Chried

Chried, ar kamoers, invalv di chanzfor a di uonaship a gudz ar saabis, frah wan poersn ar entiti tu waneda, ina hexchienj fi rimyuunarieshan, gudz ar saabis. Netwok we lou chried kaal maakit.

Wojciech Gerson - Gdańsk in the XVII century
Gdańsk
Accarias de Sérionne - Intérêts des nations de l'Europe, dévélopés relativement au commerce, 1766 - 5790093
Intérêts des nations de l'Europe, dévélopés relativement au commerce, 1766
Abalishanizam

Abalishanizam wehna muuvment fi hen di slieb chried ahn himansipiet di sliebdem ina westan Yuurop ahn di Amorkadem. Nobadi moch no protes di slieb sistim tel di 18t senchri, wen rashanalis tinkadem a di hInlaitnment kritisaizi fi vayaliet yuuman rait, ahn Kwieka ahn ada els ivanjelikal rilijos gruup kandemi az an-Kristian. Duo antisliebri sentiment wehn waidpred bai liet 18t senchri, iab likl imidiet ifek pahn di sentadem a sliebri iself — di Wes Indiz, Sout Amorka, ahn di sodorn Yunaitid Stiet. Di himpuotieshan a hAfrikan slieb wehn ban ina di British kalanidem ina 1807, ahn ina di Yunaitid Stiet ina 1808. Ina di British Wes Indiz, sliebri abalish ina 1827 ahn ina di French pozeshandem 15 ier lieta.

Ina Britn, Wiliam Wilbafuos (William Wilberforce) wehn tek aan di kaaz a abalishan ina 1787 afta di faamieshan a di Komiti fi di Abalishan a di Slieb Chried, ush ihn liid ina Paalimenchri kiampien fi abalish di slieb chried ina di British Empaya wid di Slieb Chried Ak 1807. Ihn alzwel kiampien fi di abalishan a sliebri ina di British Empaya, ahn ihn lib fi siit ina di Sliebri Abalishan Ak 1833.

Wel-nuoon Abalishanisdem inkluudn buot blak piipl, ahn wait piipl we nehn sopuot sliebri:

Tusaahn Luubatyuo

Ariet Tobman

Jan Broun

Ariet Biicha Stuo

Janz Apkinz

Frejrik Doglas

Enri Dievid Turuo

Aligzanda Bostamanti

Sar Wiliam Aligzanda Claak Bostamanti ar Sir William Alexander Clarke Bustamante, GBE (24 Febiweri 1884 – 6 Aagos 1977) wena Jumiekan palitishan ah lieba liida uu wena di fos praim minista a Jumieka. Bostamanti hana ina Jumieka wid di taikl Nashinal Iiro a Jumieka ina rekanishan a ih achiivment.

Atlantik sliev chried

Di Atlantik sliev chried ar chranzatlantik sliev chried tek plies kraas di Atlantik Uoshan frah di 15t chuu tu di 19t senchri. Di vaas majariti a demde we insliev ah weh chanspuot tu di Nyuu Wol, nof chuu di chrayanggiula chried ruut ah di Migl Pachiz, ena Wes Afrikan frah di senchral ah westan paat a di kantinent we get sel bai ada westan Afrikan tu westan Yuropian sliev chrieda, wid wah sumaal mainariti we get kiapcha dairekli bai di sliev chriedadem ina kuostal ried, ah kyaa kom a di Amoerkaz.

Baabiedoz

Baabiedoz de iis a di Kiaribiyan Sii, an a wah indipendant kantinental ailan nieshan ina di Westan Atlantik Uoshan. Ide bout 13° naat a di ikwieta ah 59° wes a di praim meridian; istil kansida paat a di Lesa Antiliiz. Di ailandem we kluosis tui a Sin Vinsn ah di Grenidiinz, ah Sin Luusha tu di wes. Chrinidad ah Tubiego de tu di sout, ah nou ab set maritaim baada wid Baadiedoz. Di tuotal lan ieria a bout 430 skwier kilamita (166 skwier mail). Baabiedoz lan muosli flat, wid soh fyuu aya ieria ina di migl a di konchri. Di ayis paint a Mount Ilabi ina Sint Anju Parish.

