяӧсь) да Сан Марино (39 км).

Канкар Итальяын — Рома.

Ӧння мувывтор вылас ӧтувья канму лоис итальяннэзлӧн 1861 годӧ, кӧр быдӧс регионнэз ӧтлаасисӧ да аркмис Королевство Италья. Республика татчӧ лӧсьӧтӧмась 1946 восянь. Талун Итальяыс олӧ Ӧтласа Европаын, пырӧ Шенген зонаӧ да Еврозонаӧ.

Казахстан

Казахстан нето Казахму (казах кыв вылын: Қазақстан) — казах отирлӧн канму асыввыв Европаын да рытвыв Азияын.

Кина

Кина нето Джунго (рочöн Китай, хань кыв вылын 中国 - 中华人民共和国 ) — Асыввыв Азияын ыджыт канму. Тыр нимыс — Китай отир республика. Оліссез лыд сьӧрті Китайыс медодзза канму Мушар вылас.

Ордчӧн Китайыскӧт куйлӧны сэтшӧм канмуэз: Рочму, Монголму, Ойвыв Корея, Тайвань, Вьетнам, Лаос, Мьянма, Индия, Бутан, Непал, Афганистан, Таджикистан, Кыргызстан, Казахстан.

Асыввылас Китай паськыта (14 500 км кузя вадӧрыс) петӧ океан дорӧ. Татӧн куйлӧны: Корея курья, Асыввыв Китай саридз, Веж саридз, Лунвыв Китай саридз.

Мӧсква

Мӧсква (роч. Москва) — Роч мулӧн канкар, Роч Федерация видзантор.

Роч канму понда Мӧсква – быдӧс. Татӧн чукӧртӧмӧсь роч политика, культура, наука да бизнес зорӧтан медыджыт выннэз.

Норвег

Норвег (букмол вылын: Norge, нюнорск вылын: Noreg, роч. Норвегия) — норман отирлӧн канму Ойвыв Европаын, Скандинав кӧдж рытвыв ладорын.

Мӧдік муэзкӧт Норвег межаасьӧ токӧ асыввылын; татӧн сыкӧт ордчӧн куйлӧны Рочму, Суоми да Шведму. Лунвылас, саридз вис сайын, Норвег вылӧ видзӧтӧ Данмарк. Ойвылын канму петӧ Баренц саридз дорӧ, рытвылын – Норвег саридз дорӧ, лунвыв-рытвылын – Ойвыв саридз дорӧ.

Сэсся Норвег видзӧ Арктикаын Свальбард архипелаг да Ян Маен ді, а сідзжӧ Буве ді Антарктида дорын.

Перем ладор

Перем ладор (рочӧнжык Перемскӧй край) — Роч Федерация видзантор. Куйлӧ Кама ю бассейнын, Урал керӧссэз одзын. Ордчӧн Перем ладоркӧт куйлӧны: ойланьын – Коми Республика, асыввылын – Свердлов лапӧв, лунвылын – Башкыр Республика, рытвылын – Удмурт Республика да Киров лапӧв.

Мувывторыслӧн ыжда – 160 600 км². Оліссез – 2 708 419 морт (01.01.2009). Перем ладорлӧн шӧрин – Перем кар.

Перем ладор вӧлі аркмӧтӧм Перем лапӧв да Перем комиэзлӧн асвеськӧтлан кытш ӧтлаӧтӧмӧн. Коми кытш эта коста лоис тодильнӧй статуса мувывторӧн Перем ладорын.

Перем ладорлӧн медваж отир – комиэз. Медодз татӧн вӧлі Ыджыт Перем канму. XV векын роч кан вынӧн босьтіс Перем му ас кипод увтӧ. 1781' годö вӧлі аркмӧтӧм Перем губерния, 1923' годӧ вӧлі лӧсьӧтӧм Урал лапӧв (шӧриныс – Свердлов кар), 1934' годӧ – Свердлов лапӧв, 1938' годӧ вӧлі торйӧтӧм Перем лапӧв, кӧда 1940'–1957' воэзӧ шусис Молотов лапӧлӧн. 2005' годся декаб 1 лунсянь – Перем ладор.

