Lacuna

Una lacuna, laguna u estanyo ye una extensión natural d'augua aturada con superficie relativament chicota (dica unas decenas d'hectarias), y poco profunda que s'ha formau dencima d'un libel cheolochico u edafico impermiable. Bi ha diferents definicions de lacuna u estanyo, y se'n diz tanto d'extensions d'augua d'orichen natural como d'orichen antropico, on las midas y usos no permiten una zonación ni la distribución cutiana en libels de diferents procesos. L'augua puet estar dulza u salada.

Una lacuna u estanyo ye mes chicot que un laco y mes gran que una basa, manimenos a vegadas ye subchetivo dicir dica a on plega cada concepto, solapando-se estos termins, y se diz a una zona humida "basa", "laguna" u "laco" d'alcuerdo con l'uso toponimico. Tamién bi ha diferents denominacions de lacunas u estanyos dependendo de lo contexto cheografico u cheolochico: saladas, albuferas, ibons, ecetra.

Fourmois
L'Étang, quadro de Théodore Fourmois, pintau en 1867
DiversitivePool
Estanyo en lo norte d'Alemanya
Strépy-Bracquegnies JPG2
Estanyo d'affaissement minier, en Hainaut (Belchica)

Etimolochía y variants

Estanyo

La parola estanyo provién de lo latín STAGNUM, ye propia de l'aragonés oriental y centro oriental y presenta la variant estany en aragonés ribagorzán, por eixemplo en Benás.[1] Tien cognatos en luengas galo-romances y italián: estany, estanh, étang, stagno, ecetra. En usos tradicionals y toponimicos de l'aragonés no se documenta l'uso d'"estanyo" con sentiu macrocheografico, pero en las traduccions heredianas si que s'ha puesto, probablement por influencia d'escribans y traductors avegaus con lo catalán, luenga a on estany puet designar extensions grans d'augua. Por eixemplo este uso lo trobamos en "La Flor de las Ystorias d'Orient", pero de seguro que ye pa dicir que las suyas caracteristicas naturals no son comparables con garra mar conoixida.

Por atra part en lo "Libro de las Marabillas de lo Mundo" bi ha un parrafo pareixiu en la mesma pachina que charran de la Mar Caspia:

Derivaus de lo latín LACUNA

Lacuna/Laguna/Llaguna deriva de lo latín LACUNA. La variant lacuna ye propia de l'aragonés central, la variant laguna ye propia de l'aragonés occidental, meridional y estió la que se feba servir mes en textos medieval, trobando-se en romanz navarro, aragonés de la Val de l'Ebro y aragonés de las comunidatz aragonesas. A diferencia de lo que se desvién en francés, italián y l'occitán no gascón no designa especificament a masas d'augua costeras (albuferas) y ye extensible a masas d'augua continentals como en castellán, catalán y galaico-portugués. Como en las luengas ibero-romances ye aplicable a masas d'augua d'escala comarcal como maximo, tals como la "Laguna de Gallocanta". No s'aplica a masas d'augua d'escala macrocheografica, inexistents en la compleganza de l'Ebro, y a las que l'aragonés medieval se refiere con la parola laco u lago, que tamién puet designar masas d'augua de mida meya.

En la toponimia de l'Alto Aragón bi ha muitos casos de "lacunas" u "lagunas" referindo-se a extensión de mida meya, (y menos a sobén "laco" como en Rodellar), y a vegadas permaneixe lo toponimo dimpués d'haber desapareixiu por colmatación natural.

Lacuna

D'alcuerdo con las Guías Prames la forma con xorda intervocalica conservada se documenta en la microtoponimia amán d'Escuer (As Lacunas), Oliván (As Lacunas, Ereta Lacuna), Tella (Lacunas), y Formigals (As Lacunas). Amán de Pedruel y Rodellar trobamos los microtoponimos Lacuna Alta y Lacuna Baxa pero corresponden a cerros, y podrían representar casos de falsa segmentación con l'articlo definito.

