Hóckey a patíns

O hóckey a patíns[1] é un deporte de equipo que se xoga en patíns de catro rodas paralelas no que se enfrontan dous equipos de cinco xogadores cada un (un porteiro e catro xogadores de campo) que empregan un pau de madeira de forma curva ou stick para conducir e golpear unha pequena pelota de caucho. Este deporte xógase nunha pista pechada por un valo de esquinas redondeadas e dúas porterías. O hóckey a patíns é practicado principalmente en Europa e América do Sur, e os países que historicamente dominaron nesta modalidade a nivel mundial foron Portugal, España, Arxentina e Italia, o hóckey rodado tamén ten importancia nalgúns países de África, principalmente en Angola e Mozambique (antigas colonias portuguesas), o mesmo pasa en Asia, onde a máxima dominadora é Macau.

O hóckey a patíns é coñecido polo nome de roller hockey en inglés, rink hockey ou hockey sur patins[2], nos países francófonos, hardball hockey en Estados Unidos, hockey sobre patines nos países de fala castelá, hoquei sobre patins nas áreas de fala catalá e hoquei em patins nos países de fala portuguesa.

O hóckey a patíns non é unha modalidade olímpica na actualidade, mais nos Xogos Olímpicos de Verán de 1992 foi incluído como deporte de exhibición, gañando a medalla de ouro a selección da Arxentina.

Argentin player during 2007 rink hockey world championship
Un xogador arxentino tira a porta nun partido de hóckey a patíns.

O xogo

No hóckey a patíns enfróntanse dous equipos de cinco xogadores cada un (catro xogadores de campo e un porteiro), que conducen unha bola por medio dun pau ou stick cara á portería contraria co obxectivo de marcar un gol. Os xogadores desprázanse en patíns de catro rodas paralelas e a bola só pode guiarse pola pista por medio do stick.

Cada partido divídese en dúas partes de 25 minutos cada unha e cun descanso de 10 minutos entre elas, logo destes minutos de descanso realízase un cambio de campo polo que os equipos pasan a atacar contra a portería que defendían na primeira metade. Nas categorías inferiores a duración das partes é menor, sendo na categoría júnior de 20 minutos cada unha das dúas partes e de 15 minutos cada unha nas categorías infantil, alevín, benxamín e prebenxamín. Cando o tempo do partido se acaba, a bola queda morta.

Ao inicio de cada unha das dúas metades un equipo se encarga de realizar un saque dende o círculo central da pista, no saque inicial o equipo é designado por sorteo, mentres que o saque que se realiza ao principio da segunda metade é realizado polo equipo que non gañou o sorteo inicial. Cada vez que un equipo marca un gol, o equipo que encaixou o gol deberá sacar dende o círculo central. Durante os saques no centro do campo os xogadores dos distintos equipos deben permanecer no seu propio campo e fora do círculo central, agás no caso do equipo que realiza o saque, que poderá contar con dous xogadores no círculo central (o que realiza o saque e un compañeiro), cando soa o pitido dos árbitros a bola pasa a estar en xogo e o executante do saque deberaa lanzar en calquera dirección, podendo os xogadores rivais tocala se o xogador que saque tarda en facelo ou dubida. Coas normas antigas nas que na pista de xogo estaban pintadas as liñas do campo atrás permitíase o saque atrasado ao propio campo.

En cada parte cada equipo dispón dun tempo morto dun minuto de duración no que os xogadores de campo de cada un dos dous equipos se poderán reunir co adestrador e os xogadores suplentes no valado. Os tempos mortos deben ser solicitados polo delegado do equipo solicitante á mesa, que debe accionar o sinal sonoro ou avisar aos árbitros, controlar o tempo de duración dos tempos mortos, sinalar cal é o equipo solicitante e levar conta dos tempos mortos de cada equipo. Se un equipo non emprega o tempo morto do que dispón nunha parte, non poderá empregalo na outra parte. Os tempos mortos só poderán ser concedidos logo da confirmación e autorización dos árbitros. Durante o tempo morto só poderán entrar na pista os xogadores suplentes que vaian substituír a un xogador en pista.