Di jaalajikal kompozishan a Baadiedoz a frah non-volkianik arijin, ah mekop a muosli laimstuon-karal faam ina sobdokshan a di Sout Amoerkan pliet we kalaidop ina di Kiaribiyan pliet. Di ailan ab chrapikal klaimit, wid chried win aafa di Atlantik Uoshan we kip di tempicha mail. Som a di lesa divelop paat a di konchri ab chrapikal udlan ah manggruov. Ada paat a di inlan we di agrikolchral indoschri fuokos ab wuoliip a shuga kien estiet ah waid, jengkl sluopin paascha lan, we ab bunununus vyuu dong tu di kuos.

Baabiedoz ab wah ai Yuuman Divelopment Index. Ina 2006, irangk 31s ina di wuol wol, an tod ina di Amoerkaz, biyain Kianada ah di Yunaitid Stiet.

Chanspuot

Chanspuot ar chanspotieshan a di muuvment a piipl, animal ah gudz frah wan lokieshan tu aneda. Muod a chanspuot ingkluud ier, riel, ruod, waata, kiebl, paiplain ah spies. Di fiil kiah divaidop ina infachokcha, viikl ah aparieshan. Chanspuot impuotant bikaa ihiniebl chried bitwiin piipl, we isenshal fi di divelopment a siblizieshan.

Farin rilieshan a Jumieka

Jumieka ab diplumatik rilieshan wid muos nieshan an a memba a di Yunaitid Nieshan ah di Aaganizieshan a Amoerkan Stiet. Jumieka chier di Wokin Gruup pah sumaala Ikanami.

Jumieka a haktiv memba a di Kamanwelt a Nieshan ah di Nan-Alain Muuvment (G-77). Jumieka a benifisheri a di Luomi Kanvenshan, chuu we di Yuropiyan Yuunian (EU) grant chried prefrans tu silek stiet ina Ieja, di Kiaribiyan, ah di Pasifik. Di konchri plie liidn ruol ina nigoshieshan a di soxesa agriiment ina Fiji ina 2000.

Iej a Diskovri

Di Iej a Diskovri, alzwel nuo az di Iej a hExpluorieshan, wehna piiriad ina ischri we taat ina di 15t Senchri ahn kantiniu tu di 19t Senchri, juurin wen Yuuropian ahn Yuuropian disendant expluor di wol bai uoshan a-saach fi chriedn paadna ahn potikiula chried gudz. Di muos dizaya chriedn gudz wehna guol, silba ahn paisdem. Westan Yuuropiandem yuuz di kompas, nyuu sielin ship teknalaji, nyuu map, ahn hadvans ina aschranami fi siik vayobl chried ruut tu Ieja fi valyuebl pais ush uda bi ankantes bai di Meditarienian powadem. Az for az shipin advans, di muos impuotant divelopment wehn di krieshan a di karak ahn karavel dizaindem ina Potiugal. Demaya vesl ivalv frahn midiival Yuuropian dizain frahn di Naat Sii ahn buot di Kristian ahn Izlamik Meditarienian. Dema di fos ship wa kuda lef di relitivli plasid ahn kiaam Meditarienian, Baltik ar Naat Sii ahn siel sief-sief pahn di hopin Atlantik.

Ischri a Jumieka

Jumieka a wan a di bigis Kyaribiyan ailan dem, pan we Arawak nietiv piipl yuuz tu liv. Wen Krixtifa Kolombos riich di ailan, im uon op di lan fi Spien. Bot stil, i neva riili get kolonaiz antil afta im ded. Fyuu dekied afta im ded, almuos aal a di Arawak dem wehn ded aaf. Spien afi difen di konchri gens nof nof ried fran di bokanier dem pan di mien siti, Spanish Toun. Ingglan ivenchali kyapcha di ailan ina 1655, suh di Spanish dem lego sum a di slave dem. Di Spanish dem did kum back inna 1658 fi try fi recyaptcha Jumieka, but dem did lose tuh di English agen.Jumieka den go ton bies fi di haparieshan a di bokanier dem, inkluudn Kyaptin Henry Morgan. Chuu evribadi wehn fried a di bokanier dem, dem manij fi protek di ailan fram di ada koluonial powa dem. Afrikan piipl wehn get kyapcha, kidnap, ahn fuos ina slievri fi wok pahn plaantieshan wen shugakien ton di ailan bigis expuot.