Atras fuents muestran microtoponimos con "Lacuna" en atros municipios. En Panticosa bi ha un vico dito Barrio ra Lacuna[2]. En Atarés se documentan los microtoponimos Las Lacunas y O Forno de Foya Alta Lacunas. Tamién en la Val d'Echo trobamos lo microtoponimo Las Lacunas. Lo microtoponimo d'Aísa Eras de la Cuna podría tener relación con Lacuna. Bi ha microtoponimos documentals con "Lacuna" en textos de lo sieglo XV en Panticosa, Sallent de Galligo, Oz de Tena, Tramacastiella de Tena y Sandiniés y dependendo de lo texto u escribán s'escribe "Lacuna" u "Laguna".

Lo microtoponimo Lacuniacha (famoso por l'actual parque faunistico), ye una derivación de "Lacuna" con una variant de lo sufixo -iello, habría estau Lacuniella d'alcuerdo con l'actual fonetica aragonesa, u Laguniella en aragonés cheneral.

Los microtoponimos Lacunarda se troban en la Val d'Ansó (La Lacunarda, La Cunarda, Col de La La Cunarda Guarde, El Puerdo de Lacunarda), Val d'Echo y Sobremont[3]. Como toponimo documental se troba tamién en la Val de Tena.[4]

Laguna

La forma laguna ye la que se troba en los textos medievals y en la toponimia de la Depresión de l'Ebro, incluyindo lo Semontano (Lagunarrota), las Cinco Villas y Zaragoza capital (Laguna de Sant Felip). Tamién ye la forma que se troba en las traduccions medievals como lo "Libro d'el Trasoro":

Y tamién en "Secreto Secretorum":

Por fer-se servir en la scripta aragonesa, standard medieval, ye la forma que se vei en textos referents de l'Alto Aragón a on la toponimia ofreixe microtoponimos con lacuna. D'esta traza en un documento referent a la redolada de Biescas de la "Colección de documentos en Romanz de lo Monesterio de Sant Chuan de la Penya" leyemos laguna[5]:

En lo Sistema Iberico se diciban u se dicen "lagunas", no i habendo conoixencia de la forma con xorda conservada "lacuna". Destaca l'uso toponimico en la Laguna de Gallocanta, que ye d'augua salada y d'orichen tectonico. A man de la laguna de Gallocanta bi ha atras lagunas ditas laguna de Guialguerrero (a man de lo despoblato medieval de Villar Guerrero), la Laguna de la Zaida y a Lagunica. Bi habió atras zonas humidas calificadas de laguna como la Laguna de Vivallo en l'aria de Castellot. Bellas zonas humidas definitas huei como lagunas en castellán se diciban balsas u balsiellas en l'aragonés medieval local, como s'ha desveniu con la Laguna Negra u Laguna de Bezas.

Llaguna, Llauna

En aragonés benasqués se diz Llaguna[6] como cabe esperar por la palatalización de la L-, y de feito las Guías Prames dan noticia de lo microtoponimo La Llaguna amán d'Ansils. Una variant palatalizada que debió estar tipica de lo ribagorzán se troba en Campo, con lo microtoponimo La Llauna, coincidindo con lo macrotoponimo "Las Llaunas" amán de Las Paúls. En tot caso d'uso de Llaguna y Llauna en ribagorzán aragonés u catalán ye en competencia con l'uso d'"ibón", "estany(o)" u atras parolas.

Referencias

  1. (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978. p 177.
  2. Jesús Vázquez Obrador Para un corpus de toponimia tensina (I). Registros en protocolos de un notario de Sallent durante los años 1424-1428, 1431, 1443 y 1450 [1]
  3. Jesús Vázquez Obrador Toponimia de Sobremonte (Huesca). II: hidronimimia Homenaje a "Amigos de Serrablo", 1989, ISBN 84-86856-27-2 , ppp. 421-450 [2]
  4. Jesús Vázquez Obrador Para un corpus de toponimia tensina (III). Registros documentales de los años 1484-1499 [3]
  5. Ana Isabel Lapeña Paúl Documentos en romance del monasterio de San Juan de la Peña (segunda serie, 1325-1399) ISSN 0214-7602, Nº 11, 1999 , págs. 295-342 [4]
  6. Francho Nagore et al. Endize de bocables de l'aragonés. Instituto de Estudios Altoaragoneses, Uesca 1999.