Os partidos están dirixidos frecuentemente por dous árbitros que se desprazan pola pista de xogo sen patíns e que son os encargados de facer que se cumpran as regras do xogo e de sancionar as condutas antideportivas, estas sancións, segundo a gravidade da falta e o lugar onde se producira, sanciónanse con tiros libres indirectos, tiros libres directos ou penaltis, as sancións disciplinarias aos xogadores poden ser: tarxeta azul (expulsión de 5 min ou ata que se marque un gol) ou tarxeta vermella (expulsión definitiva do partido). Os árbitros sinalan tamén o inicio e o final de cada unha das partes.

Historia

As orixes do hóckey son moi antigas. Foi encontrado un baixorrelevo exipcio que mostra un grupo de rapaces batendo unha bola cun pau moi gordo. Tamén foi atopado en Atenas un baixorrelevo da antiga Grecia que representa varios xogadores en posición de xogar unha bola e empuñando aléus (sticks). En Francia, a finais da Idade Media, o xogo era coñecido como crosse e ás veces polo nome de hoquet, que posiblemente, deu orixe en inglés á palabra hockey. Outros autores defenden que o hóckey (tanto a patíns como sobre xeo) deriva do xogo bandy, cuxo termo en inglés designa caxato e que era practicado polos indios americanos. E se o hóckey se remonta á Antigüidade Preclásica, a patinaxe ten os seus inicios, segundo a existencia de diversos gravados, a principios do século XII. A divulgación do primeiro patín de rodas atribúese ao belga Joseph Merlin, mais foi a partir do elástico do americano James Plympton (1850) cando se deu a grande expansión da patinaxe.

Considérase que o hóckey a patíns foi inventado a finais do século XIX no Condado de Kent (Inglaterra) por Edward Crawford, como unha adaptación do hóckey sobre xeo. O hóckey a patíns foi inicialmente coñecido polo nome de “roller polo” debido á introdución do Polo en 1876, os patinadores levaron o polo ás canchas.[3][4]. En Inglaterra comezou a ser practicado en 1877 e o primeiro partido documentado xogouse en 1878 no Denmark Rink de Londres (Inglaterra),[3][5][6] mais a súa práctica dun xeito competitivo e organizado, comezou a partir de 1905. O hóckey a patíns chegou aos Estados Unidos en 1882 coa formación da National Roller Polo League en Dayton (Ohio), esta liga estaba composta por equipos de sete vilas,[3] E en 1884 a Massachusetts Roller Polo League contaba con 14 equipos.[3] En 1949 pasou a chamarse Roller Hockhey. Se ben a finais do século XIX a súa práctica xa se expandira por case toda a Europa continental, nas primeiras décadas do século XX comezouse a practicar en Latinoamérica.[7]

O hóckey a patíns foi practicado polas grandes figuras do cine mudo Stan Laurel e Charlie Chaplin nos inicios do sécuo XX.[8] Tamén no século XX comezaron a aparecer as primeiras federacións: en 1905 creouse en Inglaterra a Amateur Hockey Association (Asociación de Hóckey Afeccionado) e en 1913, tamén en Inglaterra se creou a National Hockey Association. Coa creación en 1924 da Federation International du Patinage a Roulotte-FIPR (Federación Internacional de Patín) con Inglaterra, Suíza, Alemaña e Francia como fundadores en Montreux, serviu para estruturar e unificar criterios. Inglaterra gañou o primeiro Campionato de Europa celebrado en 1926 na localidade inglesa de Herne Bay (cidade que na época se converteu na capital mundial do hóckey a patíns), ademais dos dous Campionatos de Europa non oficiais celebrados en 1924 e 1925 na localidade suíza de Montreux (estes dous campionatos foron ademais a 4ª e 5ª edición da Copa das Nacións) e do Mundo disputado en 1936 en Stuttgart (Alemaña).[9] Foi a partir da Segunda Guerra Mundial cando Portugal e España pasaron a dominar o hóckey a patíns europeo e mundial.