Nof nof sliev kom a Jumieka chuu di Atlantik sliev chried wen ensliev Afrikan piipl kom a Naat Amerika. Fram de taim de, wuoliip a rieshal tenshan wehn de bout, an Jumieka wehn ab wan a di haiyis riet a sliev ribelyan outa aal a di Kyaribiyan ailan dem. Afta di British kroun abalish slievri, di Jumiekan de taat wok tuwaadz indipendens. Sins indipendens, di konchri hexpiiriens nof palitikal ahn ikanamik distorbans, we di kraim prablem we no tap gruo mek wos. Stil, di konchri kyan proud se i prajuus fyuu chreng palitikal liidaz.

Jumieka

Jumieka (vierieshan Jamieka ah Jomieka askaadn tu spiich rejista ar axent) a wah ailan nieshan we a paat a di Grieta hAntiliiz, bout 234 kilamiita (145 mail) lang ah bout 80 kilamiita (50 mail) waid. Ide ina di Kiaribiyan Sii, bout 145 kilamiita (90 mail) sout a Kyuuba, ah 190 kilamiita (120 mail) wes a di ailan we niem Ispanyuola, we mekop frah Ieti ah di Daminikan Ripoblik.

Di fos piipl dem we eh lib ina Jumieka, wena di Taino we eh-taak Arawak. Deh eh-niem di ailant Xaymaca (pronouns laka zai-ma-ka), we miin iida di "Lan a ud ah waata", ar "Lan a Spring". Spien ena di fos Yuropiyan konchri fi kliem Jumieka ah deh eh niemi Santiaago. Lieta Britn eh teki frah dem ah toni ina British Wes Indiz Kroun Kalani we niem Jumieka. Iget Indipendans frah Britn ina 1962 bot stil tan ina di Kamanwelt a Nieshan wid Kwiin Ilizibet II az di ed a stiet. Di kiapital a Kinston.

Jumieka ab di tod nofis piipl we chat Ingglish ina Naat Amoerka, afta Moerka ah Kianada ina da siem aada. Jumieka ab bout 5 milian sitizn wid likl anda aaf a dem a-lib ina wah nex konchri. Muos a di maigrantdem de a Moerka, Kianada ah Britn bot di dayaspora pred uoba di wuol wol. Di bigis indoschri a baxait ah tuurizam. Soh ada indoschri a kaafi, koko, shuga, rom, sichros ah banaana.

Jumieka piipl dem taak wah Ingglish-bies kriyuol Languij we deh kaal Patwa, ar jos Jumiekan. Ibies muosli pah 17t senchri Ingglish we deh tiich di Afrikan slievdem mix wid som a deh uona Wes Afrikan languij, ah likl bit a lef-bak Panish ah Puotigiis. Som a di languij koh frah di kolchadem we mekop Jumieka kolcha tu. Alduo di Jumiekan lexikan a muosli Ingglish, di grama a mienli Wes Afrikan; yu kiah fain soh similariti ina Naijiirian Pijin Ingglish.

Iibn duo a wah liili konchri, Jumieka gi di wol wuoliip ina myuuzik, spuots, rilijan ah wid Maakos Gyaavi elp, Blak Nashinalizim.

Jumiekan Frii Zuondem

Di Jumiekan Frii Zuondem a gobament frii-chried zuon inishitiv ina Jumieka.

Jumiekan Kryuol

Jumiekan Patwa a di nashinal langwij a di konchri a Jumieka. Alduo hIngglish a di hofishal langwij a Jumieka, ahn dehn aal av wa dehn kaal Jumiekan Ingglish, a muosli bakra ahn tapanaaris yu ie wid i ina hofishal sorkl, anles smadi a chrai piiki-puoki fi himpres piipl. Noftaim, Jumiekan piipl muuv bitwiin di braad Patwa ahn Jumiekan Ingglish wen dem de taak, aal iina di siem sentens.

Kiapitalizam

Kiapitalizam a wahn iikanamik sistim we welt, ahn di miinz fi projuus welt, praivitli uon. Chruu kiapitalizam, di lan, lieba, ahn kiapital uon, apariet, ahn chried fi di porpos a jinariet prafit, widoutn fuos ar fraad, bai praivit indivijual aida singli ar jaintli, ahn invesment, dischibyuushan, inkom, prodokshan, praisin ahn soplai a gudz, kamaditi ahn saabis ditormin bai valiunteri praivit disijan ina maakit iikanami. Wan distinggwishin fiicha a kiapitalizam a dat ebri dege smadi uon fi im ar fi har uona lieba ahn dierfuor lou fi sel di yuus a it tu hemplaya dem. Ina "kiapitalis stiet", praivit rait dem ahn prapati rilieshan dem protek bai di ruul a laa a limitid regiulietari friemwok. Ina di madorn kiapitalis stiet, lejislietiv akshan kanfain tu difain ahn infuos di biesik ruul dem a di maakit, duo di stiet maita provaid som poblik gudz ahn infrachokcha.

