Poerjan Empaya

Di Poerjan Empaya a heni a di siiriz a himpiirial dainasti senta ina Poerja (Iran). Di fos a demya eh-extablish bai Sairos di Griet ina 550 BKE, wid di Poerjan kangkues a Media, Lidia ah Babiluonia. Nof lieta dainasti "kliem se dem a ier a di Akimenid".

Empire Perse
Eroduotos

Eroduotos (Ienshent Griik: Ἡρόδοτος Hēródotos, pronongx [hɛː.ró.do.tos]) wena wah Griik istuorian uu weh-baan ina Alikaanasos ina di Poerjan Empaya (madan-die Bodrum, Toerki) ah lib ina di fif senchri bifuor Krais (c. 484–c. 425 BKI), kantempareri wid Sakratiiz.

Ischri a India

Di ischri a hIndia taat wid di Indus Vali Siblaizieshan, we pred an gruo ina di naat-wes paat a di Indian sobkantinent, frah c. 3300 tu 1300 BKE. Di Machior Arapan piiriad laas frah 2600-1900 BKI. Di Branz Iej siblaizieshan ya kalaps a di taat a di sekan mileniom BKE an weh kom bifuo di Aiyan Iej Vedik piiriad. Ina disya piiriad piipl akiupai muos a di Indo-Ganjetik plien, pah we nof mieja kindom kumop ina wa wi kaal di Mahajanapadas. Ina wan a di kindom Magadha, Mahavira ah Gautaama Buda eh-baan ina di 6t senchri BKE, ah deh pred dehn Sharamanik filasafi mongx demya piipl.

Afta dat, nof ada empaya koh ruul di riijan, ah mek di kolcha rich - frah di Akemenid Poerjan empaya roun 543 BKE, tu Aligzanda di Griet ina 326 BKE. Di Indo-Griik Kindom, we Dimichrios a Bakchria fain, weh ingkluud Gandhara ah Punjab frah 184 BKE; iriich di piik a di siblaizieshan anda Menader, uu set-op di Greko-Budis piiriad wid nof advaans ina chried ah kolcha.

Di Sobkantinent yuunait anda di Maurian Empaya juurin di 4t ah 3d senchri BKE. Afta dat ibrokop wid difrah-difrah paat anda sepret liidaship ina wuoliip a Migl Kindom fi di nex ten senchri. Di nadan riijandem yuunait agen ina di 4t senchri KE, ah tan so fi tuu senchri afta dat, anda di Gupta Empaya. Da piiriad ya, we si Induu rilijos an intilekchwal kom bak, binuon az di "Guolin Iej ina India." Ina da siem taim ya, ah fi nof senchri afta, Sodan India, anda di ruul a di Chalukias, Cholas, Palavas ah Pandias, ab iwona guolin iej, ina we Indian siblaizieshan, adminischrieshan, kolcha, ah rilijan (Induizim ah Budizim) pred gaa di res a Ieja.

Kerala weh av chried lingk wid di Ruoman Empaya frah roun 77 KE. Muzlim ruul uoba di riijan taat ina 712 KE wen di Arab jinaral Muhamed bin Kasim kangka Sind ah Multan ina sodan Punjab, ah set di stiej fi nof ada inviejan bitwiin di 10t ah 15t senchri KE frah Senchral Ieja, ah liid tu di faamieshan a kopl Muzlim empaya ina di Indian sobkantinent, laka di Gaznavid, di Gorid, di Deli Soltanet, ah di Muugal Empaya. Muugal ruul gruo fi kova muos a di nadan paatdem a di sobkantinent. Di Muugal ruula dem inchajuus migl-iistan aat ah aachitecha tu India. Ada dah di Muugaldem, nof indipendant Induu stiet, laka di Vijayanagara Empaya, di Maratha Empaya, di Ahom Kindom ah difrah-difrah Rajput kindom, kumop ina westan, sodan, ah naat-iis India ina da aada. Di Muugal Empaiya taat fi gi wie ina di hoerli 18t senchri, an gi apachuniti fi di Afgan, Balochis ah di Siix fi exasaiz kanchuol uoba nof ieria ina di naatwes a di sobkantinent antel di British Iis India Kompini get fi kanchuol di wuola Sout Ieja.

Frah di migl a di 18t senchri ah uoba di nex senchri, India get ad aan tu di British Iis India Kompini. Di Fos Waar a Indian Indipendans brokout kaa di piipldem neva laik di ruulaship a di kompini, an afta dat di British Kroun ruul India dairekli. Dis a di taat a wah piiriad a nof divelopment ina infaschrokcha an ikanamik diklain.

Ina di fos aaf a di 20t senchri, di Indian Nashinal Kanggres ah den di Muzlim Liig, laanch wah schroggl fi indipendans kraas di wuola di konchri. Di sobkantinent get indipendans frah Griet Britn ina 1947, afta dem paati aaf ina India ah Pakistan.

Sairos di Griet

Sairos di Griet, adawaiz nuo az Sairos II a Persia ah Sairos di Elda, wena di fos Zoroaschrian Poerjan empara. Im a weh di founda fi di Poerjan Empaya anda di Akiminid dainasti, we kombout widoutn eni ada istarikal empaya. Iwena wah wol empaya wid mieja istarikal impuotans. A weh anda fiim ruul we di empaya kova aal a di siblaiz stietdem we eh-egzis ina di Nier Iis. Ihexpan nof-nof, ah ivenchali kangka muos a Soutwes Ieja ah muos a senchral Ieja, frah Iijip ah di Elispant ina di wes tu di Indus Riva ina di iis, fi mek di bigis empaya ina di wol op tu da paint de. Di rien a Sairus laas bout 30 ier. Ih eh-bilop ih empaya chuu waar ah kangka fos di Midian Empaya den di Lidian Empaya, ah den di Nio-Babiluonian Empaya. Aida bifuo ar afta Babilan, ih liid wah expidishan ina Senchral Ieja. Sairos neba go ina Iijip kaa ih get kil ina bakl, wen im ena-fait aaf di Sidiandem langsaid di Sir Daria ina Disemba 530 BKI. Ih pozishan go tu ih son, Kambaisiiz II, uu manij fi had tu di empaya wen ih kangka Iijip, Nyuubia, ah Sirenaika, alduo ih neh ruul fi lang. Az a milichri liida, Sairos lef nof gud lesn pah di aat a liidaship ah disijan mekin. Sairos di Griet eh-rispek di kostom ah rilijandem a di landem we ih kangka. Apaat fran ih uona nieshan, Iran, Sairos lef gud-gud legisi pah Juwish rilijan (chuu di Iidik a Restarieshan), yuuman raits, palitix, ah milichri chratiji, ah pan Iistan ah Westan siblizieshan.

Ina ada langwij

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.