Kristndum

As Kristndum is mid umara zwoa Milliardn Mitglieda vuam Islam und am Hinduismus de gressde Religion vo da Wejd und oane vo de fimf Wejdreligjona.

Is Kristndum is a Oa-God Glaabm. Grinda wor da Jesus vo Nazaret, wo a Wondaprediga im heitign Palestina woa. Da Jesus wead vo d Kristn ois Kristus und Suhn vom God vaeat.

Da Kean vo dera Religjon is de Zuawendung vom God zan Menschn. In dera Zuawendung offnboart si da God und es kimmt zua God-Mensch Beziahung. De zwoa Haptgebot - neba dene zehne in da Bibl - san: du suist Good liam - mit deim ganz Herzen und du soast den Nächstn (ned de Verwandtn san do nua gmoand, sondern dea, den da des Lebn nah herbringt oder zuarabringt ) liam. sKreiz is des Zeichn vom Kristndum und soi uns dro erinnan, dass uns da Jesus am Kreiz zoagt hod, zu wos d Liab fähig is.

As Kristntum untateijt se in mehrane Bekenntnis bzw. Konfessionan unn de doraus entstondanan Kiachagmoaschoftn, unta ondam de katholische-, evangelische-, oatodoxe- und anglikanische Kiachn. Prominentestes Kiachnobahapt is da Franz ois Papst vo da remisch-katholischn Kiachn, den de ondonan Kiachgmoaschoftn oba net ois des ihrige Obahapd onakenna. De Bischef vo de Evangelischn dogeng wean vagleichsweis demokratisch gwejt und vasammen se in nationain und intanationain "Konferenzen" und "Räten". Bei de Bayern san de moasten remische Katholiken, bsondars z Oidbayern.

Latin Cross

Kristliche Sektn

Vom Kristndum hom se mehrare Sektn owgspoitn wia zan Beispui de Zeign Jehovas. Säichane Sektn han moast ziemli kloa unn richtn eanan Glaam net seijtn meglichst woatweatli no da Bibl aus.

Bibel

De Bibel, aa Bibe is im Judndum und Kristndum de Bezeichnung fia untaschiedliche Sammlunga vo Schriftn, de wo vo de Ohenga ois heilig ogseng wean und ois Uakundn vom Glaam gejtn. Des san Zammastejunga vo Schriftn (aa "Biachl", griach.: "biblica") aus'm Morgnland (Levante, Voadara Orient), de wo im Valaff vo eppa 1200 Joa entstondn san und bis zum 2. Joahundat z'eascht vo Judn, spoda aa vo Kristn kanonisiat (wuikiale ois normative Richtschnua definiat) worn san.

De hebräische Bibe, da Tanach, setzt si aus drei Hapttei Tora (Weisung), Nevi'im (Prophetn) und Ketuvim (Schriftn) zamma. De Biachln buidn in ondara Oadnung und a weng ondam Umfong aa s Oide Testament, an easchtn Hapttei vo da kristlichn Bibe, de wo no duach's Neie Testament eagenzt wead. In dea Form is de Bibe des am weidastn vabroadsde Biachl vo da Wejd.

Bibeiwasetzunga existian ois Gsomtiwasetzung in 451 Sprochn und in weidan 2479 Sprochn ois Teiiwasetzunga.

Dridds Reich

Ois Drittes Reich, boarisch Dridds Reich, wead des Deitsche Reich vo 1933 bis 1945 gnennt bzw. de Zeid vo da nationalsozialistischn Heaschoft in Deitschland.

Dea Begriff is owa ejta ois wia da Nationalsozialismus und gähd afs Kristndum zruck. De ejstaste Dreiainterpretation vo da Gschicht ko ma bei Paulus und in da Offnborung vom Johannes nochlesn. Do gibts de Dreitteilung Heidndum, mosaiische Zeid (Oids Testament) und Kristndum. Es bedeidt im Kristndum aa des Zeidoita vom Heiligen Geist. De Dreiteilung vo Gschichtsperiodn hod owa aa im omdländischn Denkn a lange Tradition, beispuisweis de Einteilung in Antike, Middloita und Neizeit. Des Dridde is oiso imma des Häxte und Eastremsweataste, desweng hom des de Nazis gnuzd.