Медыджыт юралісьыс Перем ладорын – губернаторыс. Ӧні губернаторын пукалӧ Чиркунов Олег.

Перем ладорись Коми кытш

Пе́рем ла́дорись Ко́ми кытш (рочӧнжык Коми-Пермя́цкӧй о́круг Пе́ремскӧй кра́йын) — ассяма статуса мувывтор Роч Федерацияын, Перем ладорас. Куйлӧ Урал одзын, Кама йыввезын. Коми отирлӧн чужанін. Коми йӧзыслӧн мӧд чужан му — Коми Республика, куйлӧ Коми кытшсяняс ойвылынжык.

Коми кытшыслӧн мувывтор — 32,77 сюрс км². Оліссез — 127 сюрс морт (2009), ны коласын комиэз 60,2%. Веськӧтлан шӧрин — Кудымкар. Кытшас 6 район: Гайна, Кӧс, Кӧч, Кудымкар, Юрла да Юсьва гӧгӧртасын. Кытшас дзир ӧтік кар — Кудымкар, ӧтік карок — Пожва, 30 посад, 66 посёлок да 590 грезд (деревня).

Кытшыс аркмӧма 1925' годӧ февраль 26' лунӧ. Медодз пырӧ вӧлі Урал (Свердловск) лапӧлӧ (областьӧ), а 1938 во бӧрын — Перем (Молотов) лапӧлӧ. 1993'-2005' воэзӧ вӧлі Роч Федерациялӧ субъектӧн, шусис Перем комиэзлӧн асъюралан кытш. 2005' годся декаб 1' лунсянь, асъюралӧмыс вӧлі вештӧма да, Коми кытшыс лоис ассяма статуса мувывторӧн вились аркмӧтӧм Перем ладорын.

Медыджыт мортӧн Коми кытшын лыддисьӧ Перемсянь иньдӧм министр. Сылӧн эм аслас веськӧтлан, рочӧн шусьӧ Перем ладорлӧн Коми кытш делоэз сьӧрті министерство. Медодзза министрӧн 2005'-2008' воэзӧ вӧлі Баяндин Валерий. Сэсся, 2008' год помсянь, Коми кытш сьӧрті уджалісь министрын пукаліс Быкариз Игорь, а 2012 во юньсянь Рычков Виктор.

Кытшыс олӧ Урал кад сьӧрті: муюгыт (Гринвидз) кад + 5 час (гожумнас + 6 час), Мӧсква кад + 2 час.

Сьӧмнас Коми кытшын лыддисьӧ роч шать (руб). 1 шать = 100 ур.

Унажык отир олӧны вӧр лэдзӧмӧн, тшак-ягӧд да йӧв-яй вузалӧмӧн, мукӧдыс уджалӧны кысъялан сфераын.

Коми кытшын абу кодя кӧрттуйез. Кудмыкарсянь кӧрттуй дынӧдз (Менделеёв нима поз дынӧдз) колӧ мунны 100 км.

Польска

Польска нето Полякму (поляк кыв вылын: Polska, роч. Польша) — поляк отирлӧн республика, ыджыткодь канму Европа шӧрын. Канму поляккезлӧн лоис 966 годӧ, кӧр ӧксай Мешко I пыртчис Христосаэз коласӧ. Полякму ӧштіс мезмӧтсӧ 1795 воын, кӧр сійӧ янсӧтісӧ ас коласаныс роччез, немеччез да австрияккез. Вились мезмыт канмуӧн Польскаыт лоис 1918 годӧ, кӧр разьсисӧ Роч да Немеч империяэз. Ордчӧн Полякмукӧт ӧні куйлӧны татшӧм канмуэз: Немечму, Ческо, Словенско, Украина, Беларусь, Летува да Рочмулӧн анклав Калининград лапӧв. Ойвылас канму петӧ Балты саридз дорӧ.