Naaman Manli

Naaman Washintan Manli ar Norman Washington Manley MM, QC, Nashinal Iiro a Jumieka (4 Julai 1893 – 2 Septemba 1969), wena Jumiekan stietsman. Wah Ruodz Skala, Manli eh-bikomps wan a Jumieka liidn laaya ina di 1920z. Manli wena advoket a yunivoersal sofrij, we eh-grant bai di British koluonial gobanment tu di kalani ina 1944.

Tugiada wid Azman Fierklof (Osmond Fairclough), di bredadem Frangk ah Ken Il (Frank and Ken Hill), Edli P. Jiekobz (Hedley P. Jacobs, nuo bai ih inishal H.P. Jiekobz) a soh ada wandem, ina 1938 ih foun di Piipl Nashinal Paati we lieta weh tai tu di Chried Yuunian Kanggres (Trade Union Congress,TUC) ah iibm lieta tu di Nashinal Woka Yuunian (National Workers Union, NWU). Ih liid di PNP ina ebri ilekshan frah 1944 tu 1967. Deh efat rizolt ina di Nyuu Kanstityuushan a 1944, we grant ful adolt sofrij.

Manli saab az di kalani Chiif Minista frah 1955 tu 1959, ah az Primier frah 1959 tu 1962. Ih wena propuonent a self-gobanment bot eh-poswied fi jain nain ada British kalani ina di Kiaribiyan terichri ina di Fedarieshan a di Wes Indiz bot ih kaal refarendom pah di ishu ina 1961. Di vuotadem chuuz fi mek Jumieka witjraa frah di yuunian. Manli den ap fi kaal jinaral ilekshan iibm duo ih faib-ier mandiet eh bieli aafwe chuu. Ih laas di ilekshan tu ih kozn Aligzanda Bostamanti a di Jumieka Lieba Paati we liid di konchri tu Indipendans.

Panish

Panish (Panish: español/castellano) a wah romans languij we kombout ina nadan Spien, ah den likl bai likl ivalv ina di mien languij ina gobament ah chried. Afta dat, bitwiin di fiftiint ah di naintiint senchri, juurin koluonial expanshan, ipred gaa Afrika, di Amoerkaz, Ieja ah di Pasifik.

Tide, eniwe frah 322 tu 400 milian piipl taak Panish az dem fos languij. Dis meki aida di sekan ar tod languij we piipl taak di muos az deh fos languij ina di wol, dipen pan di suos we yu riid.

Panish a-pred laka faya az sekan ar tod languij kaaza lajistix, ikanamix, ah tuoris inchres tuwaadz di wuoliip a konchridem wepaat Panish a di fos languij. Yu muosli nuotis dis ina konchri laka Brazil, di Yunaitid Stiet, Itali, Puotigal, Frans, ah muos a di hIngglish taakin konchridem.

Slievri

Slievri a liigal ar ikanamik sistim we prinsipl a prapati laa aplai tu yuuman lou dem fi klasifai az prapati, we kiah uon, bai ah sel bai di uona, ah deh kyaah witjraa yunilatarali frah di arienjment. Wails smadi a sliev, di uona ingtaikl tu di prodoktiviti a di sliev lieba, widoutn no rimiunarieshan. Di raits ah protekshan a di sliev maita regiuliet bai laa ah kostom ina soertn taim ah plies, ah smadi kiah bikom sliev frah di taim deh kiapcha, poerchis ar baan.

Tide, chatl slievri anlaaful ina haal konchri, bot smadi kiah stil diskraib az sliev ef ih fuos fi wok fi waneda smadi widoutn no abiliti fi dehself fi yunilatarali toerminiet di arienjment. Soch sititieshan tide kamanli refa tu az "praktis komiin laka slievri". Di prezent faam a di sliev chried kamanli refa tu az yuuman chrafikin.