Erzbischof

Da Titl Erzbischof (Erz- vo griachisch: αρχή##, arché, „Ofong, Fiahrung“, in da obgleitetn Bedeitung „Ober-“, und Bischof vo: επίσκοπος, epískopos, „Afseha“) wead im Kristndum vo Bischef mid bsondana Amtsstejung trong.

De Voraussetzunga san in de oanzlna Kiachn untaschiedle greglt. Es gibt de foingdn Meglichkeitn:

da Bischof steht ana Diezes voa, de a Erzbistum is

da Bischof steht ana Diezes voa und is gleichzeiti as Obahapt vo ana Kiach

da Bischof deaf in Titl duach a bsondane Valeihung fia'n (Titularerzbischof)Analog zum deitschn Protokoi wean Bischef und Erzbischef in Bayern mid „Eana Exzejenz“ ogredt.

Ged

A Ged, aa God oda Pate, feminin Godn, aa Godl oda Patin is im engan Sinn jemand wo im Kristndum de Tauf vo am Kind untastitzt. Im weidan, modeana Sinn is a Ged jemand, wo vo de Ejtan ausgwejd wead, um de Entwicklung vom Kind z feadan.In friaan Zeit hod da Ged ban Dod vo de Ejtan sogor a Fiasorgepflicht ghobt. Im katholischn Kiachnrecht is s Gedndum bis anno 1983 ois a „geistliche Vawandtschaft“ definiat gwen, wo sogor a Ehehindanis bedeidd hod.S Wort Pate kimmt vom lateinischen pater spiritualis bzw. patrinus, „Mit-Voda“ (gnau gnumma „Gevatta“). S Wort Ged kimpt vo Godvoda (vgl. engl. godfather / godmother / godparents); de Bedeitung is de sejbe.

Greapfinzda

Da Greapfinzda, Greadunasdog oda Speispfinsta is da fimfte Dog, oiso da Pfinzda, in da Koarwoch. As Kristndum erinnad an dem Dog ans letzte Omdmoi vom Jesus mit seine zwejf Apostl vor da Kreizigung. In da vorkristlichn Vorstejung ko an dem Dog mit greanan Gmias und frischn Kraitln de Kroft vom Fruajoor fias ganze Joar aufgnumma wern.

Islam

Da Islam (arabisch: إسلام‎ islām, „Hingob an God“) is noch'm Kristndum, mid 1,2 Milljardn Ohänga de zwoatgresste Religion vo da Wejd. De Ohänga wean Moslems oda Muslime gnennd. Es is oane vo de fimf Wejdreligiona und a monotheisdische Religion, wo si streng vom Polytheismus ogrenzt, de wo owa ondare (ejtare) Offmbarungsreligiona ois Voagängareligiona vom Islam akzeptiat. As bestimmade Element is de Leare vo tauḥīd, da Oaheit vo God.

As Woat Allah الله‎ / Allāh /„da (oazige) God; God“) guit in de arabischsprochign Lända, im fost rein remisch-katholischn Malta sowia in Indonesien sowoi aa fia de Kristn ois wiara fia de Muslime ois Woat fia „God“.

De easchte Quejn im Islam is da Koran, wo fia de Glaibign as unvafejschte Woat vo God is.

Jesus vo Nazaret

Da Jesus vo Nazaret oda Jeschua vo Nazaret (aramäisch: ישוע : Jeschua oda : Jeschu, gräzisiad: Ἰησοῦς; * woarscheinli voa 4 v. Kr. z Nazaret; † 30 oda 31 z Jerusalem) woa a jidischa Wondaprediga. Wia a ebba 30 Joar woar, is a in Galiläa und Judäa effndli afdredn. Ea hod dena Judn s Reich vom God vakindd und se zua Buße und Umkeah afgfoadad. Des hod da Obrigkeit und dena Reman ned bassd. Zwoa, drei Joar spada is a vo de Rema kreizigd woarn.

In da Foig is do draus a Wejdreligion entstondn. Des Neie Testament (NT) is sowoi des wichtigsde Glaamsdokument vo de Kristn ois wia aa de wichtigste wissnschoftliche Quejn. Aa aussahoib vom Kristndum hod da Jesus im Laff vo da Zeid on Bedeitung gwuna.