O rink hockey, como foi chamado en Europa, non foi organizado pola RSROA nos Estados Unidos ata 1959 e nomeado roller hockey.[3] En 1961 comezou o campionato de hóckey a patíns dos Estados Unidos.[10] En 1979 os Xogos Panamericanos introduciron a patinaxe como deporte, debutando o hóckey a patíns ese mesmo ano .[5]

Nos Xogos Olímpicos de 1992 celebrados en Barcelona (Cataluña), o hóckey a patíns viviu un feito histórico ao incluírse como deporte de exhibición, este feito supuxo a primeira aparición desta modalidade nuns Xogos Olímpicos, desafortunadamente non tivo continuidade ao non conquistar aos responsables para converterse en modalidade olímpica.

No 2004, a selección de Cataluña participou como membro provisional da FIRS, polo que participou no Campionato do Mundo "B" dese mesmo ano disputado en Macau. A selección catalá dominou o campionato e conseguiu o título, feito que lle daba o dereito a competir ao ano seguinte no Campionato do Mundo "A" que se disputaría na localidade estadounidense de San José (California). Este dereito foille suprimido por unha decisión da Corte de Arbitraxe Deportiva, que non recoñeceu a Cataluña como membro de pleno dereito da FIRS, o que lle impediu participar a competición.[11] Este caso foi coñecido co nome de Caso Fresno porque a asemblea na que se decidiu a non aceptación de Cataluña como membro de pleno dereito na FIRS tivo lugar na cidade de Fresno (Estados Unidos).

Actualmente a práctica deste deporte esténdese a 60 países e ten como principais potencias a Portugal, España, Italia e Arxentina. Ademais está a sufrir un gran crecemento en países como Francia, Suíza, Brasil, Angola, Mozambique, Estados Unidos e China (a través da antiga provincia portuguesa de Macau).

Terreo de xogo

Rinkhockey diagram
Pista de hóckey a patíns coas liñas de campo atrás e os puntos de lanzamentos directos antes do troco das normas
Campo hockey su pista
Pista de hóckey coas marcacións actuais

A pista de xogo ten forma de rectangular de xeito que a extensión lonxitudinal debe corresponder ao dobre do ancho, as medidas dos terreos de xogo son as seguintes:

  • Mínima: 34 x 17 metros
  • Standard: 40 x 20 metros
  • Máxima: 44 x 22 metros

Todo o perímetro da pista está limitado por un valo fixado ao chan dunha altura que non debe ser menor a un metro. Cada un dos catro cantos do rectángulo da pista de xogo, debe ter unha configuración semicircular, construído con base nun raio de circunferencia dun metro, do vértice do rectángulo da pista. Detrás de cada unha das dúas porterías colócase unha rede dunha altura de 4 m medidos dende a superficie da pista, se a pelota golpea na rede considérase fóra.

A pista deberá ter unhas determinadas marcacións conforme á localización e ás medidas. As marcacións do terreo de xogo son as seguintes:

