Branz Iej

Di Branz Iej a taim piiriad kiaraktaraiz bai di yuus a branz, pruoto-raitn, ah adaels hoerli fiicha a oerban sivilizieshan.

Asiria

Asiria, wah mieja Mesopotiemian Iis Simitik kindom ah empaya a di Ienshent Nier Iis, egzis az indipendant stiet frah paravencha az hoerli az di 25f senchri BKE, tel ikalaps bitwiin 612 BKE ah 599 BKE, ispan frah di migl tu Hoerli Branz Iej chuu tu di liet Ayan Iej.

Ayan Iej

Di Ayan Iej a di piiriad we jinarali okor afta di Branz Iej, maak bai di prevalent yuus a ayan. Ayan prodokshan nuo fi eh-tek plies ina Anatuolia akliis az hoerli az 1200 BKE, wid soh kantemporeri aakiolajikal evidens we paint tu hoerlia diet.

Bifuo-Ischri

Bifuo ischri a wahn torm yuuz fi diskraib di piiriad bifuo ischri rait dong. I kyahn yuuz fi refa tu aal taim sins di taat a di yuunivors, alsuo di torm yuuz muo aafn fi diskraib di piiriad sins wen laif de pan di ort. Bifuo ischri wid yuuman divaid op wid di Chrii iej sistim, bot skala uu stodi bifuo-yuuman taim piiriad yuuz di klier Rak rekaad n di intanashinal schraatom bies we difain i ina di jaalajikal taim skiel. Di chrii iej sistim a di divijan a bifuo-ischri wid yuuman ina chrii kansekitiv taim piiriad, we niem afta di mien tuul mekin teknalaji in adat de taim de:

Di Tuon Iej

Di Branz Iej

Di Ayan Iej‎Di invenshan a raitin matiirial (an di taat a istarikal taim) difrent frahn kolcha tu kolcha, bot muosli klasifai ina aida di branz iej ar di aiyan iej. Muo ahn muo, istuorian dipen pahn evidens frahn di nachral an suoshal saiyans, an no jos ritn rekaad. Wid dis, dem mek di difrens bitwiin ischri an bifuo ischri les klier.

Indo-Yuropiyan languij

Indo-Yuropiyan languij a fambili a sebral onjrid rilietid languij ah dayalek. Deh ab bout 445 libn Indo-Yuropiyan languij, askaadn tu di estimet bai Ethnologue, wid uoba tuu-toerd (313) a dem bilangx tu di Indo-Iranian branch.[2] Di Indo-Yuropiyan fambili ingkluud muos mieja korant languij a Yuurop, ah paat a Westan, Senchral ah Sout Ieja. Iweh pridaminant tu ina ienshent Anatuolia (tide-die Toerki), ah di ienshent Tarim Biesn (tide-die Naatwes Chaina) ah muos a Senchral Ieja optel die inviejan ah maigrieshan a Toerkik spiika espeshali juurin di Mangol–Toerkik kangkues ina di 13t senchri. Wid raitdong evidens wa apier sens di Branz Iej ina di faam a di Anatuolian languij ah Maisinian Griik, di Indo-Yuropiyan fambili signifikant tu di fiil a istarikal linguistix fi pozes di sekan-langgis rikaadid ischri, afta di Afroyejiatik fambili.

Indus Vali Sivilizieshan

Di Indus Vali Sivilizieshan (IVS) wena Branz Iej sivilizieshan (3300–1300 BKE; machior piiriad 2600–1900 BKE) we hexten frah wa tide a naatiis Afganistan tu Pakistan ah naatwes India. Alang wid Ienshent Iijip ah Mesopotiemia iwena wan a chrii hoerli sivilizieshan a di Uol Wol, ah outa di chrii di wan we predout di muos.

Ischri

Ischri (frah Griik ἱστορία, historia, miinin "ingkwairi, nalij akwaya bai investigieshan") a di todi a di paas, potikiula ou iriliet tu yuuman. Ia wah ambrela toerm we riliet tu paas ivent azwel di memri, diskovri, kalekshan, aaganizieshan, prezentieshan, ah intoerpritieshan a infamieshan bout demya ivent. Skala uu rait bout ischri kaal istuorian. Ivent we okor praya tu raitdong rekaad kansida priischri.

