Gmejna

Gmejna je najmjeńši administratiwny wotdźěl statow. Sydło gmejnskeho zarjadnistwa je zwjetša radnica. W Němskej je gmejna nošerka komunalneho samozarjadnistwa. Parlament gmejny je gmejnska rada; hłowa je wjesnjanosta abo měšćanosta.

Někotre gmejny dźěłaja w zarjadniskich zwjazkach zhromadnje, kaž na přikład Chrósćicy, Njebjelčicy, Pančicy-Kukow, Ralbicy-Róžant a Worklecy w zarjadniskim zwjazku „Při klóšterskej wodźe“.

Budestecy

Budestecy (němsce Großpostwitz) su wjes a gmejna w Hornjej Łužicy, ležaca w Sprjewinym dole mjez Lubinom a Mnišoncom něhdźe sydom kilometrow južnje Budyšina.

Hač na Jiłocy słušeja wšitke gmejnske dźěle oficielnje do serbskeho sydlenskeho ruma.

Susodne gmejny su Kubšicy na sewjerowuchodźe, Kumwałd na juhowuchodźe, město Šěrachow-Korzym na juhu, Hornja Hórka na zapadźe a wulke wokrjesne město Budyšin na sewjerozapadźe.

Bukecy

Bukecy (němsce Hochkirch) su wjes a gmejna we wuchodźe hornjołužiskeho wokrjesa Budyšin. Leža při zwjazkowej dróze 6 mjez Budyšinom a Lubijom. Gmejnski teritorij rozpřestrěwa so w hornjołužiskich zahonach wot wjerškow Čornoboha a Rubježneho hroda w juhu nimale hač do doliny Lubaty w sewjeru. Wjes sama ma 701 wobydlerjow.Nimo Wujezda słušeja wšitke gmejnske dźěle oficielnje do serbskeho sydlenskeho ruma.

Bóšicy

Bóšicy (němsce Puschwitz) su wjes a gmejna něhdźe dwanaće kilometrow sewjerozapadnje Budyšina w Hornjej Łužicy. Słušeja ke zarjadniskemu zjednoćenstwu Njeswačidło. Gmejna je po ličbje wobydlerstwa najmjeńša w Budyskim wokrjesu a pjata najmjeńša cyłeje Sakskeje.

Gmejna słuša do připóznateho sydlenskeho ruma Serbow w Sakskej. Wosebje w Jaseńcy, Łusču, Nowej Jaseńcy a na Horje rěči wulki dźěl wobydlerstwa serbsce.

Chrósćicy

Chrósćicy (němsce Crostwitz) su wjes a gmejna w Hornjej Łužicy, kotraž leži w serbskich Horjanach něhdźe dwanaće kilometrow wuchodnje města Kamjenc. Gmejna słuša k zarjadniskemu zwjazkej „Při Klóšterskej wodźe”.

Wjace hač 90 % ludnosće wobknježi serbšćinu a němčinu a wjele wobydlerjow ma serbšćinu jako maćeršćinu.

Žiwe nabožne žiwjenje słuša k serbsko-katolskej tradiciji. W ludowym erće so husto praji zo su Chrósćicy srjedźišćo serbskeje Hornjeje Łužicy.

Přez Chrósćicy běži rěčka Satkula.

Dobruša-Huska

Dobruša-Huska (němsce Doberschau-Gaußig) je gmejna w hornjołužiskim wokrjesu Budyšin, juhozapadnje wulkeho wokrjesneho města Budyšin, kotraž je so w lěće 1999 z dotalneju gmejnow Huska a Hnašecy-Dobruša wutworiła. Sydło gmejnskeho zarjada so w Hnašecach namaka.

Hač na Kosarnju a Nowu Wjes słušeja wšitke gmejnske dźěle oficielnje do serbskeho sydlenskeho ruma.

Susodne gmejny su Hodźij a Budyšin w sewjeru, Hornja Hórka we wuchodźe, Wjelećin w juhowuchodźe, Wjazońca w juhu a Smělna-Póckowy kaž tež Zemicy-Tumicy w zapadźe.

Halštrowska Hola

Halštrowska Hola (němsce Elsterheide) je gmejna při Čornym Halštrowje w sakskim wokrjesu Budyšin. Po přestrjeni druha najwjetša gmejna Budyskeho wokrjesu leži sewjernje Wojerec w samym sewjeru Hornjej Łužicy a słuša k něhdyšemu Łužiskim brunicowym rewěrej.

Gmejna słuša do připóznateho sydlenskeho ruma Serbow w Sakskej.

Hamor

Hamor (prjedy tež Hamory; němsce Boxberg/O.L.) je wjes a gmejna w sewjeru sakskeho wokrjesa Zhorjelc. Leži 129 m nad mórskej hładźinu we Łužiskim brunicowym rewěrje a ma wokoło 5400 wobydlerjow. Hamor je stejišćo Hamorskeje milinarnje, jedneje z najwjetšich brunicowych milinarnjow w Němskej.

Gmejna słuša oficielnje do serbskeho sydlenskeho ruma.