  • A liña divisoria de media pista divide á mesma en dúas partes iguais e está situada a 22 m de cada valado de fondo. Segundo as regras actuais de xogo, unha vez que a pelota controlada polo equipo atacante cruza a liña cara ao seu propio campo só pode estar 5 segundos no mesmo, do contrario o árbitro sinala campo atrás; antes da modificación das normas de xogo había dúas liñas paralelas á do medio campo que indicaban o campo atrás e que a bola non podía superar.
  • A área de portería é un rectángulo dunha superficie de 9 x 5,40 m comprendida entre as liñas de portería, a liña de penalti (situadas ámbalas dúas de xeito paralelo ao fondo da pista) e as dúas liñas perpendiculares que as unen. Tanto a liña de portería como a liña de penalti teñen 9 m de longo, a liña de portería se encontra a unha distancia variable do valo do fondo que oscila entre 2,70 m (mínimo) e 3,30 m (máximo), a liña de penalti sitúase a 5,40 m da liña de portería e na metade da súa extensión, coincidindo co eixo imaxinario do ancho da pista sitúase o punto de penalti.
  • Punto de falta directa está situado no eixo imaxinario do ancho da pista a 7,40 metros da portería.
  • A área de protección do porteiro é un semicírculo situado diante da portería que está limitado ao uso do gardaredes.

A portería ten unhas dimensións de 1,70 m de longo e 1,05 m de altura, conta cunha barra no seu interior a ras de chan que ergue a bola a fin de facilitar a visión dos goles, tamén conta cunha rede á altura da mesma barra coa mesma finalidade.

Equipamento

  • A bola é de 23 cm de circunferencia que ten un peso de 155 g.
  • Para conducir e golpear a bola os xogadores empregan un pau ou stick dunha lonxitude que oscila entre os 90 cm e 115 cm como máximo, non pode pesar máis de 500 gr e ten que pasar por un aro de 5 cm de diámetro. Adoitan estar feitos en madeira e non está permitido o uso de metal ou reforzos metálicos na súa fabricación. Os sticks son distintos para os xogadores de campo e para o porteiro. A súa parte inferior ou pa, debe ser totalmente plana por ámbolos dous lados.
  • A vestimenta dos xogadores é similar á empregada noutros deportes coma o fútbol ou o rugby, cunha camiseta, un pantalón curto e unhas medias ata o xeonllo, os xogadores ademais empregan unhas luvas nas mans para suxeitar o pau, así como proteccións nos xeonllos, espinilleiras e coquilla, tamén está permitido o uso de protección nos cóbados.
  • Os patíns son patíns de catro rodas (paralelas) e o diámetro das rodas ten que ser como mínimo de 3 cm ou de 5 cm como máximo.
  • As proteccións dos porteiros constan de gardas para a protección das pernas, unhas luvas nas mans, proteccións para o pescozo, peito, cóbados e finalmente un casco con protección facial.

Galería de imaxes do equipamento

Roller-hockey-(Quad)-Ball

Bola

Roller-hockey-(Quad)-Gloves

Luvas dos xogadores de campo

Roller-hockey-(Quad)-Knee-Pads

Xeonlleiras

Roller-hockey-(Quad)-Shin-Guard

Espinilleiras

Roller-hockey-(Quad)-Skate

Patíns

Roller-hockey-(Quad)-Stick

Pau ou stick

Roller-hockey-(Quad)-Goalie-Gear

Proteccións do porteiro

Roller-hockey-(Quad)-Kickers

Gardas do porteiro

Roller-hockey-(Quad)-Batting-Glove-front

Luva libre do porteiro (diante)

Roller-hockey-(Quad)-Blocker-back

Luva libre do porteiro (detrás)

Roller-hockey-(Quad)-Goalie-Stick-Glove

Luva do stick do porteiro

Roller-hockey-(Quad)-Goalie-Stick-Glove-Ball

Luva do porteiro co stick e a bola

Goal stick

Stick do porteiro

Hockey neck

Protección para o pescozo do porteiro

Hockey chest

Protección para o peito do porteiro

Hockey elbow

Protección para os cóbados do porteiro

Organismos internacionais

A continuación unha listaxe dos principais organismos do hóckey a patíns e do patinaxe no mundo e nos distintos continentes.

No mundo

Continentais

Europa

América

África

Asia

Oceanía

Competicións

De seleccións

Mundiais

Continentais

Ata a data non se organizou ningún campionato de seleccións en África.