Ischri kiah azwel refa tu di akademik disiplin we yuuz naritiv fi egzamin ah analaiz siikuens a paas ivent, ah abjektivli ditoermin di patan a kaaz ah ifek we ditoermin dem. Istuorian sohtaim dibiet di niecha a ischri ah iyuusfulnis bai diskos di todi a di disiplin az a hen ina iself ah az a wie fi provaid "pospektiv" pah di prablem a di prezent.

Tuori kaman tu potikiula kolcha bot no supuot bai extoernal suos (laka di tuoridem bout King Aata), yuujali klasifai az kolchral eritij ar lejin, bikaa deh no shuo di "disinchrestid investigieshan" rikwaya a di disiplin a ischri. Eroduotus, wah 5f-senchri BKE Griik istuorian kansida widin di Westan chradishan fi bi di "faada a ischri", ah, langsaida ih kantempareri Tuusididiiz, elp faam di foundieshan fi di madan todi a yuuman ischri. Piipl kantiniu fi riid deh wok tide, ah di giap bitwiin di kolcha-fuokos Eroduotos ah di milichri-fuokos Tuusididiiz rimien a paint a kantenshan ar apruoch ina madan istarikal raitn. Ina Ieja, wah stiet kranikl, di Pring ah Aatom Anal eh-nuo fi bi kompail frah az hoerli az 722 BKE alduo onggl 2n senchri BKE tex sovaiv.

Ienshent influens eh-elp spaan vieriant intoerpritieshan a di niecha a ischri we eh-ivalv uoba di senchri ah kantiniu fi chienj tide. Di madan todi a ischri waid-rienjin, ah ingkluud di todi a spisifik riijan ah di todi a soertn tapikal ar tiimatikal eliment a istarikal investigieshan. Noftaim ischri tiich az paat a praimri ah sekanderi edikieshan, ah di akademik todi a ischri a mieja disiplin ina yunivoersiti todi.

Ischri a India

Di ischri a hIndia taat wid di Indus Vali Siblaizieshan, we pred an gruo ina di naat-wes paat a di Indian sobkantinent, frah c. 3300 tu 1300 BKE. Di Machior Arapan piiriad laas frah 2600-1900 BKI. Di Branz Iej siblaizieshan ya kalaps a di taat a di sekan mileniom BKE an weh kom bifuo di Aiyan Iej Vedik piiriad. Ina disya piiriad piipl akiupai muos a di Indo-Ganjetik plien, pah we nof mieja kindom kumop ina wa wi kaal di Mahajanapadas. Ina wan a di kindom Magadha, Mahavira ah Gautaama Buda eh-baan ina di 6t senchri BKE, ah deh pred dehn Sharamanik filasafi mongx demya piipl.

Afta dat, nof ada empaya koh ruul di riijan, ah mek di kolcha rich - frah di Akemenid Poerjan empaya roun 543 BKE, tu Aligzanda di Griet ina 326 BKE. Di Indo-Griik Kindom, we Dimichrios a Bakchria fain, weh ingkluud Gandhara ah Punjab frah 184 BKE; iriich di piik a di siblaizieshan anda Menader, uu set-op di Greko-Budis piiriad wid nof advaans ina chried ah kolcha.

Di Sobkantinent yuunait anda di Maurian Empaya juurin di 4t ah 3d senchri BKE. Afta dat ibrokop wid difrah-difrah paat anda sepret liidaship ina wuoliip a Migl Kindom fi di nex ten senchri. Di nadan riijandem yuunait agen ina di 4t senchri KE, ah tan so fi tuu senchri afta dat, anda di Gupta Empaya. Da piiriad ya, we si Induu rilijos an intilekchwal kom bak, binuon az di "Guolin Iej ina India." Ina da siem taim ya, ah fi nof senchri afta, Sodan India, anda di ruul a di Chalukias, Cholas, Palavas ah Pandias, ab iwona guolin iej, ina we Indian siblaizieshan, adminischrieshan, kolcha, ah rilijan (Induizim ah Budizim) pred gaa di res a Ieja.