Португал

Португал (порт.: Portugal, роч. Португалия) — важынся канму лун-рытвыв Европаын, Ибер кӧдж вылын.

Межаасьӧ ойвылас да асыввылас Эспаннякӧт, рытвылас да лунвылас петӧ Атлантика океан дорӧ.

Канму пырӧ ӦВК-ӧ, Ӧтласа Европаӧ да НАТО-ӧ.

Рочму

Рочму (тыр нимыс: Роч Федерация, рочӧнжык Россия, Российскӧй Федерация) — медпаськыт канму Мушар вылын. Куйлӧ Европа асыввылын да Азия ойвылын. Роч Федерацияӧ пырӧны Коми Республика да Перем ладор, коми отирлӧн горт муэз.

Роч Федерациялӧн канкар – Мӧсква.

Канмуын юралӧны президент да премьер-министр. Президентын Рочмуас ӧні пукалӧ Путин Владимир, премьер-министрӧн уджалӧ Медведев Дмитрий.

Веськӧтлан ютыр Роч Федерацияын – Ӧтласа Рочму.

Сан Марино

Сан Марино (ит. San Marino, рочӧнжык Сан-Марино) – учӧтичок канму Европа лунвылын, Аппенин кӧдж вылын. Европаын сія медваж канму. Быдладорсянь кытшӧвтӧм Итальяӧн, куйлӧ регионнэс Эмилия-Романья да Марке коласын, неылын Адрия саридзсянь. Канму янсӧтчӧ ӧкмыс кастелло вылӧ.

Суоми

Суоми нето Финму (су. Suomi, шв. Finland, роч. Финляндия) – ыджыт канму Асыввыв Европа ойвылын, суоми отирлӧн горт му. Пырӧ Ӧтласа Европаӧ да Шенген зонаӧ.

Ӧтласа мувывторнас Суоми лоис 1809' годсянь, кӧр финнэз муыслӧ дӧнзис автономия Роч империя пытшкын. Октябся революция бӧрын, 1917' восянь Финму лоис мезмыт канмуӧн.

Талун Суоми видзӧ визир куим канмукӧт: асыввылас куйлӧ Рочму, ойвыв-рытвылас – Шведму, ойвылас – Норвег. Лунвылас да рытвылас Суоми петӧ Балты саридз дорӧ, татӧн шыль видзӧны Фин курья да Похья курья.

Тюркия

Тюркия (тюрк. Türkiye) – тюрк отирлӧн канму асыввыв Европаын да рытвыв Азияын. Аркмис 1920 воэз пондӧтчикӧ, Осман империя разьсьӧм бӧрын.

Тюркиякӧт ордчӧн куйлӧны сэтшӧм канмуэз: рытвылас – Бӧлгария да Эллада, лунвылас – Ирак да Сурия, асыввылас – Иран, Азербайджан, Аястан да Картвелму. Тюрккезлӧн республика куйлӧ Мушӧр саридз (лунвылын), Сьӧд саридз (ойвылын) да Эгеида саридз (асыввылын) коласын. Ыджытжык торыс – Учӧт Азия (Анадолу) кӧджын, неыджыт торокыс – асыввыв Фракияын

bölge (бёльге = регион) : 7 бёльге.→ il (иль = ладор, провинча) : 81 иль.

→ ilçe (ильче = район) : 957 ильче.

→ bucak (буджак = уезд) : 634 буджак.

→ belde (бельде = карок) : 2254 бельде.

→ köy (кёй = посад) : 34 247 кёй.

Украина

Украина – (украинса кыв вылын Україна [ukrɑˈjinɑ]) – ыджыт канму Асыввыв Европаын. Украина му вылын дыр кад сьӧрна быдмис роч канму, сэсся муыс шедліс Польска короллез да Мӧсква саррез увтӧ. Роч революция бӧрын Украина лоис республикӧн Советскӧй Союзын, а 1991 годӧ, СССР разьсикӧ – мезмыт канмуӧн.