Vejitebl

Ina ebridie yuusij, vejitebl a heni paat a plaant we kansyuum bai yuuman az fuud fi paat a wah sievari miil. Di toerm "vejitebl" somwat aabichreri, ah laajli difain chuu kolineri ah kolchral chradishan. Inaamali exkluud ada fuud diraiv frah plaant laka fruut, not ah siirial grien, bot ingkluud siid laka pols. Di arijinal miinin a di wod vejitebl, stil yuuz ina bailoji, weh fi diskraib aal taip a plaant, laka ina di toerm "vejitebl kindom" ah "vejitebl mata".

Arijinali, vejitebl eh-kalek frah bush bai onta-giadara ah enta koltivieshan ina sebral paat a di wol, prababli juurin di piiriad 10,000 BKE tu 7,000 BKE, wen nyuu agrikolchral wie a laif eh-divelop. Fos ting, plaant we gruo luokali wuda eh-koltiviet, bot az taim gwaan, chried kyaa egzatik krap koh frah elswe fi had tu domestik taipdem. Nowadiez, muos vejitebl gruo aal uoba di wol az ou klaimit pomit, ah krop kiah koltiviet ina protek invairament ina les suutebl lokieshan. Chaina a di laajis projuusa a vegitebl, ah gluobal chried ina agrikolchral prodok lou kansyuuma fi poerchis vejitebl we eh-gruo ina for-for konchri. Di skiel a prodokshan vieri frah sobsistans faama we soplai di niid a deh fambili fi fuud, tu agribiniz wid singkuma iekrij a singgl-prodok krap. Dipen pah di taip a vejitebl kansoern, aavis a di krap fala bai griedin, stuorin, pruosesin ah maakitin.

Wiit

Wiit (Triticum spp.) a siirial grien, (botanikali, a taip a fruut kaal a kiariapsis) arijinali frah di Levant riijan a di Nier Iis bot nou koltiviet wolwaid. Ina 2013, wol prodokshan a wiit ena 713 milian ton, meki di tod muos-projjuus siirial afta kaan (1,016 milian ton) ah rais (745 milian ton). Wiit ena di sekan muos-projuus siirial ina 2009; wol prodokshan in dat ier ena 682 milian ton, afta kaan (817 milian ton), ah wid rais az kluos tod (679 milian ton).Dis grien gruo pah muo lan ieria dah heni adaels kamoershal fuud. Wol chried ina wiit grieta dah fi aal ada krap kombain. Gluobali wiit a di liidn suos a vejitebl pruotiin ina yuuman fuud, sens iab aya pruotiin kantent dah ada mieja siirial, kaan, ar rais. In toermz a tuotal prodokshan tonij yuuz fi fuud, a korantli sekan tu rais az di mien yuuman fuud krap ah bifuo kaan, afta lou fi kaan muo hextensiv yuus ina animal fiidn. Di aakialajikal rekaad sojes se dis eh fos okor ina di riijan nuo az di Foertail Krisent.

Wol Chried Aaganizieshan

Di Wol Chried Aaganizieshan (WTO) a wah intagobamental aaganizieshan we regiuliet intanashinal chried. Di WTO ofishali komens pah 1 Janiweri 1995 anda di Marakesh Agriiment, sain bai 123 nieshan pah 15 Iepril 1994, fi riplies di Jinaral Agriiment pah Tarif ah Chried (GATT), we eh-komens ina 1948. Di WTO diil wid regiulieshan a chried bitwiin paatisipietin konchri bai provaid di friemwok fi nigoshiet chried agriiment ah dispyuut rezaluushan pruoses we iem fi infuos paatisipant adierans tu WTO agriiment, we eh-sain bai riprizentitiv a memba gobament ah ratifai bai deh paaliment.[7] Muos a di ishu we di WTO fuokos pah diraiv frah priivos chried nigoshieshan, espeshal frah di Yurugwai Rong (1986–1994).