Kerala weh av chried lingk wid di Ruoman Empaya frah roun 77 KE. Muzlim ruul uoba di riijan taat ina 712 KE wen di Arab jinaral Muhamed bin Kasim kangka Sind ah Multan ina sodan Punjab, ah set di stiej fi nof ada inviejan bitwiin di 10t ah 15t senchri KE frah Senchral Ieja, ah liid tu di faamieshan a kopl Muzlim empaya ina di Indian sobkantinent, laka di Gaznavid, di Gorid, di Deli Soltanet, ah di Muugal Empaya. Muugal ruul gruo fi kova muos a di nadan paatdem a di sobkantinent. Di Muugal ruula dem inchajuus migl-iistan aat ah aachitecha tu India. Ada dah di Muugaldem, nof indipendant Induu stiet, laka di Vijayanagara Empaya, di Maratha Empaya, di Ahom Kindom ah difrah-difrah Rajput kindom, kumop ina westan, sodan, ah naat-iis India ina da aada. Di Muugal Empaiya taat fi gi wie ina di hoerli 18t senchri, an gi apachuniti fi di Afgan, Balochis ah di Siix fi exasaiz kanchuol uoba nof ieria ina di naatwes a di sobkantinent antel di British Iis India Kompini get fi kanchuol di wuola Sout Ieja.

Frah di migl a di 18t senchri ah uoba di nex senchri, India get ad aan tu di British Iis India Kompini. Di Fos Waar a Indian Indipendans brokout kaa di piipldem neva laik di ruulaship a di kompini, an afta dat di British Kroun ruul India dairekli. Dis a di taat a wah piiriad a nof divelopment ina infaschrokcha an ikanamik diklain.

Ina di fos aaf a di 20t senchri, di Indian Nashinal Kanggres ah den di Muzlim Liig, laanch wah schroggl fi indipendans kraas di wuola di konchri. Di sobkantinent get indipendans frah Griet Britn ina 1947, afta dem paati aaf ina India ah Pakistan.

Ischri a Yuurop

Di ischri a Yuurop diskraib di taim frahm wen yuuman inabit di yuuropian kantinet tu nou. Di fos evidens a Homo sapiens ina Yuurop diet bak tu 35,000 BC, di Yuuropian Pieliolitik piiriad. Wen seklment, agrikolcha, an domestikietid laivstak kom bout a di taat a di Niolitik piiriad, we a roun 7000 BC. Frahn di fos sivilaizieshan fi yuuz raitin tu di taim wen di sivilaizieshan disapier fi wahn likl taim, branz wehna di metal we piipl yuuz fi tuu an wepan. Istuorian liebl de piiriad ya di Branz Iej.

Di klasikal antikwiti ina Yuurop diet frahn wen raitin kom bak bout ina Ienchent Griis roun 700 BC. Di Ruoman Ripoblik establish ina 509 BC. Di Ruoman dem expan dem terichri uova Itali, den uova di Meditarienian biesn an Westan Yuurop. Di kristian rilijan ton liigal anda empara Constantine ina di 4t senchri AD. Ina fyuu jenarieshan, i ton di ofishal rilijan a di empaiya.

Wahn chret tu di powa a di Ruoman empaiya kom bout frahn di Arabian peninsula an di piipl dem uu yunait aanda Izlam. Ina westan Yuurop, nof a di nyuu stiet dem wehn onggl av Latn raitin, a fyuu Ruoman kostom, an di kristian rilijan in kaman. Muos a di kristian terichri ina di wes kom bout aanda di ruul a di Frangks, espeshali Charlemagne, uu di puop kround az di westan empara ina 800. Demya sosaiyati ya faam di bakbuon a di Yuurop we wi nuo tide.

Di ischri a yuurop tai op wid di ischri a di worl ina di madorn iej, az yuurop liid explorieshan an kanggwes kraas di gluob, and influens piipl frahn di Amerikaz tu di Pasifik, tu Afrika.

Ina ada langwij

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.