Талуня Украина куйлӧ сизим канму коласын, сы гӧгӧр: Рочму, Ромыния, Молдова, Мадьярму, Словенско, Польска, Беларусь. Лунвылас Украина паськыта петӧ Сьӧд саридз дорӧ.

Швайсму

Швайсму (нем. Schweiz, фр. Suisse, ит. Svizzera, рмч. Svizra, роч. Швейцария) – мезмыт канму Европа шӧрын, куйлӧ Альпа керӧссэзын, саридз дорӧ оз пет.

Ордчӧн Швайсмукӧт куйлӧны: Франс рытвылын, Немечму войвылын, Австрия да Лихтенштайн асыввылын да Италья лунвылын.

Ыджыт Бритму

Ыджыт Бритму да Ойвыв Ирму Ӧтлаӧтан Канму (дженытжык – Ыджыт Бритму нето Ӧтлаӧтан Канму, ингл. Great Britain нето United Kingdom, рочӧнжык Великобритания нето Соединённӧй Королевство) – важынся вына канму Рытвыв Европа дорын, Ыджыт Бритму ді вылын. Бритму видзӧ ас кипод увтын ойладорас Скотланд, Оркней да Гебрид діэз, лунвылын – Норман діэз да сэсся эшӧ вит сюрс мымда поснитжык діок, а сідзжӧ веськӧтлӧ Ирму ді ойвыв-асыввылын, кытӧн куйлӧ сылӧн провинция Ойвыв Ирму. Этія провинция межаасьӧ мезмыт Ир республикакӧт, кӧда петіс Брит Ӧтувтчӧмись 1949 годӧ. Сідз-ту Ӧтлаӧтан Канмуын талун нёль тор: Ингланд, Скотланд, Кӧмры да Ойвыв Ирму.

Асыввывсянь Ыджыт Бритму пӧлӧн куйлӧ Ойвыв саридз, лунвывсянь – Ла Манш да Па дэ Кале виссэз, кӧдна мӧдӧрын, континентас, му видзӧ Франс. Рытвывлань Ыджыт Бритму вадӧр шӧр пӧлӧн куйлӧ Ир саридз, а ойвывсянь, рытвывсянь да лун-рытвывсянь – Атлантика океан.

Ыджыт Бритму – ӦВК-ись Повтӧг олан сьӧрті советын пырся инвидзись, пырӧ НАТО-ӧ да Ӧтласа Европаӧ.

Эспання

Эспання (эсп. España, кат. Espanya, баск Espainia, роч. Испания) – мезмыт канму лунвыв-рытвыв Европаын, Ибер кӧдж вылын.

Межаасьӧ рытвылас Португалкӧт, ойвылас Франскӧт да Андорракӧт, лунвылас брит колония Гибралтаркӧт да Магрибкӧт (Ойвыв Африкаын). Рытвылас Эспанняыс петӧ Атлантика океан дорӧ, асыввылас – Мушӧр саридз дорӧ.

Канму пырӧ ӦВК-ӧ, Ӧтласа Европаӧ да НАТО-ӧ.

Эстму

Эстму (эст. Eesti, роч. Эстония) – эст отирлӧн канму Асыввыв Европаын, Балты саридз дорын. Канмуыс эсттэзлӧн аркмис 1918' годӧ, но 1940'–1941' да 1944'–1991' воэзӧ сія вӧлі Советскӧй Союз увтын, а 1941'–1944' годдэзӧ – Куимӧт рейхын. Бӧр мезмыт канмуӧн Эстму лоис вӧлись 1991' годӧ, СССР разьсикӧ.

Талун Эстму межаасьӧ кык канмукӧт: асыввылас куйлӧ Рочму, а лунвылас Латвия. Рытвылас канму петӧ Рига курья дорӧ, а ойвылас Фин курья дорӧ. Фин курья пыр Эстму йитчӧ Суомикӧт, а Балты саридз пыр – Шведмукӧт.

Мöдiк кыввез вылын

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.