De clubs

Nacionais

As tres grandes ligas do hóckey a patíns son a OK Liga (Estado español), o 1ª División Portuguesa (Portugal) e a Serie A1 (Italia).

Continentais

  • Campionato Suramericano de Clubs

Mundiais

Clubs

Clasificación mundial de clubs de hóckey a patíns

Os clubs que historicamente dominaron este deporte xogan maioritariamente na liga española, principalmente os equipos de Cataluña, coa excepción do H.C. Liceo da Coruña. Tamén teñen un papel destacado os equipos portugueses e en menor medida os italianos. Destacan entre entre todos o FC Barcelona, o H.C. Liceo, FC Porto, Reus Deportiu, Igualada HC, SL Benfica etc. O club máis laureado desta modalidade deportiva é o FC Barcelona, que domina o palmarés de títulos continentais e nacionais, aínda que conta cos mesmos títulos mundiais que o H.C. Liceo galego (4 títulos).

Por países, os máximos dominadores das tres principais ligas son o FC Barcelona (OK Liga), FC Porto (1ª División Portuguesa) e Hockey Novara (Serie A1 italiana).

Seleccións

Clasificación de seleccións de hóckey a patíns

O hóckey a patíns ten dous claros dominadores, Portugal e España con 79 e 73 títulos respectivamente (contando campionatos sénior, júnior e xuvenil), moi lonxe da terceira grande potencia mundial, Arxentina (27 títulos).

A nivel mundial, as seleccións sénior de Portugal e España conseguiron 15 e 14 títulos respectivamente, por tan so 4 de Italia e Arxentina que comparten a terceira praza. A nivel europeo, os datos son máis axustados, con 20 vitorias para a selección portuguesa, 14 para a española e 12 para a selección de Inglaterra, que conquistou as 12 primeiras edicións de xeito consecutivo, se ben os títulos acadados polos ingleses en 1936 e 1939 foron considerados tamén Campionato do Mundo (por iso a selección inglesa conta con dous títulos mundiais).

Notas

  1. Definición de hóckey no Dicionario de Galego.
  2. http://www.inet.jeunesse-sports.gouv.fr/fedes/disciplines.asp%7CLe[Ligazón morta] sport de haut niveau
  3. 3,0 3,1 3,2 3,3 3,4 http://usarollersports.org/pages/pdf/magazine/USARS_Summer1978_Web.pdf[Ligazón morta]
  4. "Copia arquivada". Arquivado dende o orixinal o 22 de abril de 2008. Consultado o 30 de agosto de 2011.
  5. 5,0 5,1 "Copia arquivada". Arquivado dende o orixinal o 09 de maio de 2008. Consultado o 30 de agosto de 2011.
  6. http://www.britannica.com/EBchecked/topic/507126/roller-skating/255268/Roller-sports#ref=ref887928
  7. Fortti, Antonio y Grieco, Alberto, Hockey sobre patines, La Grulla, Avellaneda (Bs. As.), 1998
  8. "Copia arquivada". Arquivado dende o orixinal o 08 de xullo de 2011. Consultado o 08 de xullo de 2011.
  9. "Copia arquivada". Arquivado dende o orixinal o 29 de setembro de 2008. Consultado o 30 de agosto de 2011.
  10. "Copia arquivada". Arquivado dende o orixinal o 17 de setembro de 2008. Consultado o 30 de agosto de 2011.
  11. Decisión da Corte de Arbitraxe Deportiva sobre o recoñecemento de Cataluña

Véxase tamén

Ligazóns externas

A.A. Dominicos

O club A.A. Dominicos é un club de hóckey a patíns da cidade da Coruña, que compite na 1ª División Galega. Con máis de 50 anos de historia é, xunto co H.C. Liceo un dos equipos históricos do hóckey coruñés e galego. Entre os grandes logros do club figuran un campionato de España xuvenil e un alevin no ano 2013, sendo o primeiro equipo galego en acadalo.