Judndum

Unta Judndum (dt.: Judentum) vastähd ma de Gsomtheit vo Kuitua, Gschicht, Religion und Tradizion van jidischn Voik, des wos si sejm Voik Israel (hebr.: am jisrael, bnei jisrael) nennd.

Des Judndum wead oft za de Wejdreligiona grechnd, aa wonn do nua rund 13,5 Milliona Menschn dazuaghean. Des hod historische Grind. Kristndum und Islam bruafa se vuifoch af de Iwaliafarunga van Judndum, des wo aa de easchte Wejdreligion woa. Om End vo da Antike hod's jidische Gmoana ned nua im Remischn Reich sondan sogoa in Indien, Kina und Afrika gem.

Liachtmess

Liachtmess oda Lichtmess, aa Mariä Lichtmess (nei-liturgisch: "Darstellung des Herrn"), is im Kristndum a Fest wo am 2. Feba, em 40. Dog noch Weihnocht gfeiat wead. Da Nama kimmt vom Brauchtum vo da Keaznsegnung und Keaznprozession an dem Dog. Woarscheinli hod dees mit remischn und kejtischn Brauchtum z doa. Reinigungs- bzw Lichtafestln (Imbolc im Kejtntum und Spurcalia, Februa bzw. Lupercalien ba de Rema) de wo s scho lang vor da Einfiarung vo Mariä Lichtmess im Kristndum (im 5. Joahundat) gebm hod.Am 2. Feba hom de Rema Facklumzig vaostoidd, um si vo Sindn z reinign. Da Nama Feba geht afs lateinische Wort "februare" zruck, wo saiban und reinign hoaßt.

Noch da jidischn Vorstejung hod a Wei noch da Gebuat vo an Buam 40 Dog ois unrein goitn. Am 40. Dog is de Frau mitm Easchgeboranan in en Tempe kema und hods Kind in Eainnarung ans Pessach-Fest an en Heagod ibagebm. Duach Gejdopfa oda Viechaopfa hod dees Kind wieda ausglest wean miassn. Mitn Jesuskindl hom de Maria und da Josef dees aa aso gmocht. Dees wead an Mariä Lichtmess gfeiat. Liachtmess is oisdann a Dog vo da Reinigung (vo da Maria, deswegn Mariää Lichtmess) und vo da Presentation vom Jesuskindl.

In Bayern wor Liachtmess bis 1912 a gsetzlicha Feiadog.

Martini

Martini, dt. Martinstag, am 11. Novemba is da Gedenkdog fian heilign Martin und a Dog mit an Haffa Brauchdum. Da Martin wor a remischa Offizia, dea wo im 4. Joarhundat glebt hod und nacha zum Kristndum konvertiad und Bischof worn is. Ea is in Pannonien, im heiting Ungarn gebuan und bei Tours, im heiting Frankreich gstuam. Des Brauchdum hod owa andane Wuazln und midm Martin nua weng z doa.

Middloita

Unta'm Middloita (dt.: Mittelalter) vastähd ma a Epoch vo da eiropäischn Gschichtschreibung und moand domid de Zeid vo uma 500 bis uma 1500, S’Middloita is de Zeid zwischn da Antikn und da Neizeid

Ma undascheidd grob no in drei vaschiedne Eihteilunga:

As Friahe Middloita | 500 bis 1000

As Hohe Middloita 1000 bis 1250

As Spaade Middloita bis 1500De gsejschoftlichn Grundziag aus dera Zeid woan prägd van Kristndum, da Ständ und'm Feudalismus. De Buidungssproch woa Latein.

Neis Testament

As Neie Testament is a Sommlung vo Schriftn, de im Kristndum ois Zeignis vo da gedlichn Offnboarung on de Menschn guit. As Neie Testament buidt mid'm Oitn Testament zamm de Bibel. De neitestamentlichn Schriftn san etwa zwischn 50 und 120 n. Kr. gschriem worn.

Oids Testament

As Oide Testament is a Sommlung vo Schriftn, de wo vo Judn und Kristn ois Zeignis vo da geddlichn Offnboarung on de Menschn ogseng wead. De Schriftnsommlung is im Judndum da Tanach, im Kristndum buidt se mid'm Neia Testament zamm de Bibe. Demnoch soi de Obfossung vo dene Schriftn vom Geist Goddes inspiriat sei. Zwischn'm Tanach und'm Oidn Testament in da kristlichn Bibel san owa Untaschiede in da Reihnfoige vo de Schriftn, und monche Schriftn vom kristlichn Oidn Testament kumma in Tanach aa iwahapts ned voa. Zwischn katholischn und protestantischn Ausgom bstenga emfois Untaschiede.

