Escudu de Mozambique

L'escudu de Mozambique, el cualu foi adoptáu en 1990, ta nidiamente orientáu a esa dómina socialista tempraniega del país. Amuesa una rueda d'engranaxe mariella arodiada de panoyes de maíz y espigues de granos, en cuyu centru hai un sol roxu qu'asoma sobro una montaña sobre la cuala hai un llibru abiertu. Per delantre d'estes figures hai un rifle y un azadón cruciaos. Na parte d'abaxu del escudu, arodiando les semeyes descrites enantes, pue lleese la inscripción “República Popular de Mozambique” y na parte d'arriba hai una estrella roxa.

El maíz y les plantes simbolicen l'agricultura y la ñatura; la rueda dentada representa a los trabayadores; el llibru representa la élite intelixente; l'azadón simboliza a los agricultores, el rifle representa la llucha pola independencia del país y la estrella roxa ye'l socialismu. El sol roxu simboliza'l sur d'África y la esperancia d'una nuea vida.

Emblem of Mozambique
Mozambique

La República de Mozambique, o simplemente Mozambique ye un país que s'alcuentra al este d'África, na oriella del océanu Índicu. Llenda al norte con Tanzania y Malaui, al noroeste con Zambia, al oeste con Zimbabue, al suroeste con Suazilandia, al sur y al suroeste con Sudáfrica y al este col océanu Índicu. Ta separtáu de Madagascar pola canal de Mozambique, al este. La so capital, y ciudá más poblada, ye Maputu (nomada Lourenço Marques na dómina colonial).

Ente los sieglos I y V pueblos de llingua bantú emigraron, dende'l norte y l'este, al territoriu qu'anguaño ye Mozambique. A partir del sieglu XI mercaderes árabes, perses y somalíes entamaron a establecer puertos comerciales a lo llargo la costa, contribuyendo al desarrollu d'una cultura y una llingua suaḥili.

El viaxe de Vasco da Gama en 1498 supunxo la llegada de los portugueses, que pasín ente pasu foron asentándose y colonizando'l territoriu dende 1505. Los más de cuatro sieglos de dominiu portugués finaron cola independencia del país en 1975. Poco dempués d'ella proclamose la República Popular de Mozambique, y tres de namái dos años de vida, el país sumiose nuna llarga ya intensa guerra civil que duró dende 1977 a 1992. Dos años dempués del so final, en 1994, el país celebró les sos primeres eleiciones multipartidistes, y de magar caltiense como una repúbica presidencial relativamente estable, magar que sigue habiendo dellos brotes de violencia guerrillera de baxa intensidá.

Mozambique ye un país con bayura de recursos naturales. La economía de so ta basada principalmente na agricultura, pero ta medrando la industria, principalmente nos sectores alimentariu y petroquímicu y na industria del aluminiu, y el turismu va medrando nos caberos años. El principal sociu comercial ya inversor estranxeru nel país ye Sudáfrica; otros socios comerciales importantes son Bélxica, Brasil, Portugal y España. Dende 2001 el crecimientu añal del productu interior brutu del país ta ente los mayores del mundiu. Pesie a ello, el país ye ún de los más probes y sodesarrollaos del mundu, y ocupa ún de los llugares más baxos nos ránking que miden el productu interior brutu per cápita, el desarrollu humanu, la desigualdá y la esperanza de vida.

L'idioma oficial del país ye'l portugués, que ye falao, xeneralmente como segunda llingua, pola metá de la población. Les llingües natives más falaes inclúin el makhuwa, el sena y el suaḥili. La población, d'alredor de 29 millones d'habitantes, ye principalmente d'etnia Bantú. No que cinca a la relixón, la más practicada ye'l cristianismu, con minoríes importantes de musulmanes y de siguidores de les relixones tradicionales africanes.

Mozambique ye miembru de les Naciones Xuníes, la Xunión Africana, la Comunidá de Países de Llingua Portuguesa, la Mancomunidá Británica de Naciones, la Organización pa la Cooperación Islámica, el Movimientu de Países Ensin Alliniar y la Comunidá de Desarrollu del África Austral, y tien l'estatus de país observador na Organización Internacional de la Francofonía.

N'otres llingües

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.