CP Voltregà

O Club Patí Voltregà é un club deportivo de Sant Hipòlit de Voltregà, en Osona (Barcelona), fundado en 1955 adicadase ao hóckey a patíns e actualmente participa na OK Liga, a máxima categoría do hóckey a patíns de España.

Campionato Nacional de hóckey a patíns

O Campionato Nacional de hóckey a patíns (en portugués: Campeonato Português de Hóquei em Patins Masculino) despútase en Portugal dende a tempada 1938-39. Os seus principais dominadores son o Benfica e o FC Porto. A categoría suprema é coñecida coma Campionato Nacional de 1ª División.

Campionato do Mundo "A" de hóckey a patíns

O Campionato do Mundo "A" de hóckey a patíns é unha competición mundial de hóckey a patíns disputada entre seleccións estatais. Esta competición é disputada, ao igual que os Campionatos de Europa, cada dous. É organizada pola Fédération Internationale de Roller Sports (FIRS).

Club Esportiu Noia

O Club Esportiu Noia é un club de hóckey a patíns catalán da localidade de Sant Sadurní d'Anoia, no Alt Penedès. Foi fundado en 1951 e actualmente compite na OK Liga.

Copa Continental de hóckey a patíns

Iniciada na tempada 1979-80 co nome de Supercopa de Europa, era disputada entre os campións da Copa de Europa e da Recopa de Europa. No ano 1997, coa desaparición da Recopa de Europa pasa a ser disputada polo campión da Copa CERS e pasa a ser denominada Copa Continental.

Copa de Europa de hóckey a patíns

A Copa de Europa de hóckey sobre patíns, tamén coñecida como "Liga Europea de Campións" (en inglés "European Champions League") é a máxima competición europea entre clubs de hóckey sobre patíns. Foi creada en 1965, e enfronta cada tempada aos mellores clubs europeos da especialidade, na súa meirande parte da liga española (entre os que destacan principalmente os clubs de Cataluña e Galiza), italianos e portugueses. Está organizada pola CERH (Comité Européen de Rink-Hockey), o máximo organismo do hóckey a patíns europeo, con sede central en Lisboa (Portugal).

O club máis laureado da competición é o FC Barcelona, que acadou 22 títulos. O actual campión é o FC Barcelona.

Copa do Rei de hóckey a patíns

A Copa do Rei de hóckey a patíns (iniciada co nome de Copa del Generalísimo) é unha competición de hóckey a patíns, unha das máis antigas disputadas en España, xa que a primeira edición data do ano 1944.

O campión da competición disputaba a tempada seguinte a Recopa de Europa, actualmente clasifícase para disputar a Copa CERS. Dende 1999 dispútase baixo o formato de fase final a eliminatoria directa entre 8 equipos.

Futebol Clube do Porto (hóckey a patíns)

A sección de hóckey a patíns do Futebol Clube do Porto é unha das seccións do club polideportivo profesional con base en Porto, Portugal, fundada en 1955. É ademais unha das seccións máis exitosas do FC Porto, tanto a nivel nacional como internacional.

O equipo disputa os seus partidos como local no pavillón Dragão Caixa, que ten unha capacidade para 2200 espectadores.

Fútbol Club Barcelona (hóckey a patíns)

A sección de hóckey a patíns do Futbol Club Barcelona foi creada o 1 de xuño de 1942, mais problemas de pista de xogo van facer que non fora ata 1948 cando a sección acada a plena actividade. Non foi ata finais dos setenta e nos oitenta que, con Josep Lorente i Miralles á fronte, o equipo vai arrasar en España e Europa, substituíndo ao Reus Deportiu como a referencia. Logo duns anos de recesión, a mediados dos noventa, con Carlos Figueroa no banquiño, volve ao primeiro plano mundial, feito que converteu á sección na máis laureada da historia do FC Barcelona.