Bibliografía

  • (es) La Magia de Viajar por Aragón 26, Agosto 2007. pp.18-29. Fernando Lampre Vitaller
Cuerpos d'augua continental
Corrient Río · Regallo u Rigachuelo · Galocha · Torrent (Barranco · Garona · Rambla)
Aturada Laco · Lacuna u Estanyo (albufera · ibón · salada) · Paúl · Almarchal · Basa
Campo de Daroca

O Campo de Daroca ye una comarca aragonesa situada a lo sudueste d'a provincia de Zaragoza. L'agricultura ye o prencipal recurso d'a comarca, sobretot o cautivo de cerials, ferraina, y vinya. Entre o suyo patrimonio destaca a ciudat de Daroca y a lacuna de Gallocanta an se concentran muitas aus, estando la mayor lacuna d'ambients de paramera y estepa en Espanya.

Chiprana

Chiprana ye un municipio de la provincia de Zaragoza, situato en la comarca de lo Baixo Aragón-Casp.

Chordata

Os cordatos (ditos scientificament Chordata, d'o latín chorda = cuerda, cordón) son un tipo morfolochico, considerau en zoolochía, d'animals que presentan a lo menos en beluna d'as suyas fases de desarrollo una estructura dita notocorda u cuerda dorsal.

Os cordatos, dende o punto de vista evolutivo, son un grupo d'animals muit important, porque ye o grupo que as suyas especies plegan t'a más gran diversidat de nichos ecolochicos, y son as que han amostrau una capacidat más gran d'adaptación ta ambients más diferents, sobretot, en tierra firme, anque muchas especies son tamién de tot aquaticas u amfibias. Entre os cordatos destaca a suya capacidat d'autorregulación y organización interna, y a posibilidat de puyar y mantenir a temperatura corporal en bells grupos (mamiferos y muxons prencipalment). Ixes y atros factors van fer más gran a suya complexidat y van meter, en o suyo momento, a la suya desposición una capacidat unica ta controlar as suyas reaccions metabolicas y a perfección d'un sistema niervoso más complexo.

Compleganza

Una compleganza, val u cuenca hidrografica ye o conchunto de territorios que abocan las suyas auguas superficials y os suyos aqüiferos superficials dreitament relacionatos dentro d'una mesma cuenca, alimentando d'esta forma un río principal que trescruza esta cuenca y replega a lo suyo paso as aportacions de qualsiquier afluyent que i desemboque. Una cuenca hidrografica desaugua as suyas auguas en una mar, un laco, una lacuna, y en casos en os que no bi ha salita as auguas se filtran en o subsuelo u s'evaporan. As cuencas que no desauguan en a mar se dicen cuencas endorreicas.

GR 24

O GR 24 ye un sendero de gran recorrito d'Aragón.

Entre os ecosistemas por que pasa iste sendero cal destacar a lacuna de Gallocanta, puesto important de paso d'aus migratorias y un d'os humedals más importants d'Europa. Atros ecosistemas intresants d'a zona son as Foces d'o río Piedra u a Paramera de Blancas, declarata Aria Important ta las Aus Europeas.

Se troban tamién en istas tierras chazimientos arqueolochicos celtibers como lo de Berrueco y importants fortalezas medievals como a de Daroca u o castiello de Peracens.

Pasa por as siguients localidatz:

L'Aldeyuela de Tiestos - Torralba de los Fraires (PR-Z 19 y PR-Z 21) - Las Cuerlas (PR-Z 18) - Bello (PR-Z 21) - Torralba de los Sisons (PR-TE 16 y PR-Z 18) - Blancas - Pozuel - Güellos Negros - Billar del Salz - Peracens (PR-TE 4).

Gallocanta

Gallocanta ye un municipio aragonés de la comarca de lo Campo de Daroca y partito chudicial de Daroca (Zaragoza).