Hodźij

Hodźij (němsce Göda) je wjes a gmejna w Hornjej Łužicy, zapadnje Budyšina. Wjes sama ma 906 wobydlerjow, gmejna wokoło 3.000.

Cyła gmejna słuša oficielnje do serbskeho sydlenskeho ruma.

Hornja Hórka

Hornja Hórka (němsce Obergurig) je wjes a gmejna w Hornjej Łužicy. Leži pod Mnišoncom při Sprjewi. Po přestrjeni je wona druha najmjeńša gmejna Budyskeho wokrjesa.

Cyła gmejna słuša oficielnje do serbskeho sydlenskeho ruma.

Kubšicy

Kubšicy (němsce Kubschütz) su wjes a gmejna w hornjołužiskim wokrjesu Budyšin. Gmejnski teritorij rozpřestrěwa so w hornjołužiskich honach wot wjerškow Hromadnika a Čornoboha w juhu hač k zwjazkowej awtodróze 4 a Albrechtowce w sewjeru.

Wjes sama ma 443 wobydlerjow, gmejna wokoło 2.500.

Cyła gmejna słuša oficielnje do serbskeho sydlenskeho ruma.

Malešecy

Malešecy (němsce Malschwitz) su wjes a přisłušaca gmejna něhdźe šěsć kilometrow sewjerowuchodnje Budyšina w Sakskej. Gmejna, kotruž Sprjewja w zapadźe přeběži, leži w Hornjej Łužicy.

Gmejna słuša do připóznateho sydlenskeho ruma Serbow w Sakskej.

Njeswačidło

Njeswačidło (němsce Neschwitz) je wjes a gmejna w Hornjej Łužicy, sewjernje Budyšina.

Gmejna słuša do připóznateho sydlenskeho ruma Serbow w Sakskej. Wosebje we wjeskach na zapadźe gmejny so hač do dźensnišeho serbsce rěči.

Pančicy-Kukow

Pančicy-Kukow (němsce Panschwitz-Kuckau) je hornjołužiska gmejna a wjeska w sakskim wokrjesu Budyšin. Gmejna słuša k zarjadniskemu zwjazkej „Při Klóšterskej wodźe“ a k serbskemu sydlenskemu rumej a leži něhdźe dźewjeć kilometrow juhowuchodnje Kamjenca w serbskich Horjanach. Pančicy-Kukow ma wokoło 2.200 wobydlerjow, wot kotrychž je něhdźe połojca we wsy samej žiwa. W lěće 2001 rěčachu 49,7 % wobydlerstwa serbsce.

Radwor

Radwor (po starym prawopisu Radwoŕ; němsce Radibor) je wjes a přisłušaca gmejna we wokrjesu Budyšin w Hornjej Łužicy, něhdźe 10 km sewjernje Budyšina. Wjes sama ma wokoło 650 wobydlerjow, gmejna wokoło 3200. Wosebje w přewažnje katolskim juhu gmejny rěči wulki dźěl ludnosće serbsce.

Gmejna słuša do připóznateho sydlenskeho ruma Serbow w Sakskej.

Rakecy

Rakecy (němsce Königswartha) su wjes a gmejna w Hornjej Łužicy, sewjernje Budyšina. Gmejna słuša do připóznateho sydlenskeho ruma Serbow w Sakskej.

Sprjewiny Doł

Sprjewiny Doł (němsce Spreetal) je gmejna w samym sewjeru sakskeje Hornjeje Łužicy, kotraž słuša k wokrjesej Budyšin. Po přestrjeni třeća najwjetša gmejna wokrjesa leži wosrjedź Łužiskeje hole w Łužiskim brunicowym rewěrje, njedaloko Čorneje plumpy.

Wona je so dnja 1. januara 1996 załožiła přez zjednoćenje prjedawšich gmejnow Bórkhamor, Nowe Město a Sprjejcy a słuša do připóznateho sydlenskeho ruma Serbow w Sakskej.

Worklecy

Worklecy (němsce Räckelwitz) su wjes a gmejna w sakskej Hornjej Łužicy. Wone su čłonska gmejna zarjadniskeho zwjazka Při Klóšterskej wodźe. Wulki dźěl wobydlerstwa su Serbja.

Zemicy-Tumicy

Zemicy-Tumicy (němsce Demitz-Thumitz) su wjes a gmejna pod Klóšterskej horu wuchodnje Biskopic w Hornjej Łužicy, kotraž nasta w lěće 1898 přez zjednoćenje gmejnow Zemic a Tumic. Gmejna leži při młodej Čornicy na kromach serbskeho kraja a ma dwórnišćo při železniskej čarje z Drježdźan do Zhorjelca.

Łaz

Łaz (němsce Lohsa) je wjes a gmejna w sewjernej Hornjej Łužicy. Leži w krajinje hornjołužiskeje hole a hatow w sewjernym dźělu Budyskeho wokrjesa a je jeho po přestrjeni najwjetša gmejna kaž tež jedna z dźesać najwjetšich w cyłej Sakskej. Łaz leži wosrjedź něhdyšeho Łužiskeho brunicoweho rewěra.

Gmejna słuša do připóznateho sydlenskeho ruma Serbow w Sakskej.

W druhich rěčach

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.