H.C. Raxoi

O Hockey Club Raxoi é un equipo galego de hóckey a patíns da cidade de Santiago de Compostela que milita na Liga Sénior Masculina e na Copa Federación Feminina de hóckey a patíns. O equipo adestra e disputa os seus partidos no Pavillón Municipal de Vite, na capital de Galiza. Foi fundado en setembro de 1989.

Igualada HC

O Igualada Hoquei Club é un club de hóckey a patíns da localidade de Igualada, na comarca de Anoia, provincia de Barcelona (Cataluña). Actualmente compite na O.K. Liga e disputa os seus partidos como local no Poliesportiu de les Comes, cunha capacidade para 3000 espectadores.

María Pita H.C.

O María Pita Hóckey Club foi un club galego de hóckey a patíns da cidade da Coruña fundado no 1962 e disolto en 2009.

OK Liga Prata

A Primeira División Estatal é a segunda liga en importancia do hóckey a patíns do estado español logo da OK Liga. A primeira edición desta competición tivo lugar na tempada 1970-71, e o seu primeiro campión foi o CD Femsa.

Palau Blaugrana

O Palau Blaugrana é o pavillón cuberto, propiedade do Futbol Club Barcelona, onde disputan os seus partidos oficiais os primeiros equipos das seccións de baloncesto, balonmán, hockey sobre patíns e fútbol sala do FC Barcelona.

Está situado na Avenida Arístides Maillol, no barrio de Les Corts de Barcelona, e no interior do complexo que acolle o estadio do Camp Nou. Xunto ao "Palau Blaugrana" están as oficinas do club, así como a tenda oficial do FC Barcelona e o Palau de Gel.

Pazo dos Deportes de Riazor

O Pazo dos Deportes de Riazor é un pavillón polideportivo situado na cidade da Coruña (Galiza), situado á beira do paseo marítimo da capital coruñesa, na Rúa de Manuel Murguía, xusto ao carón do Estadio Municipal de Riazor. O edificio, obra de Santiago Rey Pedreira, foi inaugurado o 1 de agosto de 1970 e ten capacidade para 5.000 espectadores. Está catalogado como elemento patrimonial.

Reus Deportiu

O Reus Deportiu é un club polideportivo catalán, da cidade de Reus (Tarragona). É especialmente coñecido polo seu equipo de hóckey a patíns, aínda que tamén conta con seccóns de xadrez, atletismo, baloncesto, excursionismo, ximnasia rítmica, patinaxe artístico, rugby, tenis, tenis de mesa, espeleoloxía e balonmán, entroutras. Foi fundado en 1909, aínda que non debe confundirse co CF Reus Deportiu; a pesar de que ámbolos dous clubs compartiron un pasado común, e as mesmos cores (negro e vermello), dende 1951 son sociedades distintas.

Selección de hóckey a patíns masculina de España

A selección de hóckey a patíns masculina de España é o equipo que representa a España nas competicións internacionais de hóckey a patíns en categoría masculina. España é a gran dominadora do hóckey a patíns mundial. En 2018 era a vixente campioa do Mundo e de Europa.

En 2013 a selección española conquistou o seu 16º Campionato do Mundo (5º de xeito consecutivo), superando deste xeito á selección portuguesa no palmarés xeral, converténdose dese xeito no mellor equipo da historia.

Selección de hóckey a patíns masculina de Portugal

A selección de hóckey a patíns masculina de Portugal é o equipo que representa a Portugal nas competicións internacionais de hóckey a patíns en categoría masculina. O equipo depende da Federação Portuguesa de Patinagem. A selección debutou no Campionato do Mundo "A" de hóckey a patíns na súa primeira edición en Alemaña no ano 1950. A selección de hóckey a patíns masculina de Portugal é unha das seleccións máis laureadas do mundo. Ten 15 Mundiais "A" , 20 Campionatos de Europa e 18 Copas das Nacións.

Outras linguas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.