La suya población ye de 158 habitants en 2008, en una superficie de 25,24 km² y con una densidat de población de 6,26 hab/km²

Lacuna Coil

Lacuna Coil ye un grupo de metal (prencipalment gotico y alternativo) formato en Milán, Italia, en l'anyada 1994. D'antis más yeran ditos Sleep of Right y Ethereal.

Lacuna de Gallocanta

A cuenca d'a Lacuna de Gallocanta u Laguna de Gallocanta ye en metat d'o Sistema Iberico. Ye amugada en o norte por as sierras de Santa Cruz y Valdellosa, y ta par d'o sud por os monts d'Odón y Torralba de los Sisons.

Ye a bells 1.000 metros d'altaria, tien 7'7 km de longaria y 2'8 km de amplaria, y cuenta con una fondaria en os puestos más fundos de 1'5 m.

A Lacuna de Gallocanta no siempre tien augua en a suya cuenca, ya que i hai periodos de plevias y de sequera.

Os lugars que fan rolde a la lacuna son: Gallocanta, Berrueco, Tornos, Bello, Las Cuerlas. Una mica más luents trobamos: Santet, Fuset, Torralba de los Sisons, Odón y Castellón de Tornos.

Lacuna de Sarinyena

La Lacuna de Sarinyena (Laguna de Sarinyena en parlas no conservaderas de la xorda intervocalica) ye una lacuna que se fació en una salada dita Chapazal por plegar-ie auguas sobrants de los reganos dende la decada de 1960, que facioron que ya nunca no se secase y que la concentración de sals se fese menor. Ye de gran intrés pa la observación d'aus aquaticas. Fue declarada Refuchio de Fauna Silvestre seguntes decreto 70/1995 de 4 d'abril, de la Diputación Cheneral de Aragón.

Llaunas

Las Llaunas (Las Llagunas en castellán) ye un lugar a mán de Las Pauls y perteneixient a iste municipio, situato en a comarca de la Ribagorza. En 1991 teneba una población de 1 habitant.

Monegros

Os Monegros ye una comarca aragonesa dividita entre as provincias de Zaragoza y Uesca. A sierra d'Alcubierre trescruza a comarca de norueste ta sudeste, adubindo a suya mayor altaria en mont Escuro a 822 metros. O clima ye semiarido con escasas plevias y alteras temperaturas en verano. Bi ha muitas lacunas salatas y basetas que forman o complexo endorreico mas important d'Europa. Destacan a lacuna de Sarinyena y a salada d'a Playa.

Muga a o norte con a Plana de Uesca, a l'este con Semontano de Balbastro, Cinca Meya y Cinca Baixa, a l'ueste con a comarca de Zaragoza y a o sud con a Ribera Baixa d'Ebro y Baixo Aragón-Casp.

Paúl

Este articlo tracta sobre paúl como zona humida. Pa atros usos de la parola vaiga a l'articlo paúl (desambigación).

Paúl u almarchal ye una zona con suelo humido y vechetación higrofila. Amanix muito en la toponimia aragonesa.

Refuchio de Fauna Silvestre d'a Lacuna de Sarinyena

O Refuchio de Fauna Silvestre d'a Lacuna de Sarinyena ye un Refuchio de Fauna Silvestre d'Aragón, tien una superficie de 604 hectarias y fue declarato o 4 d'abril de 1995. A lacuna de Sarinyena se troba en os Monegros uescanos, en o termin municipal de Sarinyena, entre as cuencas d'os ríos Alcanadre y Flumen.

A lacuna de Sarinyena ye d'orichen endorreico. As suyas auguas tienen una alta concentración de sals debito a o clima arido que fa que as precipitacions sían pocas y que bi haiga una intensa evaporación en verano.

Reserva Natural d'a Lacuna de Gallocanta

A Reserva Natural d'a Lacuna de Gallocanta ye una reserva natural d'Aragón. Se troba situata en o Campo de Bello, entre as comarcas de Campo de Daroca y Xiloca, fendo parti d'os termins municipals de Santed, Gallocanta, Berrueco, Las Cuerlas, Tornos y Bello.