Yunaitid Stiet

Di Yunaitid Stiet a Amoerka (kamanli refa tu az di Yunaitid Stiet, di U.S., di USA, ar Moerka) a wah fedaral kanstitiushanal ripoblik kampraiz a fifti stiet, wahn fedaral dischrik ahn 16 terichries. Di konchri sitiet muosli ina senchral Naat Amoerka, we i faati-iet kantigyuos stiet ahn Washintan D.C. di kiapital distrik, de bitwiin di Pasifik ahn hAtlantik Uoshan, buoda bai Kianada tu di naat ahn Mexiko tu di sout. Di stiet a hAlaska de ina di naatwes a di kantinent, wid Kianada tui hiis ahn Rosha tu di wes kraas di Bierin Schriet. Di stiet a Awayi a wahn haachipelago ina di migl-Pasifik. Di konchri haalso pozes sebral teritori, ar insiula yeria, kyata-kyata roun di Kyaribiyan ahn Pasifik. Di U.S. a di toerd-laajis konchri baka Rosha ah Kianada wid a ieria a 9,826,675 skwier kilamita, ah av di toerd aies papilieshan ina di woerl. Dem a wahn a di muos rieshali, etnikali ahn kolchrali daivers konchri dem ina di woerl kaazn seh uol iip a piipl maigriet frah difran-difran konchri go liv de. Di jaagrafi ah klaimit a di Yunaitid Stiet wel-daivers tu so di konchri av nof-nof viraiati a wail-laif.

Di Pielo-Indian dem weh maigriet frah Yuurieja tu di mienlan Yunaitid Stiet rong 15,000 yier nong ah Yuropian kolonaizieshan staat ina di 16t senchri. Di Yunaitid Stiet staat out wid 13 British koloni pah di iis kuos. Deh weh av soh ranglinz wid di British ahn a dat weh caaz di Amoerkan Rivaluushan. Pah Julai 4, 1776, wen di koloni deh weh a fait ina di Amoerkan Rivaluushineri Waar, di deliget deh frah di 13 koloni dem yuunanimosli adap di deklarieshan a indipendens. Di waar weh don ina 1783 ah di British dem rekagnaiz di indipendens a di Yunaitid Stiet, di fos soksesful waar fi indipendens gens wah Yuuropian koluonial empaya. Di Yunaitid Stiet adap di kanstitiushan pah Setemba 7, 1787 ah di stiet deh ratifai ih ina 1788. Di fos ten amenment dem, nuon tugeda az di Bil a Raits, weh ratifai ina 1791 ah weh dizain fi gyarantii nof a di fondamental sivl raits ah libati dem.

Di Yunaitid Stiet weh biliiv ina di dakchrin a Manifes Destini, wah biliif se di sekla dem weh destin fi pred-out aal uova Naat Amoerka, so ina di 19t senchri deh shub-out nof-nof a di Amoerkan Indian chraib dem so deh kuda kliem nyuu terichri ah tek iin nyuu stiet. Bai 1948 deh weh pred-out aal uova di kantinent. Rung di sekan aaf a di 19t senchri, di Amoerkan Sivl Waar caaz slievri fi don ina di konchri ah bai di 19t senchri fi don, deh weh pred-out az faar az di Pasifik Uoshan. Deh taim ya di ikanami weh a gwaan gud mienli bikaaz a di Indoschrial Rivaluushan. Di Panish-Amoerkan Waar ah Woerl Waar I put di Yunaitid Stiet pah tap az wa gluobal militeri powa ah afta Woerl Waar II di wuol woerl rakagnaiz dem az a suupapowa. Dis a weh caaz deh weh a di ongl konchri fi divilop nyuklier wepan ah yuuz dem fi fait war, ah deh weh a poermanent memba a di Yunaitid Nieshan Sikioriti Kounsl. Wen di Kuol Waar weh don ah di Suoviet Yunian weh mash-op ina 1991, di Yunaitid Stiet kum out az di ongl suupapowa ina di woerl.

Di Yunaitid Stiet a we deh kaal divelop konchri so dat miin tu se dem a wa ai hinkom konchri. Dem av di laajis nashinal ikanami ina di woerl bies aafa naminal ah riil GDP - 23% a woerl GDP. Disya diraiv frah di wol iip a nachral risuos we deh gat, ah deh ai lieba prodoktiviti. Iivn duo deh kansida az puos-indoschrial, deh stil du nof-nof manifakcharin ahn a wan a di laajis manifakchara ina di woerl. Dem alsuo a di laajis militeri powa ina di woerl, siin az deh akount fi wola 34% a gluobal militeri spending. So, deh av di biges militeri ah ikanami, deh lob pred deh palitix aal bout, deh kolcha laaj aal uova di woerl, ah deh elp divelop nof-nof sayantifik ah teknalajikal inavieshan.

Ina ada langwij

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.