Ostan

Ostan, Oustan oda Ostern is a traditionejs Fruajoarsfest, wo heidnische, jidische und kristliche Wuazn hod.

De Kristn feian de Afastehung vom Jesus und de Judn in Auszug aus Egyptn (Pessach-Fest). De heidnischn Ibaliefarunga beziagn si vor oim af a Fruajoars- und Fruchborkeitsbrauchdum. Deshoib is koa Zuafoi, dass Ostan am Sunda nochm easchtn Fruajoarsvoimond gfeiad wead.

Poimsunda

Da Poimsunda is da Sunda vua Oustan und da easchde Dog vo da Koarwocha. As Fest eainnad im Kristndum an en Triumpfzug vom Jesus auf Jerusalem, wora auf an Esl gridn is und mid Poimzweigal und Poimbuschn umjublt woan is.

Religion

Religion is a jede Wödaunschauung, de wos an Mensch mid n Iwanatialichn und Transzendentn in a Beziehung bringd. Domid vabundn san ofd vaschiedane Praktikn, Vahoitnsweisn, heulige Schriftn, Moralvorstöllungan und heulige Platzln.

Remisch-katholische Kira

De remisch-katholische Kira oda remisch-katholische Kiach (dt.: Römisch-katholische Kirche) is de gressde Kira im Kristndum. Im Boarischn wead remisch-katholische Kira und katholische Kira synonym vawendd. As griachische Woat: καθολικός, (katholikos), moand: "universej", as Woat remisch hod domid z doa, doss da Bischof vo Rom, da Popst, de Kira loadd.

Da Nam is eascht in da Reformazion entstondn, zua Untascheidung vo de ondan kristlichn Bekenntnissn.

Da entscheidnde Untaschied za da orthodoxn Kira, da anglikanischn Gmoaschoft und da oidkatholischn Kira is as Primat van remischn Bischof (= Popst), wo vo dena ned oeakonnd wead.

Seitn 13. Meaz 2013 wead de katholische Kira van Popst Franz gloadd.

Tanach

Da Tanach (hebr. תנ״ך, tanach, TNK) is de heulige Schrift vaum Judndum. Ea hod drei Hauptteu: de Tora („Weisung“), de Nevi'im („Prophetn“) und de Ketuvim („Schriftn“). Da Tanach is ums Joa in 22 bzw. 24 einteut und kanonisiat wuan.

Olle Biachln vaum Tanach und dazua a Teu vau da Septuaginta san vaum Kristndum ois sog. Oids Testament iwanumma und bis 400 n. Kr. kanonisiat wuan. De Zuaoadnung und Reihnfoige vau de iwanummanan Schriftn untascheidn si je noch christlicha Konfession. De Bezeichnung "Oids Testament" geht auf de Red vaum "Oidn" und "Neien" Bund im "Hebräabriaf" zruck. Damit wiad de antijudaische und frogwiadige Auffossung vabraadt, dass da Bund vaum Heagod mid Israel duach s neie Gottesvoik vaum Kristndum oglest wuan und damit de jidische Religion "oid", "vaoitet" und "iwahoit" warad.

Weihnochtn

Weihnochtn (dt.: Weihnachten) is a kristliche Festzeid, wo de Gebuat van Jesus gfeiad wead und a profane Festzeid fia Ned-Kristn.Weihnochtn is zamma mid Ostan as wichtigsde Fest van Kristndum. De Weihnochtszeid fongd om Heiling Omd o und gähd bis zan 6. Jenna (Heilige Drei Kini). De via Wocha vua Weihnochtn hossn Advent.

De Weihnochtszeid hod ned nua kristliche Wuazln. Um de Zeid hods in Eiropa aa scho vuam Kristndum Festl gem, beispuisweis as Julfest.

Zan Brauchdum vo Weihnochtn ghean heit vua oim: Weihnochtsgschenke, Weihnochtsessn, Weihnochtsbaam, Kristmess und Weihnochtsliada.

Andane Sprochn

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.