A lacuna de Gallocanta ye, con una largaria maxima de 7 km y una amplaria maxima de 2 km, a mayor lacuna natural d'a Peninsula Iberica y chunto con a lacuna de Fuentedepiedra (provincia de Malaga) a mayor lacuna salada d'Europa. Tien una fondaria meyana de 70 centimetros y maxima de 2 metros y ye un buen eixemplo de cuenta endorreica de montanya, ye decir que no tien salida a la mar. As suyas auguas proceden prencipalment de torrents soterranyos, por lo que a suya salinidat ye muit alta: diez vegadas superior a la de l'augua d'a mar, lo que fa que en periodos xutos se gosen formar en as suyas plachas crostas de sal.

Reserva Natural d'as Saladas de Chiprana

A Reserva Natural d'as Saladas de Chiprana ye una reserva natural d'Aragón. Se troba situata de tot en o municipio de Chiprana, en a comarca de Baixo Aragón-Casp. Fue declarato como espacio natural protechito en l'anyo 2006 y tien una superficie de 154 ha, con una Zona Periferica de Protección de 360 ha.

Se tracta d'un complexo endorreico formato por 6 basas: a Salada Grande de Chiprana, a Salada de Roces, o Prado del Farol y atras tres mas chicorronas. A Salada Grande ye o solo eixemplo de lacuna d'istas caracteristicas y de gran fundaria en Europa, ya que l'altaria maxima d'o ran de l'augua gosa estar de dica 5,6 m en mayo. As suyas auguas son prou salinas y son transparents lo que permite, en dentrar a luz o sol a fotosintesi d'as especies vechetals que i viven.

Uruguai

A Republica Oriental de l'Uruguai ye un país d'America d'o Sud. Muga a o norte y a l'este con Brasil, a l'ueste y sudueste con Archentina (mugas: río Uruguai y río d'a Plata) y a o sudeste con l'Ocián Atlantico.

A suya población ye de 3.415.920 habitants (2005) en una superficie de 176.200 km², con una densidat de población de 19 hab/km². Ye o segundo estato mas chicot d'America d'o Sud, dezaga de Surinam.

Ye a segunda nación más chicota d'America d'o Sud y ye una d'as más estables politicament y economica. Politicament, dende a suya independencia o 25 d'agosto de 1825 (de Brasil, que heba ocupato ista antiga colonia espanyola), Uruguai ye una Republica, estando l'actual president José Mujica Cordano. A capital y prencipal ciudat d'Uruguai ye a ciudat Montevideo, a o canto de l'Ocián Atlantico.

Uruguai fa parte de quantas organizacions internacionals: ONU, OEA, Mercosur, CSN, ALADI, SELA. A suya moneda ye o peso uruguayo, y a luenga oficial d'o país ye o castellán.

O suyo clima templato y as suyas abundant plevias distribuitas mientres toda l'anyada favoreixen que un 75% d'o territorio uruguayo siga formato por pratos y un 25% por selvas, habendo-se desenvolicato asinas l'agricultura y as pasturas t'a ganadería, que son as prencipals actividatz economica d'o país, que tien poquetz recursos enercheticos y meneros. Tien tamién poqueta industria, mas que mas industria papelera, de fabricación de cemento y tamién industria petroquimica.

Estió un territorio a on os colonizadors espanyols no plegoron dica o sieglo XVIII, encara que se troba a o canto de l'Ocián Atlantico, y ixo mas que mas ta evitar a expansión portuguesa dende a suya colonia de Brasil. A tamas d'ixo, Montevideo esdevenió un activo competidor de Buenos Aires en zaguerías d'o rechimen colonial. Mientres as Guerras napolionicas se i producioron invasions de tropas d'o Exercito britanico, y o territorio continó con a suya fidelitat a la potencia colonial quan en 1810 os archentins proclamoron a suya independencia, estando invadito o país en 1816 por os portugueses y quedando adhibito dimpués a o Imperio de Brasil dica a independencia uruguaya con aduya d'o Reino Unito en 1830.

En atras luengas

This page is based on a Wikipedia article written by authors (here).
Text is available under the CC BY-SA 3.0 license; additional terms may apply.
Images, videos and audio are available under their respective licenses.